BILANGEN 7
7
Persembahen peminpin-peminpin bangsa Israel
1I bas warina Musa enggo dung majekken Kemah Perjumpan e, minter iminakina Kemah e ras kerina perkakas-perkakasna guna ngeresmikenca gelah banci ipake guna TUHAN, bage pe batar-batar ras kerina perkakasna. 2Jenari kepala-kepala terpuk si jadi peminpin i bas suku-suku bangsa Israel, si ertugas erbahan sensus e, 3maba persembahenna man TUHAN, e me kap: enem gereta rikutken ras sepuluh dua lembu; dua kalak mpersembahken sada gereta janah tambah si e sekalak-sekalak mpersembahken sada lembu. Kenca ipersembahkenna si enda, 4nina TUHAN man Musa, 5“Aloken lah pemere enda guna ipake i bas dahin si man lakonken i bas Kemah e. Endesken si e kerina man kalak Lewi sue ras dahin si man dahinna.” 6E maka ibereken Musa gereta e ras lembuna man kalak Lewi. 7Iberekenna dua gereta ras empat lembu man terpuk Gerson, 8janah empat gereta ras waluh lembu man terpuk Merari. Kerina dahinna arus ilakoken i teruh perentah Itamar anak Harun. 9Tapi man terpuk Kohat la lit ibereken Musa gereta ntah pe lembu, sabap barang-barang si badia si man urusenna arus ipersanna mabasa.
10Tole, peminpin-peminpin e maba persembahen guna nangkuhken batar-batar e. Tupung kerina ia enggo sikap nehken persembahen deherken batar-batar e, 11ngerana TUHAN man Musa nina, “Kataken man bana kerina gelah tep-tep wari sekalak-sekalak peminpin-peminpin e nehken pemerena sepuluh dua wari dekahna.”
12-83E maka isehkenna persembahenna rikutken uruten enda:
| Wari: | Suku: | Gelar peminpin: |
|---|---|---|
| 1 | Juda | Nahason anak Aminadap |
| 2 | Isakar | Netanel anak Suar |
| 3 | Sebulon | Eliap anak Helon |
| 4 | Ruben | Elisur anak Sedeur |
| 5 | Simeon | Selumiel anak Surisaddai |
| 6 | Gat | Eliasap anak Rehuel |
| 7 | Eperaim | Elisama anak Ammihut |
| 8 | Manase | Gamaliel anak Pedasur |
| 9 | Benyamin | Abidan anak Gideoni |
| 10 | Dan | Ahieser anak Ammisaddai |
| 11 | Aser | Pagiel anak Ohran |
| 12 | Naptali | Ahira anak Enan |
Sekalak-sekalak maba persembahen si seri, e me kap: sada mangkuk pirak beratna sada setengah kilo ras sada baskom pirak beratna 800 kilo, sue ras ukuren si sah, duana dem isin tepung si icampur ras minak saitun si ipake guna persembahen buah gandum; sada piring emas beratna 110 kilo, dem alu rempah-rempah tutungen si merim; sada jenggi lembu si nguda denga, sada bajar biri-biri, ras sada anak biri-biri umur sada tahun guna persembahen tutungen; bage pe dua jenggi lembu, lima bajar biri-biri, lima kambing, ras lima anak biri-biri umur sada tahun guna persembahen persadan.
84-88Jumlah persembahen si ibaba peminpin-peminpin si sepuluh dua e guna nangkuhken batar-batar e, e me kap:
– Sepuluh dua mangkuk pirak ras sepuluh dua baskom pirak, beratna 27,6 kilo.
– Sepuluh dua piring emas, beratna 1,32 kilo, dem alu rempah-rempah tutungen si merim.
– Sepuluh dua jenggi lembu, sepuluh dua bajar biri-biri, ras sepuluh dua anak biri-biri umur sada tahun, bage pe persembahen buah gandum rikut ras si e, guna persembahen tutungen.
– Sepuluh dua kambing guna persembahen kerna dosa.
– Dua puluh empat jenggi lembu, enem puluh bajar biri-biri, enem puluh kambing, enem puluh anak biri-biri umur sada tahun, guna persembahen persadan.
89Tupung Musa bengket ku bas Kemah e guna ngerana ras TUHAN ibegina TUHAN ngerana man bana i babo tutup Peti Perpadanen nari, i kelang-kelang kerubim e.
Currently Selected:
BILANGEN 7: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
