ULANGEN 6
6
Undang-undang pematang
1“Enda me kerina undang-undang si iperentahken TUHAN Dibatandu man bangku, gelah kuajarken man bandu. Ikutken lah kerina undang-undang e, i bas negeri si nandangi iinganindu. 2Kidekah geluhndu, arus maka kam ras sinursurndu erkemalangen man TUHAN Dibatandu, dingen ngikutken undang-undangNa si Kubereken man bandu, gelah nggedang umurndu i bas negeri e. 3O bangsa Israel, begiken ras ikutken lah undang-undang e! Adi bage mejuah-juah ras jadi bangsa si mbelin me kam, janah ngiani taneh si mehumur e, sue ras si enggo ipadanken TUHAN Dibata nu nini-nininta.
4O Israel ingetlah enda! Maka TUHAN si sada e kap ngenca Dibatanta! #Mrk 12:29 5Kelengilah TUHAN Dibatandu asa ukurndu, asa tendindu, asa gegehndu lit. #Mat 22:37; Mrk 12:30; Luk 10:27 6Ola ndigan pe lupaken kerina perentah-perentah si kubereken sendah man bandu. #Ul 11:18-20 7Ajarkenlah e man anak-anakndu. Persingetilah rusur, subuk sanga kam i rumah, ntah sanga kam i bas perdalanen, subuk sanga kam ngadi-ngadi ntah pe sanga kam erdahin. 8Iketkenlah undang-undang e i bas pergelangen tanndu pakeken i bas perdempakenndu, gelah jadi persinget man bandu. 9Suratken e i bas binangun pintun rumahndu ras i babo pintu gerbangndu.”
Kata persinget maka ola ngelanggar pedah TUHAN
10“Bagi si ipadanken TUHAN Dibatandu man nini-ninindu Abraham, Isak, ras Jakup, maka IA mereken man bandu sada negeri rikut ras kuta-kuta si mbelin ras mehuli si labo kam majekkenca. #Kej 12:7; 26:3; 28:13 11I bas kerina rumah e melala barang si mehuli, si la bekasndu namakenca i je; idapetindu sumur la bekasndu ngkali, ras peken anggur ras saitun la bekasndu nuan. Kenca ibaba TUHAN kam ku negeri e, janah enggo sikap kerina i je si man panganndu, 12jaga maka ola kam lupa TUHAN si mulahi kam i taneh Mesir nari, sanga kam jadi budak i je. 13Mbiarlah man TUHAN Dibatandu. IA sajalah ngenca sembah. Erpadanlah i bas gelarNa saja. #Mat 4:10; Luk 4:8 14Ola nembah man dibata-dibata si deban, dibata-dibata kalak si tading i sekelewetndu. 15Adi isembahndu dibata-dibata si deban e, pernembeh TUHAN reh man bandu bagi api, ngkernepken kam kerina, erkiteken TUHAN Dibatandu percimberu tuhu-tuhu.
16Ola cubai TUHAN Dibatandu bagi perbahanndu sanga kam i Massa. #Mat 4:7; Luk 4:12; Kel 17:1-7 17Jagalah, maka tetap iikutkenndu kerina undang-undang si enggo iberekenNa man bandu.
18Dahiken lah kai si mehuli ras payo bagi si ikataken TUHAN gelah mejuah-juah kam. Alu bage ngasup kam muat taneh si mehumur e jadi sikerajangenndu, taneh si enggo ipadanken TUHAN man nini-ninindu. 19Ipelawesndu musuh-musuhndu, bagi si ipadankenNa.
20I bas paksa si reh enda nungkun anak-anakndu man bandu nina, ‘Engkai maka iperentahken TUHAN Dibatanta kita ngikutken kerina undang-undang enda?’ 21Bagendalah jabapndu, ‘Mbarenda kami budak raja Mesir. Tapi TUHAN enggo mbebasken kami alu gegehNa si mbelin. 22Iidah kami alu mata kami jine ilakokenNa tanda kuasa ras ibahanNa kejadin-kejadin si erbahanca mbiar bangsa Mesir ras rajana, ras kerina pegawaina. 23IbebaskenNa kami i Mesir nari guna maba kami ku jenda janah iberekenNa man kami negeri enda sue ras padanNa man nini-nininta. 24Kenca bage iperentahken TUHAN Dibatanta kita ngikutken kerina undang-undang enda, janah mbiarlah man baNa. Adi bage perbahanenta IA lalap si njagai bangsanta ras erbahanca mehuli sikerajangenta. 25Adi tutus ateta ngikutken asa kai si iperentahken Dibata man banta, ngena ateNa man banta.’ ”
Currently Selected:
ULANGEN 6: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.