MATIUS 7

Kerna ngadili

(Luk 6:37-38,41-42)

1“Ola isalahindu kalak si deban, gelah kam pe la isalahi Dibata, 2sabap uga penalahkenndu kalak bage ka kam penalahken Dibata. Sarat-sarat si ituntutndu man kalak, sarat-sarat e ituntut Dibata ka man bandu. #Mrk 4:24 3Engkai maka idahndu rintep i bas mata seninandu, tapi beloti si lit i bas matandu la igejapndu? 4Kuga maka pang kam ngerana, ‘O senina, enta kuagui rintep si lit i bas matandu,’ sedangken i bas matandu jine pe lit beloti si galang? 5O kalak si pekulah-kulah! Agui lebe beloti si lit i bas matandu e, sabap kenca bage maka ngasup kam ngagui rintep si lit i bas mata seninandu.

6Ola iberekenndu barang si Badia man biang sabap ilawanna nge kam; ola itamakenndu mutiara ku lebe-lebe babi sabap kugapa pe iperjatina nge.”

Mindo, ndarami dingen nuktuk

(Luk 11:9-13)

7“Pindolah, tentu ngalo me kam; daramilah, tentu idatndu; tuktuklah, tentu italangi pintun man bandu. 8Sabap si mindo, ngalo, si ndarami dat me, janah si nuktuk, italangi pintun man bana. 9Tentu labo lit i bas kam bapa mereken batu man anakna adi ipindona roti man bandu. 10Bage pe tentu la iberekenndu nipe adi ipindona nurung. 11Kuga gia jahatna kam ietehndu nge kai si mehuli man berenken man anakndu. Apai denga ka Dibata, tentu iberekenNa nge si mehuli man kalak si mindo man baNa!

12Bahanlah man kalak si deban bagi ngena atendu ibahanna man bandu. Enda me ertina Undang-undang si isuratken Musa ras kai si enggo isuratken nabi-nabi.” #Luk 6:31

Pintun si kitik

(Luk 13:24)

13“Bengketlah arah pintun si kitik, sabap mbelang me pintun dingen mbelang pe dalan ku naraka, janah nterem kalak arah e erdalan. 14Pintun si kitik dingen dalan si mesera nuju ku kegeluhen si rasa lalap, janah piga-piga kalak ngenca ngasup arah e erdalan.”

Kerna batang ras buahna

(Luk 6:43-44)

15“Metengetlah nandangi nabi-nabi perguak; reh ia ndahi kam bagi biri-biri si melemuk, tapi si tuhuna ukurna bagi serigala si merawa. 16Itandaindu nge ia arah perbahanenna. Batang bungke rimbang labo anggur buahna, janah batang lateng labo galiman buahna. 17Batang si mehuli tentu mehuli nge buahna, tapi batang si la mehuli tentu pe la mehuli buahna. 18Labo banci la mehuli buahna batang si mehuli, bage pe labo banci mehuli buahna batang si la mehuli. 19Batang si la mehuli buahna itektek me jenari itamaken ku bas api. #Mat 3:10; Luk 3:9 20E maka itandaindu nge nabi si palsu e arah perbahanenna.” #Mat 12:33

Perbahanen sebo ngerana

(Luk 13:25-27)

21“Labo kerina kalak si erlebuh man bangKu, ‘O Tuhan, Tuhan!’ bengket ku bas Kinirajan Surga, tapi kalak si ngelakoken rikutken si ngena ate bapangKu i Surga nge bengket ku bas Kinirajan e. 22I bas wari pendungi pagi, nterem kalak ngataken man bangKu, ‘O Tuhan, Tuhan! I bas gelarNdu ernubuat kami, i bas gelarNdu ipelawes kami setan-setan dingen ibahan kami tanda-tanda sengget.’ 23Tapi ningKu pagin njabapsa, ‘La kam Kutandai pe. Laweslah i bas Aku nari, o kalak jahat!’ ” #Msm 6:9

Dua kalak si majekken rumah

(Luk 6:47-49)

24“Ise megi katangKu enda dingen ngikutkenca, ia bali ras kalak pentar si majekken rumahna i babo batu. 25Rumah e labo runtuh aminna gia reh banjir ras angin si meter nderpasa, sabap rumah e ipajekken i babo batu.

26Ise si megi katangKu enda tapi la ikutkenna, ia bali ras kalak lenge si majekken rumahna i babo kersik. 27Asum reh banjir ras angin meter, minter runtuh dingen sontar rumah e.”

Kerna kuasa Jesus

28Kenca dung Jesus ngerana, mamang ate kalak si nterem kerna pengajarenNa. #Mrk 1:22; Luk 4:32 29Sabap Jesus ngajar la bali ras guru-guru agama kalak enda; IA ngajar alu erkuasa.

Currently Selected:

MATIUS 7: BTX

Highlight

Copy