KELUAREN 20

Sepuluh Pedah Dibata

(Ul 5:1-21)

1Ngerana Dibata, janah enda me kataNa, 2“Aku kap TUHAN Dibatandu, si maba kam ndarat i Mesir nari, inganndu iperbudak.

3Ola isembahndu dibata-dibata si deban, tapi sembah lah Aku.

4Ola ibahanndu gana-gana tah gambar-gambaren kerna kai pe si lit i datas langit, i doni, ntah pe si i bas lau i teruh doni. #Kel 34:17; Im 19:4; 26:1; Ul 4:15-18; 27:15 5Ola kam erjimpuh man gana-gana ntah pe ersembah ku je, sabap Aku kap TUHAN Dibatandu si percemburu. Asa kai kalak si ernembeh ate man bangKu Kuukum ia, ras anak-anakna, seh ku kesusurenna si peteluken ras si peempatken. #Kel 34:6-7; Bil 14:18; Ul 7:9-10 6Tapi tetap Kukelengi kalak si engkelengi Aku ras si ngikutken undang-undangKu, seh kempak meribu-ribu kesusuren.

7Ola ipakendu gelarKu guna tujun si jahat, sabap Aku TUHAN Dibatandu, la banci la ngukum asa kai kalak si nalah gunaken gelarKu. #Im 19:12

8Inget wari Sabat janah pebadiaken lah wari e. #Kel 16:23-30; 31:12-14 9Enem wari arus kam erdahin guna ndahiken dahinndu; #Kel 23:12; 31:14-15; 34:21; 35:2; Im 23:3 10tapi wari si pepituken e me sada wari pengadi-ngadin si man persembahenken man bangKu saja. I bas wari e, ise pe la banci erdahin: kam, anak-anakndu, budak-budakndu, asuh-asuhenndu, bage pe kalak pertandang si ringan i bas negerindu. 11Sabap i bas enem wari Aku TUHAN enggo njadiken doni, langit, lawit, ras kerina isina, tapi i bas wari si pepituken ngadi Aku. Em sabapna maka Kupasu-pasu wari Sabat janah Kupebadiaken wari e. #Kej 2:1-3; Kel 31:17

12Mehamatlah man bapandu ras nandendu, gelah banci kam ndekah nggeluh i bas negeri si Kubereken man bandu pagi. #Ul 27:16; Mat 15:4; 19:19; Mrk 7:10; 10:19; Luk 18:20; Ep 6:2

13Ola munuh. #Kej 9:6; Im 24:17; Mat 5:21; 19:18; Mrk 10:19; Luk 18:20; Rom 13:9; Jak 2:11

14Ola erlua-lua. #Im 20:10; Mat 5:27; 19:18; Mrk 10:19; Luk 18:20; Rom 13:9; Jak 2:11

15Ola nangko. #Im 19:11; Mat 19:18; Mrk 10:19; Luk 18:20; Rom 13:9

16Ola ibahan-bahanindu salah kalak. #Kel 23:1; Mat 19:18; Mrk 10:19; Luk 18:20

17Ola mengga atendu rumah kalak; ola mengga atendu ndeharana, budakna, lembuna, keledena, ntah kai gia sikerajangenna.” #Rom 7:7; 13:9

Mbiar bangsa Israel

(Ul 5:22-33)

18Kenca ibegi kalak Israel sora lenggur ras sora terompet si megang e janah idahna kilap ras deleng si erdipul e, nggirgir ia kerina ban biarna e maka idauh-dauh nari ia tedis. #Heb 12:18-19 19Nina bangsa e man Musa, “Adi kam ngerana man kami nggit kami megikenca; tapi adi Dibata ngerana man kami mbiar kami mate ibahanNa.”

20Nina Musa erjabap, “Ola mbiar; nguji kam saja kap ate Dibata reh, gelah kam tetap mbiar man baNa, maka ola kam erbahan dosa.” 21Tapi kalak Israel tetap tedis i dauh-dauh nari, e maka Musa ngenca lawes ndeheri ingan Dibata i bas embun si mbiring e.

Undang-undang kerna batar-batar

22Isuruh TUHAN me Musa gelah ikatakenna man bangsa Israel bagenda, “Enggo idahndu kuga Aku, TUHAN, ngerana man bandu i langit nari. 23Ola ibahanndu dibata-dibata pirak ntah emas jadi tambahen sembah-sembahenndu, tapi Aku ngenca banci isembahndu. 24Bahanlah sada batar-batar taneh ingan persembahen man bangKu, janah persembahken lah i babona biri-birindu ras lembundu jadi persembahen tutungen ras persembahen perdamen. I bas tep-tep ingan si Kuserapken man bandu jadi inganndu ersembah man bangKu, reh Aku ndahi kam janah Kupasu-pasu kam. 25Adi ibahanndu batar-batar batu man bangKu, ola bahan e i bas batu si enggo ipahat nari, sabap adi ibuatndu batu e, lanai patut ipake man bangKu. #Ul 27:5-7; Jos 8:31 26Ola ibahanndu man bangKu batar-batar si ertangga; adi bage ibahanndu, teridah kam kari bagi si manjang-anjang tupung kam nangkih arah tangga e.”

Currently Selected:

KELUAREN 20: BTX

Highlight

Copy