यूहन्ना 1

सुरवात गेन वचन डा

1सेबाई दुनिया गा आरुटे पेला वचन डा। एठा वचन परमेश्वर गा सेंग्गोन डा एठा वचन परमेश्वर डा।, 2देटेन सुरुवात टेका परमेश्वर गा सेंग्गोन डा। 3परमेश्वर नी वचन गा द्वारा सेबाईका आरुके एठा जो चोचकाभी इनी दुनिया गेन आरुके डा, सेबाईका वचन गा द्वारा का आरुके। 4डीका वचन सेबाई जीवन पाजेर होय एठा देटेन सेबाई कुरकू के उजाला जेबा होय। 5उजाला अंधरा गेन चमकातिंजूवा एठा अंधरा डीके बान हिरिजदूका। 6परमेश्वर नी यूहन्ना जीमू गा म्या कोरो के कुल्केनेच। 7जो कुरकू के उजाला गा बारेन गवाही जिऊ गा घल्जी हेन डा। ताकी सेबाईकु दियागा गवाही गा द्वारा विश्वास डाए। 8यूहन्ना खुद मेटे उजाला बान डा, पेनो देटेन डी उजाला गा बारेन गवाही जिऊ हेन डा। 9देटेन जो सच्चो उजाला होय, हरेक कोरो के उजालएच्बा होय, देटेन दुनियान हेजेमिठाच डा। 10वचन दुनिया गेन डा, एठा दुनिया दियागा वोजीटे हारुके, पेनो दुनिया गा कुरकू नी डीचके बान चिनाडुका। 11देटेन हेजा देशोन हेके एठा दियागा हेजा कुरकू नी डीचके मनेन डुका बाने। 12पेनो जोभी कुरकू नी डीचके इकुगा मेंके, एठा दियागा लिंजेन विश्वास डाके। दिकु सेबाईकु के डीचनी परमेश्वर गा कोणकुटे आरु गा हाक जीके। 13दिकु न मेटे पचना टे, न कोम्बोर गा इच्छाटे, न कोरो गा इच्छाटे, पेनो परमेश्वर नी खुद दिकुके हेजा कोणकुटे ठहरातिंजकेकु। 14डी वचन कोरो आरोएन, देटेन कृपा एठा सच्चाई टे भेट्टी टे आलेगा तलान थंदळके। आलेनी दियागा एगो महिमा डोके, डेंगोका परमेश्वर बाटे कोनेटे हेके मिनी म्याका कोण गा महिमा। 15यूहन्ना बपतिस्मा जिऊमिठाच नी दियागा बारेन गवाही जीके एठा हाकोटे मंडीके, “इनिज डिच्का होय, दियागा बारेन समझातिंजटे घाल्के, कि जो इंजागा बदोन हेजे लक्के होय, देटेन इंजाटे खाट होय, चोयाकी देटेन इंजाटे पेलाटेका टाकूनेच डा।” 16चोयाकी दियागा भेट्टी टे आले सेबाईकु नी कृपा लिंजेन कृपा घाटाएन। 17इनिघल्जी कि मूसा गा नियम द्वारा जीके डा, पेनो परमेश्वर नी यीशु मसीह गा वोजीटे कृपा एठा सच्चाई टिपीके। 18परमेश्वर के जेकानी भी चोलाकभी बान दोडुका, सिर्फ एकला कोण जो बाटे परमेश्वर मेरानके होय, डिच्का नी परमेश्वर के आले लिंजेन वोट्केनेच।

यूहन्ना बपतिस्मा जिऊमिठाच गा गवाही

(मत्ती 3:1-12; मरकुस 1:1-8; लूका 3:1-9,15-17)

