यूहन्ना 5

अळोतीस साल गा बिमार मिठाच के ससाजा

1इनी बातो गा बादोन यीशु यहूदी कुरकू गा तिवार टेमो यरूशलेम शहर गेन ओले। 2यरूशलेम शहर गेन मेंडाकू फाटक गा मेरान तलाव डा, डीके इब्रानी भाषा गेन बैतहसदा मेंबा होय येटेन मोनाई पदळी दराजोटे बोचोके मेना डा। 3इंकून घोनेच बिमार, अंधळा, लंगळा एठा लाखवा गा रोगो डा दिकु डा गा ओखेंज गा असान देटेन सोटका थंदळ डा। 4चोयाकी ठहरातिंज्के टेमोन स्वर्गदूत तलाव गेन आगुरुटे डा ओखेंजे डा। डा ओखेंज गा बादोन जो जेकाभी तलाव गेन पेला मु डा देटेन साजाऊ डा, चाहे दियागा तुनिकाभी बिमारी टासो। 5देटेन म्या कोरो डा, जो अळोतीस साल टे बिमारीन सोटके डा। 6यीशु नी डीचके सोटका धोटे एठा इनी चिनाटे कि देटेन घोनेच दिन टे इनी हाल गेन सोटके होय, दियाटे कोम्बाराके, “चोच आम सजाऊ चाहतावा?” 7डी बिमारी कोरोनी डीचके जवाब जीके, “हे स्वामी, इंजा मेरान तुनिका कोरो बाऊ कि जब डा ओखेंजेकी मेटे इंज्के तलाव गेन अगुरुन इंजागा मदत डाए, इंज तलाव गेन आगुरू गा कोशिश दडा मेना, पेनो हमेशा जेका इंजा पेलाका देटेन आगुरुवा होय।” 8यीशु नी दियाटे मंडीके, “बिडे, अमागा चटाई टूले एठा सेंद्राए।” 9देटेन कोरो तुरुटो साजाएन एठा हेजा चटाई टूलटे सेंद्रा लज्जे। 10जो दिन इनी डाएन डी परमेश्वर गा चोखरा दिन डा। इनिघल्जी यहूदी अगुवाकु दियाटे जो साजाएन डा, मंडे लज्जे, “टैंज परमेश्वर गा चोखरा दिन होय मूसा गा नियम गा रोंगो आमेन अमा चटाई तुटूल साही बाने।” 11डीचनी दिकुके जवाब जीके, “डीच इंज्के सजाकेमी डीचकानी इंजाटे मंडीके, ‘अमा चटाई टूले डो सेन्द्रा टे सेने।’” 12दिकुनी दियाटे कोम्बाराके, “देटेन तुनी कोरो होय, डीचनी अमाटे मंडीके, ‘अमा चटाई टूले डो सेंजू।’” 13पेनो जो साजाएन डा देटेन बान हाडाई डा कि देटेन जे होय। चोयाकी गर्दी टाकु गा वोजीटे यीशु डी जगा टे म्याधेळेनजे डा। 14इनी बातो बादोन देटेन यीशु के यरूशलेम गा मंदिर गा दरोमेन घाटाएन मेटे यीशु नी दियाटे मंडीके, “डोगे आमनी साजाएन होय, डाबोलटे पापो बाकी दडा, येनेगो बाकी डाऊ येनेटे तुनिका खाट मुसीबात अमा मठान हेयु।” 15डीचनी कुरकू तलान ओलेडो यहूदी अगुवाकु टे मंडीके कि डीचनी इंज्के सजाकेमी देटेन यीशु होय। 16इनी वोजीटे यहूदी अगुवाकु यीशु के ताखलिफ जिऊ लज्जे, चोयाकी देटेन येनेगो-येनेगो कामय परमेश्वर गा चोखरा दिन गेन दडा डा। 17एने लिंजेन यीशु नी दिकुके जवाब जीके, “इंजा बाटे परमेश्वर हमेशा कामय दडावा होय एठा इंजेन भी कामय दडा होना।” 18चोयाकी यीशु नी इनी शब्द मंडीके, यहूदी अगुवाकु येठाभी ठायका डीचके घोगेच गा कोशिश लज्जे, चोयाकी देटेन न बस परमेश्वर गा चोखरा दिन गा विधी के टुक्काएवा, बनकी परमेश्वर के हेजा मेंटो मंडीटे हेज खुदके परमेश्वर गा रोंगो मेन डा।

