यूहन्ना 3

यीशु एठा नीकुदेमुस

1फरीसि कुरकू तलाटे नीकुदेमुस जीमू गा म्या कोरो डा, जो यहूदी अधिकारीकु तलाटे म्याखोम डा। 2डीचनी रातो यीशु गा मेरान हेंडो दियाटे मंडीके, “हे गुरु, आले मालूम होय कि परमेश्वर नी आमके आलेके इथू घल्जी कुल्लेमी होय। चोयाकी तुनिका चिन्हा या अचम्बो कामय के जो आमनी घालेवा होय, अगर परमेश्वर दियागा सेंग्गोन बान टासो, मेटे बान घागल।” 3यीशु नी डीचके जवाब जीके, “इंज अमाटे सच्चो-सच्चो मंडीवा, अगर जेका डाबोलटे उनाई जनम बान सा, मेटे देटेन परमेश्वर गा राज्यके डोगे बान साकता।” 4नीकुदेमुस नी दियाटे मंडीके, “कोरो जब सानाएन कि टोनोगो जनम सावा? पक्का रुपोटे म्या कोरो दूसरा बार डाऊ घल्जी हेजा गा आंटे गा लाजेन डाबोलटे बान सेने!” 5यीशु नी जवाब जीके, “इंज आपेटे सच्चो-सच्चो मंडीवा, जब टाएन तुनिका कोरो डा एठा आत्मा टे बान जनम सा मेटे टाएन देटेन परमेश्वर गा राज्य मु बाने। 6म्या कोरो गा जनम कोम्बोर गा रुपोटे आंटे-बाटे व्दारा डाऊवा होय, पेनो आत्मिक रुपोटे डी आत्मा टे जनम सावा होय। 7अचम्बो बाकी दडा, कि इंज्नी अमाटे मंडीके इनी परमेश्वर गा इच्छा होय, ‘आमेन उनाई जनम सा जरुरी होय।’ 8कोयो तुगान चाहतावा डीगान सेंद्रवा, आम डेगा आवाज आजुम्बा होय, पेनो बान हाडाई कि तुंगाटे हेजेवा तुंगान सेनेवा होय, जो जेकाभी पवित्र आत्मा टे जनम सावे डीच येनेगोका होय।” 9नीकुदेमुस नी दियाटे कोम्बाराके, “इनी बातो चोथान टे डाऊवा होय?” 10इनी आजुमटे यीशु डीचके जवाब जीके, “आम इस्राएल देशो गेन म्या खाट गुरूजी होय। आमेन आए टेमोन इनी बातो के समझातिंजू होना।” 11इंज अमाटे सच्चो-सच्चो मंडीवाकी कि आले जो हाडाई देटेन मंडीवा एठा डीचके आलेनी डोकेनेच होय दियागा गवाही जेबा होय एठा आले जो मंडीवा होय, आपे डे लिंजेन विश्वास बान दडा। 12जब इंज्नी आपेटे पृथ्वी लिंजेन डाऊ मिनी बातोनौर मंडीके एठा आपे विश्वास बान दोडो, मेटे अगर इंज आपेके स्वर्गीय मुद्दा मंडे, मेटे डाबोलटे आपे विश्वास बान दोडो। 13जेका स्वर्गेन बान सेंडुका सिर्फ कोरो गा कोण स्वर्गेन होय। 14जो रोंगो टे मूसानी सुनसान जगान नी पित्रा गा बिंजके मठान पेळेच्केनेच, डीका रितो टे जरुरी होय कि कोरो गा कोण के भी मठान पेळेजकोम्बा। 15ताकी जो जेकाभी दिया लिंजेन विश्वास डोएबा नाशोऊ बाने पेनो हमेशा गा जीवन घटायु। 16“चोयाकी परमेश्वर नी दुनिया गा कुरकू टे येनेगो प्यार डोके कि डीचनी हेजा म्याका कोण के जीकेनेच, ताकी जो जेकाभी दिया लिंजेन विश्वास डोएबा देटेन नशोयु बाकी पेनो हमेशा गा जीवन घटायु। 17चोयाकी परमेश्वर नी हेजा कोण के दुनिया गेन इनिघल्जी बान कुलडूका डा, कि दुनिया कुरकू के दण्डो गा हुकूम जे, पेनो इनिघल्जी कुल्केनेच कि दुनिया गा कुरकू दियागा द्वारा उध्दार घटायु। 18जो परमेश्वर गा कोणटे लिंजेन विश्वास दोडोवा होय, दिया लिंजेन दण्डो गा हुकूम बान डाऊ, पेनो जो दिया लिंजेन विश्वास बान दोडो, देटेन दोषी ठहरातिंज्के होय। चोयाकी डीचनी परमेश्वर गा म्याका कोणटे जीमू लिंजेन विश्वास बान दोडुका। 19एठा दण्डो गा हुकूम गा वाजा इनी होय कि उजाला दुनियान हेन होय, पेनो कोरोकु नी अंधराके उजाला येठाभी अच्छा मेंके चोयाकी दिकुगा कामय बुरा डा। 20चोयाकी जो जेकाभी बुराई दडावा होय, देटेन उजाला टे दुश्मनी दोडोवा होय एठा उजाला गा मेरान बान हेजे, चोयाकी दिकु बान चाहता कि बुरा कामय के टिपीके। 21पेनो जो सच्चाई टे सेंद्रवा होय देटेन उजाला गा मेरान हेजेवा होय, ताकी दियागा कामय डायु, कि दिकु परमेश्वर गा हुकूम गा पालन डाएवा होय।”

