Yʉanɨ 6
6
Yeso ʉ꞉dyakakiso ɓombi ɛlɛfʉ ɓɔkɔ
(Mat 14:13-21; Mak 6:30-44; Luk 9:10-17)
1Mbise ngiinanɨ, Yeso ambʉtapʉa amondu ʉ yapuu yɛɛ ɨja ngia yɨ Galilaya iya ɓaaisoko kʉ ɓɔ Tibelia. 2Ungbutu wʉ ɓombi wɔɔ ʉja wi꞉nye nayɔ kʉkpata ɓʉ ngboo, jʉ ɓombi ngiɓʉnanɨ ɓa꞉na moni kɔɔ mʉmbangɛ maja ngika Yeso i꞉nye kʉkyɨa engo kuhiiso ɓombi ɓʉ ɓakwisikiso. 3Ɔɔ Yeso ɓambuɗito ekoo ʉ ɨkpangba ɨzɔ nʉ ɓakpataka ngiɓangɔ ɓambuwuloko nanɨ. 4Ʉna tɔ, ʉmbɔ wʉ Pasɨka, mʉngana wʉ mʉmbɔ ngika kʉ Ɓayuda, wi꞉nye tiga kʉ tinene.
5Iya Yeso a꞉zono nayɔ waja, ambʉna ungbutu wʉ ɓombi wɔɔ ʉja kʉka apɛɛ angɔ ɓʉ hɨtɔɔ. Kija a꞉ɓukuo Filipo aka ɓɔ: « Ka꞊kʉa idyo gbanɨ kʉdyakakiso ɓombi ngiɓaɓɛ? » 6A꞉ɓukuo ɓwanɨ tʉkʉ aka ekoo kanyo Filipo, jʉ ɛyɔ makʉɔngɔ i꞉nye kʉmbɨa moni ngika i꞉nye kʉsa kʉkyɨa engo kʉtaa. 7Filipo ambumutisio ɓɔ: « Abana kʉkʉeni mikati yɨ falanga mɨa ɓepini, yambʉkʉnyɨa gʉ‑zʉ kʉndʉ ɨkyɛmɛ, abana ɓunzeni mombi kʉ nangana nangana mwana igbiti yɛngɔ. » 8'Ʉkpataka wangɔ wɔmɔ ino ɓɔ Andelea, iya i꞉nye manye ʉ Simoni Pɛtɛlɔ, ambʉmʉɓɨa ɓɔ: 9Mwana ɔɔ gue mʉngana a aka, anʉ mikati ɓɔkɔ, nʉ sipe ɓepini. Ɨkyɛmɨngana, ya ɗɛkɛkɛ, yambʉkʉndana ɓombi ɓɔɔ ɓaja ngiɓaɓɛ.
10Yeso ambuɓusigio ɓɔ: « Sigieni ɓombi ɓɔ ɓuwuloko akɛsɨ. » (Akʉ mʉa nguʉnanɨ, lanza li꞉nye lɨja.) Kija ɓa꞉wuloko akɛsɨ. Ati ʉ ɓombi ngiɓʉnanɨ mboi yɨ ɓugue yi꞉nye tine tine ndʉ ɛlɛfʉ ɓɔkɔ. 11Yeso ambʉchɨka mikati ngiinanɨ, ambutuisio Asʉɓɨɨ ɨbɨba, ambʉɨpakɨa ɓombi ngiɓa ɓi꞉nye ɓuwuloke ananɨ. Ambuɓunzo sipe kʉ nzoni tʉkʉ ndʉ akʉ ɓi꞉nye‑ɔɔ kʉkʉnda. 12Iya ɓa꞉mʉta nayɔ ɓʉ kpindindi, Yeso ambʉɓɨa ɓakpataka ngiɓangɔ ɓɔ: « Mʉmakeni ɓadudu ɓʉ idyo ngiɓa ɓutukuo ambʉ yeeɓio nʉ iya a꞊tambɨa gʉkʉ mʉngana. » 13Kʉ ɓwanɨ, ɓambʉmʉmaka ɓadudu ɓʉ mikati ɓɔkɔ ngia ɓombi ɓa꞉dya kʉ ɓubomu, ɓambubuhuikiso amati ʉ ɓajaɨ kumi nʉ ɓapɨnɨ.
