MARKUS 14

Rencana nangkap Jesus

(Mat 26:1-5; Luk 22:1-2; Joh 11:45-53)

1Dua wari nari Wari Raya Paskah ras Roti si La Itama Ragi, idarami imam-imam si mbelin ras guru-guru agama me dalan guna nangkap Jesus alu erbuni-buni janah ibunuhna atena. #Kel 12:1-27 2Nina kalak e sapih-sapih ia, “Ola asum Wari Raya e sidalanken, gelah ola guntar kalak si nterem.”

Jesus iminaki i Betani

(Mat 26:6-13; Joh 12:1-8)

3Asum Jesus i rumah Simon si nai sakit gadamen, i Betani, paksa man reh me sekalak diberu, ibabana sada botol dem minak si merim si meherga kal. Minak e ibahan ibas urat sinian-sinuan si merim nari. Ipecahkenna botol minak e jenari icurcurkenna ku takal Jesus. #Luk 7:37-38 4Piga-piga kalak si lit i je jungut-jungut nina sapih-sapih ia, “Engkai maka iambur-ambur minak si merim e? 5Ma kin banci idayaken lebih telu ratus duit pirak, janah duitna e ibereken man kalak musil?” Jenari irawaina pe diberu e.

6Tapi nina Jesus, “Pelepaslah! Engkai maka iganggundu ia? IA enggo erbahan si mehuli man bangKu. 7Adi kalak musil usur nge pagi ras kam janah adi bage atendu banci isampatindu katawari pe. Tapi Aku labo lalap ras kam. #Ul 15:11 8Diberu enda ibahanna asa ngasupna. Iminakina dagingKu ope denga Aku ikuburken. 9Ingetlah! I japa pe pagi iberitaken Berita Si Meriah i belang-belang doni enda, ituriken pe kerna kai si enggo ibahan diberu enda ndai guna nginget ia.”

Judas erpadan ndudurken Jesus

(Mat 26:14-16; Luk 22:3-6)

10Judas Iskariot e me sekalak ibas ajar-ajar si sepuluh dua; lawes ia ndahi imam-imam si mbelin guna ngataken maka ia nggit ngendesken Jesus man bana. 11Meriah kal ukur imam-imam si mbelin megi kai si ikataken Judas Iskariot e. Jenari mulai me idaramina kesempaten si mehuli guna ngendesken Jesus.

Jesus man-man Paskah ras ajar-ajarNa

(Mat 26:17-25; Luk 22:7-14,21-23; Joh 13:21-30)

12I bas wari si pemena wari raya roti si La Itama Ragi, e me sanga kalak nggeleh biri-biri Paskah, nungkun ajar-ajar man Jesus nina, “I ja sura-suraNdu kami nikapken pangan Paskah man Bandu?”

13E maka isuruh Jesus dua kalak ajar-ajarNa nina, “To lawes ku kota ah; i je jumpa kam kari ras sekalak dilaki si maba lau tare tambe. Ikutken ia ku rumah, janah sungkun kari si mada rumah e; 14‘Nina Guru: Kamar si apai banci Kupake ras ajar-ajarKu guna man-man Paskah?’ 15E maka ituduhkenna kari man bandu sada kamar si mbas i datas loteng, si enggo sikap. I je me sikapkenndu kerina kai si perlu guna man-man Paskahta.”

16Berkat me si dua kalak e janah seh kenca ia i kota, idapetina kerina bagi si enggo ikataken Jesus man bana. Jenari isikapkenna pangan guna Paskah e.

17Kenca gelap reh me Jesus ras ajar-ajarNa. 18Paksa ia man kerina, ngerana Jesus nina, “Begikenlah: sekalak ibas kam nari si sangana man ras Aku paksa enda, ndudurken Aku kap kari.” #Msm 41:9

19Ceda ate ajar-ajar e, jenari pegancih-gancih ia nungkun man Jesus nina, “Ma labo aku kataNdu?”

20Erjabap Jesus, “Jelmana e me kap sekalak ibas kam si sepuluh dua enda, si encalehken roti ras Aku bas mangkuk. 21Anak Manusia si isuruh Dibata la banci lang mate nge pagi bagi isuratken kerna IA ibas Pustaka Si Badia. Tapi andiko, cilaka kap kalak si ndudurken Anak Manusia si isuruh Dibata e. Ulin kin min mbarenda la ia tubuh.”

Lakon Persadan si Badia

(Mat 26:26-30; Luk 22:14-20; 1Kor 11:23-25)

22Sanga Jesus ras ajar-ajarNa man, ibuat Jesus roti, ertoto IA ngataken bujur man Dibata, jenari icepik-cepikNa roti e janah iberekenNa man ajar-ajarNa. Nina Jesus, “Buatlah, enda me badanKu.”

