DANIEL 3
3
Iperentahken Nebukadnesar maka kerina kalak nembah man gana-gana emas
1Isuruh Raja Nebukadnesar gelah ibahan sada gana-gana emas, gedangna duapulu pitu meter, janah menam telu meter bertengna. Gana-gana e isuruhna pajekken i kendit Dura, i propinsi Babilon. 2Kenca bage iperentahkenna maka kerina pegawai-pegawaina pulung, subuk raja-raja, gubernur-gubernur, wakil gubernur, wakil raja, bendahara, hakim-hakim, kepala daerah, ras kerina pegawai-pegawai si deban si lit i bas propinsi-propinsi. Kerina kalak enda arus pulung ras-ras i bas penangkuhen gana-gana si enggo ipajekken Raja Nebukadnesar. 3Tupung kerina pegawai-pegawai ndai pulung guna penangkuhen e, sanga ia tedis i lebe-lebe gana-gana e, 4lit sekalak si ermomo alu sora megang nina, “O manusia i bas kerina bangsa-bangsa, suku, ras cakap! 5Tiknari ibegindu me sora terompet rikut ras sarune, murdap, gitar, ras kulcapi, bage pe alat-alat musik si deban. Kenca ibegindu kari sora si e kerina, arus kam minter nembah mungkuk kempak gana-gana emas si enggo ipajekken Raja Nebukadnesar. 6Ise si la nembah mungkuk, minter iambekken ku bas api ginuhur si gurlah.” 7E maka kenca ibegi kalak ndai sora gendang e, minter nembah mungkuk kerina manusia i bas bangsa-bangsa, suku ras cakap ndai. Isembahna gana-gana emas si enggo ipajekken Raja Nebukadnesar.
Teman-teman Daniel si telu kalak ndai iaduken
8Tupung si e piga-piga kalak Babilon muat kesempaten lako ngaduken kalak Jahudi. 9Nina kempak Raja Nebukadnesar, “O Raja, rasa lalaplah kam nggeluh! 10Enggo iperentahkenndu maka kenca erkata terompet, kerina kalak arus minter mungkuk nembah man gana-gana emas e, 11janah ise si la mungkuk nembah ku je, la banci lang ibenterken ku bas api ginuhur si gurlah. 12Lit piga-piga kalak Jahudi si iangkatndu njujurken propinsi Babilon, e me Saderah, Mesah ras Abednego, si la ngikutken perentahndu. Kalak e la nembah man dibatandu, la ia nembah mungkuk kempak gana-gana si ipajekkenndu.”
13I je minter gara pernembeh ate raja, iperentahkenna kalak ndai teluna ngadap. 14Nina raja man bana, “O Saderah, Mesah ras Abednego; tuhu kin la kam nggit nembah man dibatangku janah nembah mungkuk kempak gana-gana emas si enggo kupajekken e? 15Dage genduari, kenca ibegindu sora terompet, sarune, murdap, gitar ras kulcapi, bage pe alat-alat musik si deban, minter kam mungkuk nembah gana-gana e. Adi lang, minter kam iambekken ku bas api ginuhur si gurlah. Akapndu kin lit dibata si ngasup engkelini kam?”
16Ngaloi Saderah, Mesah, ras Abednego, “O Raja, labo lit sura-sura kami mperdiateken diri kami. 17Adi ngasup kin Dibata si isembah kami e mulahi kami i bas api ginuhur si gurlah e nari ras i bas kuasandu nari, tentu ipulahiNa kami. 18Tapi adi lang pe, ietehndu min o Raja, maka la kami nggit nembah dibatandu, janah la kami nggit nembah mungkuk kempak gana-gana emas si enggo ipajekkenndu e.”
Teman-teman Daniel iukum mate
19Kenca bage lanai tertahan Nebukadnesar rawana, sambar ayona ngenehen Saderah, Mesah ras Abednego. E maka iperentahkenna kalak nggarai ginuhur e pitu kali lipat gurlahna asa si gelgel. 20Jenari iperentahkenna pe kalak si megegehna i bas tenterana ngiket kalak ndai teluna ras ngambekkenca ku bas ginuhur si gurlah e. 21E maka minter iiketna rikut ras bajuna, jubahna, bulangna, ras kerina pakenna si deban, jenari iambekkenna ku bas ginuhur si gurlah e. 22Perban iperentahken raja maka gurlah kal ibahan ginuhur e, e maka isilamna penjaga si namaken kalak ndai ku bas ginuhur e. 23Kenca bage, sangana teriket denga, ndabuh me Saderah, Mesah ras Abednego ku tengah-tengah api si gurlah e. 24Rempet tedis Nebukadnesar rikut ras jengang pusuhna. Isungkunna suruh-suruhenna nina, “Ma telu kalak kin ndai si iiket ras si ibenterken ku bas ginuhur si gurlah e?”
Erjabap ia nina, “Ue Raja.”
25“Adi bage ngkai maka kuidah empat kalak erdalan-dalan i bas api e?” nina raja nungkun, “Lanai ia teriket, janah la kena kai pe ia; si peempatken rupana bagi anak dibata.”
Kalak ndai ipulahi teluna, pangkatna iangkat
26E maka ideheri Nebukadnesar babah ginuhur si gurlah e janahna erlebuh nina, “O Saderah, Mesah ras Abednego, suruh-suruhen Dibata si Meganjangna! Ndaratlah, mari ku jenda!” E maka minter ndarat kalak ndai. 27Kerina raja-raja, gubernur-gubernur, wakil gubernur, ras pegawai-pegawai raja si debanna pulung ngenehen kalak ndai teluna, la lit sitik pe si mesuina ibahan api e. Ujung bukna pe la meseng, uisna pe la ceda, janah bau cimber pe ia lang.
28Nina raja, “Pujilah Dibata si Saderah, Mesah ras Abednego! IsuruhNa malekatNa engkelini kalak si nembah ras ernalem man bana. Pang ia ngelawan perentahku ras ngasamken kesahna gelah ola mungkuk ras nembah man dibata si deban, seakatan man Dibatana jine.
29E maka genduari kuperentahken, adi ise gia i bas kerina bangsa, suku tah cakap si ngerana la mehamat kerna Dibata si Saderah, Mesah ras Abednego, la banci lang itampul ras dagingna ikeret-keret, janah rumahna iruntuhken. Sabap la lit Dibata si deban si ngasup ngkelini bage hebatna.”
30Kenca bage iangkat raja pangkat Saderah, Mesah ras Abednego i bas propinsi Babilon.
Currently Selected:
DANIEL 3: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
