Jesusan Unicaman Ñu ꞌA 7
7
Bicëxuan Estebanën racuë́quinma unicama ca
1Amia manáncania cuaxun ca sacerdotenën cushicaman ꞌapun Esteban ñucácëxa:
—¿A unicaman mi ñuicë bana ax cara asérabi ꞌic?
2Cacëxun ca Estebanën cacëxa:
—ꞌËn aintsicama ꞌimainun caniacëcë unicama nun cushibu, ꞌën mitsu camainun ca cuat. Nucën rara Abrahamnëx ca Harán cacë menu ꞌiisama pain ꞌaish Mesopotamia menu ꞌiacëxa. Anua ꞌicë ca ax upíira ꞌixun nucën rara Abraham Nucën Papa Diosan cacëxa: 3“Min mecëñunbi camabi min aintsi ëbiani camina me itsinu ꞌën mi ismimainun cuanti ꞌain”. 4Cacëx ca Caldea menuax cuanx Harán menu bëbax anu tsoócëxa. Anuaxa aín papa bamacëbë ca Nucën Papa Diosan ismiasabi oi, anumi bërí nëtë́nbi bucucë, ënë menu uacëxa. 5Usaía ucëbi ca ainanbia ꞌinun me Nucën Papa Diosan ꞌinánma ꞌicën, anua aín taën amátiratsubi. ꞌInánquinmabi ca sinanatëcënuxunma ësaquin Abraham cacëxa: “Ënë mecama cana mi ꞌimainun min rëbúnquicamaribi ꞌinánti ꞌain”. Bëchicëñuma pain ꞌicë ca Nucën Papa Diosan usaquin Abraham cacëxa. 6Catancëxun ca ësaquinribi cacëxa: “Min rëbúnquicamax ca aín menuma, bëtsi unin menu tsónuxun ꞌaia. Anua tsócëbi ca anu ꞌicë unin cuatrocientos baritian min rëbúnquicama bëtsi bëtsi oquin ñu mëëminuxun ꞌaia”. 7Ësaquinribi ca Nucën Papa Diosan Abraham cacëxa: “Cuatrocientos baritia ꞌicëbëtan cana an min rëbúnquicama bëtsi bëtsi oquin ñu mëëmicë cupí, anu ꞌicë unicama tëmëraminuxun ꞌain. Usocëxun ca a menuax cuanun min rëbúnqui xuti ꞌicën. Xucëx ënë menu uxun ca ꞌë rabiti ꞌicën”. 8Usaquin caxun ca Nucën Papa Diosan Abraham ësaquinribi cacëxa: “Mi ꞌimainun min rëbúnquicamaribi ꞌënan ꞌicë ꞌunánti oquin camina min bëbu tuácama aín inshú maxacara tëati ꞌain”. Usa ꞌain ca Nucën Papa Diosan cacësabi oquin Abrahamnën Isaac bëchitancëxun achúshi semana aín bacë́ncë nëtë ꞌicëbëtan ꞌunántiocëxa. Usaribi oquin ca Isaacnënribishi Jacob bëchitancëxun ꞌunántiocëxa. Usa ꞌixun ca Jacobnënribi mëcën rabë́ ꞌimainun rabë́ oquin bëchitancëxun a camabi ꞌunántiocëxa. Jacobnën bëchicë mëcën rabë́ ꞌimainun rabë́ acamax ca nucën raracama ꞌiacëxa.
9Jacobnën bëchicë achúshi ca José cacë ꞌiacëxa. ꞌIcëbi ca ami nutsi nishquin aín xucë́antun Egipto menu buántanun uni maruacëxa. 10Marucëxuan unin buáncëxa Egiptonu ꞌiabi ca Nucën Papa Diosan abë ꞌixun ꞌaquinquin bërúancëxa. Usoquian ꞌacë́xa upí sinánñu ꞌixun upí oquin bana cuacë ꞌicë nuibaquin ca Egiptonu ꞌicë ꞌapu Faraón, an anu ꞌicë unicaman cushi ꞌimianan an aín xubunu ꞌicë ñucama bërúantiribi ꞌimiacëxa.
