1 RAJA-RAJA 9
9
Dibata encidahken baNa ka man Salomo
(2Kro 7:11-22)
1Kenca ipajekken Raja Salomo Rumah Pertoton ras istana ras kerina si isurakenna majekkenca, 2TUHAN encidahken baNa ka man Salomo, bagi si ibahanNa i Gibeon. #1Raj 3:5; 2Kro 1:7 3Nina TUHAN, “Enggo Kubegi pertotonndu. Kupebadiaken Rumah Pertoton enda, si enggo ipajekkenndu man inganKu arus isembah rasa lalap. Kutatap dingen Kukawali Rumah e katawari pe. 4Adi kam nggeluh i bas adep-adepenKu alu bujur dingen pinter ukur, bagi si ibahan bapandu Daud, janah adi ikutkenndu Undang-undangKu ras ilakokenndu si enggo Kupedahken man bandu, 5la banci lang Kusehken padan si enggo Kubahan man bapandu Daud asum Kukataken man bana maka Israel la banci la tetap iperentah kesusurenna. #1Raj 2:4 6Tapi adi kam ras kesusurenndu lanai ngikutken Aku, adi lanai ipakendu Undang-undang ras pedah si enggo Kubereken man bandu, jenari isembahndu dibata-dibata si deban, 7e maka la banci lang Kupelawes bangsangKu Israel i bas taneh si enggo Kubereken man bana enda nari. Rumah Pertoton enda pe si enggo Kupebadiaken jadi ingan ersembah man bangKu, Kutadingken. Israel la banci lang igombang-gombangi ras ipedungu-dungu kalak i japa pe pagi. 8Rumah Pertoton enda runtuh pagi jadi batu si ergun-gun, janah kasa kai kalak si mentas jadi sengget dingen kemamangen nina: ‘Engkai maka bagenda ibahan TUHAN man taneh enda ras man Rumah Pertoton enda?’ nina pagi nungkun. #2Raj 25:9; 2Kro 36:19 9Jenari ngaloi kalak: ‘Enda erkiteken itadingken bangsa enda TUHAN, Dibatana, si maba nini-ninina ndarat i Mesir nari. Iendeskenna pusuh-peratenna man dibata-dibata si deban janah nembeh ia man bana. Em sabapna maka idabuhken TUHAN mara enda ku ia.’ ”
Padan Salomo ras Hiram
(2Kro 8:1-2)
10Dua puluh tahun dekahna Salomo majekken Rumah Pertoton ras istanana. 11Raja Hiram i Tirus nari nikapken kayu pinus si merim ras pinus biasa man bana bage pe kerina emas kasa kai atena guna dahin enda. Kenca enggo dung, ibereken Raja Salomo man Hiram dua puluh kuta i daerah Galilea. 12Lawes Hiram ngenehenca, janah la atena ngena. 13E maka nina man Salomo, “Kuta kai kin si iberekenndu e man bangku, o seninangku?” Erkite-kiteken si enda; daerah e seh asa genduari igelari denga Kabul. 14Gelgel e enggo ikiremken Hiram man Salomo lebih empat ribu kilo emas.
Erbage-bage pendahin Salomo
(2Kro 8:3-18)
15Raja Salomo make kerja paksa guna majekken Rumah Pertoton ras Istanana, ngangkati taneh ku bagin kuta e arah kenjulu, ras erbahan tembok kuta e. Tole ipakena ka nge kerja paksa e majekken kuta-kuta Hasor, Megido ras Geser. ( 16Gelgel e enggo iserang raja Mesir kuta Geser jenari ikuasaina, ibunuhna pendudukna kalak Kanaan, janah icilukna kuta e. Jenari ihadiahken raja Mesir kuta e man anakna asum ia sereh man Salomo, 17kenca bage ipekena Salomo mulihken.) Alu make kerja paksa, ipajekken Salomo ka mulihken kuta-kuta Bet-Horon Berneh. 18Baalat, Tamar, i taneh si mesawang Juda, 19bage pe kuta-kuta man inganna nimpan perbekalenna, kuta-kuta man ingan kuda-kudana ras gereta perangna, ras si debanna si ipajekkenna atena i Jerusalem, i Libanon, ras i bas ingan-ingan si deban i bas kerajanna. 20-21Guna kerja paksa e ipakena kesusuren bangsa Kanaan si la ibunuh asum Israel ngerebut tanehna. Bangsa-bangsa enda e me kap bangsa Amori, bangsa Heti, bangsa Peris, bangsa Hewi, ras bangsa Jebusi, i ja kesusurenna terus jadi budak seh paksa enda. 22Kalak Israel la ibahan Salomo jadi budak; ia erdahin jadi tentera, pegawai-pegawai, puanglima-puanglima, kepala-kepala tentera si ergereta perang, ras tentera si erkuda.
23Lit lima ratus lima puluh kalak pegawai si ngaturken kerja paksa e erdahin i bas erbage-bage pembangunen.
24Itambusi Salomo bagin kuta e arah kenjulu, kenca ndeharana, puteri raja Mesir, enggo pindah i Kuta Daud nari ku istana si ipajekken Salomo man bana.
25Telu kali sada tahun Salomo nehken persembahen tutungen ras persembahen pengalemi dosa i bas batar-batar si enggo ipajekkenna. Rempah-rempah si merim itutungna ka man TUHAN. Janah bage me ia ndungi Rumah Pertoton e. #Kel 23:17; 34:23; Ul 16:16
26Piga-piga kapal pe ibahan Salomo i Esion-Geber, deherken Elat, i tepi lawit Teluk Akaba, i negeri Edom. 27Raja Hiram nuruh piga-piga kalak pelautna si enggo erpengalamen ibas kapalna nari erdahin ras anak buah Salomo. 28Erlayar ia ku Opir, jenari ibabana mulih man Salomo lebih sepuluh empat ribu kilo emas.
Currently Selected:
1 RAJA-RAJA 9: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
