मरकुस 13

यीशु व्दारा मंदिर नशो गा परमेश्वर इथूमिठाच

(मत्ती 24:1-2; लूका 21:5-6)

1जब यीशु यरूशलेम गा मंदिर टे ओट लक्के डा। मेटे चेलाकू तलाटे म्याखोम नी दिजाटे मंडीके, “हे गुरु डोगे चोच अच्छाका खाट उरा होय! डीच तुनी खापेट घोटा टे आरुके होय!” 2यीशु नी हेजा गा चेलाकू टे मंडीके, “इनी मंदिर गा खापेट उरा घल्जी जो आम आए दोडो लक्के होय। लेकिन इंज आमके घालेवा। दुश्मनकु म्या भी घोटा इकु जगान बान आरा। दिकु सेबाई नशोऊबा।”

आखिरी दिन गा निशान

(मत्ती 24:3-14; लूका 21:7-19)

3मेटे यीशु यरूशलेम गा मंदिर गा टे जैतून गा टुक्की लिजेन ओले बल्ला हुधेळेन ओले। मेटे पतरस एठा याकूब एठा यूहन्ना एठा अन्द्रियास नी यीशु गा मेरान हेन जब दिकुगा गेल्ला जेका बान डा एठा दिकुटे कोम्बराके, 4“आलेके भी घाले कि इनी बातो चोला डाऊवा? एठा जब इनी सेबाई बातो पूराऊवा डी टेमो चोच निशान थंदळवा?” 5यीशु चेलाकू टे मंडी लज्जे, “ध्यान टे थांदळे कि जेका आपेके धोका बाकी जिऊ। 6घोनेच कुरकू इंजगा जीमू गा उपयोग डाएवा। दिकु मंडीवा, ‘इंज मसीह होय’ एठा डीच घोनेच कुरकू के दिकुगा मामानातींज गा घाल्जी धोका जेबा। 7एठा जब आपे लाडाई, एठा लाडाई गा चर्चा आजुमे, मेटे बाकी हिगरा। चोयाकी एनेगा डाऊ जरुरी होय। लेकिन इनी दुनिया गा अन्त बाऊ होय। 8चोयाकी सेबाई जाटो गा कुरकू, देशो एठा राज्य म्या दूसरा गा खिलाफबेन लाडाई गेन सेनेवा। एठा हार कोनेन भूकंपा डाऊवा एठा काळकी हेजेवा। इनी नी ताखलिफ कोण गा जनम पेला कासु रोंगो होय।” #यिर्म. 6:24

9“पेनो आपे ध्यान टे थांदळे, चोयाकी कुरकू आमके जेलेन येंडाकोम्बा एठा डी जगा सभा गेन साकोम्बा। एठा दिकु आमके आराधना जगा गेन खुठाकोम्बा। चोयाकी आपे इंजा चेलाकू होय, आपे मजबूर कोम्बा कि अमा खाटसभा गेन एठा हाकमिंकू गा सम्मान सेनेवा ताकी दिकु आपेगा न्याय डाएवा। डेगा रोंगो आपे दिकुके इंजा बारेन अच्छा खाबोर घालेवा। 10पेनो जरुरी होय कि संसार गा अंत टे पेला इंजा बारेन अच्छा खाबोर सेबाई जाटो गा कुरकू गघाल होना। 11जब आमके जेलेन येंडाकोम टासो। मेटे पेलाटेका चिंता बाकी कि आले चोच मेंबा। पेनो डी टेमो हेजेन परमेश्वर जो चोचकाभी मंडीवा होय डीचके मांडे। चोयाकी आपे डीका शब्द मांडेवा जो पवित्र आत्मा आपेके जेबा। आम अमा मेराटे चोचकाभी बाकी मंडी। 12डी टेमो, जो कुरकू इंजा विश्वास बान दोडो होय। दिकु इकुका डाईकु के जेलेन येंडाकुबा। एठा जो इंज लिंजेन विश्वास दोडोवा होय घोच्कुबा। बाटे हेजा गा कोणकु गेल्ला एनोगो डाएवा एठा चफनीकू आपना आंटे-बाटे खिलाफबेन सेनेवा एठा दिकुके घोच्कुबा। #लूका 21:16; मिका. 7:6 13चोयाकी आपे इंज लिंजेन विश्वास दोडोवा होय। इनी कारण टे सेबाई कुरकू अमाटे दुश्मनी डोएबा। लेकिन जो कुरकू इंजगा आजुम्बा होय एठा कासु स्यागु टाएन इंज लिंजेन भरोसा दोडोवा होय। एठा हार बान ममानातिंज दिकु परमेश्वर गा वोजीटे बचातिंजे।”

खाट तखलीफ़ गा टेमो

(मत्ती 24:15-28; लूका 21:20-24)