11Faraónën cacësabi oquian Josénën ꞌamainun ca Egipto mecamanu ꞌimainun Canaán mecamanuribi trigo ꞌaíma ꞌiacëxa. Usa ꞌain ca anu ꞌicë unicama ꞌacëñuma ꞌaish nuibacacëxa. Nuibacácëbë ca nucën raracamaribi pitiñuma ꞌiacëxa. 12Piti ꞌaíma ꞌain ca Jacobnën, Egiptonu ca trigo ꞌitsa ꞌicë quixuan ñuicania cuaxun aín bëchicë, nucën raracama, anua trigo bitánun quixun xuacëxa. 13Xucëxun bitsínquin bëxun trigo ancëax ca amiribishi bitëcëni Egiptonu cuantëcëancëxa. Cuanx bëbaia ca Josénën aín xucë́antu isquin, ꞌëx cana mitsun xucë́n ꞌai quixun cacëxa. Usa ꞌain ca acama isquin Egiptonu ꞌicë ꞌapu, Faraónën, Josénën aintsicama ënëx ca judíos uni ꞌicë quixun ꞌunáncëxa. 14Atubë banaquin ca Josénën aín xucë́antu cacëxa, aín aintsi ꞌibucamacëñuan aín papa Egiptonu bënun quixun. Aín aintsi ꞌibucamax ca setenta y cinco ꞌiacëxa. 15Usaquian Josénën cacësabi oi ca Jacob aín aintsi ꞌibucamabë Egiptonu ꞌi cuancëxa. Cuanx anu tsotaxbia Jacobnëx pain ꞌiá ꞌain ca aín bëchicë nucën raracamaxribi bamacëxa. 16Jacob bamacë ca aín me, Canaán, anu ꞌicë ëma Siquem cacë, anu buántancëxun anuxunbi aín bëchicënën maíancëxa. A mex ca Abrahamnëan Hamor cacë unin bëchicëcama curíqui ꞌinánquin marua ꞌiacëxa.
17Usaquin catancëxun ca ësaquinribi Estebanën cacëxa:
—Jacob, aín anë itsi Israel, a ꞌimainun aín bëchicëcama Egiptonuax cëñúa ꞌaínbi ca aín rëbúnquicama anubi bucüacëxa. A nëtën Egiptonuax cuanti Nucën Papa Diosan Abraham ñuixuan, a nëtë ꞌurama ꞌain ca Jacobnën bëchicënën rëbúnquicama nucën rara ꞌiá, atux ꞌaisamaira ꞌinun uati bucüacëxa. 18Uati Egiptonu bucumainun ca bëtsi uni an José isáma, ax ꞌapu ꞌiacëxa. 19Usa ꞌixun ca a ꞌapux uni paránti ꞌunáncë ꞌianan upíma ꞌixun, bëbuaquin bëchicë tuácama bamatanuan ꞌura racánun quixun nucën raracama cacëxa. 20Usomainun ca aín titan Moisés bacë́ancëxa. Usa ꞌaish ca Nucën Papa Diosan iscëx upíira upí ꞌiacëxa. Bacë́ntancëxun ca aín titan aín papabëtan, rabë́ ꞌimainun achúshi ꞌuxën, ꞌura racánquinma aín xubunuxunbi unëxun ꞌunónmiacëxa. 21Rabë́ ꞌimainun achúshi ꞌuxë ꞌicëbëtan, ꞌura ëncë mëraxun bixun ca Faraónën bëchicë xuntacunën aín tuása ꞌicë caniocëxa. 22Cania ca Egiptonu ꞌicë unicaman atun ꞌunáncë ñucamaribi ꞌunánmiacëxa. Usa ꞌaish sinánñuira ꞌaish ca ax aín bana ꞌimainun aín ñu ꞌacëribi upí ꞌiacëxa.
