KEJADIN 28

1Ilebuh Isak anakna Jakup, jenari ipeberkatna ia alu pasu-pasuna, nina, “Ola kal ibuatndu beru Kanaan enda jadi ndeharandu. 2To lah ku Mesopotami, ku rumah nini bulangndu Betuil. I jah me kam empo, buat sada anak mamandu Laban. 3Dibata si Mada Kuasa lah si masu-masu perjabunndu, ras mereken man bandu nterem anak, gelah kam jadi nini nterem bangsa! 4Ialah si masu-masu kam ras kesusurenndu alu pasu-pasu si enggo iberekenNa man Abraham. Janah man bandulah pagi taneh si inganindu genduari enda, si enggo ibereken Dibata man Abraham!” #Kej 17:4-8 5E maka isuruh Isak si Jakup lawes ku Mesopotami ndahi Laban, anak Betuil, kalak Aram e, turang Ribka. Ribka e me nande Jakup ras Esau.

Empo denga ka si Esau

6Ieteh si Esau maka bapana Isak enggo masu-masu si Jakup, janah isuruhna pe ia ku Mesopotami erjabu. Ietehna pe maka asum ipasu-pasu Isak si Jakup, isuruhna maka ola iempoi Jakup diberu kalak Kanaan. 7Ietehna pe maka Jakup enggo ngikutken kata nandena ras bapana, janah enggo ia lawes ku Mesopotami. 8Dage ieteh Esau maka bapana Isak, la kal atena ngena diberu bangsa Kanaan. 9Erkiteken si e lawes Esau ndahi Ismael anak Abraham, jenari iempoina si Mahalat, turang Nebayot, anak Ismael, tambah ndeharana si dua kalak.

Nipi Jakup i Betel

10Itadingken Jakup Berseba, jenari berkat ia kempak Haran. 11Nandangi sundut matawari seh ia i bas sada ingan, e maka i je ia erberngi. Medem ia, janah ibantalkenna sada batu. 12Ernipi ia maka iidahna sada redan pajek i babo doni, ujungna seh ku langit; ku teruh ku das i je malekat. #Joh 1:51 13Tedis TUHAN i deherna nina, “Aku kap TUHAN, Dibata Abraham ras Isak. Man bandu ras man kesusurenndu Kubereken taneh inganndu medem enda. #Kej 13:14-15 14Kesusurenndu bali pagi ras abu taneh teremna. Ipebelangna daerahna kempak apai pe. Arah kam ras kesusurenndu kerina bangsa i doni enda ndat pasu-pasu i bas aku nari. #Kej 12:3; 22:18 15Inget lah, Aku ras kam dingen ngkawali kam ku japa pe kam lawes, janah Aku ka pagi maba kam mulih ku taneh enda. La Kutadingken kam seh enggo dung Kulakoken kerina si Kukataken bandu e.”

16Medak me Jakup, jenari nina, “I jenda kepe TUHAN; ndai la kueteh maka IA i jenda!” 17Mbiar ia nina, “Kebiaren kap ingan enda! Ugapa pe rumah Dibata nge enda; ugapa pe ingan enda pintun si talang kempak surga.”

18Lampas erpagi-pagi keke Jakup, ibuatna batu si ibantalkenna ndai, ipajekkenna jadi sada tanda peringet-ingeten. Iamburkenna minak saitun ku batu e tandana batu e enggo ipersembahken man Dibata. 19Ibahanna gelar ingan e Betel. (Ope si e kuta enda igelari kalak, Lus.) 20Kenca bage ersumpah Jakup man TUHAN, “Adi itemani Dibata aku janah adi ikawaliNa aku i bas perdalanenku, janah adi iberekenNa bangku uis ras pangan, 21adi selamat aku mulih ku rumah bapangku, e maka TUHAN me jadi Dibatangku. 22Batu peringet-ingeten si enggo kupajekken enda pagi jadi sada Rumah Dibata, janah kubereken pagi sepersepuluh i bas kasa kai si iberekenNdu bangku.”

Currently Selected:

KEJADIN 28: BTX

Highlight

Copy