यीशु गा बारेन यूहन्ना गा गवाही

22येनेगा बादोन यीशु एठा दियागा चेलाकू यहूदिया जिल्हान हेन। डी देटेन दिकुगा सेंग्गोन थंदळ टे दिकुके बपतिस्मा जीके। 23यूहन्ना के आए टाएन जेलेन बान केटडुका डा। दिकु ऐनोन गाँव गेन जो सामरीया जिल्हा गेन शालेम पूरा गा मेरान डा। एटेन घोनेच डाका डा एठा कुरकू यूहन्ना टे बपतिस्मा सा घल्जी देटेन हेज लक्के डा। 24चोयाकी यूहन्ना डी टेमो टाएन जेलेन बान येंडाडुका डा। 25देटेन यूहन्ना गा चेलाकू गा तुनिका यहूदी कुरकू गा सेंग्गोन धर्मिक रिती रिवाज रोंगो टी अबुंज गा बारेन हिंज-मान डायेन। 26यूहन्ना बपतिस्मा जिऊमिठाच गा चेलाकूनी यूहन्ना गा मेरान हेंडो दियाटे मंडीके, “हे गुरु, जो कोरो यरदन गडा गा पूर्व गा कोनेन होय, दियागा बारेन आमनी मंडीके डा। डोगे, देटेन बपतिस्मा जिऊवा होय एठा सेबाई कुरकू दियागा मेरान हेजेवा होय।” 27यूहन्ना नी जवाब जीके, “जब टाएन कोरोकु के स्वर्ग टे बान जिऊ मेटे टाएन देटेन चोचका बान घाटाऊ। 28आमनी खुद का इंज्के मंडीटे आजुम्के कि इंज्नी चोच मंडीके, ‘इंज मसीह बाने, पेनो दियागा पेला कुल्केमी मेना।’” 29नवरा डीचका होय जो निवरी गा सेंग्गोन ब्याह दडावा होय। पेनो नवरा सेंग्गोन दियागा सोपतीकु दियागा आवाज आजुमटे ठायका खुशोऊवा होय, डीका रोंगो इंजा दिल खुशीटे भेट्टेन होय। 30परमेश्वर गा इच्छा गा रोंगो येटेन जरुरी होय कि डीच खाडू लाक्कू एठा इंज सनिवा लाक्कू। 31“जो स्वर्ग टे हेजेवा होय, देटेन सेबाईकु टे खाट होय, जो पृथ्वी टे हेजेवा होय, डीच पृथ्वी गा होय एठा पृथ्वी गा बातो मंडीवा होय। जो स्वर्ग टे हेजेवा होय देटेन साबाईकु गा मठान होय। 32डीचनी जो चोचकाभी डोके होय एठा आजुम्के होय, डेगाका गवाही जेबा होय। थोळासा कुरकू दियागा गवाही मनेन नेवा होय। 33पेनो जेनी दियागा गवाही मनेनके डीचनी इनी बातो के मानतिंजे कि परमेश्वर सच्चो होय। 34चोयाकी डीचके परमेश्वर नी कुल्केनेच होय देटेन परमेश्वर गा बातो मंडीवा होय। चोयाकी देटेन पवित्र आत्मा सेबाई रेंग्गो टे जेबा होय। 35बाटे परमेश्वर कोणटे टे प्यार दोडोवा होय एठा डीचनी सेबाई चीजो दियागा टीन जीके होय। 36जो परमेश्वर गा कोणटे लिंजेन विश्वास डोएबा होय, देटेन हमेशा गा जीवन दियागा होय। पेनो जो कोण के मनेन नेज बान होय, देटेन हमेशा गा जीवन गा अनुभाव बान दडा पेनो परमेश्वर गा दण्डो दियागा लिंजेन आरुका थंदळवा।”

Currently Selected:

यूहन्ना 3: GOKNT

Highlight

Copy