IMAMAT 19

Undang-undang kerna kebadian ras keadilen

1Ikataken TUHAN man Musa, 2gelah ipesehna man perpulungen kalak Israel bagenda, “Badia lah kam, erkiteken Aku, TUHAN Dibatandu badia kap. #Im 11:44-45; 1Pet 1:16 3Kerina kam arus mehamat man nande ras bapandu, janah arus nginget wari Sabat, bagi si enggo Kuperentahken. Aku kap TUHAN Dibatandu. #Kel 20:8,12; Ul 5:12,16

4Ola tundalken Aku, jenari erkusur nembah dibata-dibata si deban; ola bahan dibata-dibata si deban i bas logam nari. Aku kap TUHAN Dibatandu. #Kel 20:23; 34:17; Ul 17:15; Im 26:1 5Adi igelehndu asuh-asuhen man persembahen persadan, ikutken lah peraturen-peraturen si enggo Kubereken man bandu; e maka Kualoken persembahen e. 6Dagingna arus maka ipan i bas wari sanga asuh-asuhen e igeleh, ntah pe pepagina. Adi lit denga iba i bas wari peteluken arus maka itutung, 7sabap daging si bage pantangen. Janah adi lit kalak si manca, la Kualoken persembahen e: 8Si manca ersalah ia, erkiteken ipeserina pangan biasa ras persembahen si khusus man TUHAN, e maka lanai ia ikira jadi bangsangKu.

9Adi iperanindu jumandu, ola perani seh ku duru, janah ola nai ulihi perani ruhi page si tading-tading. #Im 23:22; Ul 24:19-22 10Ola nai ulihi niar-niar peken anggurndu guna pepulung anggur si tading ntah pe mumahi si enggo naktaken; tadingken e man kalak si musil ras man kalak si tandang. Aku kap TUHAN Dibatandu.

11Ola nangko, ntah nipu, ntah erbual. #Kel 20:15,16; Ul 5:19,20 12Ola kam erpadan i bas gelarKu adi labo atendu itepatindu padanndu e; perbahanen si bage njuruken gelarKu kap. Aku kap TUHAN Dibatandu. #Kel 20:7; Ul 5:11; Mat 5:33

13Ola kam cari kesempaten i bas ise pe, ntah ngerampuk ia. Ola tahan gaji kalak si erdahin ras kam, sada berngi pe ola. #Ul 24:14-15 14Ola sumpahi kalak pasek, ola amparken kai pe i lebe-lebe kalak pentang erbanca ia tertuktuk. Mbiarlah man bangKu. Aku kap TUHAN Dibatandu. #Ul 27:18 15Bujur ras adillah pemutusenndu adi kam ngadili perkara kalak; ola kapiti kalak musil, ola mbiar man kalak bayak. #Kel 23:6-8; Ul 16:19 16Ola pebelang si la tuhu kerna ise pe; janah adi lit kalak si sangana iadili rutang kesah, ngerana lah adi kesaksinndu e banci nampati ia. Aku kap TUHAN.

17Ola buniken elem-elem i bas ukurndu man ise pe tapi tangkas ukur tangkas kata lah ndungi perjengilenndu ras ia, gelah ola kam erdosa erkiteken ia. #Mat 18:15 18Ola kam erbalas man ise pe, ntah pe tetap rate segat man bana, tapi kelengilah temanndu manusia, bali ras kam ngkelengi dirindu jine. Aku kap TUHAN. #Mat 5:43; 19:19; 22:39; Mrk 12:31; Luk 10:27; Rom 13:9; Gal 5:14; Jak 2:8

19Patuhlah man perentah-perentahKu. Ola kawinkenndu asuh-asuhen si la sebangsa. Ola suan dua macam benih i bas sada juma. Ola pake paken adi dua macam kainna. #Ul 22:9-11

20Adi lit kalak si enggo erpadan ndayaken budakna diberu man kalak si deban gelah jadi ndeharana, tapi langa igalarina tukur budak e, jenari adi ersada kula empu budak e ras budak diberu e, la banci ia iukum mate, tapi duana ia iukum, sabap diberu e budakna denga kap. 21Ibaba dilaki e lah sada biri-biri bajarna ku pintun Kemah Perjumpan ku adep-adepenKu jadi persembahen penebusna. 22Gelah alu e imam ngelakoken lakon pembersihen guna ngalemi dosa kalak ndai, e maka ialemi Dibata ia.

23Adi enggo kam seh kerina i taneh Kanaan, jenari nuan batang kayu si erbuah, ntah batang kai gia e, pantangken lah buahna i bas telu tahun si pemena. I bas si telu tahun e la banci ipanndu buahna. 24Peempat tahunken, kerina buahna, endeskenlah jadi persembahen pengataken bujurndu man bangKu, TUHANndu. 25Tapi i bas tahun pelimaken, banci ipanndu buahna. Adi kerina si enda ilakokenndu la banci lang reh lalana buah batang kayundu. Aku kap TUHAN Dibatandu.

26Ola pan daging si lit denga darehna. Ola kam ertenndung ntah pe erbahan kinigurun. #Kej 9:4; Im 7:26-27; 17:10-14; Ul 12:16,23; 15:23; 18:10

27Ola keret buk sekelewet takalndu, bage pe ola keret ujung janggutndu. #Im 21:5; Ul 14:1 28Ola bahan gambar-gambar i bas dagingndu alu ncucukisa, bage pe ola lukai badanndu erkiteken lit si mate-matendu. Aku kap TUHAN.

29Ola njuruken anakndu si diberu alu mahan ia jadi diberu perdenggal i bas rumah persembahen kalak perbegu; adi bage perbahanenndu, nandangi nilah me kam ku dibata-dibata si deban, janah negeri e nandangi dem alu lagu langkah si nggesuh. #Ul 23:17 30Inget wari Sabat, dingen pehaga lah inganKu isembah. Aku kap TUHAN. #Im 26:2

31Ola ngguru man guru si baso. Adi bage perbahanndu, lanai kam bersih rikutken aturen agama. Aku kap TUHAN Dibatandu. #Ul 18:11; 1Sam 28:3; 2Raj 23:4; Jes 8:19

32Mehamat lah man kalak si enggo metua, janah pehaga lah Aku. Aku kap TUHAN.

33Ola tokohi bangsa si deban si tading i bas negerindu. #Kel 22:21; Ul 24:17-18; 27:19 34Bahanlah man bana bali ras man bangsandu jine, janah kelengilah ia bagi ikelengindu dirindu jine. Inget maka kam pe pernah kesilang i negeri Mesir. Aku kap TUHAN Dibatandu.

35Ola tipu kalak alu mpergunaken sibar-sibar, timbangen, ntah sukat-sukat si la payo. #Ul 25:13-16; Kua 20:10; Esek 45:10 36Pake lah sibar-sibar, ntah timbangen, ntah sukat-sukat si bujur. Aku kap TUHAN Dibatandu, si enggo maba kam i taneh Mesir nari. 37Patuhilah kerina undang-undang ras perentah-perentahKu. Aku kap TUHAN.”

Currently Selected:

IMAMAT 19: BTX

Highlight

Copy