PERBAHANEN RASUL-RASUL 7
7
Si Istepanus ngerana i lebe-lebe Pengadilen Agama
1Isungkun Imam si Mbelin si Istepanus nina, “Tuhu kin ikatakenndu bagi si ikataken kalak enda?” 2Ngaloi Istepanus nina, “Kam bapa ras senina-senina, begikenlah! Dibata si Mulia e enggo ncidahken diriNa man nininta Abraham, asum ia nai ringan i Mesopotami, ope denga ia lawes ku Haran. #Kej 12:1 3Janah nina Dibata man bana, ‘Tadingkenlah kade-kadendu ras negerindu; berkatlah ku negeri si Kutuduhken man bandu.’ 4E maka itadingken Abraham taneh Kaldea, pindah ia ku Haran. Janah kenca mate bapana, isuruh Dibata ia miser ku negeri enda, ku inganndu si genduari enda. #Kej 11:31; 12:4 5Paksa si e nai la lit taneh enda sentepap pe ibereken Dibata jadi si kerajangen Abraham. Tapi erpadan nge Dibata mereken taneh enda kerina man bana ras man kesusurenna aminna gia paksa e la lit pupusna. #Kej 12:7; 13:15; 15:18; 17:8 6Paksa si e pe ikataken Dibata man bana, ‘Kesusurenndu pagi ringan i negeri si deban empat ratus tahun dekahna. I je pagi ia iperkawanken dingen inanamina kiniseran. #Kej 15:13-14 7Tapi Kuukum pagi bangsa si emperkawanken ia, jenari Kupulahi ia i bas negeri e nari janah isembahna Aku i bas ingan enda.’ #Kel 3:12 8Si jadi tanda i bas perpadanen enda isuruh Dibata maka Abraham ras kesusurenna isunatken. E maka isunatken Abraham anakna Isak kenca waluh wari umurna. Isunatken Isak anakna Jakup janah isunatken Jakup anakna si sepuluh dua kalak si enggo jadi nini-nininta. #Kej 17:10-14; 21:2-4; 25:26; 29:31–35:18
9Nininta e nai ercian ate nandangi seninana Jusup, e maka idayakenna jadi budak i taneh Mesir. #Kej 37:11,28; 39:2,21 10Tapi itemani dingen isampati Dibata ia i bas kerina kiniseranna. Asum ia ngadap man Paro, raja Mesir, ipehaga Dibata ia janah iberekenNa kepentaren man bana. E maka iangkat Paro si Jusup jadi kalak si erkuasa i bas ingan e bage pe nandangi kerina erta-erta raja. #Kej 41:39-41 11Kenca si e jadi me kelihen i belang-belang taneh Mesir bage pe taneh Kanan, si erbahanca turah kiniseran si mbelin. Nininta nai pe lanai ndat pangan. #Kej 42:1-2 12Tapi kenca ibegi Jakup maka i Mesir lit gandum, e maka isuruhna anak-anakna, e me nininta nai, ku Mesir. Enda me perdalanenna si pemena. 13Asum ia ku jah pedua kaliken, ipetandaken Jusup dirina man senina-seninana e. Perbahan si e, Paro pe enggo meteh kerna keluarga Jusup. #Kej 45:1,16 14Jenari isuruh Jusup piga-piga kalak ngelegi bapana Jakup ras kerina kade-kadena gelah kerina pindah ku Mesir. Teremna kalak e pitu puluh lima kalak. #Kej 45:9-10,17-18; 46:27 15E maka berkat Jakup ku taneh Mesir. I je me ia ringan seh mate janah bage ka pe anak-anakna. #Kej 46:1-7; 49:33 16Maitna ibaba ku Sihem janah ikuburken i bas kuburen si nai enggo itukur Abraham i bas anak Emor nari. #Kej 23:3-16; 33:19; 50:7-13; Jos 24:32
17Kenca enggo ndeher paksana padan Dibata man Abraham nai jadi, bangsanta i taneh Mesir enggo reh teremna. #Kel 1:7-8 18Paksa e mulai me erkuasa i Mesir sekalak raja si la meteh kerna Jusup. 19Itipuna nininta alu kejam. Ipaksana ia muangken anak-anak si mbaru tubuh gelah mate. #Kel 1:10-11,22 20Paksa si e me tubuh Musa, anak dilaki si mejile kal rupana. Telu bulan dekahna ia ibuniken orangtuana i rumah. #Kel 2:2 21Kenca bage ibuangken orang tuana ia. Tapi idah putri Paro jenari ibuatna janah ijadikenna jadi anakna. #Kel 2:3-10 22IAjarken guruna man bana kerina kepentaren kalak Mesir. Musa jadi kalak si mbelin. Ia erkuasa i bas kata ras perbahanen.
