MATIUS 23

Yesus ncakapken kalak Parisi bage pe Guru-guru Undang-undang

(Mrk 12:38-39; Luk 11:43-46; 20:45-46)

1Jenari ngerana Jesus man kalak si nterem bage pe man ajar-ajarNa, 2nina, “Guru-guru agama ras kalak Parisi e, si nerusken ajar-ajaren Musa kap. 3E maka ikutkenlah kai si ikatakenna man bandu. Tapi ola usih si ibahanna, sabap kai si iajarkenna la idalankenna. 4Baban si mberat iampekenna ku bara kalak tapi ia sitik pe la nggit mabasa. 5Ntah kai gia ibahanna, tujunna e me gelah ia idah kalak. Perdiatekenlah tulisen ayat-ayat Pustaka Si Badia si ililetken i perdempakenna ras i bas pergelangen tanna! Bage pe perdiatekenlah ambu-ambu uisna si nggedang! #Mat 6:1; Ul 6:8; Bil 15:38 6Lit kenca kerja-kerja kundul ia arah ingan si mehamat, janah i bas rumah pertoton pe arah lebe ia kundul; 7atena gelah mehamat kalak man bana i tiga janah atena ikataken kalak ia ‘Guru’. 8Tapi kam, ola kam nggit ikataken kalak ‘Guru’, sabap sada ngenca Gurundu, janah kam kerina ersenina. 9Ola ise pe i doni enda ikatakenndu ‘Bapa’, sabap sada ngenca Bapandu e me Dibata. 10Bage pe ola kam nggit ikataken kalak ‘Peminpin’, sabap sada ngenca Peminpinndu, e me Mesias si ipadanken Dibata. 11Ise si mbelinna i bas kam, ialah si ngelai kam kerina. #Mat 20:26-27; Mrk 9:35; 10:43-44; Luk 22:26 12Ise si peganjangken bana, ipeteruk Dibata me, janah ise si peteruk bana, ipeganjangken Dibata me IA.” #Luk 14:11; 18:14

Ipandang Jesus kalak si pekulah-kulah

(Mrk 12:40; Luk 11:39-42,44,52; 20:47)

13“Andiko, cilaka kal kam o, guru-guru agama, janah kam pe o, kalak Parisi! O, kalak pekulah-kulah! Iolang-olangindu kalak gelah ola bengket ku bas Kinirajan Surga. Kam jine la nggit jadi rayat Kinirajan Surga, janah kalak si deban pe iolang-olangindu.

[14Andiko, cilaka kal kam o, guru-guru agama, janah kam pe o kalak Parisi! O, kalak pekulah-kulah! Ibuatndu erta-erta diberu si enggo mbalu jenari ibahanndu pertoton si nggedang i lebe-lebe jelma si nterem. Perbahan si enda, kugapa pe reh beratna ukumenndu.]

15Andiko, cilaka kal kam o guru-guru agama, janah kam pe o, kalak Parisi! O, kalak pekulah-kulah! Isiarindu lawit ras daraten si mbelang guna ndatken sekalak jelma gelah ikutkenna agamandu; tapi kenca idatndu, ijadikenndu ia jadi calon naraka si dua kali lipat jahaten asangken kam.

16Andiko, cilaka kal kam, o peminpin-peminpin si pentang! Sabap nindu, ‘Adi lit kalak ersumpah i bas gelar Rumah Pertoton, sumpahna e la esah; tapi adi ersumpah i bas gelar emas si lit i bas Rumah Pertoton, sumpahna e esah.’ 17Kam kalak motu dingen pentang! Apai kin pentingen, emas ntah Rumah Pertoton si erbahanca emas e badia? 18Bage pe nindu, ‘Adi lit kalak ersumpah i bas gelar batar-batar ingan ersembah, sumpahna e la esah; tapi adi ersumpah kalak i bas gelar persembahen si lit i datas batar-batar e, sumpahna e esah.’ 19Kam kalak pentang! Apai kin pentingen, persembahen ntah batar-batar si erbahanca persembahen e badia? 20Dage ise ersumpah i bas batar-batar, ia ersumpah i bas gelar batar-batar ras i bas gelar persembahen si lit i datas batar-batar e. 21Bage pe ise ersumpah i bas gelar Rumah Pertoton, ia ersumpah i bas gelar Rumah Pertoton ras i bas gelar Dibata si ringan i je. 22Ise ersumpah i bas gelar Surga, ia ersumpah i bas gelar kursi Kinirajan Dibata ras i bas gelarNa si kundul i bas kursi e. #Jes 66:1; Mat 5:34

