मत्ती 26

यीशु के घोगेच गा दोडो लक्के

(मरकुस 14:1-2; लूका 22:1-2; यूहन्ना 11:45-53)

1मेटे यीशु इनी सेबाई बातोनी मंडीके, मेटे हेजा चेलाकू टे मंडी लज्जे। 2आपेन नी मालूम्का होय, कि बरी दिन गा बादोन फसह गा तिवार दडावा, एठा कोरो गा कोण क्रूस लिंजेन पेपेळेच गा घल्जी उठाउवा होय। 3मेटे मुख्यायाजक एठा फरीसि कुरकू यहूदी जुना सनाकु कैफा जीमू खाटयाजक गा दरोमेन जमाएन। 4एठा इकुका बिचार लज्जे कि यीशु के जल्दीका उठायेच्बा डो, घोजेजबा। 5पेनो दिकु मंडी डा कि, “तिवार गा टेमो बाने, कही एनोगो बाकी डाऊ कि कुरकून धुम गाळबोळ डायु।”

यीशु लिजेन किमती इत्र के चेरसीके

(मरकुस 14:3-9; यूहन्ना 12:1-8)

6जब यीशु बैतनिय्याह गाँव गेन शमौन उरा गेन ओले दिजेन पेला कोळ्या डा। 7मेटे म्या जापाए संगमरमर गा घोटा आरुके कुप्पीन किमती सुकींज सुनूम साटे दियागा मेरान हेन, एठा मेटे देटेन आटाजोम सुबांके, डा, मेटे दियागा कापारेण। 8येटेन धोटे दियागा चेलाकू चिळतिंजटे एठा मंडी लज्जे इनी जगा चोच सत्यानाश डायेबा होय? 9एटेन नी अच्छा डामा लिंजेन किजीटे खातीन्जे लक्के जा। 10येटेन मालूमटे यीशु नी दिकुके मंडीके, “जापाए के चोया सतातिन्जवा। 11गिरबो आपेगा सेंग्गोन हमेशा थंदळवा होय, पेनो इंज आपेगा सेंग्गोन। 12डीचनी इंजा कोम्बोरेन लिंजेन जो येटेन सुकींज सुनूम येंडाके डा, देटेन इंजा गघाळा तिंजा घांजी डाके होय। 13इंज आपेटे सच्चो मंडीवा होय, सेबाई संसार जो तोटेनकभी यीशु गा अच्छा खाबोर प्रचार डाएवा। देडेन इनी जपाए कामय गा चर्चा भी डाऊवा एठा कुरकू डीचके यादोएच्बा।”

यहूदा इस्करियोती गा धोकेबाज

(मरकुस 14:10-11; लूका 22:3-6)

14मेटे यहूदा इस्करियोती जो यीशु गा बारह चेलाकू तालाटे म्याखोम डा। मुख्यायाजककु गा मेरान ओले, एठा दिकुटे मंडीके कि इंज यीशु के उठा गा आपेके मदत जेबा। ओलेडो, मंडीके, 15अगर इंज आपेगा टीन उठायेन टासो, मेटे आपे इंज्के चोच जेबा। 16एनेगा बादोन यहूदा इस्करियोती यीशु के धोकाटे उठा मौका घगाटा लज्जे।

चेलाकू गा सेंग्गोन तिवार गा आखरी जोम

(मरकुस 16:12-20; लूका 22:7-13; 21-23; यूहन्ना 13:21-30)

17बरी दिन बादोन, बिना खमीर गा सोकळा गा तिवार गा पेला दिन, यीशु गा चेलाकूनी दियाटे कोम्बाराके, “आम तुगन मेंबाकी आले सेने एठा अमा घाल्जी फसह तिवार गा आटा आले तैयारे?” 18डीचनी मंडीके, यरूशलेम शहरेन अमुक कोरो गा मेरान ओलेडो डीचके मांडे कि गुरु मंडीवा होय, कि डेन इंज इंजागा चेलाकू गा सेंग्गोन फसह गा तिवार मनातिंजेवा। 19हेन मेटे चेलाकू यीशु गा हुकूम आजोम्बे, एठा देटेन फसह तिवार गा आटा तैयारके होय।