19यूहन्ना बपतिस्मा जिऊमिठाच गा गवाही येटेन होय, कि जब यहूदी अगुवाकु नी यरूशलेम शहर टे यहूदी याजककु के एठा मंदिर गा मदत दडा लेवी जाटो कुरकू दियाटे इनी कोकाम्बारा गा घल्जी सेंग्गोन हेन, “आम जे होय?” 20यूहन्ना नी जवाब जिऊ गेन इंकार बान दडुका परंतु डीचके दिकुके सपा रुपोटे मंडीके, “इंज मसीह बाऊ मेना।” 21मेटे दिकुनी दियाटे कोम्बाराके, “मेटे आम जे होय? चोच आम परमेश्वर गा कोनेटे मंडीमिठाच एलिय्याह होय?” डीचनी मंडीके, “इंज बाने मेना।” “मेटे चोच आम परमेश्वर गा कोनेटे मंडीमिठाच होय?” डीचनी जवाब जीके, “बाने।” 22मेटे दिकुनी दियाटे कोम्बाराके, “डाबोलटे आम जे होय? ताकी आले आलेगा कुकूल मिंकूके जवाब जेबा। आम आमगा बारेन चोच मेंबा होय?” 23डीचनी मंडीके, डेनोगोका परमेश्वर गा कोनेटे मंडीमिठाच यशायाह नी मंडीके, “इंज सुनसान जगान म्या खाबोर जिऊमिठाच यूहन्ना गा आवाज आजुमू लक्के होय, प्रभु गा हेजे गा घल्जी कोरा तैयारे एठा दिया घल्जी सळक्को सीधाए मेना डे लिंजेन डीच सेंदरावा होय।” 24दिकु फरीसि कुरकू गा कोनेटे कुलके मिंकू डा। 25दिकुनी दिकुटे इनी प्रश्न कोम्बाराके, “अगर आम मसीह बान होय, एठा परमेश्वर गा कोनेटे मंडीमिठाच एलिय्याह बान, एठा परमेश्वर गा कोनेटे मंडीमिठाच बान होय, मेटे बपतिस्मा चोया जिऊवा होय?” 26यूहन्ना बपतिस्मा जिऊमिठाच दिकुके जवाब जीके, “इंज्नी मेटे डा टे बपतिस्मा जिऊवा मेना, पेनो आपे तलान म्या कोरो टेंगेनके होय, डीचके आपे बान हाडाई। 27यानेकी इंजा बादोन हेजेमिठाच होय, दियागा बुट्टा गा दोरा इंज कोखला गा लायको बाने।” 28इनी बातो यरदन गडा गा पार बैतानिय्याह पुरान डायेन, देटेन यूहन्ना बपतिस्मा जिऊमिठाच कुरकू के बपतिस्मा जिऊ डा।

परमेश्वर गा पाठो

29दूसरा दिन यूहन्ना नी यीशु के हेज कोनेन हेजे धोटे मंडीके, “डोगे, येटेन परमेश्वर गा पाठो, जो दुनिया कुरकू गा पापो के सेगेवा होय। 30येटेन डीचका होय, दियागा बारेन इंज्नी मंडीके डा, कि म्या कोरो इंजा टाऊटे हेजेवा होय, जो इंजाटे ठायका खाट होय, चोयाकी देटेन इंजाटे पेलाका डा। 31चोयाकी इंज बान हाडाई डा, कि देटेन मसीह डा, पेनो इनिघल्जी इंज इस्राएली कुरकू के इनी घागल घल्जी हेन देटेन जे होय, इंज डा टे बपतिस्मा जिऊ लठ्ठाका हेन।” 32यूहन्ना इनी गवाही जीके, “इंज्नी पवित्र आत्मा के कबूत्तर रुपोन बदळा टे हेजे टे डोके होय, आगुरुटे डोके होय एठा यीशु लिंजेन रुकातिंजे। 33चोयाकी इंजेन बान मालूम डा कि देटेन मसीह डा, पेनो डीचनी इंज्के डा टे बपतिस्मा सा घल्जी कुल्केमी डीचकानी इंजाटे मंडीके, ‘जे लिंजेन आम पवित्र आत्मा के आगुरुटे एठा थंदळ टे डोके, डीचका पवित्र आत्मा टे बपतिस्मा जेबा होय।’ 34एठा इंज्नी डोके एठा इंज आपेटे सच्चो मंडीवा मेना कि इनिज्का परमेश्वर गा कोणटे#1:34 परमेश्वर गा कोणटे "परमेश्वर गा कलमके मिठाच" म्या मुख्या रुपोटे दर्शातिंजके, होय।”

