લુક 20

યહૂદીયાહાથી ઈસુવાલ સાવાલ

(માથ્થી 21:23-27; માર્ક 11:27-33)

1ઈસુ એને ચ્યા શિષ્ય પાછા યેરૂસાલેમ યેય પોઅચ્યા, એને જોવે તો દેવાળામાય હિકાડતો આતો એને પોરમેહેરા હારી ખોબાર આખતો આતો, તોવે મુખ્ય યાજક, મૂસા નિયમ હિકાડનારા ગુરુ એને આગેવાન ચ્યા ચ્યાપાય યેના. 2એને પુછા લાગ્યા, “તુલ યેં કામે કોઆહાટી તોપાય કાય ઓદિકાર હેય? કુંયે તુલ ઓહડા ઓદિકારાહાતે દોવાડયોહો?” 3તોવે ઈસુય ચ્યાહાન સાવાલ પુછીન જવાબ દેનો, “આંયબી તુમહાન યોક સાવાલ પૂછતાહાવ; ચ્યા તુમા માન જાવાબ દા. 4જોવે યોહાનાય લોકહાન બાપતિસ્મા દેના, તે કાય ચ્યા ઓદિકાર હોરગામાઅને પોરમેહેરાપાઅને કા માઅહા પાઅને?” 5તોવે ચ્યા ચ્યાહામાય વિચાર કોઆ લાગ્યા, કા હોરગામાઅને આખહુ તોવે, તો આમહાન આખરી કા, તોવે તુમહાય ચ્યાવોય કાહાનાય બોરહો થોવ્યો? 6એને જોવે આમા માઅહા પાઅને આખહુ તોવે કાય ઓઈ? લોક આપહાન દોગડાકોયન ઠોકી, કાહાકા લોક ઈ માનતા આતા કા, યોહાન બાપતિસ્મા દેનારો પોરમેહેરા પાયને યોક હાચ્ચો ભવિષ્યવક્તા આતો. 7એને ચ્યાહાય ઈસુવાલ જાવાબ દેનો કા, “આમા નાંય જાંઆજે કા યોહાન બાપતિસ્મા દેનારાલ લોકહાન બાપતિસ્મા દાંહાટી કુંયે દોવાડલો.” 8તોવે ઈસુય ચ્યાહાન આખ્યાં, તે “આંયબી તુમહાન નાંય જાવાબ દાંઉ કા, ઈ કામ આંય કોઅહા ઓદિકારાકોય કોઅહુ.”

ખારાબ કામે કોઅનારા ખેડુતાહા દાખલો

(માથ્થી 21:33-46; માર્ક 12:1-12)

9પાછો, ઈસુ બિજા દાખલા દેયન યહૂદીયાહા આગેવાનાહાઆરે વાત કોઆ સુરુ કોઅયા, “યોક માઅહાય ચ્યા રાનામાય દારાખા વાડી લાવી, પાછે ચ્યાય ચ્યા રાનાલ કોલહાક ખેડુતાહાન બાગે દેય દેના એને બિજા દેશા એછે બોજ દિહયા હાટી લાંબ પારદેશ નિંગી ગીયો. 10જોવે દારાખેં પાકના સમય યેનો, તે ચ્યા ચાકારાહામાઅને યોકાલ બાગે ખેડુતાપાય દોવાડયો, કા ચ્યાલ દારાખાહા વાડીયેમાઆને દારાખાહા કોલહાક ભાગ દેય. બાકી ખેડુતાહાય ચ્યાલ દોઇન માર દેનો, એને ચ્યાલ કાયજ નાંય દેના એને પાછો દોવાડી દેનો. 11પાછો વાડયે માલિકાય યોકબીજા ચાકરાલ ખેડુતાહાપાય દોવાડયો; એને ચ્યાહાય ચ્યાલબી માર ઠોક્યો એને ચ્યાઆરે જુઠા કોઅયા એને ખાલી આથે દોવાડી દેનો. 12પાછા ચ્યાય તીજાલ દોવાડયો એને ચ્યાહાય ચ્યાલબી માર ઠોકીન એને ઘાયાલ કોઇન દોવાડી દેનો. 13તોવે દારાખાહા વાડી માલિકાય આખ્યાં, ‘આંય કાય કોઉ? આંય મા પાહાલ દોવાડીહી કાહાકા, ચ્યે એહેકોય જાંઅયા કા, મા પોહા ચ્યા દાક રાખી.’ 14જોવે ખેડુતાહાય ચ્યા પાહાલ યેતા દેખ્યા, તે ચ્યા ચ્યાહામાય વિચાર કોઅતા લાગ્યા, ‘ઓ તે વારસદાર હેય; ચાલા, એલાલ આપા માઆઇ ટાકતા, તોવે વારસો આપહે ઓઅઇ જાઅરી.’ 15એને ખેડુતાહાય ચ્યા પોહાલ દોઇન, વાડયે બાઆ કાડીન માઆઇ ટાક્યો. ચ્યાહાટી દારાખાહા વાડયે માલિક કાય કોઅરી? 16તો યેયન ચ્યા ખેડુતાહાન માઆઇ ટાકી એને દારાખાહા વાડી બીજહાન દેય દી” ઈ વોનાઈન ચ્યાહાય આખ્યાં, “પોરમેહેર એહેકોય નાંય કોઅરા જોજે.” 17ઈસુવે ચ્યાહા એછે એઇન, “પાછા ઈ કાય લોખલાં હેય: જ્યા દોગડાલ બાંદનારા કોડયાહાય નોકામ્યો ઠોરાવ્યેલ તોજ ખૂણામાઅનો મુખ્ય જાયો?” 18“જીં કાદાં માઅહું યા દોગડા ઉપે પોડી, ચ્યા ટુકડા-ટુકડા ઓઅઇ જાય; બાકી જ્યા ઉપે ઓ દોગાડ પોડી, ચ્યાલ તો બુપટા બોનાડી દી.”