14Iya ɓombi ɓa꞉na nayɔ moni kɔɔ mʉmbangɛ ngikʉnanɨ Yeso a꞉kyɨa, ɓambusigo ɓɔ: « Mombi ngiakɛ a kingono tʉkʉ ɨgbɛ ngia ya꞉kwanana jɛnɛ kʉka akʉ ɨtaka! » 15Iya Yeso ambɨa kusigo ɓɔ ɓakʉhata nayɔ kʉkpata ɓɔ ɓʉmʉnapɨa kuɓio ngama akʉ angu, kija a꞉ʉngwa, ambʉtʉa ɓata kʉ mbise ɛyɔ kʉ nangana ekoo ɨkpangba.
Yeso ʉkɨndaka ekoo ʉ mepo
(Mat 14:22-33; Mak 6:45-52)
16Tiga nɨpasɨ, ɓakpataka ngiɓangɔ ɓambijo nʉ ʉndʉʉ akʉ ɨtɛtɛtɛ yɨ yapuu yɛɛ ɨja. 17Ɓambuɗito akʉ ɨngbɔɔ kʉtapʉa anʉ Kapelenaumu anʉ wagba ʉ mondu wʉ yapuu yɛɛ ɨja ngiinanɨ. Ɓisi ɓi꞉nye tiga ɓuweni woni, ɨkyɛmɨngana Yeso i꞉nye ambʉtʉenikɔmʉ naɓɔ kʉgbʉka. 18Amati ʉ yapuu ngiinanɨ, mepo kambufaniso tʉkanɨa ɓʉ kpo kpo kpo, jʉ mahuo wi꞉nye kʉpɨka ɓʉmʉ. 19Iya ɓa꞉ɓʉya nayɔ akʉ kilɔmɛtɛlɛ ndʉ ɓɔkɔ yɛmɔ ndʉ ʉmalɨa, ɓambʉna tiga Yeso kʉkɨndaka ekoo ʉ mepo ɓʉ paa paa kʉka tinene nʉ ɨngbɔɔ, kija ya꞉ɓukiso kʉ ʉɓa. 20Ɨkyɛmɨngana, Yeso ambuɓusigio ɓɔ: « Nɔɔkumokɔmʉ. Tʉkʉ ɛmɛ iinanɨ! » 21Ɓi꞉nye kʉkʉnda ɓɔ ɓumuɗitiso ekoo ʉ ɨngbɔɔ, ɨkyɛmɨngana kʉ nɨma ngiinanɨ, ɨngbɔɔ yambʉɓʉya anambamba akʉ ɨtaka mesu akʉ ɓi꞉nye‑ɛɛ kʉsa.
'Ungbutu wʉ ɓombi wakʉhata Yeso
22Kʉɓa ɔngɔ, ungbutu wʉ ɓombi ngua wi꞉nye wutukueni amondu ʉ yapuu yɛɛ ɨja ngiinanɨ wambʉna ɓɔ ɨngbɔɔ yi꞉tukuo tii tʉkʉ mɨngana. Ʉna tɔ, ɓa꞉mbɨa mbɨanɨ ɓɔ Yeso a꞉ɗitokɔmʉ ɨngbɔɔ ɨzɔ nʉ ɓakpataka ngiɓangɔ. Ɓakpataka ɓa꞉sa kʉ ɛɓɔ. 23Ɨkyɛmɨngana, lɨngbɔɔ nga lɔmɔ lɨja la꞉ʉngwa mesu akʉ gʉlʉ ʉ Tibelia, lambʉka kʉfʉma tinene nʉ mʉa ngua Makʉʉɓɨɨ a꞉tuisio‑ɔɔ Asʉɓɨɨ ɨbɨba nʉ aka a꞉dyakakiso‑ɔɔ ɓombi. 24Iya ɓa꞉na ɓɔ Yeso ambʉkɔmʉ tii, abana kʉndʉ ɓakpataka ngiɓangɔ, ɓambuɗito lɨngbɔɔ kʉsa nayɔ kʉhata anʉ Kapelenaumu.
