KEJADIN 24
24
Diberu si man Isak
1Genduari Abraham enggo seh kal tuana, janah ipasu-pasu TUHAN ia i bas kerina si idahikenna. 2Nina man suruh-suruhenna si metuana, si ngurus kerina erta-ertana, “Amparken tanndu kelang-kelang pahangku, jenari ersumpahlah. 3Ateku maka ersumpah kam i bas gelar TUHAN, Dibata langit ras doni, maka la ibuatndu beru Kanaan enda jadi ndehara anakku Isak. 4La banci la mulih kam ku negeri asalku, gelah ibuatndu diberu man anakku Isak, i bas kade-kadengku nari.”
5Tapi nungkun suruh-suruhen ndai nina, “Uga adi la pagi nggit si nguda-nguda e nadingken rumahna ngikut ras aku ku taneh enda? Banci nge kutaruhken anakndu ku negeri asalndu?”
6Ijabap Abraham, “E ola kal! Ola kal isuruhndu anakku mulih ku jah! 7TUHAN, Dibata si mada langit, enggo maba aku i rumah bapangku nari, i bas taneh keluargangku nari ku ingan enda. Dibata enggo ersumpah man bangku maka iberekenNa taneh enda man kesusurenku. IA pagi si nuruh malekat arah lebendu, gelah idatndu sada diberu i jah man anakku. 8Adi singuda-nguda e la pagi nggit ngikut ras kam, enggo nangtang kam i bas perpadanen enda. Tapi amin kai pe jadi, ola kal babandu anakku mulih ku jah.” 9Kenca bage itamaken suruh-suruhen ndai tanna i kelang-kelang paha Abraham, tuanna, jenari ersumpah ia maka idahikenna kerina bagi si ipindoken Abraham e.
10E maka ibuat suruh-suruhen Abraham ndai sepuluh unta tuanna, jenari lawes ia ku kuta ingan Nahor ringan ndube, e me arah Utara Mesopotami. 11Kenca ia seh i jah, ipengadina unta ndai deher sumur i darat kuta. Wari nandangi ben, janah sangana kal diberu-diberu rehen ku sumur e ngelegi lau. 12Ertoto suruh-suruhen ndai nina, “O, TUHAN, Dibata tuanku Abraham, bahanlah maka seh sura-surangku sendah, janah ingetlah padanNdu ras tuanku Abraham. 13Genduari aku sangana ndeher ku sumur enda, i ja singuda-nguda kuta enda nandangi reh ngelegi lau. 14Kuperkuanken kari sekalak i bas singuda-nguda e ningku, ‘Pesusur sitik ingan laundu, maka banci aku minem!’ Adi ngaloi ia, ‘Minemken, untandu pe banci kupeminem,’ singuda-nguda si e min si itetapken Kam man suruh-suruhenndu Isak. Adi jadi kari bage, enggo kueteh maka itepatiNdu kepe padanNdu ras tuanku.”
15Langa pe ia dung ertoto, enggo seh Ribka i je maba ingan lau i babo barana. Ribka anak Betuil si diberu, janah Betuil e me anak Nahor si dilaki, ras ndeharana Milka. Nahor e me senina Abraham. 16Ribka e me sekalak singuda-nguda si seh kal jilena, janah ngincuah ia kempak sumur ngisi ingan launa, jenari mulih ia. 17Kiam suruh-suruhen Abraham ndahi ia, jenari nina, “Banci kang kuinem sitik laundu ena?”
18“Minemken Tuan,” nina singuda-nguda e. Pedas-pedas ipesusurna ingan launa i bas barana nari, e maka itunggahina suruh-suruhen ndai. 19Kenca enggo dung ia minem nina singuda-nguda ndai, “Lau inemen untandu pe banci nge kulegi asa biasna.” 20Pedas-pedas iusekenna launa ku bas pelangkah ingan minem rubia-rubia si lit i je, jenari kiam ia ku sumur ndai ngelegi lau tole, seh puas kerina untana ndai minem. 21Alu sinik-sinik, iperdiateken suruh-suruhen ndai singuda-nguda e, metehsa ntah payo enggo isehken TUHAN sura-surana.