23Cuarenta baritiañu ꞌaish ca aín aintsi Israel unicama isti sinánbiani cuancëxa. 24Cuanquin ca Egiptonu ꞌicë unin Israel uni achúshi ami mëparamëquin mëëquin ꞌatimoia mëraxun, anun rabanan nëëquin, Egiptonu ꞌicë uni ꞌacëxa. 25Usotancëxun ca aín aintsi ꞌaquinsa tanquin Moisésnën sináncëxa, ꞌën aintsin ca ꞌunania, Nucën Papa Diosan ꞌamicëxun cana atu tëmëraiabi ië́miti ꞌai quixun. Usaquian Moisésnën sinaniabi ca aín aintsicaman ꞌunánma ꞌicën. 26Usoquin ꞌonx isi cuantëcënquinbi ca aín aintsi rabë́ mëëanania mëracëxa. Mëraquin ca ënananmicasquin cacëxa: ¿Uisacatsi caramina nuibananshitima min aintsibë mëëananin? 27Cacëxun ca an bëtsi paëoquin mëëcë an Moisés cushin titicaquin cacëxa: ¿Uin cara nun ꞌapu ꞌixunmi nun ꞌacë ñucama mëníonuxun isnun mi cax? 28¿Min caramina Egiptonu ꞌicë unimi ꞌoncësaribi oquin ꞌë rëisa tanin? quixun cacëxa. 29Usaquian cacëx ratúquiani abax ca Moisés ꞌura ꞌicë me, Madián, anu cuancëxa. Cuanx bëbaxun ca aín nëtë ꞌaímabi anu tsóquin xanu bitancëxun bëbu rabë́ oquin bëchiacëxa.
30Usaquin catancëxun ca ësaquinribi Estebanën ꞌapucama cacëxa:
—Cuarenta baritia Madián menu ꞌitancëx ca Sinaí cacë aín bashi ꞌurama, anu uni ꞌicëma me, anu Moisés ꞌiacëxa. Anu ꞌixun ca imaxu anuax tsi rëquirucë mëúcüa ángel achúshi isacëxa. 31Usai ꞌia isi ratutia —uisa cara —quixun ñachaquin isnux a ꞌurama cuaniabi ca Nucën ꞌIbu Diosan ësaquin Moisés cacëxa: 32“ꞌËx cana min raracama aín Dios ꞌain. Abraham, Isaac, Jacob acaman Dios cana ꞌëx ꞌain”. Ësai quia cuati racuëti bërëruquin ca Moisésnën istisama tancëxa. 33Usaía ꞌia ca Nucën ꞌIbu Diosan Moisés cacëxa: “ꞌËx ënu ꞌain ca anumi nicë me ënëx upíira upí ꞌicën. Usa ꞌain ca min taxaca ëchit. 34Egipto menuaxa ꞌën unicama tëmëraia isanan cana atúxa unin bëtsi bëtsi ocëx nuibacati banaiaribi cuan. Cuaxun acama tëmëraiabi ië́mi cana uan. Ië́minuxun cana mi pain Egiptonu xutin”.
35A aín aintsin titicaquin —¿uin cara nun ꞌapu ꞌixunmi nun ꞌacë ñucama mëníonuxun isnun mi cax? —quixun cacë, a Moisésbi ca Nucën Papa Diosan atun cushi ꞌixuan aín aintsicama tëmëraiabi ië́minun xuacëxa. Usoquin ca imaxunuax abë banaquian Moisés canun aín ángel camiacëxa. 36Xucëxun ca Egiptonu cuanxun Moisésnën Israel unicama anua buáncëxa. Buánquin ca Egiptonuxun ꞌanan, parúnpapa Xonsa anuxun ꞌanun, cuarenta baritian anu uni ꞌicëma menuxunribi Nucën Papa Diosan ꞌamicëxun uni itsin ꞌacëma ñu ꞌacëxa.
