1 RAJA-RAJA 7
7
Istana Raja Salomo
1Ipajekken Salomo ka pe sada istana man bana, janah si enda sepuluh telu tahun dekahna maka dung. 2-3Gedung “Kerangen Libanon” gedangna empat puluh empat meter, belangna dua puluh dua meter, janah ganjangna 13,5 meter. Binangunna i bas kayu pinus si merim nari, lit telu baris, sepuluh lima tiap baris, ras beloti kayu pinus si merim ipakuken ku je. Langit-langitna i bas kayu pinus si merim nari, terus ku kamar-kamarna, itatang binangun ndai. 4I bas dingdingna si arah kawes ras kemuhen lit telu baris jendela. 5Pintunna ras jendela-jendelana kerina segi empat, janah jendela-jendela si telu baris i bas sada dingding, petingtang ras jendela-jendela si telu baris dingding si sada nari.
6“Ruang tiang-tiang” gedangna dua puluh dua meter janah 13,5 meter belangna. Arah lebe lit serambina si ertarum, melala tiangna.
7“Ruang Kursi Kinirajan”, igelari ka pe “Gedung Pengadilen”, ingan Salomo mutusken perkara-perkara, ilapisi alu papan kayu pinus si merim mulai i bas lantena nari terus ku rusukna.
8Gedung ingan Salomo tading, i bas kesain si deban arah pudi “Gedung Pengadilen” e, bali ibahan ras gedung-gedung si deban. Rumah si bage ka tempasna ipajekkenna ka man kemberahenna, putri raja negeri Mesir e. #1Raj 3:1
9Kerina gedung-gedung enda, subuk kesain si mbelang e, ibahan i bas batu si mejile nari, mulai i bas palasna nari terus ku ujung paspasenna i das. Kerina batu e enggo dung isikapken lebe i bas ingan muatca janah ipotong rikutken ukurenna, jenari arah darat ras arah bas ipelinangi alu gaji. 10Palasna ibahan i bas batu si galang nari si enggo isikapken i bas ingan muatca, deba telu setengah meter gedangna, deba empat meter. 11I babo batu palas e itamaken batu si deban, si ipotong rikutken ukurenna, ras beloti-beloti kayu pinus si merim. 12Kesain istana, kesain Rumah Pertoton e dingdingna batu, i ja i bas tiap telu lapis batu, itama beloti kayu pinus si merim.
Tugas Hiram
13Isuruh Raja Salomo kalak ngelegi Hiram, tukang si ringan i kuta Tirus, si beluh kal erbahan barang-barang tembaga. 14Bapana i Tirus nari, tapi enggo mate. Ia pe seh kal beluhna erbahan barang-barang tembaga. Nandena i bas suku Naptali nari. Hiram tukang si beluh dingen erpengalamen. Ialokenna undangen Raja Salomo guna itugasken erbahan kerina barang-barang tembaga si man bahanen.
Tiang tembaga si dua
(2Kro 3:15-17)
15Ituang Hiram dua tiang tembaga, tiap tiang ganjangna waluh meter janah kelilingna 5,3 meter, jenari itamakenna i bas dalan bengket ku bas Rumah Pertoton e. 16Jenari ibahanna ka pe dua takal tiang silit ukirenna i bas tembaga nari, tiap takal tiang ganjangna 2,2 meter, guna itamaken i babo tiang-tiang tembaga ndai. 17Ujung tiap tiang ihiasi alu rante si ipiuh, 18ras dua baris buah galiman tembaga.
19Kepala tiang tembaga ndai bentukna bagi bunga bakung, ganjangna 1,8 meter, 20janah itamaken i bas ujung tiang e, i babo ukiren rante-rante ndai. Lit dua ratus ukiren galiman i bas dua baris i sekelewet tiap takal tiang.
21Tiang tembaga si dua e itamaken Hiram i lebe-lebe dalan bengket kubas Rumah Pertoton: tiang si arah Selatan igelari Jahin, janah tiang si arah Utara igelari Boas. 22Kepala tiang tembaga si bagi bunga bakung e lit i babo tiang-tiang e.
Bage me dahin erbahan tiang-tiang tembaga e idungi.
Tong tembaga
(2Kro 4:2-5)
23Hiram erbahan tong mecengke i bas tembaga nari, bagesna 2,2 meter, garis tengahna 4,4 meter janah kelilingna 13,2 meter. 24I sekelewet biber tong e arah darat lit dua baris labu tembaga, si ituang ersada ras tong e. 25Tong e icibalken i babo gurung sepuluh dua jenggi lembu tembaga si ngala ku darat, janah tiap telu lembu ersada pengalana. 26Dingding tong e 75 millimeter kapalna. Biber tong e bali ras biber piala, janah lempir ku darat bagi bunga bakung. Isi tong e lit kira-kira empat puluh ribu liter.