20मेटे सिंगुरूपजे मेटेनी यीशु हेजा बराह चेलाकू सेंग्गोन डी उरान हेन। 21मेटे दिकु जोजोम लक्के डा, मेटे यीशु नी मंडीके, इंज आपेटे सच्चो-सच्चो मंडीवा आपे तलाटे म्याखोम इंज्के उठाकेमी। 22येने लिंजेन दिकु ठायका उदासोयेन मेना, एठा हार म्याखोम दियाटे कोकाम्बारा लज्जे, हे गुरु “चोच डीच इंज होय?” 23डीचनी जवाब जीके, “कि जे इंजा सेंग्गोन थाळान टी येंडाके, होय। 24चोयाकी कोरो गा कोण जो इंज होय डेनोगोका दियागा विषय गेन ओलके होय, डेनोगोका डाऊवा। पेनो डी कोरो लिंजेन भेबाव कासु हेजेवा जो कोरो गा कोण के उठाएच्बा। डी कोरो घाल्जी अच्छा डाऊवा कि डीच जनम बान सा।” 25मेटे दियागा उठामिठाच यहूदा इस्करियोती नी मंडीके कि हे गुरु, “चोच डीच इंजा होय?” डीचनी डीचके मंडीके आमनी मनातिंजे।

प्रभु भोज

(मरकुस 14:22-26; लूका 22:14-20; 1कुरि. 11:23-25)

26जब दिकु जोम लक्के डा, मेटे यीशु नी सोकळा सावे एठा धन्यवाद डाटे थोळासा चेलाकू जीटे मंडीके, ना जोमे, येटेन इंजा कोम्बोर होय। 27एठा डीचनी कोटोरा सावे, धन्यावाद जीके, एठा दिकुके जीटे मंडीके, “आपे सेबाईकु येनेटे नोए, 28चोयाकी येटेन उनाई करार गा इंजा पचना होय, जो घोनेचकु का घांजी पापो गा मापो घल्जी आडेवा मेना होय। 29इंज आपेटे सच्चो मंडीवाकी, कि अंगूर गा रेस्सो इंज डी दिन टाएन बान नुनू जब टाएन परमेश्वर गा राज्यन उनाई अंगूर गा रेस्सो बान नुनूवा।” 30बदोन यीशु दियागा चेलाकू भाजन गानावे डो बल्लान जैतून गा टुक्की लिजेन ओले।

पतरस गा बान चिचाना गा भविष्यवाणी

(मरकुस 14:27-31; लूका 22:31-34; यूहन्ना 13:36-38)

31मेटे यीशु नी हेजा चेलाकू टे मंडीके, “आपे सेबाईकु टैंजका रातो इंजा विषय गेन खेडा जोम्बा, चोयाकी ओल्के होय, इंज चाचारा मिंकूके घोच्कुबा, एठा घोन्जा गा मेंडाकू इंगान डीगान कुवा। 32पेनो इन्जा जीटाऊ गा बदोन आपेटे पेला गलील शहरेन सेनेवा आपे देटेन मिलातिंजकु।” 33एने लिंजेन पतरस नी दियाटे मंडीके, अगर सब अमा विषय गेन खेडा जोम्बा मेटे जोमे, पेनो इंज चोलाकाभी खेडा बान जोम्बा। 34यीशु नी दिकुके मंडीके, इंज आपेटे सच्चो मंडीवाकी, कि टैंजका रातो का कोम्बा गा राटे पेला आम आफाई बार इनचे इन्कारेवा। 35पेनो पतरस नी एठाभी जोर टे मंडीके, “अगर इंज्के अमा गेल्ला गुजू भी टासो एठाभी इंज अमा इन्कार चोलाका बान दडा।” इनी रोंगो बाकी चेलाकूभी मंडीके।

गतसमनी गा बगीचा गेन प्रार्थना

(मरकुस 14:32-42; लूका 22:39-46)

