मत्ती 7

आनोवा बाकी तोटाका

(लूका 6:37-38,42)

1आनोवा बाकी तोटाका, कि अमा लिंजेन भी आनोवा बाकी तोटाका होना। 2चोयाकी डिकारोंगो आपे दूसराकु लिंजेन आनोवा तोटाकावा, डिकारोंगो परमेश्वर आपेगा न्याय डायेबा। परमेश्वर आपेगा सेंग्गोन डेनोगोका व्यवहार डाएवा, येनोगोका आपे दूसराकु सेंग्गोन डाएवा। 3आपना डाई गा चफनी-चफनी गलती गा बारेन चिंता बाकी, पेनो आपना खापेट-खापेट गलती के डोगे एठा समझातिंजे।

4जब अमागा खुद गा तलान ठायका खाटबेळे गलती होय, मेटे आमके खुद टे सानी गलती मिनी अमा डाई गा मदत दडा कोशिश बाकी दडा होना। 5हे ढोंगो, पेला अमा खाट गलती के सुदरातिंज्की, डाबोलटे आम अमा डाई गा सानी गलती के सुसाधरातिंज गा मदत डायेबा। 6डी कुरकू के परमेश्वर गा चोखरा खाबोर के बाकी गघाल जो इनिके आजोम बाने। अगर आपे येनोगो दडा टासो, “मेटे इनी येनोगो डाऊवा डेनोगोका तुनिका चोखरा चीजो सिटाकु गा सम्मान टेप्पाकी, देटेन येनोगोका सुकळीकु गा सम्मान मोती टेटाप्पा जो बस मोती नंगा इटान टाजेबा एठा डाबोलटे आपे लिंजेन हामला डायेबा।”

परमेश्वर टे आसी एठा सा

(लूका 11:9-13)

7आपेके जो होना डी परमेश्वर टे आसे एठा डीच आपेके जेबा, घाटाए, टासो घाटाऊवा, ठाट-ठाडे टासो मेटे आपेगा घल्जी खुल्लाएबा। 8चोयाकी जो जेकाभी आसिवा होय, दियेन घाटाऊवा होय, जो घगाटावा होय, देटेन घाटाऊवा होय, एठा जो ठाट-ठाडेबा होय, दिया घल्जी खुल्लाएबा। 9आपे तालाटे तुनिकाभी बाटे हेजा कोणटे के घोटा बान जिऊ अगर डीच अमाटे सोकळा आसी टासो।

10इनिका रोंगो तुनिकाभी बाटे हेजा कोण के काकू आसी टासो जेर मिठाच बिंजके बान जिऊ। 11इनिघल्जी नका आपे बुरा आरुटे, आपना चफनीकुके अच्छा चीजो जिऊ हाडाई टासो, मेटे आपेगा स्वर्ग गा बाटे हेजा आसी मिठाच अच्छा चीजो जरुर जेबा। 12इनिघल्जी जो चोच्काभी आपे चाहतावा, कि कोरोकु आपेगा सेंग्गोन डाये, आम भी दिकु सेंग्गोन डेनोगोका डाये, चोयाकी मूसा गा नियम एठा परमेश्वर गा कोनेटे मंडीमिंकू गा शिक्षा मतलब इनिका होय।

सीधा एठा मुश्किल कोरा

(लूका 13:24)

13आपे बस सकडा फाटक टेका परमेश्वर गा राज्यन मुवा होय, चोयाकी देटेन फाटक चौदा होय, एठा सीधा होय देटेन कोरा जो नाशोऊ गा कोनेन साकोम्बा होय, एठा घोनेच कुरकू होय जो देटे मुवा होय। 14चोयाकी सकडा होय देटेन फाटक एठा मुश्किल होय, देटेन कोरा जो हमेशा गा जीवनेन पोचातींकोम्बा होय, एठा थोडा कुरकू होय, जो डीके घाटायेवा होय।

फलनौर टे सिंजके चिचाना

(लूका 6:43-44,46; 13:25-27)

