लूका 21

कंगाल विधवा जापाए गा सच्चो दान

1एठा डीचनी मेट टे धोटे लकपाती कु के आपना-आपना दान भंडार गेन येण्दाटे डोकेकु, 2एठा डीचनी म्या गिरबो विधवा के भी डेन बरी तम्बा चिक्खा (सेबाई टे कामती भाव) येण्दाटे डोकेनेच, 3मेटे यीशु नी मंडीके, “इंज आपेटे सच्चो मंडीवाकी इनी गिरबो विधवानी सेबाईकु टे खाट येंडाके होय? 4चोयाकी दिकु सेबाईकु नी इकु खाट मेंटो दानेन चोच्का येंडाके होय, पेनो इनिज एटे टाएन कि डीच भी जो दियेन जीटा थंदळ गा घाल्जी होना डा।”

युग गा अन्त गा लक्षण

5मेटे चोटो कुरकू यरूशलेम गा मंदिर गा बारेन मंडी लक्के डा, कि देटेन हे गुरु डोगे चोच अच्छाका खाट उरा होय! डीच तुनी खापेट घोटा टे आरुके होय, मेटे डीचनी मंडीके, 6“डी दिन हेजेवा, डेंनी इनी सेबाई बातो जो दोडो लक्के होय। लेकिन इंज आमके घालेवा। दुश्मनकु म्या भी घोटा इकु जगान बान आरा। दिकु सेबाई नशोऊबा।” 7दिकुनी दियाटे कोम्बारायेवा, हे गुरु, येटेन सेबाई चोला डाऊवा? एठा इनी बातो मेटे पुराऊ गेन हेजेवा, मेटे डी टेमो गा तुनी चिन्हा होंगा? 8डीचनी मंडीके, ध्यान टे थांदळे कि जेका आपेके धोका बाकी जिऊ, कि भुल्लाऊ बाकी घोनेच कुरकू इंजगा जीमू गा उपयोग डाएवा। दिकु मंडीवा, इंज मसीह होय, एठा येटेन भी टेमो मेरान हेन 9एठा मेटे आपे लाडाई, एठा लाडाई गा चर्चा आजुमे, मेटे बाकी हिगरा। चोयाकी एनेगा डाऊ जरुरी होय। लेकिन इनी दुनिया गा अन्त बाऊ होय। 10मेटे दिच्नी दिकुके मांदिके, कि सेबाई जाटो गा कुरकू, देशो एठा राज्य म्या दूसरा गा खिलाफबेन लाडाई गें सेनेवा। 11एठा हार कोनेन भूकंपा डाऊवा एठा काळकी हेजेवा।, एठा बदळा गेन भायनाक बातो एठा खापेट-खापेट चिन्हा ओटबा होंगा, 12पेनो इनी बातो टे पेला दिकु इंजा जीमू गा कारान आपेके उठाकोम्बा, एठा सतातिंजकोम्बा, एठा आराधना जगा गेन, एठा जेलेन येण्दाकोम्बा, एठा राजाकु गा एठा हाकमिंकू गा सम्मान साकोम्बा, 13पेनो येटेन आपेगा घांजी गवाही जिऊ गा मौका हेजेवा, 14इनिघल्जी आपना-आपना मेन गेन मंडीकी कि आले पेला टे जवाब जिऊ गा चिंता बाकी? 15चोयाकी इंज आपेके येनोगो मंडी एठा दिमाग जेबा, कि आपेगा सेबाई दुश्मानकु सम्मान या खीजो बाकी? 16एठा जो इंज लिंजेन विश्वास दोडोवा होय घोच्कुबा। बाटे हेजा गा कोणकु गेल्ला एनोगो डाएवा एठा चफनीकू आपना आंटे-बाटे खिलाफबेन सेनेवा एठा दिकुके घोच्कुबा। 17चोयाकी आपे इंज लिंजेन विश्वास दोडोवा होय। इनी कारण टे सेबाई कुरकू अमाटे दुश्मनी डोएबा। 18पेनो आपेगा चोचकाभी हानि बान डाऊ। 19आपना आराम्बोटे आपे आपेगा का जीवन के बाचातींजेवा!

