PERBAHANEN RASUL-RASUL 8
8
1Saul pe erpengakap maka Istepanus patut ibunuh.
Perpulungen kalak si tek ngenanami kiniseran ibahan Saul
I bas wari e pe mulai me perpulungen si lit i Jerusalem ngenanami kiniseran, sabap ia isiksa kalak si nterem. Kerina kalak si tek mengongsi ku dusun-dusun i Judea ras Samaria; rasul-rasul ngenca la mengongsi. 2Piga-piga kalak si erkiniteken, engkuburken mait Istepanus, janah tangis kal ia kerina.
3Tapi Saul ersura-sura engkernepken perpulungen e. Ibengketina tep-tep rumah kalak si tek janah ibabana kalak e ku darat subuk dilaki bage pe diberu. Jenari itamakenna ku penjara. #Perb 22:4-5; 26:9-11
Berita Si Meriah seh i Samaria
4Kalak si erkiniteken si enggo merap e lawes ku kuta-kuta meritaken Berita Si Meriah. 5Pilipus lawes ku sada kuta i Samaria. I je iberitakenna kerna Si Engkelini si ipadanken Dibata man kalak si nterem. 6Meriah ukur kalak si nterem megiken pengajaren Pilipus. Ersada kerina ukurna megiken ia. Idahna pe tanda-tanda sengget si mbelin si ibahan Pilipus. 7I bas kalak si setanen nari, ndaraten setan-setan janahna serko alu megang. Bage pe nterem kalak si pangpangen ras kalak si cempang ipepalem. 8Perbahan si e jadi me keriahen si mbelin i Samaria.
9I bas kuta e lit me sekalak dilaki; gelarna Simon. Gelgel nari enggo ieteh kalak maka ia lit kinigurunna. Ikatakenna pe maka ia sekalak si mbelin. 10Kerina kalak si i bas kuta e, subuk kalak si meganjang ras si meteruk megiken katana. Nina kalak si nterem e, “I bas ia me Kuasa Dibata si igelari Kuasa si Mbelin.” 11Kalak si nterem megiken ia perbahan ndekah me enggo kemamangen kalak ibahanna alu kinigurunna. 12Tapi kenca ia tek kerina man Berita Si Meriah si iberitaken Pilipus kerna Kinirajan Dibata ras kerna Jesus Kristus, e maka iperidiken ia kerina, subuk si dilaki bage pe si diberu. 13Simon pe tek. Janah kenca ia iperidiken, ras Pilipus ia katawari pe. Mamang kal atena asum idahna tanda-tanda sengget si mbelin ibahan Pilipus.
14Rasul-rasul si i Jerusalem megi berita maka kalak Samaria enggo ngaloken kata Dibata. E maka isuruhna Petrus ras Johanes ndahi kalak e. 15Kenca ia seh, ertoto ia gelah kalak si enggo tek e ngaloken Kesah Si Badia. 16Sabap Kesah Si Badia langa nusur man bana; saja ia enggo iperidiken i bas gelar Tuhan Jesus. 17Kenca bage itamaken Petrus ras Johanes tanna ku babo kalak Samaria e, jenari ialoken kalak e me Kesah Si Badia.
18Kenca idah Simon maka kalak si tek e enggo ngaloken Kesah Si Badia asum itamaken rasul-rasul tanna ku babo kalak e, e maka iberekenna duit man Petrus ras Johanes, janah nina, 19“Berelah maka i bas aku pe lit kuasa e, gelah kalak ngaloken Kesah Si Badia adi kutamaken tanku ku babona.”
20Tapi nina Petrus, “Bene me kam ras duitndu e, sabap iakapndu banci itukur pemere Dibata. 21Labo lit baginndu ntah pe hakndu i bas dahin kami, sabap ukurndu la bujur i bas pengidah Dibata. 22E maka jeralah kam i bas rencanandu si jahat e janah ertotolah man Tuhan gelah ialemiNa kam i bas perukurenndu si la mehuli e. 23Sabap kuidah maka kam dem cian ate janah kam iperbudak dosandu.”
24Ngaloi Simon man Petrus ras Johanes, “Totokenlah aku man Tuhan gelah ola sada pe jadi i bas aku kai si ikatakenndu ndai.”
25Kenca Petrus ras Johanes ersaksi dingen nuriken kata Tuhan, mulihken ia ku Jerusalem. I bas perdalanenna iberitakenna Berita Si Meriah i kuta-kuta kalak Samaria.
Pilipus ras menteri Etiopia
26Sekalak malekat Tuhan, ngerana man Pilipus nina, “Ersikap janah laweslah kam ku Selatan, ku dalan si i Jerusalem nari ku Gasa.” (Dalan enda melungun). E maka ersikap Pilipus, jenari berkat ia. 27Paksa e lit sekalak Etiopia mentas arah dalan e mulihna ersembah i Jerusalem nari. Ia kepala Bendahara Kandake, Ratu Etiopia. Guna si e ia enggo 28ikebiriken. Ia mulih tare geretana. Asum ia i datas geretana alu sora megang iogena kitap Nabi Jesaya. 29Nina Kesah Si Badia man Pilipus, “To deheri gereta e.” 30IAyaki Pilipus gereta e janah ibegina menteri e ngoge kitap Nabi Jesaya. E maka nungkun Pilipus man bana, “IAngkandu nge kai si iogendu e?”
31Erjabap menteri e, “I ja ka nge banci kuangka, adi la lit kalak si nerangkenca man bangku?” Jenari ipindoken menteri e gelah Pilipus nangkih ku gereta dingen kundul i datas ras ia. 32Bagin Pustaka Si Badia si iogena e e me,
‘IA bali ras biri-biri si ibaba guna igeleh.
IA bali ras anak biri-biri si la ngelawan asum igunting mbuluna.
Kai pe la ibelaskenNa. #Jes 53:7-8
33IA ihina janah la lit keadilen ibahan man baNa.
Ise pe la ngasup nuriken kerna kesusurenNa,
Sabap geluhNa enggo ibuat i bas doni enda nari.’
34Kenca bage nina menteri e man Pilipus, “Kusungkun kam: Kerna ise si ikataken nabi enda? Kerna dirina ntah kerna kalak si deban?” 35E maka ibenaken Pilipus ngerana erpalasken kata e. Iturikenna man menteri e Berita Si Meriah kerna Jesus. 36Asum ia ras nerusken perdalanenna, seh ia ku sada ingan si lit i je lau. E maka nina menteri e man Pilipus, “Nehenlah, enda kap lau. Ma banci kin aku iperidiken?” [37Nina Pilipus man bana, “Kam banci iperidiken adi kam tuhu-tuhu enggo tek man Jesus Kristus.” Ngaloi menteri e, “Aku tek maka Jesus Kristus Anak Dibata kap.”]
38E maka isuruh menteri kusirna pengadi gereta e. Jenari duana ia, si Pilipus ras menteri e, nusur ku lau. I je me ia iperidiken Pilipus. 39Kenca ia ndarat i bas lau nari, rempet Pilipus ibabaken Kesah Tuhan. Menteri e lanai ngidah Pilipus, tapi iteruskenna perdalanenna alu meriah ukur. 40Pilipus enggo seh i Asdot. Isiarina kerina kuta-kuta janah iberitakenna Berita Si Meriah ngayak seh ia i Kesarea.
Currently Selected:
PERBAHANEN RASUL-RASUL 8: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
