Maarqoos Mishiraachcha 15

Philaaxoos Illagenne Oogato'ina Hincaa'akko'isa

(Mat 27:1-2,11-14; Luq 23:1-5; Yoh 18:28-38)

1Soodaraar daram qeessa awwonsaan lommanninne, Seera losisaaninnee dummichchi daannuwwinnee hundinnem a'llanta'a lasage Yesuusa katta'a massita'a gassaanchi Philaaxoosina higissa'a uwwito'o. 2Philaaxoosim Yesuusa «At Ayihuxxi adilannihe?» yaa xa'mmukko. Yesuusim «At yittisame» yukko.

3Qeessa awwonsaanim dut luwwa woccu'uuyyi ixxo kasassam hee'llo'o. 4Odim Philaaxoos Yesuusina «Mee'i luwwanne keese kasassamulda'e macceese. At maham dabattooyyonnihe?» yaa xa'mmukko. 5Ihukkaarem Yesuus maham dabarukkoyyo. Ee bikkina Philaaxoos lobakata maalalukko.

Yesuusanne Leho Oogatakko'isa

(Mat 27:15-26; Luq 23:13-25; Yoh 18:39—19:16)

6Shaashshiqqi Ugudanne karatiinsi tiramona minaadab xa'mmitam mat mancho tirimmi losamaakkoohan hee'ukko. 7Ee ammane Oroo'm adilanne bangujjita'a Oroo'm uulli mannika shita'a karanto'oo fanguwwi hee'llo'o. Ixxuwwiinsim mat Barbaana yakkam manchi hee'ukko. 8Mannim Philaaxoos beyyo matta'a ixxuwwina issam hee'u losano issoo'isina xa'mmito'o. 9-10Ixxim qeessa awwonsaan Yesuusa ixxena higissa'a uwwito'ok to'achchimminnette ihukkisa la'ukkuuyyim ixxuwwa «Ka Ayihuxxi adila ki'nnuwwina fatakihona hassakkamonnihe?» yaa xa'mmukko.

11Ihukkaarem qeessa awwonsaan «Yesuusayyo; Barbaan fatakamona!» yita'a xa'mmitamisina manna soggo'o. 12Philaaxoos ixxuwwa «Eehaare ka Ayihuxxi adila yitakkam Yesuusa maha isso?» yaa la'mmaaggem xa'mmukko. 13Ixxuwwim «Saqalamona!» yitu'uuyyi shuutto'o.

14Ihukkaarem Philaaxoos «Mahinatte? Ku manchi maha bi'isaate?» yaa xa'mmukko. Ixxuwwim «Saqalamona!» yita'a odim shuutto'o. 15Philaaxoosim manna liiranseena Barbaana ixxuwwina fatakukko. Ihukkaarem Yesuusa gansiisaa saqalakkamisina higisaa uwwukko.

Gaadaan Yesuusanne Naacco'isa

(Mat 27:27-31; Yoh 19:2-3)

16Ee lasage gaadaan Yesuusa gassaanchi mine#15:16 «Gassaanchi mine» yamamukkok Oroo'mmisinne «Firaatooruma» yamamookko. aagisso'o. Odim gatto'i gaadaano hundam weeshsho'o. 17Yesuusinam adilluwwisam kashar eddechcha eddeessa'atii uttinne adilla'n mare'e baxxa'a ixxi horoorenne issita'atii 18«Ayihuxxi adila, kiina hechcho!» yitu'uuyyi game'llitam hee'llo'o. 19Odim shomboqo'inne ixxeka horoore aphphissu'uuyyii anja tuhitu'uuyyii guruphphita'a otossito'o. 20Naacanta'a lasage eddeesso'i kashar eddechcha sheelatta'a ixxi gaqqi eddechcham eddeessa'a saqalteena massito'o.