23Kenca bage ibuatNa ka calung, ertoto IA ngataken bujur man Dibata jenari iberekenNa man ajar-ajarNa, janah kerina ia minem tare calung e. 24Nina Jesus, “Enda me darehKu si iamburken guna nterem jelma, si ngesahken padan Dibata. #Kel 24:8; Jer 31:31-34 25Kukataken pe man bandu, maka lanai bo pagi Kuinem lau anggur. Tapi denggo Kuinem anggur si mbaru ibas Kinirajan Dibata.”

26Kenca bage kerina ia ngendeken ende-enden pujin, jenari lawes IA ku Uruk Seton.

Ikataken Jesus maka ipersoken Petrus pagi IA

(Mat 26:31-35; Luk 22:31-34; Joh 13:36-38)

27Nina Jesus man ajar-ajarNa, “Kerina kam pagi kiam nadingken Aku, sabap enggo tersurat ibas Pustaka Si Badia, ‘Permakan e pagi ibunuh Dibata janah biri-biri e kerina merap.’ #Sak 13:7 28Tapi kenca Aku ipekeke, leben pagi Aku ku Galilea asa kam.” #Mat 28:16

29Ngaloi Petrus nina, “Aku labo pagi nggit nadingken Kam, aminna gia kerina kalak enda kiam.”

30Nina Jesus man Petrus, “Ingetlah! I bas berngi enda pe, ope tekuak manuk dua kali, enggo ipersokenndu Aku telu kali.”

31Reh lantangna Petrus ngaloi nina, “Asa ndigan pe la Kam kupersoken, amin terpaksa pe aku mate ras Kam!” Janah ajar-ajar si deban pe kerina ngataken bagi si ikataken Petrus enda.

Jesus ertoto i Peken Getsemane

(Mat 26:36-46; Luk 22:39-46)

32Seh me Jesus ras ajar-ajarNa ibas sada ingan gelarna Getsemane. Nina Jesus man ajar-ajarNa, “Kundul kam i jenda, Aku ertoto lebe.”

33Ibabana Petrus, Jakup ras Johanes ngikut ras IA. Paksa e ceda ate Jesus dingen getem kal pusuhNa, 34janah nina man ajar-ajarNa si telu kalak, “Ceda kal ateKu, bagi si mate atena Aku. Timai i jenda, ola kam tunduh.”

35Lawes IA terdauhen sitik nari, jenari erjimpuh IA i taneh, janah ertoto IA gelah adi banci, ola min ibentasiNa paksa kiniseran e. 36Nina ibas pertotonNa, “O BapangKu, o BapangKu! La kap lit si metahat ibas Kam. Agui min calung kiniseran enda ibas Aku nari. Tapi labo peratenKu, peratenNdu lah jadi.”

37Kenca bage mulihken IA, idapetiNa ajar-ajar si telu kalak ndai tunduh. E maka nina man Petrus, “O Simon, tunduh kam e? La kam ngasup la tunduh sada jam pe?” Nina ka Jesus man bana teluna, 38“Erjaga janah ertotolah gelah ola kam ndabuh ku bas percuban. Ukurndu mehuli kap tapi dagingndu kote.”

39Jenari lawes ka IA ertoto bagi si ndai. 40Asum IA mulihken ka, idapetina ajar-ajar si telu ndai tunduh; la termedakkenca matana, bage pe lanai teraloisa Jesus.

41Asum mulihken Jesus petelu kaliken, isungkunNa ajar-ajarNa si telu e nina, “Medem dingen tunduh denga kin kam? Enggo me bias! Enggo seh paksana, maka Anak Manusia si isuruh Dibata iendesken ku bas kuasa kalak perdosa. 42Kekeken, ota lawes kita. Nehenlah, si ngendesken Aku enggo reh.”

Jesus itangkap

(Mat 26:47-56; Luk 22:47-53; Joh 18:3-12)

43Sanga Jesus ngerana denga, reh Judas, e me sekalak ibas ajar-ajar si sepuluh dua kalak e. Ibabana sada rombongen si maba pedang ras perpalu, e me rombongen si isuruh imam-imam si mbelin ras guru-guru agama bage pe peminpin-peminpin kalak Jahudi. 44Si ndudurken Jesus enggo mereken tanda man kalak ndai, nina, “Si kuema e me kari kalakna, tangkap janah baba, olanai pulah.”