37Usaquin caxun ca ësaquinribi Estebanën catëcëancëxa:
—Moisés ax ca an Israel unicama ësaquin cá a ꞌicën: “An ꞌë ꞌimicësaribi oquin ca mitsun rëbúnqui achúshi, an ax quicë bana unicama ñuixunti uni Nucën Papa Diosan ꞌimiti ꞌicën. ꞌImicëxuan an atu cacësabi oi ca ꞌicanti ꞌicën”. 38Moisés ax ca axa anu uni ꞌicëma menuax Israel unicama nëbë́tsi ꞌianan, aín bashi Sinaí cacë a tanáinuax abë banacë ángelbë ꞌianan nucën raracamabëribi ꞌiá ꞌiacëxa. ꞌIanan ca a aín unicamax usai ꞌiti bana Nucën Papa Diosan ꞌináncë, a ꞌiacëxa. A bana, Israel unicama nun ꞌunánuan cuënëonun ca Nucën Papa Diosan Moisés usaquin cacëxa.
39Usa ꞌaínbi ca Moisés quicësabi oquin ꞌaisama tanquin nucën raracaman Egiptonu cuantëcënti sináncëxa. 40Sinánquin ca Moisésnën xucën, Aarón, a cacancëxa: “An nu Egipto menua bëcë Moisés cara uisaxa cananuna ꞌunaniman. Usa ꞌain camina dios raíri min nu unioxunti ꞌain, an nu rëcuë́nxunbianun”. 41Usaquin caxun ca vaca tuá tanquin ñu uniocancëxa. Usotancëxun ñuina caniocë rëax ca atun mëcënanbi uniocë ñu a rabi cuëëncancëxa. 42Usoia ca Nucën Papa Diosan atúnbia naínu ꞌicë ñu, ꞌispa, ꞌuxë, bari acama rabinun quixun ëancëxa, an Nucën Papa Dios quicë bana uni ñuixuncë unicaman ësaquin cuënëosabi oquian ꞌanun:
Israel unicama, anu uni ꞌicëma me anu cuarenta baritia ꞌiquin ꞌaracacë ñuina ꞌaquinbi camina ꞌë rabicanma ꞌain. 43Usai ꞌiquin camina anuxun Moloc cacë dios rabiti xuburatsu niquianan mitsúnbi uniocë ꞌispa tanquin uniocë ñu ax isa Renfán cacë dios ainan ꞌicë quixun rabinuxun buáncën. Usa ꞌain cana mitsu ꞌë rabiquinmami usa ñuishi rabicë cupí mitsun nëtënua, Babilonia cacë ëma ꞌucë, anumi tsónun xuti ꞌain.
Usaquian cuënëosabi oi ca ꞌiacëxa.
44Usaquin catancëxun ca ësaquinribi Estebanën cacëxa:
—Nucën Papa Diosan ca abë banaquin Moisés anu uni ꞌicëma menuxun cacëxa: Anuxun ꞌë rabiti xubu ꞌaquin camina cëxtú chupa ꞌën mi ismicëxunmi iscë usabi oquin ꞌati ꞌain. Usoquian cacësabi oquin ꞌatancëxun ca Nucën Papa Diosan aín bana anu cuënëo maxax pará, a anu nanxun nucën raracaman bërúancëxa. 45A xubu ca nucën raracaman anu uni ꞌicëma menuax cuanquin capúnquin mëníoquin bibianquin, anu atux tsóti menu cuanquin abi buáncëxa. Nucën Papa Diosan ꞌamicëxun ca a menu bucucë unicama nucën raracaman Josuébëtan abámiacëxa. Abámitancëxëxa: Anuxun ꞌë rabiti xubu ꞌaquin camina cëxtú chupa ꞌën mi ismicëxunmi iscë usabi oquin ꞌati ꞌain. Usoquian cacësabi a aín menu tsómainun ca a chupa xuburibi anu ꞌiacëxa. ꞌAin ca a xubunuxun bari itsi bari itsi buínquin nucën raracaman Nucën Papa Dios rabiacëxa, David axa ꞌapu ꞌitámainun. 46David an ca nucën rara Jacobnëan aín rëbúnquicamabëtan rabia Nucën Papa Dios, ami sinánquin ax anu ꞌinun xubu chaira upí oquin ꞌaxunti sináncëxa. 47Usoquin sinánxunbia ꞌama ꞌain ca aín bëchicë Salomón an cuni a xubu ꞌacëxa. 48ꞌAxuan ꞌaínbi ca Nucën Papa Dios, ax ꞌApuira ꞌaish, unin ꞌacë xubunu tsotima. Ësai ca an Nucën Papa Dios quicë bana unicama ñuixuncë unían cuënëo bana quia:
49Ësai ca Nucën ꞌIbu Dios quia: ꞌËx naínu ꞌicë ꞌApuira ꞌaish cushiira ꞌain ca menu ꞌicë ñucamaribi ꞌënan ꞌicën. ¿Usa ꞌëx ꞌain caramina ꞌëx anu tsónun uisa xubu ꞌë ꞌaxúnti ꞌain? ¿ꞌËx anu tantiti cara uinuira ꞌic? 50¿ꞌËn cushínbi carana ënë ñucama ꞌama ꞌain?