यीशु गा पेला चेला

35दूसरा दिन डाबोलटे यूहन्ना बपतिस्मा जिऊमिठाच एठा दियागा चेलाकू तलाटे बर्खिंज चेलाकिंज टेंगेनके डा। 36डी टेमो डीचनी यीशु के डोकेनेच जो चेल्के डा एठा हेजा चेलाकू टे मंडीके, “डोगे, येटेन परमेश्वर गा पाठो कोंटे होय।” 37मेटे डी बरी भी चेलाकिंज दियागा आजुमटे यीशु गा टाऊटे ओले। 38यीशु नी आंगुरटे एठा दिकुके टाऊटे हेजे टे धोटे दिकुटे मंडीके, “आपे जेके घागटा लक्के?” दिकुनी दियाटे मंडीके, “हे गुरु, आम तोनेन थंदळवा होय?” 39यीशु नी दिकुटे मंडीके, “बो, हेजे डो डोगे।” मेटे दिकुनी हेंडो दियागा थंदळ गा जागा डोके एठा डी दिन दियाका सेंग्गोन थंदळके। डी टेमो अंदाजोटे डया गा उफुन बजाके डा। 40दिकिंज बर्खिंज तलाटे जो यूहन्ना गा बातो आजुमटे यीशु गा टाऊटे ओले डा, म्या शमौन पतरस गा डाईटे अन्द्रियास डा। 41अन्द्रियास नी पेला हेजा सग्गा डाईटे शमौन पतरस टे मिलातिंजटे दियाटे मंडीके, “आलेन मसीह (मतलब परमेश्वर सुनूम लेमेटके) घटाएन।” 42अन्द्रियास, शमौन के यीशु गा मेरान सालेनेच। यीशु नी डीच कोने धोटे मंडीके, “आम योना #1:42 योना जो पतरस गा बाटे होय, डीच परमेश्वर गा कोनेटे मंडीमिठाच “योना” टे अलग्गो होय, मत्ती 16:17 गा कोंटे शमौन होय, आम कैफा मतलब पतरस मेंटो मंडेबा।”

फिलिप्पुस एठा नतनएल के हाको

43दूसरा दिन यीशु नी गलील जिल्हा गेन सेने गा निर्णय डाके एठा देटेन फिलिप्पुस मिलातिंजटे मंडीके, “इंजा चेला आरु घाल्जी इंजा टाऊटे हेजे।” 44फिलिप्पुस मेटे अन्द्रियास एठा पतरस गा पूरा गा बैतसैदा थंदळ मिठाच डा। 45फिलिप्पुस नी नतनएल टे मिलातिंजटे दियाटे मंडीके, “आलेन देटेन कोरो घटाएन होय, दियागा बारेन मूसा गा नियम गेन एठा परमेश्वर गा कोनेटे मंडीमिठाच नी ओल्के डा। देटेन नासरत शहर टे यूसुफ गा कोंटे यीशु होय।” 46नतनएल नी दियाटे कोम्बाराके, “तुनिका अच्छा चीजो भी नासरत पुराटे बान ओलेट।” फिलिप्पुस दियाटे मंडीके, “बो डो डोगे।” 47यीशु नी नतनएल के हेज कोनेन हेजे टे धोटे दियागा बारेन मंडीके, “डोगे, इनिज सच्चो इस्राएली कोरो होय, इनीजेन तुनिका खोटो बाऊ होय।” 48नतनएल नी दियाटे कोम्बाराके, “आम इंज्के चोथान टे हाडाई होय?” यीशु नी जवाब जीके, “येनेटे पेलाकी फिलिप्पुस नी आमके हाकोलेमी, जब आम अंजीर गा सिंज गा इटान डा, मेटे इंज्नी आमके डोकेमी डा।” 49नतनएल डीचके जवाब जीके, “हे गुरु, आम परमेश्वर गा कोणटे होय, आम इस्राएल देशो गा राजा होय।” 50यीशु नी डीचके जवाब जीके, “इंज्नी जो अमाटे मंडीके, कि इंज्नी आमके अंजीर गा सिंज गा इटान डोकेमी इनिघल्जी आम विश्वास दोडोवा होय। आम येनेटे भी खापेट-खापेट अचम्बो कामय डोगेवा।” 51डाबोलटे यीशु नी मंडीके, “इंज आपेटे सच्चो-सच्चो मंडीवाकी कि आपे स्वर्ग खुल्लाका एठा परमेश्वर गा स्वर्गदूतकु के मठान सेने टे एठा कोरो गा कोण गा मठान आगुरुटे डोगेवा।”

Currently Selected:

यूहन्ना 1: GOKNT

Highlight

Copy