Maarqoos Mishiraachcha 16

Lehiinsi Yesuus Ki'ukkisa

(Mat 28:1-8; Luq 24:1-12; Yoh 20:1-10)

1Usheexxaxxi Ayyaam higaa lasage Magda'l Maaraame, Yaaqoob ama Maaraamee Saloomee matta'a Yesuus leeshanne labbeena shitto'o bitaa'llo'o. 2Ixxuwwim Abba'i balla#16:2 «Abba'i balla» yimmi keesammi kitaabisinne saantina luxxi balla yimma. soodaraar daram eelliinchi firukkuuyyi waammi beyyo matto'o. 3Mattu'uuyyim ixxuwwina'i ixxuwwim «Waammi suumiinsi kina niina ayyi onkoroollisookko?» yito'o. 4Ee'isa yito'i mashka'i oo kin lobakata geejji hee'u bikkinatte. Ihukkaarem daaphphita'a moo'llo'i ammanenne kin onkoroollaa hee'ukko. 5Ixxuwwim waammi woro aaggo'i ammanenne qadaalli eddechcha edde'aakkoo mat woraadichchi ee waammi woronne makki kollinne afuuraakkoo moo'lla'a muggito'o.

6Ixxim ixxuwwina «Muggitakkotte! Saqalamaa hee'u Naazireexxi Yesuusa hassakkamisa la'oommo. Ixxi ka beyyonne bee'e; ixxi lehiinsi ki'aakko. Waammamu beyyim ka beyyo; moo'llehe. 7#Mat 26:32; Mar 14:28 Kabadem mattakka'a ixxi losaaninaa Pheexiroosinaa ‹Ixxi ki'nnuwwa gaassaa Galiila afookko; ki'nnuwwina kurukkisam eekke'enne ixxo moo'llakkamo› yi'llehe» yukko.

8Ixxuwwi baddita'a huxe'llam hee'llo'i bikkina waammi beyyiinsi gibba'a fitta'a matto'o. Lobakata baddita'a hee'llo'i bikkina ayyenam matem luchchom kutto'oyyo.

Magda'l Maaraamena Yesuus Moo'amukkisa

(Mat 28:9-10; Yoh 20:11-18)

9Saantiinsi luxxi balli soodukkuuyyi Yesuus lehiinsi ki'aa lasage gaassaa lamar habusa fissaa hee'u Magda'l Maaraamena moo'amukko. 10Isem matta'a Yesuusinne maqire hee'llo'i keen kichche'llu'uuyyii wi'llitu'uuyyii hee'llonam ka woshsha kutto'o. 11Ihukkaarem ise «Yesuus lehiinsi ki'aakko; anim moo'aammo» yita'a kutto'oka macceesso'i ammanenne ixxuwwi amma'nnito'oyyo.

Lamem Losaaninam Yesuus Moo'amukkisa

(Luq 24:13-35)

12Ee lasage Yesuus ixxuwwi uulla mattu'uuyyi hee'llo'i lam losaanina annannisinne moo'amukko. 13Ixxuwwim daba'llita'a gatto'i losaanina kutto'o. Ihukkaarem oo keen kutto'okam amma'nnito'oyyo.

Tomminaa Mat Asse'amaaninaa Yesuus Moo'amukkisa

(Mat 28:16-20; Luq 24:36-49; Yoh 20:19-23; Ass 1:6-8)

14Ee lasage odim ixxi losaa'nnek tommii matii hurbaata itteena afuutto'oohaannonne moo'amukko. Moo'amaa ixxi lehiinsi ki'aa lasage moo'llo'i keen kutto'i woshsha ixxuwwik wodan duudaa amma'nnitobee'i bikkina ixxuwwa acceeqasukko. 15#Ass 1:8 Ee lasage ixxuwwina «Uulli hundam mattakka'a mishiraachchi sagara qooccanchi hundinam alallaattehe. 16Amma'nnukkokii xammaqamukkokii hundim gatookko. Ihukkaarem amma'nnubee'aannonne oogatamookko. 17Eesenne amma'nnito'i keen hundim ka mare'uwwa issiteena xantamo. I summinne habusa fissitamo. Laqqambee'i suuminnem woccamo. 18Hamashsham amaddota'n te'im shoo qaraarem aggota'n ixxuwwa hawwodooyyo. Jabbu keenonnem ixxuwwi anga issitamaare jabbaan fayye'ookko» yukko.

Yesuus Iimane Marukkisa

(Luq 24:50-53; Ass 1:9-11)

19 # Ass 1:9 Moollanni Yesuus ixxuwwina kaka wocaa lasage iimane maraa Waa'i makkanne afuurukko. 20Ixxi losaanim matta'a beyyi hundannem mishiraachchi sagara alallaatto'o. Moollannim ixxuwwinne maqire baxam hee'ukko. Ixxuwwi losissam losishshi hanqi ihukkisam ixxuwwi kollinne issam hee'u mare'inne la'isam hee'ukko#16:9-20 Mat mat kitaabbuwwannee gaassi tirattuwwannee ku lasaanchi xigguwwi bee'ane..

Currently Selected:

Maarqoos Mishiraachcha 16: KeesKita

Highlight

Copy