BILANGEN 9

Paskah si peduaken

1 TUHAN ngerana man Musa i gurun pasir Sinai i bas bulan si pemena tahun si peduaken kenca bangsa Israel enggo nadingken Mesir. Nina, #Kel 12:1-13 2-3“I bas wari pesepuluh empatken bulan enda, kenca matawari sundut, bangsa Israel arus mperingeti wari Paskah rikutken kerina peraturen ras cara-cara guna si e.” 4E maka isuruh Musa bangsa e mperingeti Paskah, 5jenari i bas berngi wari pesepuluh empatken bulan si pemena, ibahanna me bage i gurun pasir Sinai. Kerina idalanken Israel payo kal bagi si ipedahken TUHAN man Musa.

6Tapi lit i je piga-piga kalak si la bersih rikutken peraturen agama sabap enggo idadapna mait, janah la banci iperingetina Paskah i bas wari e. E maka lawes ia ndahi Musa ras Harun 7janah nina, “Kami la bersih sabap enggo idadap kami mait, tapi ngkai maka kami la iatanken nehken persembahen man TUHAN radu ras kalak Israel si debanna?”

8Nina Musa erjabap, “Timai lebe seh aku ngaloken pedah i bas TUHAN nari.”

9 TUHAN nuruh Musa, 10ngataken man kalak Israel nina, “Ise i bas kam ntah pe kesusurenndu si la bersih erkite-kiteken njemak mait ntah pe sangana i bas perdalanen, tapi merincuh ia mperingeti Paskah e, 11banci iperingetindu sada bulan kenca si e, i bas berngi wari pesepuluh empatken bulan si peduaken. Rayakenlah e alu roti si la tama ragi ras gule-gulen si pagit. 12Ola tadingken sitik pe pangan e seh erpagi-pagina janah ola penggelken sada pe tulan asuh-asuhen e. Peringetilah Paskah e sue ras kerina peraturen-peraturenna. #Kel 12:46; Joh 19:36 13Tapi ise pe si bersih rikutken peraturen agama janah la ia i bas perdalanen si ndauh, adi la iperingetina Paskah e, lanai ikira bangsangKu, sabap la isehkenna persembahen man bangKu i bas paksa si enggo itentuken. Ia la banci lang ngenanami kiniseran erkiteken dosana e.

14Adi sekalak asing si ringan i tengah-tengahndu merincuh mperingeti Paskah e, arus idalankenna sue ras kerina peraturen ras cara-carana. Undang-undangna seri man tep-tep kalak, bali man kalak Israel asli ntah kalak asing.”

Embun api

(Kel 40:34-38)

15-16Kenca Kemah Perjumpan e enggo pajek, i bas wari e reh sada embun nutupisa. Tep-tep berngi, embun e teridah bagi api. 17Adi nangkih kenca embun e, bangsa Israel nadingken inganna erkemah, jenari ipajekkenna ka kemahna i bas ingan embun e nusur ku teruh. 18Bangsa e nadingken inganna erkemah rikutken perentah TUHAN, janah arah perentahNa ka ia majekken kemahna. Kidekah embun e ringan denga i babo Kemah e, bangsa Israel tetap ringan i je. 19Adi embun e ndekah ringan i babo Kemah e, ipatuhina TUHAN, la ia pindah ku ingan si deban. 20Maun-maun embun e ringan i babo Kemah e piga-piga wari saja ngenca; aminna kuga gia, ia tetap ringan i bas inganna erkemah e ntah pindah sue ras perentah TUHAN. 21Maun-maun embun e ringan i je karaben nari seh erpagi-pagi ngenca, janah minter kalak e pindah enggo kenca embun e nangkih. Adi nangkih kenca embun e, minter kalak e pindah. 22Aminna gia dua wari, sada bulan, sada tahun ntah pe dekahen asa e, adi embun e ringan denga i babo Kemah e, bangsa Israel la pindah, tapi adi nangkih kenca, pindah ia minter. 23Ipajekkenna, ntah pe ipindahkenna kemahna alu patuh nandangi perentah si ibereken TUHAN arah Musa.

Currently Selected:

BILANGEN 9: BTX

Highlight

Copy