Safooniyaas Kitaaba 2

Baaxiilo Biiraa Yimmi Bikkina

1Ki'nnuwwi tuuttakkambee'i minaadaba, qaqqissakka'a Waa'i kollonne daba'llehe. 2Eebeelas hafachchi fii'aa massoo bura'isa ikkakkamo; Waa'ik gii'llisa aphphoo quunqi kinnuwwanne waarookko; bala'im ki'nnuwwanne dillookko. 3Waa'ika ijaajo egettakkam keen uullanne hee'llakkam maashaalluwwi hundim Waa'i kollonne daba'llehe; muccuroomam hassehe; Waa'i illagenne gaga heeshaa'llehe; ayyi la'ukko Waa'i quuqoo ayyaamo baraara fittakkeena xantakkamo.

Mulli Minaadab Guzumo'amukkisa.

4 # Isa 14:29-31; Erm 47:1-7; Hiz 25:15-17; Iyo 3:4-8; Amo 1:6-8; Zak 9:5-7 Gaaza'i beero'i manni hee'oobee'i udma'i ihookko; Asqaloo'n beero'im gindamookko. Ashdoodanne hee'llam mannim samgud ballanne ixxuwwi gattiinsi hollantamo; Eeqiroo'n mannim beero'iinsi yaayyanta'a fittamo. 5Dambalaq tochchonne hee'llakkam Kaarte'i manna, ki'nnuwwina aayye! Waa'i ki'nnuwwanne oogateenatte; Filisxee'm uulli Kana'aana, ayyim hee'eena xanoobee'isa issaa keese bi'soommo. 6Dambalaq tochchonne yoo ki'nnuwwi uulli hundim diinat allaa'lloo beyyoo allaaraanii diinatii hee'oo beyyoo ihookko. 7Qeefadanchiinsi gatto'i Yihuxxi manni ki'nnuwwi uulla lago aa'lla'a allaachchi beyyi issitamo; Asqaloonanne yoo minneewwannem gattamo. Moollanni Waa'im ixxuwwa abooyyookko; qeefadamaa maru ixxuwwi amaxxam dabarookko.

8 # Isa 15:1—16:14; 25:10-12; Erm 48:1-47; Hiz 25:8-11; Amo 1:13-15; Erm 49:1-6; Hiz 21:28-32; 25:1-7; Amo 1:13-15 Gogoxxi Moollanni Waa'i «I minaadaba Moo'aaphphi minaadab naacco'isaa Amoo'n minaadab game'llito'isaa macceesaammo; gadda'a naacco'isaa uulla hootteena sha'llanto'isaa la'aammo. 9#Qoc 19:24An Isra'ee'l Waa'i gogoxxi Moollanni hee'oomman ihummisinnem hanqinam Moo'aabii Amoonii Soddo'mmisaa Gomo'llisaa bi'llamo; bochchi xuuxu beyyisaa sooqixxi ba'llisaa heer heerina udma'i ihookko; qeefajjiinsi gatto'i i minaadab ixxuwwika amaxxa boggamo; ixxuwwi uullam lago aa'llamo» yoolla.

10Moo'aaphphaannonnee Amoo'n minaadabannee ku hawwi hundim afookkok Gogoxxi Moollanni Waa'i minaadabanne bolximminne naacantu'uuyyi sha'llanto'i bikkinatte. 11Waa'i ixxuwwi uullanne yoo qophpha'n waa'uwwa hundam bi'isoo bikkina Waa'a badditamo. Dambalaq tochchonnee wo'inne kibbamaakkoo uulli hundannee hee'llam minaadab hundim yo'i beyyonne hundannem Waa'ina otossitamo.

12 # Isa 18:1-7 Ki'nnuwwi Tophphe'i manni i bisa'inne letakkamo.

13 # Isa 10:5-34; 14:24-27; Noh 1:1—3:19 Waa'i hanaa'n qarinne yoo Asoora bi'isookko; Naanaawe'i beero'om udma'i issookko; uulli udma'isam gokkisookko. 14Gereebbi, fella'i, larii moochchii hosoo beyyi ihookko; mooqqaqqi gindamu mi'n woronne garookko; maskoottuwwannem firaa muunookko. Gooc hundannem gindamu minneewwi hacci tuubamookko. Digibinne baxakko'i minneewwik haqqi maxaramookko. 15Ee beero'i manni «Niinniinsi bagaan manni bee'e» yimminne bolxita'a hee'llam hee'llo'o; ihukkaarem kaba oo beero'i moochchi garoo udma'i ihaa gatookko; eeheen higoo hundim maalalaa anginne moo'isukkuuyyi fiinqeesookko.

Currently Selected:

Safooniyaas Kitaaba 2: KeesKita

Highlight

Copy