23Kenca umur Musa empat puluh tahun turah ukurna ndahi senina-seninana bangsa Israel. #Kel 2:11-15 24Idahna sekalak Israel ipekpeki kalak Mesir. E maka ibelana kalak Israel e; isampatina ia alu munuh kalak Mesir e. 25Ietehna maka ate Dibata make ia mulahi bangsana. Janah iakapna maka bangsana pe meteh kerna si e; tapi la ieteh bangsana. 26Pepagina idahna dua kalak bangsa Israel rubati. Icubakenna ndameken si dua kalak e nina, ‘O teman begikenlah! Kam ersenina; ngkai maka sipekpeken kam duana?’ 27Tapi kalak si ersalah i bas perubaten e la megiken kata Musa nina man Musa, 28‘Ise kin ngangkat kam jadi peminpin dingen hakim nandangi kami? Ibunuhndu ka kin atendu aku bagi nderbih enggo ibunuhndu kalak Mesir e.’ 29Megi kata e, kiam Musa, itadingkenna taneh Mesir janah ringan ia i taneh Midian. I je ipupusna dua kalak anak dilaki. #Kel 18:3-4
30Kenca empat puluh tahun Musa ringan i Midian icidahken malekat dirina man Musa i bas api si gara i bas rambah duri i gurun pasir deher Deleng Sinai. #Kel 3:1-10 31Mamang ate Musa ngidahsa. E maka ideherina rambah duri guna pepayosa. Asum ideherina e ibegina sora Tuhan nina, 32‘Aku kap Dibata si isembah ninindu, Dibata si Abraham, Isak ras Jakup.’ Erkiteken si e nggirgir Musa perbahan biarna. Lanai ia pang jurgak. 33Jenari nina ka Tuhan man bana, ‘Tangtangi sepatundu sabap ingan enda taneh Badia kap. 34Tuhu-tuhu enggo Kuidah bangsangKu i Mesir ngenanami melala kiniseran. Enggo Kubegi pernderkuhna e maka reh Aku mulahi ia. Marilah, kam me kusuruh ku taneh Mesir.’
35Musa enda me si itulak bangsa Israel alu ngataken, ‘Ise kin si ngangkat kam jadi peminpin dingen hakim nandangi kami?’ IA si isuruh Dibata erkelang-kelangken malekat si enggo teridah man bana i rambah duri si gara jadi peminpin ras simulahi bangsa Israel. #Kel 2:14 36Ibabana bangsa Israel ndarat i taneh Mesir nari alu erbahan tanda-tanda sengget si mbelin i Mesir, i Lawit Merah, ras empat puluh tahun i gurun pasir. #Kel 7:3; 14:21; Bil 14:33 37Musa enda me si ngataken man bangsa Israel, ‘IAngkat Dibata pagi sekalak nabi man gunandu, i tengah-tengahndu nari, bali ras aku enggo iangkatNa.’ #Ul 18:15,18 38Musa enda me si pulung ras nini-nininta i gurun pasir. Ia me si ngerana ras malekat i Deleng Sinai. IAlokenna kata Dibata si ngaturken kegeluhen guna ipeseh man banta. #Kel 19:1–20:17; Ul 5:1-33
39Tapi nininta nai la megiken katana. Isimbakna Musa, sabap atena mulihken ku taneh Mesir. 40E maka nina man Arun, ‘Bahanlah dibata-dibata man kami jadi peminpin kami. Sabap la ieteh kami kai si enggo jadi nandangi Musa si maba kami ndarat i taneh Mesir nari.’ #Kel 32:1 41E maka ibahan kalak enda sada gana-gana, bali ras anak lembu. Jenari ipersembahkenna persembahen tutungen man gana-gana e. Ihamatina kai si enggo ibahanna e alu erbahan sada kerja si meriah. #Kel 32:2-6 42Tapi Dibata nadingken kalak e. Ipelepasna kalak e nembah man bintang-bintang i langit, bagi enggo isuratken i bas kitap nabi-nabi,
‘O bangsa Israel!
