लूका 16

सेसंदरा दडामिठाच

1डाबोलटे डीचनी चेलाकू टे इनी उदहारण जीटे मंडीके, तुनिका लकपाती गा म्या भंडारी डा, एठा कुरकू नी दियागा सम्मान भंडारी लिंजेन येटेन आनोवा टोकाके कि येटेन अमा सेबाई ओटे संपत्ति उळातिंजेबा होय। 2इनिघल्जी लकपाती कोरोनी भंडारी हाकोटे मंडीके, येटेन चोच होय जो इंज अमा विषय गेन आजोम लक्के मेना, आमनी इंजा डामा टे चोच डाके होय, हिसाब घाले, चोयाकी आम सम्मान नी भंडारी बान थंदळ। 3मेटे भंडारी सोचातिंज लज्जे, नका इंज चोच डाए? चोयाकी इंजा स्वामी नका भंडारी गा कामय इंजाटे रुटे लक्के होय। ओटे लला या टी टे कामय दडा गा ताखत इंजेन बाऊ होय भिको आसी टे इंजेन सेरोम हेजेवा होय। 4नका इंजेन मालूम होय, कि चोच इंज चोच दडा होना, जब इंज भंडारी गा कामय टे आरायेन, मेटे कुरकू इंजा मदत डाएवा। 5डीचनी हेजा स्वामी गा कर्जोमिंकू टे म्या म्यखोम के हाकोटे पेला कर्जोमिंकू टे कोम्बराके, कि अमा लिंजेन इंजा स्वामी गा चोटो कर्जो होय? 6डीचनी मंडीके, अंदाजोटे आफाई हजार याई सेद्दी जैतून सुनूम, मेटे भंडारी नी दिकुटे मंडीके, अमा हिसाब गा बुक सायोम एठा सुबानटे तुरुटो आठरा सेद्दी पचासो लिटर ओलजा। 7डाबोलटे दूसरा टे कोम्बाराके, अमा लिंजेन चोटो कर्जो होय? डीचनी मंडीके, इसा हजार किलो गुं मेटे डीचनी डीचके मंडीके, आमगा हिसाब गा बुक साटे सोला हजार किलो ओलकी। 8स्वामी नी डी अधर्मी भंडारी गा तरीफ डाके कि डीचनी हुशारी टे कामय डाके होय, चोयाकी इनी जामान गा कोण हेजा पीढी गा सेंग्गोन इकुगा लेन-डेन गेन उजाला गा कोंटे एठाभी हुशार होय। 9इनिघल्जी इंज आपेटे मंडीवा मेना, दुनिया गा डामा टे अमा घल्जी सोपती आरु, ताकी डामा गा स्यागु गा बादोन एठा अमागा गोएन गा बादोन, आमके हमेशा गा जीवन गा उरान साकोम। 10जो चफनी-चफनी बातोन ईमानदार होय, देटेन खापेट बातो गेन भी ईमानदार होय। एठा चफनी-चफनी बातो गेन बैमान होय, देटेन खापेट बातो गेन भी बैमान होय। 11इनिघल्जी जब आपे दुनिया गा डामानौर ईमानदार बाकी ठहरातिंजू मेटे स्वर्गीय गा सच्चो डामा गेन ईमानदार टोनोगो ठहरातिंजूबा? 12अगर आम दूसरा गा डामा गेन ईमानदार बान ठहरातिंजडुका, मेटे आमके हेजा खुद गा देख-रेख दडा घल्जी जे जेबा? 13“तुनिका भग्या म्याका टेमोन बरी स्वामी किंज गा सेवा बान दडा, चोयाकी देटेन नी म्याखोमटे दुश्मान एठा दूसरा टे प्यार डोएबा, देटेन म्याखोमटे मिलातिंज थंदळवा, दूसराकु बेकार मेन्बा, आपे परमेश्वर एठा डामा बाएरा गा भी सेवा बान डाऊ।”

