KEJADIN 50

1Idakepi Jusup bapana, itangisina, iemaina. 2Kenca bage iperentahken Jusup gelah itamaken rempah-rempah ku mait bapana. 3Bagi biasana empat puluh wari dekahna adi ngerempahi mait. Itangisi kalak Mesir Jakup pitu puluh wari dekahna.

4Kenca enggo lepas paksa erceda ate nina Jusup man pegawai-pegawai raja, “Peseh lah berita enda man raja, 5‘Nandangi bapa mate, isuruhna aku erpadan man bana gelah kukuburken ia i kuburen si enggo isikapken i Kanaan. Erkiteken si e lawes aku lebe ngkuburken bapangku, janah kenca dung mulih ka aku.’ ” #Kej 47:29-31

6Nina raja njabapsa, “To kuburken lah bapandu bagi si enggo ipadankenndu.”

7E maka lawes me Jusup ngkuburken bapana. Kerina pegawai raja, kalak si erpangkat, ras kalak si mbelin i Mesir ngikut ras Jusup. 8Keluargana, senina-seninana, kerina keluarga bapana ngikut ras ia. Si tading i daerah Gosen e me danak-danak si kitik denga, biri-biri, kambingna, lembuna. 9Ikut pe kalak si ergereta perang ras si ngersak kuda. Lanai tanggung teremna kalak enda naruhkenca.

10Kenca kalak enda seh ibas ingan ngerik i kuta Atat, arah matawari pultak Lau Jordan, ndekah ia i je tangis ngandung alu sora megang. Ibahan Jusup adat perngandungen pitu wari dekahna. 11Kenca iidah rayat Kanaan kalak si erceda ate e i Atat nina, “Megogo kal ate ngidah adat perngandungen kalak Mesir e.” E me sabapna maka ibahan gelar ingan e Abel Misraim. Cibalna arah Timur Lau Jordan.

12Dage ilakoken anak-anak Jakup me bagi si iperentahken bapana man bana. 13Ibabana ia ku Kanaan, ikuburkenna i gua Mahpela, arah Timur Mamre i juma si itukur Abraham i bas Epron kalak Heti e man taneh kuburen. #Perb 7:16 14Kenca enggo ikuburken Jusup bapana, mulih ia ku Mesir radu ras senina-seninana ras kerina kalak si ngikut i bas penguburen e.

Ipetetap Jusup ukur senina-seninana

15Kenca bapana enggo mate nina senina-senina Jusup sapih-sapih ia, “Uga pagi jadina adi segat denga ate Jusup man banta, jenari erbalas ia man banta erkiteken kerina kejahaten si ibahan kita man bana?” 16E maka ipesehna sada tenah man Jusup nina, “Ope denga bapanta mate, 17isuruhna kami mindo man bandu bagenda, ‘Alemilah salah senina-seninandu asum ibahanna nai si la mehuli man bandu.’ erkiteken si e, mindo kami gelah ialemindu salah si enggo ibahan kami man bandu. Kami enda kap suruh-suruhen Dibata si isembah bapandu.” Tangis Jusup tupung ialokenna tenah enda.

18Dungna senina-seninana e jine reh, erjimpuh i adep-adepen Jusup nina, “Kami enda reh jadi budakndu.” 19Tapi nina Jusup man kalak enda, “Ola mbiar labo banci aku jadi gancih Dibata ngukum kalak. 20Jahat sura-surandu man bangku, tapi enggo isalihken Dibata e jadi si mehuli, gelah arah e banci iselamatken Dibata kesah nterem kalak si nggeluh denga genduari. 21E maka ola pada sitik pe kam mbiar. Aku pekena-kena kam ras anak-anakndu.” Dage alu kata si melias e, ipetetap Jusup mulihi ukur senina-seninana seh maka malem atena kerina.

Jusup mate

22Jusup ras keluarga bapana tetap denga tading i Mesir; sanga ia mate umurna seratus sepuluh tahun. 23Sempat denga iidahna anak-anak ras kempu-kempu si Eperaim, janah sempat denga pe ialokenna anak-anak si Mahir kempu Manase jadi keluargana.

24Nina man senina-seninana, “Aku lanai ndekah mate, tapi kuga pe ipekena-kena Dibata nge kam. ItaruhkenNa kam ndarat i jenda nari ku taneh si enggo ipadankenNa man Abraham, Isak ras Jakup.” 25E maka isuruh Jusup kerina kesusuren Jakup ersumpah nina, “Erpadanlah man bangku, maka adi itaruhken Dibata kam ku taneh si ipadankenNa e, tulanku pe ibabandu ku jah.” #Kel 13:19; Jos 24:32; Heb 11:22 26Dungna mate me Jusup i Mesir i bas umur seratus sepuluh tahun. Itama rempah-rempah ku badanna, jenari itamaken maitna ku bas peti.

Currently Selected:

KEJADIN 50: BTX

Highlight

Copy