22Kenca singuda-nguda ndai enggo dung mere minem unta-unta e, ibuat suruh-suruhen e sada anting-anting emas si meherga, itamakenna ku igung singuda-nguda e, janah gelang emas si galang igelangkenna i bas tanna. 23Jenari nina, “Anak ise kin kam? Lit kang ingan i bas i rumahna man inganku erberngi ras teman-temanku?”
24“Bapangku Betuil, anak Nahor ras Milka,” nina singuda-nguda e njabapsa. 25“Nggala ras gagaten man nakan asuh-asuhen pe melala nge i rumah kami, janah inganndu erberngi pe lit nge.”
26E maka erjimpuh suruh-suruhen e nembah ia man TUHAN. 27Nina, “Terpujilah TUHAN, Dibata tuanku Abraham, si tetap nteguh ncikep perpadanenNa ras tuanku Abraham. Enggo ibabai TUHAN aku pinter ku kade-kade tuanku.”
28Kenca bage kiam singuda-nguda e ku rumah, iturikenna kasa kai si enggo jadi. 29Lit sekalak turang Ribka, Laban gelarna, janah enggo ibegina kai si enggo ituriken turangna man bana. 30Bage pe enggo ka idah Laban anting-anting i bas igung turangna, ras gelang i bas tanna. E maka kiam ia ndahi suruh-suruhen ndai si sangana tedis ras untana deherken sumur e. 31Jenari nina Laban, “Mari ras kita ku rumah. Kam kalak si enggo ipasu-pasu TUHAN. Engkai maka tedis kam i darat enda? Enggo sikap kamar i rumahku man inganndu, bage pe lit nge ingan man kerina untandu.”
32Dage ku rumah me suruh-suruhen e. Itangtangi Laban baban unta e, iberena nggala ras gagaten. Man suruh-suruhen Abraham ras teman-temanna, ibabana lau man pemurihi nahena. 33Kenca enggo sikap nakan man pangan nina suruh-suruhen e, “Aku langa nggit man, adi langa kubelasken kai si arus kukataken.”
Nina Laban, “Belasken lah!”
34“Aku kap suruh-suruhen Abraham,” nina menaken ranan. 35“Tuhu-tuhu enggo ipasu-pasu TUHAN tuanku Abraham. Ibahan TUHAN ia jadi kalak bayak. Enggo ibereken TUHAN man tuanku melala biri-biri, kambing, lembu, pirak, emas, budak-budak dilaki ras diberu, bage pe unta ras kelede. 36Sara, ndehara tuanku, enggo mupus sekalak anak dilaki kenca ia enggo metua. Enggo ibereken tuanku kerina kebayakenna man anak e. 37Isuruh tuanku aku erpadan alu ersumpah, maka tetap kuikutken perentahna. Nina tuanku, ‘Ola kal ibuatndu singuda-nguda kalak Kanaan man ndehara anakku. 38Tapi lawes lah ku bangsa bapangku, ku kade-kadengku, janah pilihlah i je diberu man anakku.’ 39E maka kusungkuni tuanku, ‘Uga adi singuda-nguda e la nggit ngikut ras aku?’ 40Ijabapna nina, ‘TUHAN si kusembah i bas geluhku, IA si nuruh malekat ras kam gelah sangap kam i bas tugasndu. Idatndu nge pagi diberu man anakku i bas bangsangku nari, e me i bas keluarga bapangku nari. 41Sada ngenca dalanndu nangtang i bas sumpahndu e nari, e me: adi lawes kam ndahi kade-kadengku, tapi itulakna kam, e enggo nangtang kam i bas sumpah e nari.’