Gereta tembaga
27Sepuluh gereta tembaga pe ibahan Hiram; gedangna 1,8 meter sada, belangna 1,8 meter janah ganjangna 1,3 meter. 28Kerina gereta e ibahan i bas papan-papan si segi empat si ipasang i bas bingke-bingke beloti, 29janah i bas papan-papan e lit gambar-gambar singa, jenggi lembu, ras mahluk si erkabeng; i babo bingkena e, datasen ras teruhen singa-singa ras jenggi lembu e, lit gambar-gambar timbul bagi bunga si terlak. 30Tiap gereta lit empat roda tembagana janah asna pe tembaga. I bas sukina empatna lit tembaga penatang sada baskom; penatangna e ihiasi alu gambar-gambar timbul bagi bunga si terlak. 31I bas ujungna lit sada bingke si mecengke guna baskom e, njurnjur ku das empat puluh lima sentimeter i babo tepi gereta e nari janah sepuluh waluh sentimeter i jenari ku bas. I sekelewetna lit gambar-gambar ukiren. 32Roda-roda ndai ganjangna enem puluh enem sentimeter; kerina i teruh papan ndai, janah asna ersada ras gereta e. 33Bentuk roda-roda e bagi roda gereta perang; asna, bingkena, jari-jarina, ras kepala kambingna kerina tembaga. 34I bas sukina si arah teruh empatna, lit empat tiang penatang gereta e, si ersada ras gereta e. 35I babo tiap gereta e lit bagi gendit, belangna dua puluh dua sentimeter; tiang-tiang penatangna ras papan-papan ndai kerina ersada ras gereta e. 36Tiang-tiang penatangna ras papan-papanna ihiasi alu gambar-gambar mahluk si erkabeng, singa ras batang kurma, asa siatna, alu gambar-gambar bunga i sekelewetna. 37Bagenda me dage gereta ndai ibahan; kerina seri, belinna seri, janah bentukna pe seri.
38Tole pe ibahan Hiram ka sepuluh baskom, sada guna tiap gereta. Tiap baskom garis tengahna 1,8 meter, janah isina kira-kira 800 liter. #Kel 30:17-21 39Lima i bas gereta e itamakenna arah Selatan Rumah Pertoton e, janah si lima nari arah Utara; tong tembaga ndai itamakenna i bas sukina si arah Tenggara.
Gelar-gelar perkakas i bas Rumah Pertoton TUHAN
(2Kro 4:11–5:1)
40-45Tambah si e ibahan Hiram ka kudin, sendok-sendok si galang, ras mangkuk. Idungina kerina dahinna man Raja Salomo guna Rumah Pertoton TUHAN. Enda me kerina si ibahanna:
Dua tiang galang.
Dua takal tiang bentukna bagi mangkuk i babo tiang-tiang e.
Hiasen bentukna bagi rante ipiuh i bas tep-tep takal tiang.
Empat ratus buah galiman tembaga, i bas dua baris, seratus tiap baris i sekelewet tiap takal tiang.
Sepuluh gereta.
Sepuluh baskom.
Tong.
Sepuluh dua jenggi lembu tembaga si natang tong e.
Kudin, sendok-sendok si galang, mangkuk-mangkuk.
Kerina peralaten Rumah Pertoton enda, si ibahan Hiram man Raja Salomo ibahan i bas tembaga nari ipelas seh melinang. 46Kerinana isuruh raja ibahan i bas ingan penuangen barang-barang besi kelang-kelang Sukot ras Saretan, i Baluren Lau Jordan. 47Barang-barang enda sada pe la isuruh Salomo gelah itimbang, erkite-kiteken mbuesa man timbangen, e maka labo iteh beratna.
48Barang-barang emas guna peralaten Rumah Pertoton e pe isuruh Salomo gelah ibahan: batar-batar, meja roti si man persembahenken man Dibata, #Kel 25:23-30; 30:1-3 49sepuluh nahe lampu si pajek i lebe-lebe Ingan si Badiana kal, lima arah Selatan janah lima arah Utara; bunga-bunga, lampu-lampu, ras jepit-jepit; #Kel 25:31-40 50cangkir-cangkir, penjepit sumbu lampu mangkuk-mangkuk, piring-piring ingan rempah-rempah si man tutungen, ras talam ingan ngangkat arang si sangana merara; bage pe engsel-engsel pintu Ingan si Badiana kal ras engsel-engsel pintu Rumah Pertoton si arah darat. Kerina peralaten enda ibahan i bas emas nari.
51Kenca idungi Raja Salomo kerina dahin i bas Rumah Pertoton e, itamakenna ku bas kamar erta-erta kerina barang-barang si enggo iserapken bapana Daud man TUHAN – pirak, emas, ras barang-barang si deban. #2Sam 8:11; 1Kro 18:11
Currently Selected:
1 RAJA-RAJA 7: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
