PERBAHANEN RASUL-RASUL 27

Paulus erlayar ku Roma

1Kenca enggo iputusken maka kami arus erlayar ku Italia, iendesken me Paulus ras piga-piga kalak tahanen si deban man Julius. Julius, e me sekalak perwira i bas pasuken tentera Roma si igelari “Pasukan Kaisar”. 2Idatasi kami kapal si reh i Adramiti nari, jenari erlayar kami alu kapal e si enggo sikap berkat ku pelabuhen-pelabuhen i Propinsi Asia. Aristarkus, sekalak Makedoni i Tesalonika nari ikut ras kami. 3Pepagina seh kami i Sidon. Julius mehuli kal man Paulus. Iijinkenna Paulus ndahi teman-temanna si i Sidon gelah banci ibereken teman-temanna e kai si iperlukenna. 4I Sidon nari terus kami erlayar ngikut-ngikut pantai pulau Kiprus si terampang i bas angin si meter rembus nungsang kapal e. 5Ikepari kami lawit tingtang Kiliki ras tingtang Pampilia, jenari seh kami i kuta Mira, i daerah Likia. 6I Mira idat perwira e kapal si reh i Aleksandria nari. Kapal e muatna berkat ku Italia. E maka ipindahken perwira e kami ku kapal e.

7Piga-piga wari dekahna kapal kami manjar-anjar ngenca banci erdalan. Alu mesera-mesera ideheri kami kuta Kenidos. Tapi perbahan lalap meter angin nungsang kapal kami, la banci iterusken kami kempak arah si pemena; e maka kenca seh i tanjung Salmone erlayar kami arah Selatan pulau Kreta gelah kapal kami terligen i bas angin si meter e nari. 8Alu mesera-mesera tetap iikut-ikut kami tepi pulau e janah kedungenna seh kami i bas sada ingan si igelari Pelabuhen si Mejile. Pelabuhen enda la ndauh i kuta Lesea nari.

9Ngayak ingan enda saja enggo melala wari-wari kami terbuang. Enggo tambah pe bahayana adi iterusken pelayaren paksa si e. Bage pe enggo lepas wari puasa kalak Jahudi. E maka nina Paulus man kalak si i bas kapal e, 10“O teman-teman, kuakap bahaya man banta adi terus kita erlayar. Labo saja kapal ras barang-barang si lit i bas kapal enda bene tapi kita pe banci bene nge.” 11Tapi teken perwira e man kapten ras empu kapal e asangken man Paulus. 12Janah perbahan pelabuhen e labo ingan si sikap i bas paksa-paksa musim angin topan e maka teremen kalak setuju berkat alu pengarapen banci seh i Peniks, gelah kidekah musim angin topan e banci ringan i je. Peniks, e me sada pelabuhen i pulau Kreta. Pengalana kempak Barat Daya ras kempak Barat Laut.

Angin si meter nungsang kapal si itumpangi Paulus

13Asum angin si reh i Selatan nari mulai rembus alu manjar-anjar, mbelin pengarapen kalak e maka banci seh sura-surana. E maka iangkatna jangkar jenari erlayar ia ngikut-ngikut pantai pulau Kreta. 14Tapi la ndekahsa kenca si e, rempet rembus angin si meter i pulau e nari si igelari angin Timur Laut. 15Iderpa anginna kapal ndai janah perbahan lanai tersungsang angin e, e maka ipelepas kami saja kapal ndai ibabaken angin e. 16Jenari ibabakenna kapal kami kempak Selatan pulau si kitik si igelari pulau Kauda. Paksa e me irintak kami alu mesera-mesera sekoci ku das kapal e. 17Kenca iangkat pegawai kapal perahu si kitik e ku bas kapal, irakutina kapal e kelewet alu tinali. Perban mbiar kalak enda tertendeng kapal e uruk kersik si i bas lawit i pantai Libia, e maka ipesusurna layar janah ipelepasna kapal e ibaba angin. 18Angin si merawa e terus rembus, e maka pepagina iambekken pegawai me muaten kapal. 19Janah pepagina ka alat-alat kapal e pe deba terpaksa iambekkenna. 20Piga-piga wari dekahna matawari ras bintang la teridah, janah angin si merawa e tetap rembus. Dungna lanai lit arapen kami nggeluh.