Yeso a mukati ngua waanzo ʉɓɨɨ
25Ɓombi ngiɓʉnanɨ ɓambʉgbʉka Yeso amondu ʉ yapuu, ɓambumuɓukuo ɓɔ: « Mʉpananakɨa, wʉ꞉ka yeni ati tɨmanɨ? »
26Yeso ambuɓutisio ɓɔ: « Tʉkʉ kingono maninu kusigio ɓɔ, nambʉkɔmʉ nɛmɛ kʉhata jʉ na꞉na pongo moni kɔɔ mʉmbangɛ ngika ma꞉kyɨa, ɨkyɛmɨngana tʉkʉ jʉ na꞉dya pongo mikati nambumotoko. 27Nɔɔkyɨakɔmʉ kuu aka ekoo ʉ idyo ngia yaakpaga kpaganɨ, ɨkyɛmɨngana kyɨeni kuu aka ekoo ʉ idyo ngia yaagbalɨa akʉ ʉɓɨɨ ngua wʉ mɨtʉ yɨ ɨpá nʉ mɨtʉ yɨ ɨpá, iya Mwana ngia ʉ Mombi a꞊kwanana ninu kunzo ɛyɔ, jʉ Asʉɓɨɨ Tidoo kʉ a꞉pananiso kingono ɓɔ a꞉mʉbaya bayaa nʉ nayɔ kunzo ɨbɨba. »
28Kija ɓa꞉muɓukuo ɓɔ: « Kʉkwanana kʉkyɨa tanɨ aka ekoo ʉ kyananakɨa kuu yɨ Asʉɓɨɨ? »
29Yeso ambuɓutisio ɓɔ: « Kuu ngia Asʉɓɨɨ akʉkʉnda ɓɔ kyɨeni ya ɓɔ: bayeni mombi ngia ɛyɔ a꞉mʉtʉma. »
30Ɓambumuɓukuo ɓɔ: « Kɔkɔ ɔɔ mbangɛ tɨmanɨ iya wakyɨa aka ekoo ngia ɓɔ kʉ'ʉna kija kanabaya? Moni tɨmanɨ ika wʉkwanana kʉkyɨa engo? 31Ɓakuku ngiɓʉndɛsʉ ɓa꞉dya jɛnɛ mana ati ngia ɓi꞉nye‑ɔɔ akʉ 'ukengu kʉkpatanakɨa nʉ Mubio ngika ɓa꞉tɨndakɨa jɛnɛ ɓɔ: ‹ A꞉ɓunzo mikati ngia ya꞉ʉngwa ekoo ʉ ɓisi ɓɔ ɓʉɨdya. › »
32Yeso ambuɓutisio ɓɔ: « Tʉkʉ kingono maninu kusigio ɓɔ chʉkɔmʉ Mʉsa a꞉ninzo jɛnɛ mukati kʉʉngwa ekoo ʉ ɓisi, ɨkyɛmɨngana Tidoo ngiasɛmɛ kʉ aninu kunzo mukati wʉ ingono uwa wakʉʉngwa ekoo ɓisi. 33Jʉ mukati ngua Asʉɓɨɨ aninu kunzo engo wa uwa wakʉʉngwa ekoo ɓisi nʉ waanzo ɓombi ʉɓɨɨ. »
34Kija ungbutu wʉ ɓombi wa꞉musigio ɓɔ: « Makʉʉɓɨɨ, ɓio nisu kunzo mukati nguunanɨ tii tʉkʉ makwaa kʉ muɓomu. »