મૂસા નિયમ હિકાડનારા ગુરુ એને મુખ્ય યાજક

19ચ્યેજ ગેડીયે મૂસા નિયમ હિકાડનારા ગુરુ એને મુખ્ય યાજક ચ્યાલ દોઈ દાં માગેત, કાહાકા ચ્યા હુમજી ગીઅલા કા ચ્યાય આમેહાટી ઓ દાખલો દેનો, બાકી ચ્યાહાન લોકહા બિક આતી. 20એને ચ્યા ઈસુવા બુલ હોદાહાટી ચ્ચા પાછલા પોડ્યા યાહાટી ચ્ચાપાય બેદયા દોવાડયા યાહાટી કા ન્યાયી હારકો રુપ લેયને ઈસુવા કોઅહીબી વાતોમાય ફસવીન ચ્યાલ રાજ્યપાલા આથામાય હોઅપી દેય. 21ચ્યાહાય ચ્યાલ ઈ પુછ્યાં, “ઓ ગુરુ, આમા જાંઅજેહે કા, તું સાદા ઠીક આખતોહો, એને પોરમેહેરા વાટ હાચ્ચાયે પરમાણે હિકાડતો બી હેય, એને કાદા પક્ષપાત નાંય કોઆ, બાકી પોરમેહેરા વાત હાચ્ચાયેકોય આખતો હેય, તે પાછે આમી આમહાન આખ. 22કાય કૈસરાલ કર દેઅના આમે નિયમા વિરુદ હેય?” 23ચ્યાય ચ્યાહા લુચ્ચાઈ જાઇન ચ્યાહાન આખ્યાં. 24“યોક દીનાર માન દા, ચ્યા ઉપે કા છાપ એને નાંવ હેય?” ચ્યાહાય આખ્યાં, “કૈસરા#20:24 કૈસરા ઈ યોકતા માઅહા નાંવ નાંય હેય બાકી રોમ શેહેરા મોઠો શાસકાલ કૈસર આખતેહે. .” 25ઈસુય ચ્યાહાન આખ્યાં, “તે જીં કૈસરા હેય, તી કૈસરાલ દા; એને જીં પોરમેહેરા હેય તીં પોરમેહેરાલ દા.” 26ચ્યા લોકહા આગલા, યે વાતમાય ચ્યાલ દોઈ નાંય હોક્યા બાકી ચ્યે વાતે જાવાબ વોનાયને ચ્યા નોવાય પામીન ઠાવકા રોય ગીયા.

પાછા જીવી ઉઠના એને વોરાડા દાખલો

(માથ્થી 22:23-33; માર્ક 12:18-27)

