BILANGEN 17
17
Ciken Harun
1Nina TUHAN man Musa, 2“Suruh bangsa Israel mereken sepuluh dua ciken man bandu, sada i bas tep-tep peminpin suku nari. Suratken gelarna sekalak-sekalak i bas cikenna, 3jenari suratken gelar Harun i bas ciken suku Lewi. Tep-tep peminpin suku, sada cikenna. 4Babalah ciken e kerina ku bas Kemah Perjumpan, jenari tamaken i lebe-lebe Peti Perpadanen, i ja Aku jumpa ras kam. 5I je kari, ciken kalak si Kupilih tentu ertunas. Alu dalan si enda ateKu Kubahan gelah bangsa Israel olanai jungut-jungut nandangi kam.”
6Ngerana Musa man bangsa e, e maka sekalak-sekalak peminpinna mereken sada ciken man bana, sada guna tep-tep suku. Kerinana sepuluh dua, jenari ciken Harun ipersada ras ciken ndai kerina. 7Kenca bage itamaken Musa kerina ciken e i bas Kemah i lebe-lebe Peti Perpadanen TUHAN.
8Pepagina, tupung Musa lawes ku bas Kemah e, idahna maka ciken Harun, si jadi wakil suku Lewi, enggo ertunas. Ciken e enggo erbunga ras buahna enggo tasak, e me buah kahoa! #Heb 9:4 9Ibuat Musa kerina ciken e jenari icidahkenna man kalak Israel. Idahna kai si enggo jadi, jenari tep-tep peminpin muat cikenna ndai mulihken. 10Nina TUHAN man Musa, “Tamaken ciken Harun mulihken ku lebe-lebe Peti Perpadanen e; ciken e arus isimpan guna jadi sada pertenget man bangsa Israel si berontak maka ia la banci la mate adi la kin ia ngadi jungut-jungut.” 11Ibahan Musa bagi si ipedahken TUHAN.
12Nina bangsa Israel man Musa, “Adi bage kin enggo kita dung! 13Adi mate kin tep-tep kalak si ndeheri Kemah e, e bali nge kita ras kalak si enggo mate e!”
Currently Selected:
BILANGEN 17: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