42Ndai kenca seh aku i sumur, ertoto aku, ‘TUHAN, Dibata tuanku Abraham, berelah maka seh sura-surangku i bas tugasku enda. 43Genduari i deher sumur enda aku. Adi lit kari singuda-nguda muat lau atena, kupindo kari man bana maka iberena minem aku alu ingan launa. 44Adi iberena kari, janah lau man untangku pe ibabana ka, ia me kalakna si enggo ipilihNdu jadi ndehara man anak tuanku.’ 45Ope denga aku dung ertoto, reh Ribka maba ingan lau i babo barana ku sumur e muat lau. Ningku man bana, ‘Enta sitik laundu ena, minem kal ateku.’ 46Pedas-pedas ipesusurna ingan launa, jenari nina, ‘Minemken, untandu pe banci kubere minem!’ E maka minem aku, janah unta e pe iberena minem. 47Kusungkun ia, ‘Ise bapandu?’ Ijabapna nina, ‘Bapangku si Betuil, anak Nahor ras Milka.’ Kenca bage kutamaken anting-anting i bas igungna ras gelang i bas tanna. 48Erjimpuh aku nembah muji TUHAN, Dibata tuanku Abraham, si enggo naruhken aku pinter ku kade-kade tuanku, i ja enggo jumpa aku ras anakna si diberu man ndehara anak tuanku. 49Genduari adi atendu nehken tanggung jawabndu ras keleng atendu man tuanku, katakenlah man bangku; adi lang pe katakenlah lang, maka kueteh kai arus kubahan.”
50Erjabap Laban ras Betuil nina, “Kai si jadi e, i bas TUHAN nari kap, e maka labo kami si erbahan keputusen e. 51Enda kap si Ribka; babalah ia jadi ndehara anak tuanndu, bagi si enggo ikataken TUHAN.”
52Kenca ibegi suruh-suruhen Abraham kata enda, erjimpuh ia nembah TUHAN. 53Kenca bage, ipedaratna uis, bage pe perhiasen emas ras pirak, jenari iberekenna man Ribka. Bage pe iberekenna barang-barang si meherga man turang ras nande Ribka.
54Kenca bage maka man ras minem suruh-suruhen Abraham ras teman-temanna si ngikut ras ia, janah i je ia erberngi. Kenca ia enggo keke erpagi-pagi nina suruh-suruhen e, “Ateku mulih min ku tuanku.”
55Tapi nina nande Ribka ras turangna, “Seminggu ntah sepuluh wari narilah gia min diberu enda ras kami i jenda, jenari kari lawes gia ia labo dalih.”
56Tapi nina suruh-suruhen e, “E ola kal ambati aku. Enggo ibere TUHAN maka sangap perdalanenku, e maka berelah aku mulih ku tuanku.”
57Nina kalak ndai ngaloi, “Adi bage kin, sidilo lah Ribka e, ntah kuga nina.” 58E maka idilona Ribka, isungkunna nina, “Nggit kam berkat ras kalak enda?” “Nggit,” nina ngaloi.
59Erkiteken si e ipelepas kalak enda me Ribka ras si rembahisa nai berkat ras suruh-suruhen Abraham, ras teman-teman suruh-suruhen e. 60Ipasu-pasu kalak enda Ribka nina,
“Jadilah kam Ribka, nande erjuta-juta kalak.
Italuken kesusurenndu gelah pagi kuta-kuta musuh-musuhna.”
61Kenca bage ersikap-sikap me Ribka ras piga-piga kalak suruh-suruhenna si deban, jenari iersakna unta, berkat ia ras suruh-suruhen Abraham.
62I bas paksa e Isak mbaru denga seh i gurun pasir si tergelar “Sumur Dibata si nggeluh si mperdiateken aku”. Ia sanga ringan i bagin Selatan Kanaan. 63Karaben-karaben ndarat ia erdalan-dalan i bas mbalmbal, jenari iidahna unta reh. 64Kenca idah si Ribka Isak, minter nusur ia i datas untana nari. 65Isungkunna suruh-suruhen Abraham nina, “Ise dilaki si erdalan kempak kita i bas mbalmbal ah?”
“Ia kap tuanku,” nina suruh-suruhen ndai njabapsa. Erkiteken si e, minter ibuat Ribka selendangna, itutupina ayona.
66Ituriken suruh-suruhen e man Isak kasa kai si enggo ilakokenna. 67Kenca bage ibaba Isak me Ribka ku kemah si nai iingani nandena, Sara. Ribka jadi ndehara Isak. Ngena kal ate Isak man Ribka, janah erkiteken si e terapul ia aminna gia nandena enggo mate.
Currently Selected:
KEJADIN 24: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
