मत्ती 16

फारिसि कुरकू वोजीटे यीशु गा चिचाना

(मरकुस 8:11-13; लूका 12:54-56)

1फरीसि कुरकू एठा सदूकी कुरकू नी यीशु गा मेरान हेंडो चिचना गा घल्जी दियाटे मंडीके, “आलेके स्वर्ग गा म्या अचम्बो कामय घाले।” 2डीचनी दिकुके जवाब जीके, कि सिंगुरूप नी आपे मंडीवाकी खुल्लाका थंदळवा चोयाकी बदळा राटा होय। 3“एठा फेजेर नी मंडीवाकी, कि टैंज धूंडी हेजेवा चोयाकी बदळा राटा एठा आपे बदळा गा आकार धोटे राजो घालेवा होय पेनो टेमो गा चिन्ह गा राजो चोज बान घागल होय? 4इनी युगेन बुरा एठा आनोवा कुरकू चिन्हा घगाटावा होय, पेनो परमेश्वर गा कोनेटे मंडीमिठाच योना गा चिन्हा के आरागे तुनिका दिकुके बाकी जिऊ मेना। एठा डीच दिकुके आराटे सेंजू।

फरीसि कुरकू एठा सदूकी कुरकू गा सोडा

(मरकुस 8:14-21)

5एठा चेलाकू समुद्र गा डी पारेन सेने टेमो सेंग्गोन आटा सा भुल्लाएन। 6यीशु नी दिकुके मंडीके, डोगे, फरीसि कुरकू एठा सदूकी कुरकू गा खमीर टे ध्यान टे थंदळे। 7चेलाकू इकुका बिचार लज्जे, आलेनी सोकळा बान साडुका इनिघल्जी देटेन एंगो मंडीवा होय।” 8इनी चिनाटे यीशु दिकुटे मंडीके, हे अदाविश्वासकु। आपे आपेका बिचार लक्के होय, कि आबु मेरान सोकळा बाऊ? 9चोच आपे आए टाएन बान समजातिंजडुका कि एठा मोनाई हजार कुरकू गा मोनाई सोकळा यादो बाने, एठा न येटेन कि चोटो टोपला टूलके डा? 10एठा डी उफुन हजार सोकळा गा आईय्या सोकळा, एठा न येटेन कि चोटो टोपला टूलबे डा। 11आपे चोया बान समजातिंजडुका, कि इंज्नी आपेटे सोकळा गा विषय गेन बान मंडीडुका, फरीसि कुरकू एठा सदूकी कुरकू गा सोडा टे चातराएटे थंदळे? 12मेटे दिकुनी समझातिन्जे, कि डीचनी सोकळाके खामीर टे बाने, पेनो फरीसि कुरकू एठा सदूकी कुरकू गा शिक्षा टे चतराये थंदळकु।

पतरस गा यीशु मसीह के मानतिन्जेनेच

(मरकुस 8:27-30; लूका 9:18-21)

13यीशु कैसरिया फिलिप्पी शहर हेंडो आपना चेलाकू टे कोम्बाराए लज्जे, कुरकू कोरो गा कोण के चोया मंडीवा होय? 14दिकुनी मंडीके, चोटोकु का यूहन्ना बपतिस्मा जिऊमिठाच, दूसराकु मंडीवा होय, परमेश्वर गा कोनेटे मंडीमिठाच एलिय्याह होय, एठा चोटोका परमेश्वर गा कोनेटे मंडीमिठाच यिर्मयाह या परमेश्वर गा कोनेटे मंडीमिठाच तुनिका म्याखोम के मंडीवा होय। 15डीचनी दिकुके मंडीके, पेनो आपेनी इंज्के चोया मंडीवा होय? 16शमौन पतरस नी जवाब जीके, “आमका जीटा परमेश्वर गा कोणटे मसीह होय।” 17यीशु नी डीचके जवाब जीके, “हे शमौन योना #16:17 योना योना जो पतरस गा बाटे होय, डीच परमेश्वर गा कोनेटे मंडीमिठाच “योना” टे अलग्गो होय, यूहन्ना 1:42गा कोणटे, अमा धन्य होय, चोयाकी इनी सच्चाई के आमनी तुनिकाभी कोरो टे बान घाटाडुका, पेनो इंजा बाटे नी जो स्वर्ग गेन होय। इनी बातो अमा लिंजेन डाके होय। 18एठा इंजभी आपेके मंडीवाकी, कि आम पतरस होय, एठा इंज इनी घोटा लिंजेन इंजगा मसीह गा मंडली आरोयेवा एठा पातल गा फाटक डे लिंजेन जीटा डाए बाने। 19इंज आपेके स्वर्ग राज्य गा कुंजी जेबा एठा जो चोचकाभी आम पृथ्वी लिंजेन टोलेवा, देटेन स्वर्ग गा राज्य गेन टोलेवा, एठा जो चोचकाभी आम पृथ्वी लिंजेन खुल्लाएबा, देटेन स्वर्ग गेन खुल्लाएबा।” 20मेटे यीशु नी चेलाकूके चातराएटे घाल्के, “जेकाकेका बाकी गघाल कि यीशु का मसीह होय।”