23Andiko, cilaka kal kam o, guru-guru agama, janah kam pe o, kalak Parisi! O, kalak pekulah-kulah. Ipersembahkenndu man Dibata sepersepuluh i bas ulihndu nuan-nuan nari, seh maka jera, lenga ras serei pe ipersembahkenndu. Tapi si pentingna i bas Undang-undang la iperdiatekenndu, e me kap keadilen, keleng ate, ras kinibujuren. Si enda arus idalankenndu alu la ngelupaken si debanna. #Im 27:30 24O, peminpin-peminpin si pentang! Iaguindu laneng i bas inemenndu, tapi unta ibenndutndu.

25Andiko, cilaka kal kam, o, guru-guru agama, janah kam pe o, kalak Parisi! O, kalak pekulah-kulah! Arah darat ngenca iburihindu cangkir ras pingganndu, tapi arah bas meluat kal. 26O, kalak Parisi si pentang! Burihi lebe cangkir e arah bas gelah arah darat pe bersih.

27Andiko, cilaka kal kam o, guru-guru agama, janah kam pe o kalak Parisi! O, kalak pekulah-kulah! Bali kal kam ras kuburen si icet mbentar; arah darat tatapen mejile, tapi i bas dem tulan-tulan kalak mate ras si macik-macik. #Perb 23:3 28Bage me kam! Tatapen bujur, tapi kam pekulah-kulah janah ukurndu jahat kal kepe.”

Ituriken Jesus ukumen kalak pekulah-kulah

(Luk 11:47-51)

29“Andiko, cilaka kal kam, o guru-guru agama janah kam pe o, kalak Parisi! O, kalak pekulah-kulah! Iseminndu kuburen nabi-nabi janah ipejilendu tugu kalak bujur, 30janah nindu, ‘Adi enggo min nai kami lit asum nini-nininta nggeluh, tentu la kami nggit munuh nabi-nabi e.’ 31Alu bage, si tuhuna kam enggo ngaku maka kam kesusuren si munuh nabi-nabi e. 32Dage terusken dingen dungilah kai si enggo ibenaken ninindu! 33O, nipe! O, kesusuren nipe upar. Arah apai nari dalanndu pulah i bas ukumen naraka nari? 34Kukataken man bandu: Kusuruh pagi reh ndahi kam piga-piga kalak nabi, kalak pentar ras guru; tapi deba pagi ibunuhndu, ipakukenndu ku kayu persilang janah deba iligasindu i bas rumah pertotonndu, janah iayak-ayakndu i bas sada kuta nari ku kuta si deban. 35E maka man bandu me ndabuhna ukumen kalak si enggo munuh kalak si la ersalah, mulai i bas pembunuhen Abil nari seh ku pembunuhen Sakaria, anak Barahia, si ibunuhndu kelang-kelang Rumah Pertoton ras batar-batar ingan persembahen. 36Kukataken man bandu: Kerina ukumen kalak si munuh e ndabuh man kalak si genduari enda.”

Kekelengen Jesus nandangi kuta Jerusalem

(Luk 13:34-35)

37“O Jerusalem, Jerusalem! Ibunuhindu nabi-nabi janah ibenterindu alu batu kalak si isuruh Dibata ndahi kam! Enggo piga-piga kali ateKu pepulung bangsandu bagi indung manuk ngkeremken anakna i teruh kabengna, tapi la kam nggit! 38Tuhu-tuhu me pagi itadingken Dibata rumahndu. 39Kukataken man bandu: Lanai bo pagi Aku idahndu seh paksana ikatakenndu, ‘Dibata kap si masu-masu IA si reh i bas gelar Tuhan.’ ”

Currently Selected:

MATIUS 23: BTX

Highlight

Copy