1 RAJA-RAJA 22
22
Nabi Mikaya mpersingeti Raja Ahap
(2Kro 18:2-27)
1Lebih dua tahun dekahna Israel ras Siria la siperangen. 2Tapi i bas tahun si peteluken, Josapat raja Juda, lawes ndahi Ahap raja Israel.
3Nina Ahap man pegawaina, “Ma itehndu nge kita empuna kuta Ramot i Gileat? Engkai maka sinik saja kita, janah la si rebut i bas raja Siria nari?” 4Jenari isungkun Ahap si Josapat nina, “Nggit kam ras kita merangi Ramot?”
Erjabap Josapat nina, “Aku bali nge kap ras kam; bangsangku bangsandu, kudangku-kudandu. 5Tapi sisungkun lebe TUHAN.”
6E maka ipepulung Ahap nabi-nabi kira-kira empat ratus kalak teremna, janah isungkunna kalak e nina, “Kuserang nge ndia Ramot, ntah lang?” “Seranglah,” nina nabi-nabi e ngaloi. “Ibereken TUHAN kemenangen man bandu.”
7Tapi nungkun Josapat, “La kin lit nabi si deban dalanta nungkun man TUHAN?”
8“Lit sekalak nari, Mikaya anak Imla,” nina Ahap njabapsa. “Tapi segat ateku ia, sabap la pernah inubuatkenna si mehuli man bangku; si la mehuli saja ngenca rusur.”
“Ola min bage nindu, raja,” nina Josapat.
9Kenca bage idilo Ahap sekalak pegawai istana, jenari isuruhna minter ngelegi Mikaya.
10Tupung si e Ahap ras Josapat make paken kemulianna sangana kundul i kursi kinirajan, i bas ingan ngerik gandum, deherken pintu gerbang kuta Samaria, janah kerina nabi-nabi e ernubuat i lebe-lebena. 11Sekalak i bas nabi-nabi e, Sedekia anak Kanana, erbahan tanduk besi, jenari nina man Ahap, “Enda si ikataken TUHAN, ‘Alu tanduk besi enda iperangindu bangsa Siria e, janah ikernepkenndu ia.’ ” 12Kerina nabi-nabi si deban pe bage ka nge nina. “Serbulah Ramot, menang nge kam. TUHAN mereken kemenangen man bandu.”
13Tupung e nina pegawai si ngelegi Mikaya ndai, “Kerina nabi-nabi si deban enggo ernubuat si mehuli man raja; erkiteken si e kam pe ulin ka nge bage nubuatndu.”
14Tapi erjabap Mikaya nina, “I bas gelar TUHAN si nggeluh erpadan aku maka kai si isuruh TUHAN, e ngenca kukataken!”
15Kenca ia seh i lebe-lebe Raja Ahap nungkun raja man bana nina, “O, Mikaya, iserang kami nge ndia kuta Ramot, ntah lang?”
“Seranglah!” nina Mikaya ngaloi. “Tentu kam menang, sabap TUHAN si mereken kemenangen e man bandu.”
16Tapi erjabap Raja Ahap, “Adi kam ngerana man bangku i bas gelar TUHAN, katakenlah si tuhuna! Piga kali kin arus kukataken si e man bandu?”
17Ngaloi Mikaya nina, “Teridah man bangku tentera Israel marpar-merap i datas uruk, desken biri-biri si la erpermakan. Janah nina TUHAN, ‘Kalak enda la lit peminpinna, pelepaslah ia mulih alu mejuah-juah.’ ” #Bil 27:17; Mat 9:36; Mrk 6:34
18Nina Ahap man Josapat, “Ma enggo kukataken man bandu, nabi si enda la pernah ernubuat kerna si mehuli man bangku? Si la mehuli saja ngenca rusur inubuatkenna!”
19Iterusken Mikaya ngerana nina, “Genduari dengkehkenlah kai si ikataken TUHAN: Kuidah TUHAN kundul i bas kursi kemulianNa i Surga, dingen kerina malekat-malekatNa tedis i deherNa. #Jop 1:6; Jes 6:1 20Nungkun TUHAN nina, ‘Ise si ngendik-ngendik Ahap gelah lawes erperang ku Ramot dingen mate denggo i je?’ Deba malekat e si ngataken bage, deba ka si ngataken bagah. 21Dungna reh me kesah, ideherina TUHAN, jenari nina, ‘Aku ngendik-ngendiksa.’ 22‘Uga ibahanndu?’ nina TUHAN nungkun. Ngaloi kesah e, ‘Lawes aku jenari kubahan kerina nabi-nabi Ahap nuriken kata guak.’ Nina TUHAN, ‘To dage, ugapa pe ngasup kam nipu ia.’ ”
23Jenari idungi Mikaya cakapna nina, “Si enda enggo jadi. Enggo ibahan TUHAN maka kerina nabi-nabi erguak man bandu, sabap enggo itetapken TUHAN maka kam la banci la jumpa cilaka!”
24Kenca bage reh Nabi Sedekia ndeheri Mikaya, iparapna ayona, jenari isungkunina, “Ndigan nai kin Kesah TUHAN nadingken aku janah ngerana man bandu?”
