Maarqoos Mishiraachcha 9

1Odim Yesuus ixxuwwina «Hanqinam an ki'nnuwwina kuroommo; ka beyyonne yo'i keeniinsi mat mat manni lobakat malaayyinne Waa'i adillan waarukkuuyyi moo'lleebee'i afeebee'e letambee'i keen yo'o» yukko.

Yesuusik Hagar Dabassamukkisa

(Mat 17:1-13; Luq 9:28-36)

2 # 1Phex 1:17-18 Loh balliinsi lasage Yesuus xale'i Pheexiroosa, Yaaqoobaa Yohaannisaa awwonsaa mat lob duunanne firukko. Ixxuwwi moo'llu'uuyyim ixxek hagar dabassamukko. 3Ixxi eddechchim belecce'ukko; ka uullanne ayyim aanshaa qadaalliseena xanoobeeqaxam qadaallukko. 4Eeliyaasii Muse'ee Yesuusinne atoorattu'uuyyim caakkita'a moo'anto'o.

5Pheexiroosim Yesuusina «Losisaancho! Ka beyyonne hee'immi niina danaamo. Ee bikkina sas daasa matoo kiina, matoo Muse'ena, matoo Eeliyaasina banxona» yukko. 6Ixxuwwi lobakata baddita'a hee'llo'i bikkina Pheexiroos maha wocooda'e la'am hee'ukkoyyo. 7#Mat 3:17; Mar 1:11; Luq 3:22 Umbu'llim ixxuwwa ifiisukko. Ee umbu'l woriinsim «An iittoommi i Beet kane; ixxeensi macceessehe!» yoo sagar macceesamukko. 8Ixxuwwim ee ammanem qerephita'a moo'llo'o. Ihukkaarem xale'i Yesuusiinsi bagaan matom moo'llo'oyyo.

9Ee duuniinsim dillitu'uuyyi Yesuus ixxuwwina Manchi Beet lehiinsi ki'eebe'e moo'llakko'oka ayyenam kuttakkambee'isa yaa ijaajukko. 10Ixxuwwim Yesuus kuru sagara ixxuwwi ixxuwwi wodanonne amaddo'o. Ihukkaarem ixxuwwina'i ixxuwwim «Ku lehiinsi ki'imma yimmi mayyimma?» yaqqanto'o. 11#Mil 4:5; Mat 11:14 Ixxuwwim Yesuusina «Seera losisaan ‹Gaassaa Eeliyaas waarimmi hasisookko› yitamok mahinatte?» yita'a xa'mmito'o. 12Ixxim ixxuwwina «Hanqo'isam Eeliyaas gaassaa waaraa hundem luwwam gudisookko. Ihona bagaan Manchi Beet lobakata hawwoo'isaa gadamoo'isaa ixxi bikkina kitaabamukkok mahinatte? 13An ki'nnuwwina kuroommo; Eeliyaas waaraakko. Keesammi Kitaabanne ixxi bikkina kitaabamukkisam ixxo hasso'isa hundam issito'ookko» yukko.

Habus Amadaakkoo Beeto Yesuus Fayyiisukkisa

(Mat 17:14-21; Luq 9:37-43)

14Yesuusii sasem losaanii daba'llita'a losaa'n beyyo waatto'i ammanenne ee losaa'n kululleetanne dut manna moo'llo'o. Seera losisaanim ixxuwwinne fitantam hee'llo'o. 15Oo mannim Yesuusa moo'llo'i ammanenne muggito'o; ixxi beyyom geetta'a matta'a xummaatisso'o. 16Yesuusim ixxi losaanina «Ixxuwwinne fitantakkamuullak mahannette?» yukko.

17Ee manniinsim mat manchi Yesuusina «Losisaancho! I beeto habus suume duussaa amadu bikkina ki beyyo eebaammo. 18Oo xissi ki'oo ammane hannonnem ubbuusaa suuminne himba eebookko. Ixxi inqem iicookko. Orachchim haqqisa gogookko. Ki losaan eekka fissitona xa'mmummaare fissiteena xanto'oyyo» yukko.

19Yesuusim ixxuwwina «Ki'nnuwwi amma'nnatbee'i qarancha! An hinkaa'n amman afeebe'e ki'nnuwwinne hee'oommo? Hinkaa'n amman afeebe'e an ki'nnuwwa iyyaqqoommo? Huno'o, beetooma i beyyo eebbehe» yukko. 20Ixxuwwim beeto ixxi beyyo eebbo'o. Habusim Yesuusa moo'u ammanenne beeto fitfitaa'ukko. Beetim uullanne ubaa suuminne himba eebukkuuyyi biqqiiqqukko. 21Yesuusim ee beet annina «Kuk ka beeto amadukkaanniinsi hinkaa'n ammane» yaa xa'mmukko. Annim «Ciiloommanonnetteme. 22Dut ammane sheena hasaa giirannee wo'onnee ubbuusookko. Ihukkaarem at xantilas niina qishixxitaa hara'mme» yaa dabarukko. 23Yesuusim ixxena « ‹Xantilas› yitoollannihe? Amma'nnoohaannina hundem luwwim xanamookko» yukko.

24Ee ammanem beet anni «Amma'nnoommo, i amma'nnaxxi hoonge at iinniinsi hoore!» yaa laarukko. 25Yesuusim manni gafe'amukkuuyyi waaroo moo'u ammanenne habusina «Ka duudissaa gawwissoo habusa! Ka beeto fatakitoo'isinaa od la'mmaagge ixxonne daba'llitaa aaggoobee'isinaa keese ijaajoommuulla!» yaa shaaqukko. 26Habusim laaraa beeto lobakata fitfitaa'aa lasage firukko. Beet tuude'aa hee'u bikkina dut keen «Lehaakko» yitam hee'llo'o. 27Ihukkaarem beetika anga amadaa Yesuus uullisukko. Ixxim ki'aa uullukko.