35Yeso ambʉɓʉɓɨa ɓɔ: « Ɛmɛ ma mukati ngua wʉ ʉɓɨɨ. Mombi ngia a꞊ka ya andɛmɛ, ambʉkʉkɔnɔ sina taa gʉkʉ ɗɛkɛkɛ, nʉ mombi ngia a꞊nabaya ɛmɛ ambʉkʉkɔnɔ sina taa yɨ mepo gʉkʉ ɗɛkɛkɛ. 36Kʉ ɓwanɨ, kʉndʉ ma꞉nɨɓɨa pɛɛ ɓɔ abana ndʉ na꞉nana ɛmɛ kititi, na꞉nabayakɔmʉ gʉkʉ ɗɛkɛkɛ. 37Ɓombi kʉ ɓuɓomu ngiɓa Tidoo anɛmɛ kunzo ɓa꞊ka ya andɛmɛ, nʉ ɛmɛ mambʉkʉyaa mombi ngia aaka ya andɛmɛ gʉkʉ ɗɛkɛkɛ. 38Jʉ ɛmɛ ma꞉ʉngwa ekoo ʉ ɓisi chʉkɔmʉ kʉkyɨa ɓʉkʉnda ngiɓʉsɛmɛ, ɨkyɛmɨngana ma꞉ka kʉkyɨa ɓʉkʉnda ɓʉ Mombi ngia a꞉natʉma. 39Nʉ ɓʉkʉnda ɓʉ mombi ngia a꞉natʉma, ɓa kusigo ɓɔ mombi gʉkʉ mʉngana ati ʉ ɓombi ngiɓa a꞉nanzo, ɔɔyangaakɔmʉ akʉ lɨkɔndɔ lʉsɛmɛ, ɨkyɛmɨngana yɨkwanana ɓɔ mʉmʉjʉkaniso akʉ ingyo akʉ ɓisi ɓʉ 'upipio. 40Kingono, moni ngika Tidoo ngiasɛmɛ aakʉnda ka ɓɔ, mombi kʉ nangana nangana ngia a꞊na Mwana, ambʉmʉbaya, nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá, kija ɛmɛ ma꞊mʉjʉkaniso sina akʉ ɓisi ɓʉ 'upipio. »
41Kija Ɓayuda ɓa꞉faniso ndʉndanakɨa Yeso jʉ a꞉sigo ɓɔ: « Ma mukati ngua wa꞉ʉngwa ekoo ʉ ɓisi. » 42Ɓambusigo ɓɔ: « Chʉkɔmʉ‑zʉ Yeso iyakɛ, iya a mwana ʉ Yɨjɛfʉ? Kaambɨa ɨsɛ nʉ inye kʉtaa. Ɨkyɨkyɨɓʉmʉ tanɨ iya atisigio‑ɔɔ ɓɔ a a꞉ʉngwa ekoo ʉ ɓisi? »
43Yeso ambuɓutisio ɓɔ: « Nɔɔɓiokɔmʉ kʉndʉndanakɨana ati ʉndɛnʉ. 44Mombi ambʉkʉkwanana kʉka ya andɛmɛ, Tidoo ngia a꞉natʉma ʉmʉkɨndakisenikɔmʉ, kʉ ɓwanɨ ɛmɛ ma꞊mʉjʉkaniso akʉ ingyo akʉ ɓisi ɓʉ 'upipio. 45Ɓa꞉tɨndakɨa amati ʉ Mubio kʉ lɨgbɛ ɓɔ: ‹ Asʉɓɨɨ a꞊panɨa ɓombi kʉ ɓuɓomu panɨaa. › Mombi kʉ uɓomu ngia a꞊kɔ Ɨsaʉ ngia yɨ Tidoo nʉ kuɓoto mapanʉ ngikangɔ, akʉka andɛmɛ. 46Mombi gʉkʉ mʉngana ambʉnakɔmʉ sina Tidoo. Mombi ngia ʉpaana Tidoo ɓʉ kpe tʉkʉ gwa ngia a꞉ʉngwa ɔɔ Asʉɓɨɨ. 47Tʉkʉ kingono maninu kusigio ɓɔ mombi ngia akʉbaya, anʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. 