15डी कुरकू टे ध्यान टे थंदळे, जो परमेश्वर गा कोंटे मंडीमिंकू रोंगो आरुटे दूसराकु के धोका जिऊ घल्जी, एठा खुदके मेंडाकू रुपो आरुटे हेजेवा होय, ताकी दिकु इनी कुरकू के विश्वास जेबाकी दिकु मेंडाकू होय, पेनो आए टेमोन दिकु डोंगोरा सिटा जो कुरकू लिंजेन हामला डाएवा। #यहे. 22:27 16दिकुगा जीवन दडा गा तरीका टे आपे दिकुके चीनाकुवा! झाळीनौर टे अंगूर गा फल बान जाऊ एठा जानोम टे अंजीर बान जाऊ।

17इनिका रोंगो हर म्या अच्छा सिंज अच्छा फाल सेगेवा होय, एठा जो कामय बाऊ सिंज बुरा फल सेगेवा होय। 18अच्छा सिंज बुरा फल बान सा टासो, एठा जो सिंज तुनिका कामय गा बाऊ, देटेन अच्छा फाल बान सा टासो। 19जो सिंज अच्छा फल बान सा, डीके म्हागेवा मेना, एठा डीके सिंगेलेन येंडाएवा होय, डी कुरकू के जो परमेश्वर गा कोंटे मंडीमिंकू आरुवा होय दूसराकु के धोका जिऊवा होय दिकुके इनिका रोंगो दण्डो जेबा होय।

20इनिघल्जी दिकुगा कामय टे आपे दिकुके चीनाकुवा। 21जो इंजाटे, “हे प्रभु, हे प्रभु मंडीवा होय, दिकु तलाटे हर म्याखोम स्वर्ग गा राज्यन मुवा बाने, पेनो डीचका स्वर्ग राज्यन मुवा जो इंजगा स्वर्ग बाटे गा इच्छा लिंजेन सेंदरावा होय।” 22न्याय गा दिनेन घोनेच कुरकू इंजाटे मांडेवा, “हे प्रभु, हे प्रभु, चोच आले अमागा जीमू टे भविष्यवाणी बान दडुका, एठा अमागा जीमू टे भूतोकुके ओटकेकु, एठा अमागा जीमू टे अचम्बो कामय डाके।” 23यीशु नी मंडीके, कि इंज डी कुरकू टे सपा रुपोटे मंडेबा, “हे बुरा कामय दडामिंकू इंजा मेराटे लेंक्कीन सेंजू चोयाकी इंज आपेके बान हाडाई।”

दिमागदार एठा बेदिमाग कोरो

(लूका 6:47-49)

24“इनिघल्जी जो जेकाभी इंजा इनी बातो आजुमटे डीके मनातिंजेवा होय, देटेन डी दिमागदार कोरो गा रोंगो ठहरातिंजूबा जोभी हेजा उरा गा पैय्याके पाठा लिंजेन आरुके। 25डाबोलटे डा घामाएन डो आडी हेन एठा डी धुक्काऊ लज्जे, पेनो देटेन बान बोचोडुका, चोयाकी डेगा पैय्या पाठा लिंजेन येंडाके डा। 26पेनो जो जेकाभी इंजा इनी बातो आजोम्बा होय एठा डे लिंजेन बान सेंदरा देटेन डी बेदिमाग कोरो रोंगो ठहरातिंजूबा डीचनी हेजा उरा रिती लिंजेन आरुके। 27एठा डा घामाएन डो आडी हेन, एठा कोयो धुंदळ लज्जे, एठा उरान टकरातिंजे एठा नाशोएन।”

28मेटे यीशु इनी मंडीकेका डा, मेटे कुरकू गर्दी दियागा शिक्षानौर टे बिचारजे। 29चोयाकी देटेन मूसा गा नियम इथूमिठाच रोंगो बाने, पेनो म्या हाकगेल्ला शिक्षानौर जिऊ डा।

Currently Selected:

मत्ती 7: GOKNT

Highlight

Copy