Empat puluh tahun dekahna asum kam i gurun pasir,
igelehndu dingen ipersembahkenndu asuh-asuhenndu.
Tapi man bangKu kin ipersembahkenndu asuh-asuhen e? #Amos 5:25-27
43Lang! Tapi ilanjandu kemah dewa Moloh
ras gambar bintang dewa Repan man dibatandu;
e me patung-patung si ibahanndu man sembahenndu.
Perbahan si e Kubuang kam ku ingan si terdauhen asa Babil.’
44Asum nini-nininta i gurun pasir, lit kap i tengah-tengahna Kemah Perjumpan. Kemah e isuruh Dibata ibahan Musa rikutken contoh si enggo icidahken Dibata man bana. #Kel 25:9,40 45Kemah si ialoken nininta i bas bapana nari seterusna ibabana asum ia lawes ras Josua guna ngerebut taneh enda i bas bangsa si deban nari, e me bangsa si ipelawes Dibata i lebe-lebe nininta nari. Kemah e lit denga asum Daud jadi raja. #Jos 3:14-17 46Daud si ngena ate Dibata e, mindo man Dibata, gelah ia iijinken erbahan sada rumah, e me rumah man Dibata si isembah Jakup. #2Sam 7:1-16; 1Kro 17:1-14 47Tapi Salomo me surungna erbahan Rumah Pertoton man Dibata. #1Raj 6:1-38; 2Kro 3:1-17 48Tapi Dibata si Mbelin e labo ringan i bas rumah si ibahan manusia; bagi enggo isuratken nabi,
49Nina Tuhan, ‘Surga kap inganKu kundul
janah doni kap manca-manca nahengKu.
Rumah si kuga kin atendu ibahanndu man bangKu?
I ja kin inganKu pekesahken? #Jes 66:1-2
50Ma kin Aku erbahanca si nasa lit?’
51O kam si keras kepala! Ukurndu bali ras ukur kalak perbegu, la kam nggit megiken kata. La erngadi-ngadi isimbakNdu Kesah Si Badia. Bali kam ras ninindu nai! #Jes 63:10 52Lit kin sekalak lah gia nabi si la isiksa ninindu? Ibunuhna pe nai kalak si enggo leben erberita kerna kerehen Persuruhen Dibata si Bujur janah Persuruhen Dibata si Bujur e enggo ihianati dingen ibunuhndu. 53Enggo ialokenndu Undang-undang si reh i bas Dibata nari, si isehken malekat man bandu tapi la ikutkenndu.”
Istepanus ibenteri alu batu
54Megelut anggota sidang megi ranan si Istepanus. Erderik ipenna perban rawana nandangi Istepanus. 55Tapi Istepanus si dem alu Kesah Si Badia, natap ku das. Idahna terang si ersinalsal i bas Dibata nari janah idahna pe Jesus tedis arah kemuhen Dibata. 56Jenari nina, “Nehenlah! Kuidah langit talang, janah Anak Manusia si isuruh Dibata tedis arah kemuhen Dibata.”
57Alu sora megang serko kerina anggota sidang e janah nutupi cupingna alu tanna. Jenari iserbuna Istepanus. 58Isarenna ku darat kuta, jenari ibenterina alu batu. Kalak si menterisa e nangtangi bajuna, janah itadingkenna i bas sekalak anak perana; gelarna Saul. 59Asum Istepanus ibenteri kalak e, ertoto ia man Tuhan nina, “O Tuhan Jesus, alokenlah tendingku!” 60Erjimpuh ia janah nina alu sora megang, “O Tuhan, ola min ikira Kam dosa kalak enda.” Kenca ikatakenna si enda, mate ia.
Currently Selected:
PERBAHANEN RASUL-RASUL 7: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
