1 RAJA-RAJA 15
15
Abia raja Juda
(2Kro 13:1–14:1)
1Kenca Jerobeam nandangi genep sepuluh waluh tahun jadi raja i Israel, Abia jadi raja i Juda, 2janah dekahna ia erkuasa lit telu tahun i Jerusalem. Nandena Maaka, anak Absalom. 3Dosa si ibahanna bali ras dosa si ibahan bapana, janah la bulat ukurna ngikutken TUHAN Dibatana bagi Daud, ninina. 4Tapi erkite-kiteken Daud, ibereken TUHAN Dibatana man Abia sekalak anak dilaki jadi raja i Jerusalem janah ibahanna Jerusalem tetap aman. #1Raj 11:36 5Si enda ibahan TUHAN sabap enggo ibahan Daud kai si ngena ateNa janah la pernah isimbakna pedahNa, seakatan i bas soal Uria kalak Heti e. #2Sam 11:1-27 6Abia ras Jerobeam tetap si perang-perangen kidekah pemerentahen Abia. #2Kro 13:3-21 7Janah turi-turin si deban kerna kai si ibahan Abia isuratken i bas kitap Sejarah Raja-raja Juda.
8Jenari mate Abia janah ikuburken i bas Kuta Daud; anakna Asa nggantiken ia jadi raja.
Asa raja Juda
(2Kro 15:16–16:6)
9Kenca Jerobeam nandangi genep dua puluh tahun jadi raja i Israel, Asa jadi raja i Juda, 10janah dekahna ia erkuasa lit empat puluh sada tahun i Jerusalem. Nini-tudungna e me Maaka, anak Absalom. 11Asa ngelakoken kai si ngena ate TUHAN, bagi si ibahan ninina Daud. 12Ipelawesna i negeri e nari kerina dilaki ras diberu si pendahinna erlua-lua i bas ingan-ingan ersembah kalak perbegu, janah iaguina kerina gana-gana si enggo ibahan raja-raja si leben asa ia. #2Kro 15:8-15 13Ipindahkenna nini-tudungna Maaka i bas jabaten kemberahen nari, sabap enggo ibahanna sada gana-gana Dewi Asera si mereha man tatapen. Itabah Asa gana-gana e jenari icilukna i berneh Kidron. 14Aminna gia ingan-ingan ersembah kalak perbegu e la kerina icedaken Asa, ia tetap erkemalangen man TUHAN i bas gedang-gedang geluhna. 15Barang-barang si enggo ikhususken bapana man Dibata bage pe barang-barang emas ras pirak si ipersembahkenna kerina itamakenna i bas Rumah Pertoton.
16Raja Asa, raja Juda ras Raja Baasa, raja Israel tetap si perang-perangen kidekah ia erkuasa duana. 17Iserbu Baasa taneh Juda jenari ibenakenna erbahan benteng kuta Rama gelah lanai banci kalak bengket ntah pe ndarat i Juda nari. 18E maka ibuat Raja Asa kerina pirak ras emas si lit denga tading i bas Rumah Pertoton ras i bas istana, jenari itenahkenna arah piga-piga kalak pegawaina ku Damaskus, man Benhadat raja Siria, anak Tabrimon kempu Hesion, rikut ras berita enda: 19“Ertemanlah kita bagi bapa-bapanta nai. Pirak ras emas enda me hadiahku man bandu. Genduari putuskenlah hubungenndu ras Baasa raja Israel gelah terpaksa itarikna tenterana i bas daerahku nari.”
20Mehuli iakap Raja Benhadat kerna pemindon Asa enda jenari isuruhna puanglima perangna ras tenterana merangi kuta-kuta Israel. Italukenna Ijon, Dan, Abel-Bet-Maaka, daerah i deher Dano Galilea, janah kerina daerah Naptali. 21Kenca ibegi Raja Baasa kai si enggo jadi, ingadikenna erbahan benteng Rama jenari lawes ia ku Tirsa.
22Kenca bage ikiremken Raja Asa perentah ku kerina taneh Juda gelah kerina rayat, sada pe la si tading-tading, ngangkati batu ras papan-papan i Rama nari si enggo ipake Baasa man benteng kuta e. Alu si enda ibahan Asa benteng kuta Mispa ras Geba, kuta i daerah Benyamin.
23Turi-turin si deban kerna perbahanen Raja Asa, kerna kinirawanna ras kuta-kuta si ibahanna bentengna, kerina isuratken i bas kitap Sejarah Raja-raja Juda. Tapi kenca dagingna enggo metua ia lanai ngasup erdalan sabap lit penakit i bas nahena. 24Jenari mate Asa janah ikuburken i bas kuburen raja-raja i bas Kuta Daud; anakna Josapat nggantiken ia jadi raja.
Nadap raja Israel
25Nadap anak Raja Jerobeam jadi raja Israel i bas tahun si peduaken pemerentahen Asa raja Juda. Lit dua tahun dekahna Nadap jadi raja. 26Ia pe bali ras bapana, erdosa man TUHAN janah kalak Israel pe ibabaina erdosa.
27Baasa anak Ahia i bas suku Isakar nari erpekat ngelawan Nadap. Ibunuh Baasa ia asum Nadap ras tenterana ngkeleweti kuta Gibeton e taneh Pilisti. 28Enda jadi i bas tahun si peteluken pemerentahen Asa raja Juda. E maka igantiken Baasa si Nadap jadi raja Israel. 29Minter ibunuhina kerina anggota keluarga Jerobeam. Sue ras kai si enggo ikataken TUHAN arah suruh-suruhenNa Nabi Ahia i Silo nari, maka kerina keluarga Jerobeam ibunuh la lit sada pe pulah. #1Raj 14:10 30Enda jadi erkiteken alu dosa si ibahan Jerobeam keke rawa TUHAN, Dibata bangsa Israel. Bage pe ia me si erbahanca maka Israel erdosa.
31Kerina si debanna si ilakoken Nadap isuratken i bas Sejarah Raja-raja Israel. 32Kidekah Asa, raja Juda ras Baasa, raja Israel erkuasa, lalap ia si perang-perangen.
Baasa raja Israel
33Baasa, anak Ahia, jadi raja Israel i bas tahun si peteluken pemerentahen Asa, raja Juda. Lit dua puluh empat tahun dekahna Baasa ngerajai Israel i Tirsa. 34Ia pe bali ras Raja Jerobeam, erdosa ia man TUHAN janah kalak Israel pe ibabaina erdosa. #Jos 6:26
Currently Selected:
1 RAJA-RAJA 15: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