48Ɛmɛ ma mukati ngua waanzo ʉɓɨɨ. 49Ɓatʉngwanɨ ɓʉndɛnʉ ɓa꞉dya jɛnɛ mana akʉ 'ukengu, ɨkyɛmɨngana ɓa꞉dʉka jɛnɛ tiga kʉ dʉkanɨ. 50Ɨkyɛmɨngana, mukati nguakɛ wa uwa wa꞉ʉngwa ekoo ʉ ɓisi, ndʉ mombi aʉdya ambukuwo sina. 51Ɛmɛ ma mukati ngua waanzo ʉɓɨɨ, ʉwa wa꞉ʉngwa ekoo ʉ ɓisi. Ndʉ mombi aʉdya a꞊nyɨa nʉ ʉɓɨɨ wʉ mɨtʉ ɨpá nʉ mɨtʉ yɨ ɨpá. Jʉ mukati ngua ɛmɛ ma꞊nzo ɓombi wa ndʉtʉ ngiisɛmɛ, iya ma꞊inzo aka ekoo ngia ɓɔ ɓombi ɓʉnyɨa nʉ ʉɓɨɨ. » 52Iya Ɓayuda ɓa꞉kɔ nayɔ moni ngikʉnanɨ, ɓambufaniso wai ati ʉndaɓʉ kusigo ɓɔ: « Gue ngia akwanana nisu kunzo ndʉtʉ ngiangɔ ɓɔ kʉɨdya ɨkyɨkyɨɓʉmʉ tanɨ? »
53Kʉ ɓwanɨ, Yeso ambuɓusigio ɓɔ: « Maninu kusigio tʉkʉ kingono ɓɔ, ndʉ nambʉkʉdya ndʉtʉ ngiisɛmɛ, ɛmɛ Mwana ngia ʉ Mombi, nʉ ndʉ nambʉkʉmwa miniki ngikʉsɛmɛ, nambʉkʉnyɨa nʉ ʉɓɨɨ amati ʉndɛnʉ gʉkʉ ɗɛkɛkɛ. 54Mombi ngia adya ndʉtʉ ngiisɛmɛ, nʉ kʉmwa miniki ngikʉsɛmɛ, anʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá, nʉ ɛmɛ ma꞊mʉjʉkaniso sina akʉ ingyo akʉ ɓisi ɓʉ 'upipio. 55Ndʉtʉ ngiisɛmɛ ya idyo kingono, nʉ miniki ngikʉsɛmɛ ka ɨkyɛmɛ yɛɛ mwɛ kingono. 56Mombi ngia adya ndʉtʉ ngiisɛmɛ, nʉ kʉmwa miniki ngikʉsɛmɛ a ujubunie nɛmɛ, nʉ ɛmɛ ma amati angɔ. 57Tidoo ngia a꞉natʉma a kʉkʉʉ, nʉ ʉɓɨɨ nguʉsɛmɛ wa amati angɔ. Kʉ ɓwanɨ, mombi ngia anadya ɛmɛ aɓio tiga nʉ ʉɓɨɨ 'upi akʉ ɛmɛ. 58Mukati nguakɛ wa uwa wa꞉ʉngwa ekoo ʉ ɓisi, wambʉkɔmʉ ngbanga nʉ mukati ngua ɓatʉngwanɨ ɓʉndɛnʉ ɓa꞉dya jɛnɛ akʉ ukengu. Jʉ mbise ɔngɔ ɓa꞉wo ɓata tʉkʉ woni. Ɨkyɛmɨngana, mombi ngia adya mukati nguakɛ, a꞊nyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. »
59Yeso a꞉nzo mapanʉ ngikʉnanɨ kʉ muɓomu amati ʉ ɨkáa yɨ nɨta ngia yɨ Ɓayuda anʉ Kapelenaumu.