36जब यीशु एठा दियागा चेलाकू गतसमनी जीमू म्या जगान गेन हेन। एठा यीशु नी हेजा चेलाकू टे मंडीके, “येटेनका सुबानकूका जब टाएन इंज प्रार्थना दडावा।” 37एठा देटेन पतरस एठा जब्दी गा बरी कोन्किंज गा सेंग्गोन सैय्येकु। 38मेटे यीशु नी मंडीके, “इंजा ठायका दुकीके होय एटे टाएन कि इन्जा जान ओठ्जे डा। आपे एटेन टेंगेनेका एठा इंजा जटटो थंदळे।” 39एठा यीशु थोळासा सम्मान ओले, ठोपरे टे सुबानटे एठा इनी प्रार्थना दडा लज्जे, “हे इंजा बाटे अगर डाऊ टासो मेटे इनी कासु इंजाटे लेंक्कीनकी।” एठा डीचनी मंडीके, “हे अबा हे बाटे अमाटे सेबाईका डाऊवा होय। इनी खाट कासुके इंजा मेराटे म्या देळेनकी एठाभी पेनो जैसा इंज चाहता डेंगो बाने। पेनो अमा इच्छा पुरायु।” 40डाबोलटे जब यीशु हिराके चेलाकूके गिटीचटे डोके पतरस टे मंडीके, “हे शमौन अमा गिटीच लक्के होय? चोच अमा म्या घंटा भी जटटो थंदळ डुका? 41झाटटो एठा प्रार्थना दडा होना एठा तखलीफबेन बाकी बोचो। कि अमा अंदाजो बाकी बोचो, आत्मा तैयारके होय पेनो कोम्बोर कमजोर होय।” 42एठा डीच दूसरा बार ओलेडो डीका शब्द प्रार्थना वे होय, कि हे इंजा बाटे; अगर येटेन इंजा नुनू बिना म्याधेळेनु टासो अमा इच्छा पुरायु। 43एठा डबोलटे यीशु हेन डो दिकुके गिटीचका डोकेनेच, चोयाकी दियागा मेट दुनूमेन का डा एठा बान हाडाई डा कि डीचके तुनी जवाब जे। 44एठा दिकुके आराटे डाबोलटे ओले मेना, एठा डीका बातो के एठा आफाई बार प्रार्थना डावे। 45एठा तिसरा बार हेन यीशु नी चेलाकू टे मंडीके, “नका आपे गिटीजे का एठा आराम्बोए बस टेमो हेन होय। डोगे कोरो गा कोण जो इन्ज होय पापीकु गा टीन उठाउवा होय। 46बिडे बो, डोगे इंजगा उठामिठाच मेरान हेन होय।”

यीशु के उठा जेनेच

(मरकुस 14:43-50; लूका 22:47-53; यूहन्ना 18:3-12)

47देटेन इनी मांदिका लक्के डा, मेटे डोगे यहूदा इस्करियोती जो बारह कु तलाटे म्याखोम डा, हेन, एठा दियागा सेंग्गोन मुख्यायाजककु एठा कुरकू गा यहूदी जुना सनाकु कोनेटे खाट गर्दी, तलवार एठा लठ्ठा साटे हेन। 48यहूदा नी उठामिंकूके इनी पता घल्के डा। डीचके इंज गुरु मेंटो हाकोएच्बा एठा चुम्मा जे देटेनका होय डीचके उठाटे सावधान टे साईंय्याकेच। 49यहूदा हेन एठा तुरुटो यीशु गा मेरान ओलेडो मंडीके, “हे गुरु, नमस्कार!” एठा डीचके चुम्मा जीके। 50यीशु नी दिकुके मंडीके, हे सोपतीकु, जो कामाय घांजी आपे हेन होय, डीके डा कि, मेटे दिकुनी मेरान हेंडो यीशु लिंजेन टी येंडाटे डीचके उठाएनेच। 51मेटे यीशु गा सोपतीकु तलाटे म्याखोम टी बळातिंजटे हेजा तलवार ओळजे एठा खाटयाजक गा भाग्य लिंजेन सेंदराटे दियागा लुटूर गेटके। 52मेटे यीशु नी डीचके मंडीके, “अमागा तलवार का टीन डोकी चोयाकी जो तालवार सेसंद्राबा होय, डी सेबाई तालवार टे नाशोऊवा। 53चोच आमेन बान सामझातिन्जू, कि इंज आपना बाटे टे बिनती दडावा होय, एठा देटेन स्वर्गदूतो कु गा बारह पलटण टे जादा इंजा मेरान कुलेवा? 54अगर येटेन येनोगो डाऊवा, मेटे पवित्र ग्रंथ गेन ओल्के मिनी डी बातो पुराऊ बाने, इनिघल्जी जैसा डाऊ लक्के होय डेनोगोका डा डाए?” 55डीका टेमोन यीशु नी गर्दी तालाटे मंडीके, चोच तालवार एठा लठ्ठा साटे इंज्के डाकु गा सम्मान उठा घांजी ओटके होय, इंज हार दिन यरूशलेम गा मंदिरेन सुबान्टे उदाहरण जिऊ डा, एठा आपेनी इंज्के बान उठाडुका। 56पेनो येटेन सेबाई इनिघल्जी डायेन होय कि परमेश्वर गा कोनेटे मंडीमिठाच गा वचन पुरायु। मेटे सेबाई चेलाकू डीचके आराटे साळुपजे।

कैफा गा सम्मान यीशु

(मरकुस 14:53-65; लूका 22:54-55,63-71; यूहन्ना 18:13-14,19,24)

