KELUAREN 23

Keadilen ras kinibujuren

1“Ola pebelang berita-berita si la tuhu, janah ola sampati kalak si salah alu mereken bukti-bukti si la tuhu. #Kel 20:16; Im 19:11-12; Ul 5:20 2Ola ikutken jelma si nterem si erbahan salah ntah pe si mereken kesaksin guna nutupi keadilen. 3Ola erpendobahen iakapndu kalak musil adi lit perkarana. #Im 19:15

4Adi idahndu lembu ntah kelede imbangndu pulah, tangkap janah bereken man bana. #Ul 22:1-4 5Adi keledena guling erkiteken baban si mberat, sampatilah ia petedissa; ola kam mentas saja.

6Berekenlah keadilen man kalak musil adi lit perkarana i bas pengadilen. #Im 19:15; Ul 16:19 7Ola bahan-bahan kesalahenna, janah ola munuh kalak si la ersalah, sabap la banci la Kuukum kalak si erbahan kejahaten si bage. 8Ola aloken uang sogok, sabap uang sogok erbahanca kalak lanai ngidah si benar, janah perkara kalak si la ersalah ibalikken.

9Ola erbahan si la bujur nandangi kalak pertandang; enggo itehndu kuga nanamna jadi kalak pertandang, sabap kam pe nai kalak pertandang nge i Mesir.” #Kel 22:21; Im 19:33-34; Ul 24:17-18; 27:19

Tahun si pepituken ras wari si pepituken

10“Enem tahun banci isuanindu jumandu janah perani kai si iasilkenna. #Im 25:1-7 11Tapi i bas tahun si pepituken pelepas jumandu e ngadi, janah ola perani kai pe si turah i je. Kai si turah i je ipan kalak musil, janah rubia-rubia si meliar banci mangani kai si tading. Peken anggurndu ras batang saitun pe bage lah ban.

12Enem wari kam erdahin i bas sada minggu, tapi ola kam erdahin i bas wari si pepituken, gelah budak-budakndu ras kalak pertandang si erdahin ras kam bage pe asuh-asuhenndu banci pekesahken. #Kel 20:9-11; 31:14-15; 34:21; 35:2; Im 23:3; Ul 5:13-14

13 TUHANndu kap si ngerana man bandu e; begiken lah kerina si enggo Kukataken. Ola ertoto man dibata-dibata si deban; ola singetken pe gelarna.”

Telu wari raya si mbelin

(Kel 34:18-26; Ul 16:1-17)

14“Rayaken telu wari raya setahun guna mereken kemulian man bangKu. 15I bas bulan Abip, bulan tupung kam nadingken Mesir, rayaken Wari Raya Roti si la tama ragi, bagi si Kupedahken man bandu. Ola pan roti kai pe si lit ragina kidekah pesta si pitu wari e. Tep-tep kali kam ersembah man bangKu, la banci la ibabandu persembahenndu. #Kel 12:14-20; Im 23:6-8; Bil 28:17-25

16Pestakenlah Kerja Rani asum ibenakenndu rani buah pagendu.

Pestakenlah Wari Raya Sapo-sapo i bas pengkeri-kerin tahun, asum iperanindu buah anggurndu ras si debanna. #Im 23:15-21,39-43; Bil 28:26-31

17Tep-tep tahun i bas wari raya si telu enda ndai, kerina dilaki la banci la reh ersembah man bangKu, TUHAN, Dibatandu.

18Ola ipersembahkenndu man bangKu roti si tama ragi, adi ipersembahkenndu ka asuh-asuhen. Lemak asuh-asuhen si ipersembahken sangana wari-wari raya enda ndai la banci iahanken seh ku pagina erpagi-pagi.

19Tep-tep tahun baba ku Rumah TUHAN Dibatandu buah page si pemena si iperanindu.

Ola tanggerken anak biri-biri ntah pe kambing alu lau susu indungna.” #Kel 34:26; Ul 14:21; Ul 26:2

Padan ras perentah-perentah

20“Kusuruh sada malekat arah lebendu ngkawali kam i bas perdalanenndu janah mabai kam ku ingan si enggo Kusikapken. 21Perdiateken lah ia janah ikutken lah. Ola lawan ia, sabap enggo Kusuruh ia, janah adi ilawanndu ia, kam la banci lang iukum kam. 22Tapi adi iikutkenndu ia janah ibahanndu asa kai si Kuperentahken, Aku ngelawansa kerina musuhndu. 23MalekatKu erdalan arah lebendu janah ibabaina kam ku taneh kalak Amori, Heti, Peris, Kanaan, Hewi ras Jebusi, janah Aku ngkernepkenca bangsa-bangsa e. 24Ola kam erjimpuh ntah pe ersembah man dibata-dibatana; janah ola iusihndu adat si lit i bas agamana. Kernepken dibata-dibatana, runtuhken kerina tugu-tuguna si badia. 25Adi isembahndu Aku, TUHAN Dibatandu, Kupasu-pasu kam alu mereken pangan ras lau, janah Kuagui kerina penakitndu. 26I bas negerindu la lit diberu si keguguren, la lit si la mupus. Kuban kam nggeluh cawir metua.

27Mbiar imbang-imbangndu kerina Kubahan man bangKu; Kuhuntakken imbangndu erperang, janah Aku erbahanca maka kerina musuhndu kiamen nadingken kam. 28Guntar Kubahan musuh-musuhndu, Kupelawes bangsa Hewi, bangsa Kanaan ras bangsa Heti tupung kam mengketi tanehna. 29Tapi la ia Kupelawes i bas sada tahun; sabap adi bage Kubahan, taneh e enggo kari jadi melungun, janah mbuesa pagi iakapndu rubia-rubia si meliar jadi musuhndu. 30E maka sitik-sitik ia Kupelawes seh maka enggo cukup teremna kam ngkuasai taneh e. 31Kupebelang baleng negerindu i bas Teluk Akaba nari seh ku Lau Eprat janah i Lawit Tengah nari seh ku gurun pasir. Kubereken gegeh man bandu naluken penduduk negeri e, janah ipelawesndu ia kerina tupung kam bengket. 32Ola ibahanndu perpadanen ras ia ntah ras dibata-dibatana. 33Ola bere bangsa-bangsa e ringan i bas negerindu; sabap adi iberendu, ibabaina kam pagi erdosa man bangKu. Adi isembahndu dibata-dibatana, enggo kam kena siding si erbahanca kam mate.”

Currently Selected:

KELUAREN 23: BTX

Highlight

Copy