25“Si e sempat nge pagi idahndu tupung kam lawes ku kamar-kamar belakang lako cebuni,” nina Mikaya njabapsa. 26Kenca bage iperentahken Raja Ahap sekalak kepala tenterana nangkap Mikaya nina, “Tangkap ia! Endesken man Amon, pengulu kuta enda, ras man Joas, anak raja. 27Suruh ia namakenca ku bas penjara janah sitik saja ban nakanna ras inemenna ngayak aku mulih alu mejuah-juah.”
28“Adi mejuah-juah kin kam pagi mulih, e tandana TUHAN la tuhu ngerana arah aku,” nina Mikaya alu sora megang. Tole nina, “Begikenlah katangku enda, o kerina bangsa.”
Kematen Ahap
(2Kro 18:28-34)
29Kenca bage Ahap, raja Israel, ras Josapat, raja Juda lawes merangi Kuta Ramot i Gileat, 30Nina Ahap man Josapat, “Asum kita lawes erperang, kusambarilah pakenku gelah ola itandai kalak, tapi kam pakelah paken kemulianndu.” E maka berkat me raja Israel ku bas perang alu la itandai kalak sabap enggo isambarina pakenna.
31Tupung e enggo iperentahken raja Siria man telu puluh dua kalak tenterana si ergereta perang gelah ola iserangna ise pe seakatan raja Israel. 32E maka asum idah kalak ndai Raja Josapat, iatekna maka ia me raja Israel. E maka minter ia iayaki kalak ndai, iserangna atena. Tapi asum nderkuh Josapat, 33tereteh man kalak ndai maka labo kepe ia raja Israel. Erkiteken si e ingadiken kalak ndai merang Josapat. 34Tapi lit sekalak tentera Siria manahken panahna alu la ertujun, rembang ngkenai Raja Ahap i bas perdemun baju besina. “Enggo kena aku,” nina man sais gereta perangna. “Ota mulih, baba aku ndarat i bas peperangen enda nari!”
35Pertempuren e terus reh hebatna, Raja Ahap tetap tedis alu itatang i das geretana ngalaken kalak Siria e. Dareh si ndarat arah lukana maler ku teruh ngelitapi lante gereta e. Berngina mate ia. 36Nandangi sundut matawari kerina tentera Israel iperentahken gelah mulih ku kuta ras daerahna sekalak-sekalak.
37Bage me perpate Raja Ahap. Maitna ibaba ku Samaria, jenari ikuburken. 38Gereta perangna ibersihken i bas kolam Samaria, i bas ingan ridi diberu-diberu si pendahinna erlua-lua, darehna idilati biang sue ras si ikataken TUHAN.
39Kerina si debanna si ilakoken Raja Ahap, subuk turi-turin kerna istanana si ihiasi alu gading ras kerina kuta si ipajekkenna, isuratken i bas Sejarah Raja-raja Israel. 40Kenca Ahap mate, anakna Ahasia nggantiken ia jadi raja.
Josapat raja Juda
(2Kro 20:31–21:1)
41Josapat anak Asa, jadi raja Juda i bas tahun peempatken pemerentahen Ahap, raja Israel. 42Tupung e umur Josapat telu puluh lima tahun, janah ia jadi raja Juda i Jerusalem dua puluh lima tahun dekahna. Gelar nandena Asuba, anak Silhi. 43Bali ras Asa bapana, si jadi raja ope ia, ibahan Josapat si mehuli i lebe-lebe TUHAN; tapi ingan-ingan ersembah man berhala-berhala la icedakenna. E maka bangsa e terus mpersembahken persembahen-persembahen gelehen ras nutung kumenen i je. 44Josapat pe erbahan perdamen ras Israel.
45Kerina si debanna si ilakoken Josapat, kerna kerina kinirawanna i bas pertempuren-pertempuren, isuratken i bas Sejarah Raja-raja Juda. 46Imasapkenna kalak si pendahinna erlua-lua i bas batar-batar persembahen man berhala-berhala, subuk dilaki bage pe diberu, si lit denga tading i bas masa pemerentahen Asa, bapana.
47Negeri Edom la lit rajana, e maka negeri e iperentah wakil raja si itetapken raja Juda.
48Guna ngelegi emas ku negeri Opir, ibahan Raja Josapat kapal mbelin. Tapi ceda kapal e i Esion-Geber, e maka lanai pernah erlayar. 49Kenca bage isampati Raja Ahasia, atena Josapat nina, “Ras anak buahku saja suruh anak buahndu erlayar.” Tapi Josapat la nggit ngaloken penampatna e.
50Kenca Raja Josapat mate, ia ikuburken i bas kuburen raja-raja i Kuta Daud, janah anakna Jehoram nggantiken ia jadi raja.
Ahasia raja Israel
51Ahasia, anak Ahap jadi raja Israel i bas tahun pesepuluh pituken pemerentahen Josapat, raja Juda. Dua tahun ia dekahna jadi raja Israel i Samaria. 52Ia pe jahat perbahanenna i lebe-lebe TUHAN, bali ras bapana Ahap, nandena Isebel, ras Raja Jerobeam, si mabai Israel erdosa. 53Isembahna dingen erdahin ia guna Baal, janah bali ras bapana si jadi raja ope denga ia, ipekekena rawa TUHAN, Dibata Israel.
Currently Selected:
1 RAJA-RAJA 22: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