21Kenca enggo ndekah kalak si i bas kapal e la man, e maka tedis Paulus i lebe-lebe kalak e jenari nina, “O senina-senina, ulin kin min mbarenda ibegikenndu katangku. Ulin min mbarenda la kita berkat i pulau Kreta nari, gelah ola kita rugi dingen ngenanami kiniseran enda. 22Tapi genduari, kukataken man bandu maka aminna gia kita lit i bas kiniseran enda tetapkenlah ukurndu, labo kam sekalak pe bene. Kapal enda ngenca pagi bene. 23Sabap ndai berngi reh ndahi aku malekat persuruhen Dibata si kusembah dingen Dibata si empu geluhku. 24Nina malekat e man bangku, ‘O Paulus, ola kam mbiar! La banci kam la seh ku lebe-lebe Kaisar, janah erkiteken perkuah ate Dibata arah kam, kerina kalak si lit i bas kapal enda pe selamat.’ 25E maka tetapkenlah ukurndu o senina-senina! Sabap tek aku man Dibata maka kai si ikatakenNa man bangku jadi kap. 26Tapi la banci lang ibabaken angin kita ku sada pulau.”

27Kenca sepuluh empat berngi kapal kami bombang-bombang i Lawit Adria, asum tengah berngi pegawai-pegawai kapal erpengakap maka kami enggo ndeher ku daraten. 28E maka ipesusurna batu si irakutken ku nali guna nibari bagesna lawit. Bagesna lawit e lit empat puluh meter. Kenca terleben isibarina ka bages lawit e, lit telu puluh meter. 29Perbahan mbiar ia kapal e terantuk ku batu karang e maka idabuhkenna empat jangkar arah pudi kapal e. Ngarap pe kami kerina gelah pedas min terang wari. 30Pegawai-pegawai kapal kiam atena i kapal nari. Ipesusurna sekoci i kapal nari, dingen ipekulah-kulahna ndabuhken jangkar arah lebe kapal. 31Perbahan si e nina Paulus man perwira ras prajurit, “Adi itadingken pegawai-pegawai e kin kapal enda labo kam sada pe banci selamat.” 32E maka iretapken perajurit-perajurit nali si ngiket sekoci e janah ipelepasna sekoci e ndabuh ku lawit janah mombak.

33Nandangi terang, isuruh Paulus kerina kalak si lit i bas kapal e man. Nina, “Enggo sepuluh empat wari dekahna iarap-arapkenndu ngadi angin si meter e. Janah kidekah si e la kam man. 34E maka kukataken man bandu maka man lah kam lebe. Si enda perlu guna kesehatenndu. Labo selambar pe buk takalndu bene.” 35Kenca ikataken Paulus enda, ibuatna roti, ertoto ia i lebe-lebe kalak e kerina guna ngataken bujur man Dibata kerna pangan e. Jenari icepik-cepikna roti e janah ipanna. 36Ngidah si e tetap ukur kalak ndai janah man pe ia kerina. 37Teremna kami i bas kapal e dua ratus pitu puluh enem kalak. 38Kenca kerina besur man, iambekken pegawai gandum si lit i bas kapal gelah reh nahangna kapal e.

Gedap kapal si itumpangi Paulus

39Kenca terang wari idah pegawai-pegawai daraten si la itandaina. Idahna teluk ras pantai. E maka itetapkenna gelah kapal itamaken ku daraten i je adi banci. 40Ipeltepkenna tinali-tinali jangkar janah ipelepasna jangkar e tading i bas lawit. Iosarina tinali si ngiket kemudi kapal jenari ipasangna layar arah lebe kapal gelah ibaba angin kapal e ku tepi pantai. 41Tapi itendeng kapal e uruk kersik si lit i bas lawit si erbahanca kapal e lanai banci erdalan. Bagin kapal si arah lebe leket janah bagin si arah pudi pecah ibahan galumbang.

42Paksa si e arih-arih perajurit-perajurit guna munuh kerina kalak tahanen gelah ola sekalak pe ia erlangi ku duru jenari kiam. 43Tapi perbahan Paulus la ate perwira e ibunuh, e maka ilarangna perajurit-perajurit munuh kalak tahanen e. Isuruhna kalak si beluh erlangi leben lompat ku lau janah erlangi ku daraten. 44Kalak si la beluh isuruhna make papan-papan ntah pe pecahen-pecahen kapal. Bagenda me carana kerina kami terkelin seh ku daraten.

Currently Selected:

PERBAHANEN RASUL-RASUL 27: BTX

Highlight

Copy