28Yesuusim mine aagu ammanenne ixxi losaan «Neese ka habusa fissineena xannumbee'ek mahinatte?» yita'a mulli manni macceesoobee'isa xa'mmito'o. 29Ixxim ixxuwwina «Kido'i habusa fissakkamok soommanakka'a Waa'a uunximminnette bagaan mullisinne ma'isinnem fissakkamoyyo» yaa dabarukko.

Yesuus Lehaa Ki'oo'isa La'mmaagge Wocukkisa

(Mat 17:22-23; Luq 9:43-45)

30-31Yesuusii ixxi losaanii ee beyyiinsi ki'lla'a Galiilinne higga'a matto'o. Yesuusim xale'i ixxi losaano losisam hee'u bikkina ixxuwwi yo'i beyyo ayyim la'ona hasukkoyyo. Ixxi losaaninam «Manchi Beeto manni anganne higisakka'a uwwakkamo. Ixxuwwim ixxo shitamo. Ihukkaarem sas balliinsi lasage lehiinsi ki'ookko» yukko. 32Ihona bagaan Yesuus yukkoka ixxuwwi qoossito'oyyo. Xa'mmiteenam baddito'o.

Hundiinsim Lophphookkok Ayyette?

(Mat 18:1-5; Luq 9:46-48)

33Yesuusii ixxi losaanii Qifirinnaahooma affo'o. Affa'a mine aagga'a lasage Yesuus ixxuwwina «Googonne fitantakkam hee'llakko'ok maruchchonnette?» yaa xa'mmukko. 34#Luq 22:24 Googonne «Ni lambe'iinsi lophphookkok ayyette?» yitu'uuyyi fitanta'a hee'llo'i bikkina ixxena maham dabatto'oyyo. 35#Mat 20:26 Yesuus afuuraa lasage tommoo lamem losaanoo weeshaa «Hundiinsim lophpheena hasookkok ayyim ixxi gaga hoffiisaa hundinam awwaadoohan ihimmi hasisookko» yukko. 36Odim mat ciilichcho ixxuwwi lambe'enne uullisaa qaaphphaa 37#Mat 10:40; Luq 10:16; Yoh 13:20 «Kido'i ciilluwwiinsi mato i summinne aa'ookkok ayyim eesem aa'aakko. Eese aa'ookkok hundim aa'ookkok eesette ihoo'n eese asse'ukkaneme» yukko.

Neese Saboobee'ek Hundim Niinninnette

(Luq 9:49-50)

38Yohaannisim Yesuusina «Losisaancho! Mat manchi ki summinne habusa fissukkuuyyi moo'nnaa niinninne keese awwonoobee'i bikkinam hoollummo» yukko. 39-40#Mat 12:30; Luq 11:23 Ihukkaarem Yesuus ixxuwwina «Neese saboobee'ek ayyim niinninnette. I summinne aganna baxukkuuyyi i bikkina jora woceena gaaggaabookkok bee'e. Ee bikkina hoottakkotte. 41#Mat 10:42 Hanqinam an ki'nnuwwina kuroommo; Kiristoosan ikkakko'i bikkina i summinne mat kubbaayyi wo'o aggakkona uwwookkok ayyim irifo'o siixxookko» yukko.

Mannina Qolat Ihimmiinsi Ege'llimmi Hasisoo'isa

(Mat 18:6-9; Luq 17:1-2)

42Odim Yesuus «Eesenne amma'nnita'a gaga hoffiissam keeniinsi mato huushansookkok ayyim ixxi gaanjenne kee'mmaalli liitimma ka'llaa dambalaqanne ubuta'n e'llookko. 43-44#Mat 5:30 Ee bikkina at baaxiilo baxxona ki angi keese huushisoohan ihulas muttaa uunje. Lam angi hee'aa giir xoo'oobee'i daquurim lehoobee'i Gaahaannamanne uunjantoohaanniinsi mat anga murammi ikkaa heer heerina hee'oo heechcha siixximmi e'llookko.#9:43-46 Xiqqi 48 kitaabamu sagarinne mat ihu bikkina Giriik kitaabbuwwik dut edukkoyyo. 45-46Ki lokkim at baaxiilo baxxona keese huushisoohan ihulas muttaa uunje. Lam lokki hee'aa giir xoo'oobee'i daquurim lehoobee'i Gaahaannamanne uunjantoohaanniinsi mat lokko dim ikkaa heer heerina hee'oo heechcha siixximmi e'llookko. 47#Mat 5:29 Ki illim at baaxiilo baxxona keese huushisoohan ihulas fissitaa uunje. Lam illi hee'aa giir xoo'oobee'i daquurim lehoobee'i Gaahaannamanne uunjantoohaanniinsi mat ille hooggaa Waa'i adillanonne hee'immi e'llookko.

48 # Isa 66:24 Gaannamanne ixxuwwa itoo daquur hore'em lehoobee'ane. Aphphoo giirim hore'em xoo'oobee'ane. 49Kitim hundim sooqidinne muccuroo'isam ayyi manchim giirinne muccurookko. 50#Mat 5:13; Luq 14:34 Sooqid xee'oohane. Ihukkaarem sooqixxek xee'n bi'uta'n hinkid issitakka'a xee'oo'isa issitakkamo? Ki'nnuwwi lambe'enne sooqixxisa xee'oo iitti hee'ona. Ki'nnuwwina'i ki'nnuwwim iittinne hee'llehe» yukko.

Currently Selected:

Maarqoos Mishiraachcha 9: KeesKita

Highlight

Copy