कोण गा अधिकार

19एने लिंजेन यीशु नी दिकुटे मंडीके, “इंज आपेटे सच्चो-सच्चो मंडीवा मेना, कोण खुद टे चोचका बान दडा। देटेन डीचका डाएवा होय, जो देटेन बाटे के दडा डोगेवा होय, चोयाकी जो चोचकाभी बाटे दडावा कोण भी डीका दडावा।” 20इनिघल्जी बाटे कोणटे टे प्यार दोडोवा होय एठा जो-जो कामय देटेन आम दडावा होय, देटेन सेबाई डीचके घालेवा होय। बाटे इंकूटेभी खाट कामय डीचके घालेवा ताकी आपे अचम्बो डाए। 21चोयाकी जैसा बाटे गोएन कुरकू के डाबोलटे जीटाकुवा होय, डेनेगोका कोण भी दिकुके चाहतावा होय दिकुके डाबोलटे जीटाकुवा होय। 22-23चोयाकी जो रोंगो सेबाई कुरकू बाटे परमेश्वर के आदर जेबा होय। डीका रोंगो दिकु इंजा मतलब कोण के आदर जेबा होय। बाटे परमेश्वर नी इंज जो दियागा कोणटे मेना न्याय दडा गा सेबाई हाक जिले। अगर जेका इंज्के आदर बान जिऊ मेटे देटेन बाटे परमेश्वर के भी आदर बान जिऊ, डीचनी इंज्के कुल्लेमी होय। 24इंज आपेटे सच्चो-सच्चो मंडीवा मेना, जो इंजा वचन आजुमटे इंजा कुल्के मिठाचजा लिंजेन विश्वास दोडोवा होय, हमेशा गा जीवन दियाका होय एठा डीचके दण्डो बान जिऊ पेनो दिकु जेलोमका गुजूटे बचातिंजे होय एठा पेलाटेका उनाई जीवनेन मोएन होय। 25इंज आपेटे सच्चो-सच्चो मंडीवा मेना, डी टेमो हेजेवा होय एठा नका होय, डेन गोएन मिंकू परमेश्वर गा कोण आवाज अजोमेबा एठा जो आजोम्बा दिकु हमेशा घल्जी जीटाऊवा। 26चोयाकी जो रितो टे बाटे हेज खुदेन जीवन दोडोवा होय, डीका रितो टे डीचनी कोण के भी इनी हाक जीके होय कि आम खुदेन जीवन डोए। 27चोयाकी इंज कोरो गा कोण मेना, बाटे परमेश्वर नी इंज्के सेबाई कुरकू गा न्याय दडा हाक जिले होय। 28एनेटे अचम्बोऊ बाकी, चोयाकी टेमो हेजेवा होय कि इनी सेबाई कुरकू जो गोएन होय दियागा आवाज आजुमेबा एठा जीटाटे टेंगेंबा। 29जेगा मेरान अच्छा जीवन डा, दिकु हमेशा गा जीवन घटाऊ जीटाऊवा एठा दिकु जो बुराई गेन जीवन बिबातातिंज डा, दिकु दोषी ठहरातिंजू घल्जी जीटाऊवा।

