ESEKIEL 42
42
Dua gedung deherken Rumah Pertoton
1Kenca bage ibabai dilaki ndai aku ku kesain si arah darat, jenari iteguna aku ku gedung si deban arah Utara Rumah Pertoton e, la ndauh i bas gedung si galang si lit jahen Rumah Pertoton. 2-3Sada dampar gedung enda ndai ngala kempak beranda si belangna sepuluh meter e, janah dampar si deban ngala kempak lante batu si lit i kesain si arah darat. Gedung e ertingkat telu; tep-tep tingkat njurnjur ku lebe dauhen asa tingkat si arah datasna. 4I lebe kamar-kamar e, arah bas, lit lorong si belangna lima meter, gedangna lima puluh meter. Pintunna kerina ngala ku Utara. 5Kamar-kamar i tingkat si arah datas kitiken asa kamar-kamar si lit i tingkat si arah teruhna, sabap lorong-lorong i lebe-lebe kamar-kamar si arah datas ndai belangen asangken si lit iteruhna. 6Kamar-kamar ndai ertingkat telu janah la lit binangunna bagi gedung-gedung si lit deher kesain e. 7-8Sada bagin i tingkat si arah teruh, si gedangna dua puluh lima meter jadi tembok saja ngenca, si lebihna, gedangna dua puluh lima meter lit kamar-kamarna. I tingkat si arah datasna kal lit kamar-kamarna gedang-gedang gedung e. 9-10I teruh kamar-kamar, i ujung si arah kenjulu gedung e, e me bena tembok, lit sada pintun ku kesain si arah darat.
Arah dampar Selatan Rumah Pertoton e lit gedung si bali tempasna, inganna la ndauh i bas gedung si arah kenjahe ndai. 11I lebe-lebe kamar-kamarna lit sada lorong bali ras lorong-lorong gedung si arah Utara. Sibar-sibarna, tempasna, pintunna, kerina seri. 12I teruh kamar-kamar si lit i bas dampar Selatan, i bas bena tembok si arah kenjulu, lit sada pintun.
13Nina dilaki ndai man bangku, “Gedung enda duana, badia kap. I bas gedung e me imam-imam si banci ngadap ku adep-adepen TUHAN, man persembahen si badiana kal. Erkiteken kamar-kamarna pe badia, imam-imam namaken persembahen si badiana kal i je. Persembahen e, e me: persembahen buah gandum ras persembahen pengalemi dosa tah pe persembahen ganti rugi. 14Kenca imam-imam dung ndahiken dahinna i bas Rumah Pertoton, janah adi lawes atena ku kesain si arah darat, maka paken imam si ipakena arus itadingkenna i bas kamar-kamar e. Imam-imam e arus make paken si deban maka banci ia lawes ku ingan pulung jelma si nterem.”
Sibar-sibarna sekelewet Rumah Pertoton
15Kenca enggo dung isibarina bagin bagin si arah bas Rumah Pertoton e, ibabana aku ndarat arah kerabangen si arah kenjulu; kenca bage isibarina bagin sekelewet Rumah Pertoton e. 16Ibuatna galah penibar, jenari isibarina bagin si arah kenjulu, gedangna lit 250 meter. 17-19Kenca bage isibarina ka bagin si arah Utara, Selatan ras si arah kenjahe; gedangna kerina seri, e me 250 meter. 20Dage pertapaken Rumah Pertoton e empat segi tempasna, janah ikeleweti tembok si seri gedangna ras belangna, e me 250 meter. Tembok e lakonna e me mpeserap apai si badia, apai lang.
Currently Selected:
ESEKIEL 42: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.