45Kenca seh Judas ndai minter ideherina Jesus nina, “O Guru!” Jenari iemana Jesus. 46E maka itangkap kalak ndai Jesus jenari iketna. 47Tapi sekalak ibas ia si tedis i je isintakna pedangna, jenari itampulna juak-juak Imam si Mbelin seh retap cupingna. 48E maka ngerana Jesus man kalak si reh ndai nina, “Iatekndu kin Aku enda sekalak pengerampok maka reh kam maba pedang ras perpalu guna nangkap Aku? 49Idahndu nge Aku tep-tep wari ngajar ibas Rumah Pertoton, janah labo itangkapndu Aku. Tapi arus nge isehken kai si tersurat ibas Pustaka Si Badia.” #Luk 19:47; 21:37

50Kenca bage kiam kerina ajar-ajar nadingken Jesus.

51Lit me sekalak anak perana si ngikutken Jesus, uisna selambar kain putih ngenca. Icubaken kalak ndai pe nangkap ia, 52tapi itadingkenna uisna e jenari kiam ia manjang-anjang.

Jesus i lebe-lebe Pengadilen Agama

(Mat 26:57-68; Luk 22:54-55,63-71; Joh 18:13-14,19-24)

53E maka ibaba kalak ndai Jesus kurumah Imam si Mbelin. I je enggo pulung kerina imam-imam si mbelin, peminpin-peminpin ras guru-guru agama. 54Petrus ngikut-ngikut i dauh-dauh nari seh ku kesain rumah Imam si Mbelin e. I je ia kundul ras pengawal-pengawal janahna cudu deher api. 55Imam-imam si mbelin bage pe Pengadilen Agama e ndarami bukti-bukti si nalahken Jesus, gelah banci IA ibunuh; tapi la lit idatna. 56Nterem saksi si ngataken si la tuhu kerna Jesus, tapi sada pe la seri katana.

57Dungna tedis piga-piga kalak saksi ngelawan Jesus alu tuduhen palsu, 58nina, “Enggo pernah ibegi kami maka nina Jesus enda, ‘Kuruntuhken pagi Rumah Pertoton si ibahan manusia enda, janah kenca telu wari Kupajekken ka sada si labo bekas manusia erbahan.’ ” #Joh 2:19 59Kesaksin enda pe la seri ras kesaksin kalak si deban.

60E maka tedis me Imam si Mbelin i lebe-lebe kalak si ersidang e jenari isungkunna Jesus nina, “La kin lit jabapndu nandangi tuduhen saksi-saksi enda man bandu?” 61Sinik saja Jesus, kai pe nina lang. E maka isungkun Imam si Mbelin ndai ka IA sekali nari nina, “Kam kin Mesias si ipadanken e, e me Anak Dibata si Badia e?”

62Erjabap Jesus nina, “Aku me, janah pagin idahndu Anak Manusia si ipadanken Dibata kundul arah kemuhen si Mada Kuasa janah reh me ras embun i langit nari!” #Dan 7:13

63Minter icaingken Imam si Mbelin ndai baju dinasna, janah nina, “Man kai nari kin saksi? 64Enggo ibegindu uga pencekurakiNa Dibata. Kuga pengakapndu kerina?”

Kerina ia ngatakenca maka Jesus e ersalah janah ersada arihna gelah Jesus ibunuh. #Im 24:16

65Piga-piga kalak mulai enciduri Jesus, itutupina ayo Jesus jenari itinjuina janah nina, “Kataken ise si ninju Kam!” Pengawal-pengawal pe ikut mbalmbal IA.

Petrus mersoken Yesus

(Mat 26:69-75; Luk 22:56-62; Joh 18:15-18,25-27)

66Asum Petrus i teruh denga, i kesain rumah Imam si Mbelin, reh me sekalak diberu, suruh-suruhen Imam si Mbelin e. 67Sanga idahna Petrus cicudu, ipernehenna kal janah nina, “Kam kap teman Jesus kalak Nasaret e.”

68Tapi merso Petrus nina ngaloi, “La kueteh, la kuangka pe kai si ikatakenndu e.” Jenari lawes ia ku kesain si arah lebe. Paksa e pe tekuak manuk sekali.

69Idah diberu ndai denga ka Petrus i je, e maka ikatakenna man kalak si lit i je nina, “IA kap sekalak ajar-ajar Jesus e!” 70Tapi e pe ipersoken Petrus ka nge.

Lanai ndekahsa kenca si e lit kalak nuduh ia nina, “Lanai bo terpersoken; ugapa pe kam teman kalak e, sabap kam pe i Galilea nari!”

71E maka ersumpah Petrus nina, “Mate gia aku, adi kutandai kin tuhu si ikatakenndu e!”

72Paksa e pe minter tekuak manuk si pedua kaliken. Inget Petrus pe kai si enggo ikataken Jesus man bana, e me, “Ope denga tekuak manuk dua kali, enggo ipersokenndu Aku telu kali!” E maka erkadiola kal Petrus e maka tangis kal ia kesi-kesi.

Currently Selected:

MARKUS 14: BTX

Highlight

Copy