Mapanʉ ngika kaanzo ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá
60Iya ɓakpataka ɓaja ɓa꞉kɔ moni ngikʉnanɨ, ɓambʉyakanaka ati ʉndaɓʉ ɓɔ: « Ʉpanʉ nguakɛ wa ɓʉmʉ. Anɨ kʉ akwanana nawɔ kʉkɔ? »
61Yeso ambʉmbɨa ɓɔ ɓakpataka ngiɓangɔ ɓi꞉nye nayɔ kʉyakanakɨa. Ambuɓuɓukuo ɓɔ: « Ajʉ moni ngika mu꞉sigoo kʉ꞉nɨjʉka jʉkanɨ ɓiɛ? 62Yaɓio sina tiga tanɨ iya na꞊na sina‑ɔɔ Mwana ngia ʉ Mombi kuɗito ekoo ʉ ɓisi akʉ mʉa ngua i꞉nye‑ɛɛ pɛɛ? 63Tʉkʉ 'Ʉtʉma waanzo ʉɓɨɨ, ndʉtʉ yambʉkɔmʉ gʉkʉ ɨkyɛmɛ. Moni ngika mʉ꞉nɨɓɨa akɛ ka 'Ʉtʉma nʉ ʉɓɨɨ. 64Ɨkyɛmɨngana, yanʉ ɓombi nga ɓɔmɔ ati ʉndɛnʉ aka iɓa ɓambʉkɔmʉ nɛmɛ kʉbaya. » Yeso a꞉yaka ɓwanɨ jʉ a꞉mbɨa kʉʉngwa tʉkʉ akʉ 'ʉkpanganɨa ɓombi ngiɓa ɓa꞊mubaya sina, nʉ mombi ngia a꞊mʉgaba sina kʉtaa. 65Yeso ambʉmatɨa ɓata kusigo ɓɔ: « Ya aka ekoo moni ngikʉnanɨ iya ma꞉nisigio‑ɔɔ ɓɔ: yambʉkɔmʉ nʉ mombi gʉkʉ mʉngana iya a꞊kwanana kʉka andɛmɛ, yambikinye tʉkʉ ɓɔ kʉ Tidoo kʉ ʉmʉsɨa ɨngbaa yɛngɔ. »
66Kʉʉngwa tʉkʉ isiinanɨ, ɓakpataka ɓaja ngiɓangɔ ɓambʉʉngwa, ɓambʉsɨa nayɔ kʉkpata. 67Kʉ ɓwanɨ, Yeso ambuɓukuo ɓakpataka kumi nʉ ɓapɨnɨ nguɓʉnanɨ ɓɔ: « Ajʉ inu na kʉ kʉkʉnda kʉsa ɓiɛ? »
68Simoni Pɛtɛlɔ ambumusigio ɓɔ: « Makʉʉɓɨɨ, isu kabi tɔ ɓata ɔɔ anɨ? Tʉkʉ ɔwɛ kʉ nangana kʉ wakwanana kunzo ɓombi mapanʉ ngika kʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. 69Isu kʉbaya bayanɨ nʉ kupimiso ɓɔ ɔwɛ wa Klisito, Mombi ɔɔ Tu ngia a꞉ʉngwa ɔɔ Asʉɓɨɨ. »
70Yeso ambuɓutisio ɓɔ: « Ajʉ chʉkɔmʉ‑zʉ ɛmɛ kʉ ma꞉nɨchwa inu ɓombi kumi nʉ ɓapɨnɨ ɓiɛ? Tɔ, mʉngana ati ʉndɛnʉ a abɨa! » 71A꞉yaka moni ngikʉnanɨ tʉkʉ aka ekoo Yuda, mwana ʉ Simoni Ɨsɨkalɨɔta, jʉ kʉ ɛyɔ i꞉nye ɓɔ a꞊mʉgaba, abana ndʉ i꞉nye mʉngana wʉ ɓakpataka kumi nʉ ɓapɨnɨ kititi.
Currently Selected:
Yʉanɨ 6: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
