ESEKIEL 40
40
PENGENEHENEN KERNA RUMAH PERTOTON I BAS PAKSA SI NANDANGI REH
40:1–48:35
Esekiel ibaba ku Jerusalem
1Tupung si e, e me wari sepuluh, bulan si pemena, i bas tahun si pedua puluh limaken, sanga kami i bas pembuangen, tah pe i bas tahun si pesepuluh empatken kenca Jerusalem irebut musuh, i bas wari e tergejap man bangku kuasa TUHAN, jenari ibabaNa aku lawes. 2I bas sada pengenehenen, ibaba Dibata aku ku taneh Israel, janah itamakenNa ku das sada deleng. I lebe-lebengku kuidah melala rumah tempa-tempa bagi sada kuta. #Ket 21:10 3IbabaNa aku terdeheren, e maka kuidah sekalak dilaki si ersinalsal bagi tembaga. Dilaki ndai ncikep pita penibari i bas kain linen nari ras sada galah penibari. Ia tedis deherken kerabangen. #Ket 11:1; 21:15
4Nina man bangku, “Perdiatekenlah o manusia si ermasap-masap. Dengkehken dingen perdiatekenlah mehuli-mehuli kai si kucidahken man bandu, sabap erkiteken si enda me maka kam ibaba ku jenda. Kai si iidahndu arus iturikenndu man bangsa Israel.”
Kerabangen si arah Timur
5E maka kuidah me Rumah Pertoton ikeleweti tembok. Ibuat dilaki ndai galah penibari si gedangna telu meter, jenari isibarina tembok ndai; ganjangna telu meter, kapalna pe telu meter. #1Raj 6:1-38; 2Kro 3:1-9 6Kenca bage lawes ia ku kerabangen si ngala ku kenjulu. Erdalan ia arah tangga ku das, janah kenca seh i das, isibarina pintunna; kapalna telu meter. 7Ipudi pintun ndai lit sada lorong; arah kawes lit telu kamar jaga, bage ka pe arah kemuhun. Belang tep-tep kamar telu meter sagi, janah kapal tembokna dua setengah meter. I lepar kamar-kamar jaga e lit dalan ku sada ruang galang ngala kempak Rumah Pertoton e. Dalan ndai telu meter gedangna. 8-9Isibarna ruang ndai, belangna empat meter. Ingan ruang ndai i bas ujung kerabangen si rembak ras Rumah Pertoton, ujung-ujung tembok e kapalna sada meter. (10Kamar-kamar jaga silit arah kawes ras kemuhun lorong ndai seri kerina belinna, janah tembokna pe seri kapalna.)
11Kenca bage isibarina ka belang lorong si lit i bas kerabangen e, belangna enem setengah meter. Belang kerabangen ndai lima meter. 12I lebe-lebe tep-tep kamar jaga lit sada tembok si meteruk, setengah meter kapalna (Kamar-kamar ndai belangna telu meter sagi). 13Kenca bage isibarina asa kai dauhna i bas dingding si arah pudi nari ku dingding si arah pudi dua kamar si petala-tala, teridah lit sepuluh dua setengah meter. 14Ruang si galang ndai pe isibarina; gedangna sepuluh meter. Arah pintun ruang enda banci ndarat ku kesain Rumah Pertoton. 15Dauhna i bas kerabangen si arah darat nari seh ku ujung tembok ruang si galang ndai dua puluh lima meter. 16I bas tembok si arah pudi ras i bas tep-tep tembok kelang-kelang kamar-kamar ndai lit tingkap kitik-kitik. I bas tembok-tembok si ngala kempak lorong ndai, ibahan ukiran gambar batang kurma.
Kesain si arah darat Rumah Pertoton
17Kenca bage ibabana ka aku arah kerabangen ndai ku kesain Rumah Pertoton. I bas tembok si arah darat i sekelewet Rumah Pertoton e, lit ibahan telu puluh kamar. I lebe-lebe kamar-kamar e lit lante batu, 18ngkeleweti kesain ndai. Kesain si arah darat enda teruhen asangken kesain si arah bas.
19I je lit sada kerabangen ganjangen asa kesain e, nuju kempak kesain si arah bas. Isibarina asa kai dauhna sirang kerabangen si dua e; teridah maka lit lima puluh meter.
Kerabangen si arah Utara
20Kenca bage isibarina ka kerabangen si arah utara si jadi dalan bengket kempak kesain si arah darat. 21Kamar-kamar jaga si telu arah kawes, telu arah kemuhen lorong ndai, tembok-tembok kelang-kelang kamar kamar e, bage pe ruang si galang ndai, kerina bali galangna ras si lit i bas kerabangen si arah kenjulu. Gedangna kerabangen ndai lit dua puluh lima meter janah belangna sepuluh dua setengah meter. 22Ruang si galang jendela-jendelana, ras ukiren gambar-gambar batang kurma si lit i je, bali ras si lit i bas kerabangen si arah kenjulu. I jenda lit pitu anak tangga maka seh ku kerabangen e, janah i bas ujungna lit sada ruang galang ngala kempak kesain Rumah Pertoton. 23Petala-tala ras kerabangen utara enda, lit kerabangen si deban man dalan bengket ku kesain si arah bas, bali ras si lit kerabangen si arah kenjulu. Isibarina asa kai dauhna sirang kerabangen si dua e; teridah maka lit lima puluh meter.