57एठा यीशु के उठामिंकू डीचके कैफा जीमू खाटयाजक गा मेरान सैय्येनेच, देटेन मूसा गा नियम इथूमिठाच एठा यहूदी जुना सनाकु जमाएन डा। 58एठा पतरस लेंक्कीटे टेका दिकु टाऊ-टाऊटे खाटयाजक गा उरा गा दरोम टाएन ओले। एठा सैनिककु गा सेंग्गोन सुबानटे सिंगेलेन सेको लज्जे। 59मुख्यायाजककु एठा सेबाई खाटसभा यीशु के घोगेज गा घाल्जी दियागा खिलाफबेन गवाही घगाटा लक्के डा, पेनो बान घाटाडुका। 60चोयाकी घोनेच कुरकू यीशु गा खिलाफबेन लबाळ गवाही जिऊ लक्के डा। पेनो दिकु सेबाई कुरकू गा गवाही म्याका रोंगो बान डा। मेटे चोटोकु नी बिटजे डो दियागा खिलाफ मेटे लाबाळ गवाही जीके, 61आलेनी डीचके इनी मंडीटे आजुम्के होय, “इंज इनी टी गा आरुके मिनी परमेश्वर गा मंदिर के फाळेबा, एठा आफाई दिनेन दूसरा आरोएवा।”

62मेटे खाटयाजक नी कुरकू सम्मान टेंगेनटे यीशु के कोम्बाराके, “आम अमागा बबाचातिंजेन चोचकाभी चोया बान मंडी? इनी कुरकू अमा खिलाफबेन चोच गवाही जेबा होय?” 63पेनो यीशु कायोम्के एठा तुनिका जवाब जिडुका। खाटयाजक नी यीशु टे डाबोलटे कोम्बाराके, “चोच अमा डी चोखरा परमेश्वर गा कोणटे मसीह होय दियागा आले आराधना दडावा होय?” 64यीशु नी दिकुके मंडीके, आपेनी इनिज्के आपेका मंडीके बरेन इंज अमाटे इनी मंडीवाकी, नका टे अमा इंज्के कोरो गा कोण गा सर्वाशक्तीमान गा डाखुरी कोनेन सुबांके, एठा आकाश गा बदळा लिंजेन हेजेवा डूगुवा। 65खाटयाजक नी हेजा कपळे टयाटे मंडीके, इंज परमेश्वर गा खिलाफबेन मंडीके आलेन एठा तुनिका गवाही गा जरुरत बाऊ होय। 66डोगे, आमनी इनी खिलाफबेन आजुम्के जो इनिजनी चोखरा परमेश्वर गा घाल्जी मंडीके। “आपेगा एनेन चोच साला होय?” दिकु सेबाई कुरकू नी आजुम्जे कि यीशु नी गलती डावे होय इनिघल्जी डीचके गुजू गा दण्डो जे। 67मेटे, दिकुनी दिया म्वारेन उलीच बेच्के, एठा डीचके बुक्की मुंडाटे मंडी लज्जे, 68हे मसीह, आलेके भविष्यवाणी डाटे घाले, कि जे आमके मुंडाकेमी?

पतरस व्दारा यीशु के बान चिचाना

(मरकुस 14:66-72; लूका 22:56-62; यूहन्ना 18:15-18,25-27)

69एठा पतरस बल्लान दारोमेन सुबानके मेना डा, कि म्या भाग्निकू नी दिया मेरान हेंडो मंडीके, अमा भी यीशु गलील कुरकू गा सेंग्गोन डा। 70डीचनी सेबाईकु सम्मान इनी मंडीटे इन्कार डाके एठा मंडीके, इंजेन बान मालूम कि अमा चोच मंडी लक्के डा। 71मेटे देटेन बल्लान दारोजोन ओले, मेटे दूसरा भगनी नी डीचके धोटे दिकुटे जो देटेन डा मंडीके, “येटेन भी नी यीशु नासरी गा सेंग्गोन डा।” 72डीचनी कासोम जोमटे एठा बान मेंके कि इंज डी कोरो के बान हाडाई। 73थोळासा टेमो बादोन, जो देटेन टेगेनके डा, दिकुनी पतरस गा मेरान हेंडो डीचके मंडीके, “सच्चोका आम भी दिकु तालाटे म्याखोम होय, चोयाकी अमागा मंडी घलेबा होय, कि आम गलील जिल्हा गा होय।” 74मेटे देटेन बानेका मेना एठा कासोम जोम लज्जे, “इंज डी कोरो के बान हाडाई।” एठा तुरुटो कोम्बानी राके। 75मेटे पतरस के इनी बातो जो यीशु नी दियाटे मंडीके डा यादो हेन, “कोम्बा गा राटे पेला अमा आफाई बार इंजगा इन्कार कोम्बा।” एठा देटेन बल्लान ओलेडो खट्टेका जाम लज्जे।

Currently Selected:

मत्ती 26: GOKNT

Highlight

Copy