यरूशलेम गा नशो

20मेटे आपे यरूशलेम शहर गा सेना टे बोचोके मिंकू डूगुवा, मेटे चिनायाकी दियागा उजाळातिंजू मेरान होय। 21मेटे जो डाबोलटे यहूदिया जिल्हा गा कुरकू के उखु घाल्जी टुक्की कोनेन सळुप होना एठा जो यारुश्लेम गा तालन दिकु बल्लान ओठ्बा मेना; एठा जो गावा गेन डेन बान सेने, 22चोयाकी इनी डी टेमो होय, जब परमेश्वर येनेगा सेबाई कुरकू के दण्डो जेबा। मेटे पवित्र ग्रंथ ओल्के सेबाई बातो पूराऊवा। 23इनी डी जपाएकु घाल्जी म्या भयनाक टेमो हेजेवा जो लाजके होय एठा दिकु घाल्जी जो चफनीकुके दिडोम आनु लक्के! चोयाकी दिकु घाल्जी सळुप ठायका मुश्किल होय। चोयाकी देशोन नी खाट गफान एठा इनी कुरकू लिंजेन मुश्किल हेजेवा, 24दिकु तलवार गा धार टे घोच्कुबा, एठा अदा कुरकू दूसरा देशो गेन बंदी आरुटे इडीकुवा एठा यरूशलेम शहर अलग्गो जाटो गा कुरकू द्वारा डी टेमो टाएन रेसेडूबा। जब अलग्गो जाटोकु गा टेमो पुराऊ बाने।

यीशु गा डबोलटे हेजे गा संकेत

25एठा सूर्य एठा चंद्र एठा इफिल्कू गेन चिन्हा डूगुवा मेना, एठा पृथ्वी लिंजेन, सेबाई जाटो गा कुरकू गा मुश्किल होंगा, चोयाकी दिकु समुद्रा गा बारसतिन्जुवा एठा लापा गा आवाज घबरातिन्जू वा, 26एठा हिगरा गा कारान एठा दुनिया लिंजेन हेजे मिनी घाटना के बांददो दोडो कुरकू गा जान गेन जान एठा बदळा टे इफुलकु बोचोवा, एठा बदळान शक्तीनौर ओखेंजेबा। 27मेटे दिकु कोरो गा कोण के शक्ती एठा खाट महिमा गा सेंग्गोन बदळा लिंजेन हेजे टे दोडोवा। 28जब इनी बातो डाऊ लज्जे, मेटे सीधा टे अमा कापार माठान टूले, चोयाकी परमेश्वर आपेके जल्दी आराकोम्बा।

परमेश्वर गा राज्य मेरान होय

29डीचनी दिकुके मंडीके, म्या उदाहरण भी मंडीके, अंजीर गा सिंजाटे एठा सेबाई सिंजाके डोगे। 30जोभी दिकुगा कोम्बो ओठ्बा होय, मेटे आपे धोटे आपे चिनाएवा कि डा गा मोसोम मेरान होय। 31डीका रोंगो जब अमा डी चीजो के डाऊटे डोगे। मेटे आपेन मालूम होनाकी इनी दुनिया गा अंत बिल्कुल हेन होय। कि परमेश्वर गा राज्य मेरान होय। 32इंज आपेटे सच्चो मंडीवा होय इनी पीढी अदा कुरकू मेटे भी जीटाका थंदळवा जब इनी सेबाई घटना डाऊवा। 33बदळा एठा पृथ्वी नशोऊबा डी हमेशा गा घाल्जी बान थंदळ लेकिन इंज्नी जो मंडीके इनी हमेशा घाल्जी थंदळवा।

हमेशा तैयार थंदळे

34“इनिघल्जी ध्यान टे थंदळे, येनोगो बाकी डाऊ, कि आपेगा मन लपरवह एठा होशोन बान थंदळ, एठा इनी जीवन गा चिन्ता टे ढीला थंदळजू। अगर आपे येनेगो दडा टासो मेटे डी दिन आपे लिंजेन फंदा गा रोंगो अचानक हेजेवा होय। 35चोयाकी इनी म्या फंदा रोंगो, पृथ्वी गेन थंदळ मिंकू सेबाई कुरकू लिंजेन हेजेवा। 36इनिघल्जी जाट्टो थंदळे एठा हार टेमोन प्रार्थना दडा लक्कू कि आपे इनी सेबाई हेजेमिंकू घाटना टे बचातींजकु एठा कोरो गा कोण मेना इंजा सम्मान टेंगेन गा लायको आरोए।” 37देटेन दिनेन यरूशलेम गा मंदिर गेन शिक्षा जिऊ डा, एठा रातो शहर टे बल्लान सेने डा डो जैतून जीमू टुक्की लिंजेन थंदळ डा। 38एठा फेजेर गा सेबाई कुरकू दियागा शिक्षा आजोम घल्जी यरूशलेम गा मंदिर गेन दियागा मेरान हेजेवा मेना डा।

Currently Selected:

लूका 21: GOKNT

Highlight

Copy