BILANGEN 13

Mata-mata si sepuluh dua

(Ul 1:19-33)

1Nina TUHAN man Musa, 2“Pilihlah sekalak i bas peminpin-peminpin tep-tep merga si sepuluh dua e, jenari suruhlah ia jadi mata-mata ku taneh Kanaan gelah iselidikina taneh, si ateKu Kubereken man bangsa Israel.”

3-15Ipatuhi Musa perentah TUHAN, e maka i bas taneh mesawang Paran e nari isuruhna peminpin-peminpin si tersurat arah teruh enda:

Suku:	Gelar peminpin e:
Ruben	Sammua anak Sakur
Simeon	Sapat anak Hori
Juda	Kalep anak Jepune
Isakar	Igal anak Jusup
Eperaim	Hosea anak Nun
Benyamin	Palti anak Rapu
Sebulon	Gaddiel anak Sodi
Manase	Gaddi anak Susi
Dan	Ammiel anak Gemalli
Aser	Setur anak Mikael
Naptali	Nahbi anak Wopsi
Gat	Geuel anak Maki

16Enda me mata-mata si isuruh Musa gelah iselidikina negeri e. Isambarina gelar Hosea anak Nun jadi Josua.

17Tupung isuruh Musa ia lawes nina man bana kerina, “Lawes lah kam ku Utara i bas ingan enda nari ku bagin Selatan taneh Kanaan janah kenca e terus ku daerah si lit uruk-urukna. 18Pepayo, ntah taneh si kuga e, nterem ntah lang pendudukna, janah kuga gegehna. 19Pepayo taneh e mehuli ntah lang, ntah kalak si i je nggeluh i bas kuta-kuta si la erbenteng ntah i bas kuta-kuta si erbenteng. 20Pepayo ntah taneh e mehumur dingen melala i je turah batang-batang kayu. Janah ola kam lupa maba buah pangan si turah i je.” (Tupung e sangana musim buah anggur mulai tasak.)

21E maka lawes kalak ndai kerina ku Utara, jenari iselidikina taneh e mulai i bas taneh si mesawang Sin arah Selatan terus ku Rehop, deherken sada dalan, Hamat gelarna, arah Utara. 22Mula-mula lawes ia ku bagin Selatan taneh e janah seh ia ku Hebron i ja ringan kalak Ahiman, Sesai, ras Talmai, e me kesusuren sada bangsa manusia raksasa si igelari kalak Enak. (Hebron ipajekken leben pitu tahun asa Soan i Mesir.) 23Seh ia ku Baluren Eskol, janah i je ikeretna sada tandan buah anggur. Bage beratna buah anggur si sada tandan e seh maka dua kalak ngelanjasa maka terbaba. Tambah si e ibabana pe mulih buah galiman ras buah ara. ( 24Ingan e igelari Baluren Eskol sabap i je me buah anggur si ikeret kalak Israel.)

25Kenca iselidikina negeri e empat puluh wari dekahna, mulih mata-mata ndai 26ndahi Musa ras Harun, ras kerina perpulungen bangsa Israel i Kades i bas taneh mesawang Paran. Iturikenna kerina kai si enggo idahna janah icidahkenna pe buah pangan si ibabana. 27Nina kalak ndai man Musa, “Iselidiki kami taneh e janah enggo iteh kami maka taneh e tuhu-tuhu mehuli ras mehumur; enda kap deba buah sinuan-sinuanna. 28Tapi kalak si ringan i je tuhu-tuhu megegeh, janah kuta-kutana mbelin janah ibentengi alu mehuli. Si cilakana idah kami i je kesusuren manusia raksasa. 29Kalak Amalek ringan arah bagin Selatan taneh e; kalak Heti, Jebusi ras Amori ringan i daerah si melala uruk-urukna; janah kalak Kanaan ringan i tepi Lawit Tengah ras i gedang-gedang Lau Jordan.”

30Ipesinik Kalep kalak si sangana jungut-jungut man Musa, janah nina, “Arus maka siserang ia genduari janah sikuasai taneh e; kita cukup megegeh guna ngkuasaisa.”

31Tapi nina kalak si lawes ras Kalep ndai, “Lang, gegehta la cukup lako merang ia; kalak si i je gegehen asa kita.” 32E maka ipebelangna berita palsu i tengah-tengah bangsa Israel kerna taneh si enggo iselidikina e. Nina, “Asil taneh e la cukup mere man kalak si ringan i je pe. Kerina kalak si idah kami nggedang mbelin kal, 33janah idah kami pe manusia raksasa i je, e me kesusuren Enak. Bagi labang e nari ngenca iakap kami man kami, janah bagem pengidah kami kerna ia.” #Kej 6:4

Currently Selected:

BILANGEN 13: BTX

Highlight

Copy