Kerabangen si arah Selatan
24Kenca bage, ibabana ka aku ku Selatan. I je kuidah sada kerabangen. Isibarina kerabangen e, janah bali ras si debanna. 25Jendela-jendela si lit i bas kamar-kamarna bali ras si lit i bas gerbang-gerbang si deban. Gedang lorong kerabangen enda lit dua puluh lima meter, belangna sepuluh dua setengah meter. 26I je lit pitu anak tangga maka seh ku kerabangen e, janah ruang si galang lit arah ujung, ngala ku kesain Rumah Pertoton. I bas tembok-tembok si arah bas si ngadap kempak lorong, lit ukiren gambar-gambar batang kurma. 27I je lit kerabangen man dalan bengket ku kesain si arah bas. Isibarina ka asa kai dauhna sirang kerabangen si dua e; teridah lit lima puluh meter.
Kerabangen Selatan dalan bengket ku kesain si arah bas
28Jenari ibaba dilaki ndai ka aku arah kerabangen Selatan ku kesain si arah bas. Isibarina kerabangen Selatan e, janah seri belinna ras kerabangen si arah darat. 29-30Kamar-kamar jaga, ruang si galang, tembok-tembokna si arah bas seri ras si lit i bas kerabangen si deban. Kamar-kamar si lit i bas kerabangen enda pe lit jendela-jendelana. Lorong kerabangen enda gedangna dua puluh lima meter, belangna sepuluh dua setengah meter. 31Ruangna si galang ngala kempak kesain si arah darat. Tembok-tembok si arah bas si ngala kempak lorong, i je pe lit ibahan ukiren gambar-gambar batang kurma. Waluh anak tangga maka seh ku kerabangen e.
Kerabangen si arah kenjulu dalan bengket ku kesain si arah bas
32Kenca bage ibabana aku arah kerabangen si kenjulu ku bas kesain si arah bas. Isibarina kerabangen e, janah seri ras gerbang-gerbang si debanna. 33Kamar-kamar jaga, tembok-tembok si arah bas, ras ruang si galang, bali belinna ras si lit i bas kerabangen si deban. I bas kamar-kamarna ras i bas ruangna si mbelin lit tingkapna. Gedangna lorong kerabangen e lit dua puluh lima meter janah belangna sepuluh dua setengah meter. 34Ruangna si galang ngala kempak kesain si arah bas. I bas tembok-tembok si arah bas si ngala kempak lorong, lit ukiren gambar-gambar batang kurma. Waluh anak tangga maka seh ku kerabangen e.
Kerabangen Utara dalan bengket ku kesain si arah bas
35Dungna ibabaina aku ku kerabangen Utara. Isibarina kerabangen e, janah seri belinna ras gerbang-gerbang si deban. 36Kamar-kamar jagana, tembok-tembokna si arah bas, bage pe ruang si mbelin, seri ras si lit i bas gerbang-gerbang si deban. Kamar-kamarna bage pe i bas ruang si mbelin e lit tingkap-tingkapna. Gedangna lorong kerabangen enda lit dua puluh lima meter, janah belangna sepuluh dua setengah meter. 37Ruang si mbelin e ngala kempak kesain si arah darat. I bas tembok-tembok si arah bas si ngala kempak lorong, lit ibahan ukiren gambar-gambar batang kurma. Waluh anak tangga maka seh ku kerabangen e.
Gedung-gedung deherken kerabangen Utara
38I bas kesain si arah darat lit sada kamar tambahen arah bas kerabangen Utara. I bas kamar tambahen enda lit sada pintun dalan bengket ku bas ruang si mbelin. I je me iburihi rubia-rubia si enggo igeleh jadi persembahen tutungen. 39I bas ruang si mbelin e lit empat meja, dua i bas tep-tep dampar. I das meja e me igeleh rubia-rubia persembahen tutungen, persembahen nasapken dosa, ras persembahen ganti rugi. 40I darat ruang si mbelin e lit ka empat meja si deban, dua i bas tep-tep dampar kerabangen utara e. 41Dage, lit waluh meja kerina ingan nggeleh persembahen, empat i bas, empat i darat. 42Meja si empat si lit i bas kamar tambahen e si ipake guna nikapken persembahen tutungen, ibahan alu batu si ipahat. Meja e ganjangna setengah meter; arah das tempasna empat segi. Gedangna ras belangna telu perempat meter. Perkakas guna nggeleh rubia-rubia persembahen e itamaken i das meja e. 43Tepi meja e lit biberna; belangna pitu setengah millimeter. Kerina daging si nandangi ipersembahken icibalken i das meja e.
44Kenca bage ibabana ka aku ku kesain si arah bas. I je lit dua ruangen galang, sada arah kawes kerabangen e, sada arah kemuhenna. Sada ngala kempak selatan, sada kempak utara. 45Ikataken dilaki ndai man bangku maka ruang si mbelin si ngala ku Selatan e isikapken man imam-imam si erdahin i bas Rumah Pertoton. 46Janah ruang si galang si ngala kempak Utara isikapken guna imam-imam si erdahin i bas batar-batar persembahen. Kerina imam-imam e arus i bas kesusuren Sadok nari, sabap i bas suku Lewi, kesusuren Sadok ngenca banci ngadap man TUHAN lako mpersembahken persembahen.
Kesain si arah bas ras Rumah Pertoton
47Isibari dilaki ndai kesain si arah bas. Tempasna persegi empat, gedangna bali ras belangna, e me limapuluh meter. Rumah Pertoton e lit arah Barat. I lebe-lebena lit sada batar-batar. 48-49Kenca bage ibabaina aku ku ruang si arah lebe i bas Rumah Pertoton e, nangkih arah piga-piga anak tangga. Isibarina ruang dalan bengket, belangna pitu kali dua setengah meter. Dingdingna si arah kawes ras kemuhen kapalna sada setengah meter. Arah kawes ras kemuhen lit sada binangun. Ruang si arah lebe ndai gedangna sepuluh meter, belangna enem meter.
Currently Selected:
ESEKIEL 40: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
