Zakkaaryaas Kitaaba 3
3
Zakkaaryaas Hundiinsi Lob Qeessichchi Bikkina Moo'u Kaalta
1 #
Izr 5:2; Kal 12:10 Ee lasage Waa'i hundiinsi lob qeessichchi Iyyaaso Waa'i asse'amaanchi illagenne uullaakkoo kaaltanne moo'isukko. Sheexaanchim Iyyaaso kasaseena ixxi makki kollinne uullaa hee'ukko. 2#Yih 1:9Waa'im Sheexaanchina «Sheexaancho, keese Waa'i axeere! Yerusaaleema doo'llu Waa'i keese axeere! Ku manchi shokkiinsi baraara firaakkoohaneyyonnihe?» yukko.
3Iyyaasim xuraakkoo eddechcha edde'aa Waa'i asse'amaanchi illagenne uullaa hee'ukko.
4Waa'i asse'amaanchim ixxi illagenne uullita'a awwaaddam keenina «Ka xuraam eddechcha ixxeensi sheelattehe!» yaa ijaajaajukko. Iyyaas kollim daba'llaa «Oono'o, ki baaxiilo kiinniinsi qeessaammo; haareechchi lombi eddechcham eddeesoommo» yukko.
5Waa'i asse'amaanchim awwaadaanina «Muccur gufuta ixxi horoonenne xaaxxehe» yaa ijaajukko; ixxuwwim ijaajanto'isannem issito'o; Waa'i asse'amaanchi eekke'enne uullaa hee'onam awwaadaan Iyyaasina haareechchi eddechchca eddeesso'o.
6Ee lasage Waa'i asse'amaanchi Iyyaasina 7«Gogoxxi Moollanni Waa'i ‹I illagenne ki taakki xabbeen ihulasii i seeram egettilasii i minenne gassaancho, i wixxixxi beyyuwwannem daanni ikkootto. Ka beyyonne uullito'i iina asse'amaaninne maqirem i illagenne aaggaa fittoo daannooma uwwoommo. 8#Erm 23:5; 33:15; Zak 6:12Hundiinsi lob qeessichchi Iyyaaso, kaka macceese; ixxenne maqire awwaaddakkam qeessuwwii ka lasage ihoo eroommina mare'i ikkakko'i keenii kaka macceessehe. ‹‹Caafa›› yamamoo i awwaadaancho an asse'oommo. 9Oono'o, Iyyaas illagenne lamar illi yoo mat kincho dissaammo; eehanni hanennem kitaaboommo; ka uulli baaxiilom mexxo'i mat ballanne bi'isoommo. 10#Mik 4:4Oo balli afoo ammane ki'nnuwwiinsi annannichchim woyi'n kaashshaannonnee oda'i hafannee maadda gudisaa ixxi olla'a weeshaa liiramookko› yoolla» yukko.
Currently Selected:
Zakkaaryaas Kitaaba 3: KeesKita
Highlight
Share
Copy
Want to have your highlights saved across all your devices? Sign up or sign in