हेजा गुजू बारेन यीशु गा हेजे मिनी टेमो घागल

(मरकुस 8:31-33; लूका 9:22)

21डी टेमो टे यीशु नी हेजा गा चेलाकूके घाले लज्जे, इंजेन जरुरी होय, कि यरूशलेम शहर गेन सेने, एठा यहूदी जुना सनाकु एठा मुख्यायाजक एठा मूसा गा नियम इथूमिठाच गा टी टे घोनेच कासु टूलबे, एठा घोजुवा मेना, एठा आफाई दिन गा बादोन जीटाएन। 22एने लिजेन पतरस नी डीचके तखलिफ एठा गुजू गा बारेन बातो गा वोजीटे डीचके कल्लाकेनेच। परमेश्वर बाकी दडा, अमा लिंजेन येनोगो चोलाकाभी बाकी डाऊ। 23यीशु नी डाबोलटे पतरस के कल्लाटे मंडीके, “हे शैतान इंजा सम्माटे बाजूने, चोयाकी आम डेनोंगो बान सोसाचातिंज डेनोगोका परमेश्वर गा रोंगो सोसाचातिंज होय। लेकिन कुरकू रोंगो सोसाचातिंज्बा होय।”

यीशु गा टाऊटे सेन्द्रा गा मतलब

(मरकुस 8:34-9:1; लूका 9:23-27)

24यीशु नी गर्दी के इंजा चेलाकू गेल्ला हेजा मेरान होकोटे दिकुटे मंडीके, “अगर आपे इंजा चेलाकू आरु टासो, तो आपेके आपेगा इच्छाके आरा होना।” आपेन आपेगा क्रूस तुटूल घाल्जी तैयारका थंदळ होना। 25चोयाकी जो जेकाभी हेजा गा जान बचातिंजकोम टासो, देटेन नाशोएवा, एठा जो इंजा घल्जी आपना जीवन जेबा देटेन घाटाऊवा। 26म्या कोरो के चोच फायदा अगर डीच दुनिया गा सेबाईकु टे खाट डामा कोरो आरोएन टासो। सच्चो जान आडेवा लेकिन परमेश्वर गा सेग्गो गा अनन्त जीवन आडे टासो? चोच इनी डाऊवा होय कि जेका अनन्त जान घाटाऊ घाल्जी परमेश्वर गा घाल्जी जेबा होय? चोचकाभी बाने! 27इंज जो कोरो गा कोण हेजा गा स्वर्गदूत गा सेंग्गोन हेजा गा बाटे गा महिमा गेन हेजेवा, एठा डी टेमोन देटेन हर म्याखोम के दियागा कामाय गा रोंगो फाल जेबा। 28इंज आपेटे सच्चो-सच्चो मंडीवा होय आपे तालाटे अदा कुरकू जो येटेन टेंगेनकेनेच होय एनोगो टाकाकु होय, मेटे टाएन कोरो गा कोण राज्यन हेजे टे बान दोडो मेटे टाएन घुजुगा अनुभव चोलाका बान डाऊ।

Currently Selected:

मत्ती 16: GOKNT

Highlight

Copy