27તોવે સાદૂકી ટોળામાઅને કોલહાક લોક જ્યા ઈ આખતાહા કા મોઅલા માઅને પાછા જીવતા નાંય ઓઈ હોકેત ઈસુવાપાય યેયન પુછ્યાં, 28“ઓ ગુરુ, મૂસાય શાસ્ત્રામાય આમહે કોરે યોક નિયમ લોખલો હેય, જોવે યોકતા વોરાડ ઓઅલો માટડો મોઓઈ જાય, એને તો વોગાર પાહાહા થેઅયેલ છોડી જાહે, તોવે ચ્યા માટડા બાહા વિધવા થેઅયેઆરે વોરાડ કોઇ લા જોજે, એને યોક પોહા પૈદા કોઅરા જોજે, જો ચ્યા બાહા વારસદાર બોને. 29હાંત બાહા આતા, બોદહા મોઠા બાહાય વોરાડ કોય લેદા બાકી વોગાર પાહાહા તો મોઅઇ ગીયો. 30પાછે બીજે, 31એને તીજ વાત તીજા બાહા આરે જાઈ. એને બોદા હાંતી બાહાહા આરે જાઈ, ચ્યે થેઅયેય ચ્યાહામાઅને કાદાહાટીબી યોક પાહાહાન જન્મો નાંય દેનો. 32છેલ્લે, તી થેએબી મોઓઈ ગિઇ. 33એને આમી આમહાન આખ, આમી યે થેએયે વોરાડ હાંત માટડાઆરે ઓઅયા, તે જોવે મોઅલા માઅને પાછા જીવી ઉઠી, તોવે તી કા થેએ રોય? કાહાકા તી હાંતહ્યા થેએ આતી.” 34ઈસુવે ચ્યાહાન આખ્યાં, “યા કાળામાય પાહાહામાય વોરાડ ઓઅહે એને વોરાડ કોઇ દેતહેં, 35બાકી જીં કાદાં યા લાયકે ઓરી કા ચ્યા યુગા એને મોઅલા માઅને પાછા જીવતા ઓઅના મેળવી, ચ્યે નાંય વોરાડ કોઅરી. 36ચ્યે પાછે મોઅનારે બી નાંય, બાકી હોરગામાય રોનારા હોરગા દૂતહા હારકે રોય. એને મોઅલા માઅને પાછા જીવતા ઓઅવાથી પોરમેહેરા પોહેં બી બોની. 37બાકી યે વાતે બારામાય કા મોઅલે જીવતે ઓઅતેહે, મૂસાય બી જાડા કાહાની માય ખુલ્લાં કોઅયા કા તો પ્રભુલ આબ્રાહામા પોરમેહેર, એને ઈસાકા પોરમેહેર, એને યાકૂબા પોરમેહેર આખહે. 38પોરમેહેર મોઅલાહા નાંય બાકી જીવતાહા તો પોરમેહેર હેય કાહાકા ચ્યા પાહી બોદેજ જીવતે હેતેં.” 39તોવે ઈ વોનાયને મૂસા નિયમ હિકાડનારા ગુરુહુ માઅને કુંયે તેરુ ઈ આખ્યાં, “ઓ ગુરુ, તુયે હારાં આખ્યાં.” 40એને પાછે ચ્યાહાન સાવાલ પૂછના કાદા ઈંમાત નાંય ચાલી.

ખ્રિસ્ત દાઉદા પોહો કા દાઉદા પ્રભુ હેય

(માથ્થી 22:41-46; માર્ક 12:35-37)

41પાછે ઈસુય ચ્યાહાન પુછ્યાં, “ખ્રિસ્તાલ દાઉદ રાજા પોહો કેહેકેન આખતેહે?” 42દાઉદ રાજા પોતે ગીતહા ચોપડયેમાય આખતો હેય: 43પ્રભુ પોરમેહેરાય મા પ્રભુવાલ આખ્યાં, “તું મા જમણે આથે બોહો, જાવ લોગુ આંય તો દુશ્માનાહાલ આરવી નાંય દાંઉ તાંઉલોગુ.” 44દાઉદ રાજા પોતેજ ચ્યાલ પ્રભુ આખહે, પાછે તો ચ્યા પોહો કેહેકેન ઓઅહે?

મૂસા નિયમ હિકાડનારાહાથી હાચવીન રોજા

(માથ્થી 23:1-36; માર્ક 12:38-40; લુક. 11:37-54)

45જોવે બોદા લોક વોનાય રીઅલા આતા, તે ચ્યાય ચ્યા શિષ્યહાન આખ્યાં, 46“મૂસા નિયમ હિકાડનારા ગુરુપાયને હાચવીન રા, જ્યા યે વાતેલ પોસાન કોઅતાહા કા સાર્વજનિક ઠિકાણા વોય લોક ચ્યાહાન લાંબા એને મોઅગેં ડોગલેં પોવીન ફીઅતા દેખે, એને આટામાય લોક ચ્યાહાન માનેપાને કોય સલામી કોએ. એને સોબાયે ઠિકાણામાય માનાપાના જાગાવોય બોહના પોસંદ કોઅતાહા, એને જેવણામાય માનાપાના જાગો ચ્યાહાન ગોમહે. 47ચ્યા વિઘવા બાઈહે ગોએ લુટી લેતાહા, એને દેખાડાહાટી લાંબી વાઆ પ્રાર્થના કોઅતાહા, પોરમેહેર નોક્કીજ ચ્યાહાન કોઠાણ સાજા દી.”

Currently Selected:

લુક 20: GBLNT

Highlight

Copy