ESEKIEL 44
44
Kegunan kerabangen si arah kenjulu
1Ibaba dilaki ndai ka aku ku kerabangen si arah darat, julun pertapaken Rumah Pertoton e. Kerabangen ndai sangana pintu, 2e maka nina TUHAN man bangku, “Kerabangen enda tetap ipintu, janah ndigan pe la banci italangi. La lit manusia si banci bengket arah kerabangen e, sabap Aku, TUHAN Dibata nu Israel, enggo bengket arah e. E maka kerabangen e arus tetap pintu. 3Amin bage gia, raja si sangana erkuasa banci lawes ku lorong kerabangen e man pangan si badia i adep-adepenKu. Ia arus bengket ras lawes nadingken lorong kerabangen e arah ruang si mbelin si lit i je.”
Peraturen-peraturen mengketi Rumah Pertoton
4Kenca bage ibabai dilaki ndai ka aku ku lebe-lebe Rumah Pertoton e arah kerabangen si lit i Utara. Sanga kunehen ku je, kuidah Rumah Pertoton TUHAN e dem alu sinalsal kemulian TUHAN. Minter aku langkem i babo taneh; 5e maka nina TUHAN man bangku, “O manusia si ermasap-masap, perdiatekenlah kai si iidah ras ibegindu. AteKu nuriken man bandu peraturen ras Undang-undang kerna Rumah Pertoton e. Perdiateken tuhu-tuhu ise si banci bengket ku bas Rumah Pertoton e, janah ise ka si lang.
6Kataken man bangsa Israel si pemberontak e, maka Aku, TUHAN si Erdolat, la ngasup ngidah perbahanenna si ciga ateKu. 7Enggo iliamina Rumah PertotonKu erkitekan iberena bangsa si deban si la isunatken, bangsa si la ngikutken Aku, bengket ku bas Rumah Pertoton e, tupung tabeh-tabeh ras dareh rubia-rubia e ipersembahken man bangKu. Dage bangsangKu enggo ngelanggar perpadanenKu alu kerina perbahanen si ciga ateKu. 8La ia saja si ngaturken lakon-lakon si badia i bas Rumah PertotonKu, tapi bangsa si deban isuruhna.
9Aku, TUHAN si Erdolat ngatakenca, maka bangsa si deban si la isunatken, kalak si la ngikutken Aku, sada pe la banci bengket ku bas Rumah PertotonKu, aminna gia bangsa si deban e ringan i tengah-tengah bangsangKu Israel.”
Kalak Lewi ipengadi i bas jabaten imam nari
10Nina TUHAN man bangKu, “Kuukum me kalak Lewi, si enggo ikut ras bangsa Israel si debanna, nadingken Aku janah isembahna berhala-berhala. 11Tapi banci ia erdahin guna Aku i bas Rumah Pertoton jadi si erjaga kerabangen. Banci igelehna rubia-rubia si ipersembahken bangsa e jadi persembahen tutungen ras persembahen si deban, janah arus ia erdahin guna bangsa e. 12Tapi erkiteken enggo ibabaina bangsa Israel i bas lakon-lakon persembahen man berhala-berhala, janah alu bage ibabaina bangsa e erdosa, e maka ersumpah Aku, TUHAN si Erdolat, maka kalak Lewi la banci lang iukum. 13La banci ia jadi imam si ndahiken dahinKu, tah ndeheri kasa kai si badia, tah pe bengket ku Ingan si Badiana kal. Enda me ukumen erkiteken perbahanenna si ciga ateKu. 14Man bana genduari Kubereken dahin-dahin kelatihen i bas Rumah Pertoton e.”
Imam-imam
15Nina TUHAN si Erdolat, “Tupung bangsa Israel nadingken aku, imam-imam Lewi kesusuren Sadok tetap patuh ndahiken dahinKu i bas Rumah Pertoton. Erkiteken si e, genduari ia me kerina si erdahin guna Aku janah banci ia reh ku adep-adepenKu mpersembahken tabeh-tabeh ras dareh asuh-asuhen si ipersembahken. 16Ia ngenca banci bengket ku Rumah PertotonKu, bage pe ndahiken dahin i bas batar-batar, ras mabai kebaktin i bas Rumah Pertoton. 17Adi bengket ia arah kerabangen ku kesain si lit i bas Rumah Pertoton e, la banci lang ia make uis linen. Uis si ibahan i bas mbulu biri-biri nari la banci ipakena tupung ia ndalanken tugasna i bas kesain si arah bas tah pe i bas Rumah Pertoton. #Kel 28:39-43; Im 16:4 18Maka ola ia panasen, arus ia make bulang linen ras seluar luar linen, tapi la banci ergendit. 19Ope denga ia ndarat ku kesain si arah darat ingan jelma si nterem pulung, arus itangtangina lebe paken si ipakena asum ia ndalanken dahinna i bas Rumah Pertoton, janah isimpanna i bas kamar-kamar si badia e. Ia arus make paken si deban gelah jelma si nterem e ola kena cilaka erkiteken paken si badia e. #Im 16:23
20Imam-imam la banci takal tabu, janah la ka banci gedang bukna. Arus iperdiatekenna maka bukna payo pergedangna. #Im 21:5 21Imam-imam la banci sitik pe minem lau anggur ope denga bengket ku bas kesain Rumah Pertoton. #Im 10:9
22Imam-imam la banci ngempoi diberu si enggo mulih i bas perbulangenna nari; si banci iempoina e me si nguda-nguda kalak Israel tah pe ndehara imam si enggo mbalu. #Im 21:7,13-14
23Imam-imam arus ngajari bangsangKu, apai si badia, apai si lang, apai si bersih rikutken aturen agama, apai si la bersih. #Im 10:10 24Adi lit kalak si erpekara, imam-imam arus ndungi perkara e erpalasken Undang-undangKu. Wari raya agama arus iperdiateken maka irayaken sue ras peraturen-peraturen ras Undang-undangKu, janah la banci lang ipebadiakenna wari Sabat.
25Sekalak imam la banci njemak mait gelah ola ia la bersih rikutken aturen agama, pala mait ndai mait orang tuana, mait anakna, seninana, tah pe turangna si langa tersereh. #Im 21:1-4 26Adi la ia bersih erkiteken njemak mait arus itimaina lebe pitu wari janah kenca ia bersih ka mulihi, 27e maka bengket ia ku kesain si arah bas i bas Rumah Pertoton lako mereken persembahen guna mersihken dirina maka banci ia ndahiken dahinna i bas Rumah Pertoton. Aku, TUHAN si Erdolat enggo melasken katangKu.
28Imam-imam ngaloken jabaten imam, janah e me baginna i bas kai si Kubereken man Israel ersundut-sundut. La banci lit erta ras kebayakenna i Israel, sabap Aku kap kebayakenna. #Bil 18:20 29Persembahen buah gandum, persembahen pengalemi dosa ras persembahen ganti rugi, e me jadi nakan imam-imam e. Janah kasa kai si iserapken jadi sikerajangenKu i Israel, arus ibereken man imam-imam. #Bil 18:8-19 30Man imam-imam arus ibereken kerina ulih peranin si pemena ras si mehulina, bage pe kerina si debanna si ipersembahken man bangKu. Tep-tep kali bangsa Israel nasakken roti, maka roti sipemenana arus ibereken man imam jadi persembahen; e maka Kupasu-pasu rumah bangsa Israel. 31Imam-imam la banci ipanna perik-perik tah pe rubia-rubia si deban si mate bana, tah pe mate ijerngem rubia-rubia si merawa.” #Im 22:8
Currently Selected:
ESEKIEL 44: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.