51Usaquin caxun ca ësaquinribishi Estebanën cacëxa:
—Mitsux camina bana sinanima, nuituñuma ꞌaish pabíñumasa ꞌiá ꞌaish usabi ꞌain, Nucën Papa Dios ꞌunáncëma unisaribi ꞌaish. Camabi nëtë́an Nucën Papa Diosan Bëru Ñumshin Upitan mitsu sinánmicë ꞌitsíanxbi camina an sinánmicë ꞌiisama tanin. Mitsun rara ꞌiásaribiti camina mitsux ꞌin. 52An Nucën Papa Dios quicë bana uni ñuixuncë unicama ca mitsun raracaman bëtsi bëtsi ocëxa. Bëtsi bëtsi onan ca axa, Nucën Papa Diosan Bëchicë Upíira ca uti ꞌicë quicë unicama aribi ꞌacëxa. A unicama quiásabi oía uá ꞌicëbi camina mitsun a bamamicasquin unían i curúsocënu matásnun ꞌinan. 53Mitsux camina nun cuati bana ángelnëan Moisés cá, a ꞌunanibi a bana quicësabi oi ꞌicëma ꞌain.
Esteban bama
54Usaquían cacëxun cuati ca ꞌapucama xuamati Estebanmi nishacëxa. 55Nishmainun ca naíu bësuquin aín Bëru Ñumshin Upitan cushiocë ꞌixun Estebanën Nucën Papa Diosan cushi isanan asaribi ꞌaísha Jesús aín Papa mëqueu nicë isacëxa. 56Isquin ca cacëxa:
—Ca is. Naí panárabëcëbëtan cana axa uni ꞌinux anuax uá Jesús, a Nucën Papa Dios mëquea nicë isin.
57Ësai quiabi cuaisama tani pamumëti, munuma cuëncëni, ami qui abáquianxun ca bicancëxa. 58Bibianquin ca Jerusalénua buánxun maxaxan ꞌacëxa. Aín cutun pain pëxun bëná uni, Saulo cacë, an bërúanun quixun nantancëxun ca Esteban maxaxan ꞌacëxa. 59Maxaxan ꞌacëxun ca Estebanën Nucën ꞌIbu Jesús cacëxa:
—ꞌËn ꞌIbu Jesús, mibë ꞌinun ca ꞌë bit.
60Catancëx rantin purúnxun ca munuma banaquin Nucën ꞌIbu Jesús catëcëancëxa:
—Atúxa ësari ꞌuchaiabi camina ꞌënun rabanan uisabi otima ꞌain.
Ësai quíshi ca bamacëxa.
Currently Selected:
Jesusan Unicaman Ñu ꞌA 7: cbrPB
Highlight
Share
Copy
Want to have your highlights saved across all your devices? Sign up or sign in
© 1978, 1995, 2008, 2022 Wycliffe Bible Translators, Inc. All rights reserved.