14म्या दिन आम उजळातिंज बुरा चीजो डोगेवा डेगा वोजीटे मंदिर के आरागेवा। इनी चीजो डी जगान डाऊवा देटेन डेगा डाऊ साही बाऊ होय। हार जेका इनिके पपाळातिंज्बा होय डीके समझातिंजू गा कोशिश होना! जब डी टेमो हेजेवा मेटे जो कुरकू यहूदिया जिल्हा गेन होय, दिकुके सजा थंदळ घल्जी टुक्की कोनेन सळुप होना। #दानि. 9:17; 12:11; 11:31 15अगर अमा अमागा पदळी लिंजेन टासो। मेटे आपना सामोन सा घाल्जी उरा तलान बाकी सेने आपे देटे टे सळुपजू होना। 16एठा जो खिटीन टासो डीच हेजा कपडे सा घाल्जी उरान डाबोलटे बाकी हिरा। 17इनी डी जपाएकु घाल्जी म्या भयनाक टेमो हेजेवा जो लाजके होय एठा दिकु घाल्जी जो चफनीकुके दिडोम आनु लक्के! चोयाकी दिकु घाल्जी सळुप ठायका मुश्किल होय। 18-19डी दिनेन कुरकू ठायका बुरा रुपोटे तखलीफबुवा। कुरकू नी चोलाकाभी इनी रोंगो कासु सामना दडुका होय, जब टे परमेश्वर नी दुनिया आरुके डा। एनेगा बदोन कुरकू डाबोलटे डी रोंगो कासु टे भोबगातिंज बाने। इनिघल्जी प्रार्थना डाए कि इनी खतरनक टेमो भांबरान बाकी डाऊ, जब यात्रा दडा मुश्किलुबा। 20अगर परमेश्वर नी डी भयनाक टेमो के जल्लोका स्यस्यागा फैसला बान दडुका टासो सेबाईकु घोयुवा। लेकिन परमेश्वर नी हेजा कलमके कुरकू गा वोजीटे डी टेमो बचातिंजे। 21डी टेमो अगर जेका अमाटे मांडे, “डोगे मसीह येटेनके होय! येटेन डोगे मसीह देटेनके होय!” मेटे विश्वास बाकी दोडो। 22चोयाकी लाबाळ मसीह एठा लाबाळ परमेश्वर गा कोनेटे मंडीमिठाच हेजेवा। एठा निशान एठा अचम्बो कामय घालेवा। डी कुरकू के धोका जिऊ घाल्जी दिकुके परमेश्वर कलमकेकु। #मत्ती 24:24 23“इनी सेबाई घटना डाऊटे पेला इंज्नी आमके सेबाई घटना गा बारेन घल्के होय इनिघल्जी ध्यान टे थंदळे।”

यीशु गा डबोलटे हेजे

(मत्ती 24:29-31; लूका 21:25-28)

24“डी दिनेन भयानक कासु गा टेमो स्यागु गा बादोन। सूर्या एठा चंद्र चमकतिंजू बंदोऊबा। 25एठा बदळा टे इफुलकु बोचोवा, एठा बदळा गा शक्तीनौर #13:25 शक्तीनौर येनेगा मतलब बादळन नक्षात्र चन्द्र के दर्शतिंजेज्बाओखेंजेबा। #प्रका. 6; यशा. 34:4 26डी टेमो कुरकू कोरो गा कोण जो इंज होय पृथ्वी गा कोनेन बदळान हेजे लक्के होय। दिकु इंजा महान शक्ती एठा महिमा डोगेवा। #दानि. 7:13; प्रका. 1:17 27डी टेमोन डीच हेजा स्वर्गदूतकु के कुलकूबा, पृथ्वी गा इनी कोपरा टे बदळा गा डी कोपरा टाएन। उफुन भी दिशा कलमके कुरकू घोलाकुवा।” #व्यवस्था. 30:4; मत्ती 24:31

अंजीर गा सिन्ज गा उदाहरण

(मत्ती 24:32-35; लूका 21:29-33)

28“अंजीर गा सिंजाटे इनी उदाहरण इठोए। जब एनेगा डांगोल ओठ्बा होय एठा पाला ओटबा होय। मेटे आपे चिनाएवा कि गर्मी गा मोसोम मेराएन होय। 29डीका रोंगो जब अमा डी चीजो के डाऊटे डोगे। मेटे आपेन मालूम होनाकी इनी दुनिया गा अंत बिल्कुल हेन होय। 30इंज आपेटे सच्चो मंडीवा होय इनी पीढी अदा कुरकू मेटे भी जीटाका थंदळवा जब इनी सेबाई घटना डाऊवा। 31बदळा एठा पृथ्वी नशोऊबा डी हमेशा गा घाल्जी बान थंदळ लेकिन इंज्नी जो मंडीके इनी हमेशा घाल्जी थंदळवा।” #यशा. 40:8; लूका 21:33

रोजोका झाटटो थांदळे

(मत्ती 24:36-44)

32“इनी बातो तुनी घिळीन एठा तुनी दिन डाऊवा इनी जेका बान हाडाई।” न स्वर्गदूत एठा न इंज जो कोण होय। पेनो बस बाटे परमेश्वर का डी दिनके एठा घिळीके हाडाई होय। 33डोगे, जटटो थंदळे, एठा प्रार्थना दडा लक्कू। चोयाकी आपे बान हाडाई घटना गा डी टेमो चोला हेजेवा। 34कोरो गा कोण जो इंज होय डाबोलटे हिरा हेजे म्या दूसरा गाँवेन ओले मिठाच कोरो रोंगो होय। जो दूसरा गाँवेन सेने टेमो आपना उरा आराकी। एठा हेजा भाग्याकूके हाक जे जो दिकुन दडा होना, एठा देटेन चौकीदार घालेवा होय कि देटेन हेजे घल्जी तैयारकु। 35इनिघल्जी यीशु नी हेजा चेलाकू टे मंडीके जटटो थांदळे, चोयाकी आपे बान हाडाई उरा गा मालिको चोला हिराबा होय। सिंगुरुपटे या अदा रातोन या ठायका फेजेरा टेमो हिराबा इनिघल्जी आपेके ध्यान दोडो होना। 36अगर इनिज बिना तुनिका गघाल गा अचानक मेटे दिकुन इनी बाकी मलुम्जू बाकी होना एनोगो बाकी डाऊ कि दिकु अचानक हेन डो आपेके गिटीच डोकोम्बा। 37एठा जो इंज आपेटे मंडीवा हारेक कोरो टे डीका मंडीवा होयकी, “इंज हेजे घल्जी तैयारकु।”

Currently Selected:

मरकुस 13: GOKNT

Highlight

Copy