यीशु गा बारेन गवाही

30“इंज खुद टे चोचकाभी बान दडा, इंज कुरकू गा न्याय डेनोगोका दडावा जैसा बाटे परमेश्वर इंज्के दिकुगा न्याय दडा गा मंडीवा होय एठा इंजा न्याय सच्चो होय। चोयाकी इंज खुद गा इच्छा बाने, पेनो इंजा कुकूल मिठाच गा इच्छा चाहतावा मेना। 31अगर इंज खुद का इंजा गवाही जे टासो, मेटे इंजा गवाही मन्य बाऊ। 32म्याखोम एठा होय जो इंजा बाटे होय जो इंजा गवाही जिऊवा होय एठा इंज हाडाई मेना कि इंजा जो गवाही देटेन जेबा होय डी सच्चो होय। 33आपेनी यूहन्ना बपतिस्मा जिऊमिठाच गा मेरान इंजा बारेन कोकाम्बरा घल्जी खाबोर जिऊमिठाचके कुल्केनेच एठा डीचनी सच्चाई गा गवाही जीके होय। 34पेनो इंज खुद गा बारेन कोरो गवाही बान चाहता। फिरभी इंज्नी आमके डी गवाही गा बारेन घाल्के होय जो यूहन्ना नी जिले डा ताकी आपेन उध्दार घाटायु। 35यूहन्ना म्या दिवा रोंगो जुलू एठा चमकातिंजू डा एठा अदा टेमो टाएन दियागा उजाला गेन खुशी ममानातिंज अच्छा लगातिंजे। 36पेनो इंजा मेरान यूहन्ना बपतिस्मा जिऊमिठाच गा गवाही टे खाट गवाही होय। देटेन कामय जो बाटे नी इंज्के पुपरा घल्जी जिले होय, डीका इंजा बारेन गवाही जिऊवा होय। जो कामय इंज दडा लक्के मेना देटेन कामय इंजा गवाही जेबा कि बाटे नी इंज्के कुल्लेमी होय। 37एठा बाटे डीचनी इंज्के कुल्लेमी होय डीचकानी इंजा गवाही जीके होय। आमनी न चोलाकाभी दियागा आवाज अजोम्के होय एठा न डीचके अम्मा-सम्मा डोकेनेच होय। 38दियागा शिक्षा के मजबूत बान दोडो चोयाकी आपे इंजा लिंजेन विश्वास बान दोडो, डीचके कुल्केनेच होय। 39आपे पवित्र ग्रंथ गेन पपाळातिंजबा होय, चोयाकी समझातिंजेवा कि डेन हमेशा गा जीवन घाटाऊवा होय। एठा इनी पवित्र ग्रंथ इंजा का बारेन गवाही जिऊवा होय। 40फिरभी आपे हमेशा गा जीवन घटाऊ घल्जी इंजा मेरान हेजे बान चाहतावा। 41इंज कुरकू टे आदर बान चाहता। 42आपे आपेगा मनेन परमेश्वर टे प्यार बान दडा। 43इंज इंजागा बाटे परमेश्वर गा हाक टे हेन मेना, एठा आपे इंज्के मनेन कोम बाने। अगर जेका दूसरा हेजाका हाक टे हेजे, मेटे डीचके मनेन नेज्बा। 44आपे इंजा लिंजेन विश्वास बान दोडो, चोयाकी आपे इनिज दियाटे आदर चाहतावा एठा आपे म्याका रोंगो परमेश्वर टे आदर घटाऊ गा कोशिश बान दडा। 45इनी बाकी ससामझातिंज कि इंज बाटे सम्मान अमा लिंजेन आनोवा टोकाएवा। मूसा गा नियम लिंजेन आपेनी आसा डोकी होय डीचका आपे लिंजेन आनोवा टोकाएवा। 46अगर आपे मूसा लिंजेन दोडोवा, मेटे इंजा लिंजेन भी विश्वास दोडोवा, चोयाकी डीचनी इंजा बारेन ओल्के होय। 47पेनो आपे दियागा ओल्के बातो लिंजेन विश्वास बान दोडो, मेटे जो इंज मंडीवा मेना आपे पक्का रुपोटे एने लिंजेन विश्वास बान दोडो कि इंज जो मंडीवा मेना।”

Currently Selected:

यूहन्ना 5: GOKNT

Highlight

Copy