परमेश्वर गा राज्य गा मूल्य

14फरीसि कुरकू जो लालीचो डा, इनी बातो आजुमटे दियागा मजाक उळातिंजे लज्जे। 15मेटे यीशु नी दिकुटे मंडीके, “आम खुदके कुरकू गा सम्मान धर्मी ठहरातिंजेवा, पेनो परमेश्वर आपेगा मन के हाडाई। चोयाकी जो चीजो कोरो गा नजर गेन कास होय, देटेन परमेश्वर गा मेरान उजळातिंज होय।” 16जब टाएन यूहन्ना बपतिस्मा जिऊ लठ्ठाका हेन, मेटे टाएन मूसा गा नियम एठा परमेश्वर गा कोनेटे मंडीमिठाच गा संदेश कोरा घागल मिठाच डा लेकिन नका परमेश्वर गा राज्य अच्छा खाबोर गा प्रचार डाएवा होय एठा हरेक जेकाभी तलान सेने टे खुशी डाऊवा होय। 17बदळा एठा पृथ्वी गा नशोऊबा परमेश्वर मूसा गा नियम टे म्या बिंदू गा उठरू टे असान होय। 18“जो जेकाभी खुद गा जापाए के आराटे दूसरा टे ब्याह दडावा होय, देटेन आनोवा दडावा होय, जो जेकाभी येनोगो आराके जापाएटे ब्याह दडावा होय, देटेन भी आनोवा दडावा होय।”

लाकपति कोरो एठा गिरबो लाजर

19“म्या लकपाती कोरो डा जो घोनेच महंगा कपळे उरी डा एठा सेबाई टे अच्छा आटाजोम डा। 20-21लेकिन लाजर जीमू गा म्या गिरबो डा दियेन लकपाती कोरो उरा गा फाटक कोनेन सेगेच डा। डीच लकपाती कोरो गा आटाजोम गा टेबाल टे बोचोके सोकळा बचातिंजे गा तुकळा जोम गा उम्मीद दडा लक्के डा। एठा दियागा कोम्बोर गाओ टे उगुरके डा, एठा सिटाकु डीचके जजाल घल्जी हेजेका लक्कू डा। 22एठा येनोगो डायेन कि देटेन गिरबो गोयेन डा, एठा स्वर्गदूतकु नी डीचके साटे अब्राहम गा सेंग्गोन थंदळ घल्जी अदिरकेनेच, म्या लकपाती कोरो भी गोयेन एठा गळातिंज्केनेच। 23पातल गा ताखलिफबेन बोचोयेन मिठाच लकपाती कोरोनी लेंक्की टेका डोके कि लाजर अब्राहम गा मेरान सुबानके होय। 24डीचनी खाट्टेका हाकोटे मंडीके, हे बाटे अब्राहम इंजा लिंजेन दया डाटे, लाजर के कुल्लेच, ताकी देटेन हेजा बोटो गा सेंडा डा गेन ओलाटे इंजा लांज के ओलाकी, चोयाकी इंज इनी सिंगेल गेन खाट ताखलिफ सेहेने लक्के। 25पेनो अब्राहम नी मंडीके, ‘हे कोण यादोए जब आम पृथ्वी लिंजेन, आमेननी अमा जिंदगीन अच्छा चीजो घाटाएन होय, एठा लाजरेन सेबाई बुरा चीजो घाटाएन, पेनो नका देटेन येटेन शांती घाटाऊ लक्के होय, एठा आम खाट ताखलिफबेन के होय। 26इनी सेबाई बातो गा अलावा आलेगा एठा आपेगा तलान म्या खाट खाई ठहरातिंज्के होय ताकी जो येटे टे डी पारेन अमा मेरान सेने टासो डीच बान सेने एठा न जेका देटे टे इनी पारेन बान हेजु।’ 27लकपाती कोरोनी मंडीके, ‘हे बाटे अब्राहम इंज अमाटे बिनती दडावाकी, आम लाजर के इंजा बाटे गा उरान कुलेच। 28चोयाकी इंज चाहतावाकी देटेन सेने एठा इंजा डाईकु के इनी बातो चेतावनी जे, येनोगो बाकी डाऊ कि इंकुभी इनी ताखलिफबेन हेजे।’ 29अब्राहम नी डीचके मंडीके, दिकुगा मेरान चेतावनी जिऊ घल्जी मूसा गा नियम एठा परमेश्वर गा कोनेटे मंडीमिंकू गा पुस्तक होय। दिकुन डीचके आजोम होना एठा दियागा पालान दडा होना। 30लकपाती कोरोनी मंडीके, ‘बाने, हे बाटे अब्राहम, पेनो अगर जेका गोएन मिठाच जाटे दिकुगा मेरान सेने, एठा दिकुके चेतावनी जे मेटे दिकु इकुगा पापो घल्जी पश्चाताप डाएवा।’ 31अब्राहम नी दियाटे मंडीके, ‘जब दिकु मूसा गा नियम एठा परमेश्वर गा कोनेटे मंडीमिंकू गा हुकूम बान आजोम मेटे गोएन मिंकूटे जेकाभी जीटाएन टासो तोभी दिया लिंजेन विश्वास बान दोडो।’”

Currently Selected:

लूका 16: GOKNT

Highlight

Copy