Yesuusa Saqalakko'isa

(Mat 27:32-44; Luq 23:26-43; Yoh 19:17-27)

21 # Oro 16:13 Ixxuwwi mattu'uuyyim googonne Iskindirinaa Ruufoosinaa anni hee'u Qaaree'n uulli Simi'oona beero'o waarukkuuyyi edanto'o. Ixxim Yesuusika masqala iyyona giddisso'o. 22Ee lasage Yesuusa Golgota yakkam beyyo massito'o. Golgota yimmim Horoo'l Qooma yimma. 23Eekke'em ixxena karbe'e yakkam qaraar hamaaramaakkoo woyi'n diqaasa agona uwwito'o. Ihukkaarem ixxi agukkoyyo.

24 # Maz 22:18 Ee lasage Yesuusa saqalta'a ixxi eddechchi ayyayyena afooda'e moo'lleena saamo fissita'a baxxanto'o. 25Ixxom saqalto'i amman da'l sas sa'aatannette hee'ukko. 26Ixxo kasasso'i woshsham «Kuk Ayihuxxi adila» yita'a kitaabba'a masqalanne issito'o. 27-28#Isa 53:12 Ixxenne maqire lam fanguwwa matoo makki kollinne matoo qeddi kollinne saqalto'o.#15:27-28 «Keesammi Kitaabanne ‹Boqqi keeninne maqire xigamukko› yamamukkok ee'isinne wo'mmukko» yoo sagar Giriik kitaabbuwwaannonne mat matonne edamaakko. 29#Maz 22:7; 109:25; Mar 14:58; Yoh 2:19 Ixxi gadaninne higgam keenim ixxo gadda'a horoore heekkeessu'uuyyi «Ku Keesammi Mine ginditaa sas ballanne baxxoo at 30huno'o, ka masqaliinsi dillitaa ki gaga gatixxe» yitu'uuyyi naaccam hee'llo'o.

31Odim qeessa awwonsaanii Seera losisaanii ixxuwwina'i ixxuwwim naaccu'uuyyi «Ixxi mulli keeno gatisookko. Ihukkaarem ixxi gaga gatiseena xanukkoyyo. 32Isra'ee'l adil Kiristoos ixxotte ihulas huno'o, kaba masqaliinsi dillona. Neesem moo'nnaa amma'nninoommo» yito'o. Odim Yesuusinne maqire saqalanto'i keenim game'llitam hee'llo'o.

Yesuus Lehukkisa

(Mat 27:45-56; Luq 23:44-49; Yoh 19:28-30)

33Balli loh sa'aatiinsi ki'isaa honsi sa'aat afeebe'e uulli hundim tuunsukko. 34#Maz 22:1 Honsi sa'aatanne Yesuus «Eeloohee! Eeloohee! Lamaa sabaqtaanii?» yaa laarukko. Ee'isa yimmim «I Waa'aa! I Waa'aa! Eese mahina uttitto?» yimma.

35Ee beyyonne uullita'a hee'llo'i mannik mat mat keen ee sagara macceessa'a «Macceessehe! Eeliyaasa weeshoolla» yito'o. 36#Maz 69:21 Ixxuwwiinsim mat geeraa maraa shiishaakkoo woyi'n diqaasanne hallaammi'nnoo'i luwwa cefaa shomboqo'i bicconne issaa Yesuusina agona uwwaa «Huno'o, Eeliyaas waaraa ixxo dilliisoo'isa moo'nnona uttakka'a ullehe!» yukko.

37Ee lasage Yesuus laaraa lehukko. 38#Doy 26:31 Lehukkisam Keesammi Minenne hee'u du'm eddechchi ludiinsi lugumonne afeebe'e lam ihaa dereeramukko.

39Yesuus saqalamu masqa'l illagenne uullaa hee'u xibbi halaqichchi Yesuus hinkid lehuda'e moo'aa «Hanqinam ku manchi Waa'i Beet hee'ukko» yukko.

Golgotanne Hee'u Meenti Bikkina

(Mat 27:55-56; Yoh 19:25-27)

40 # Luq 8:2-3 Eekke'em qee'llonne ikka'a moo'llam meenti hee'llo'o. Ixxuwwinne maqirem Magdala yakkam beero'i Maaraame, hoffi Yaaqoobinaa Yoosa'inaa ama Maaraamee Saloomee hee'llo'o. 41Yesuus Galiilanne hee'u ammane oo meenti ixxo hara'mmitu'uuyyi awwontam hee'llo'o. Yesuusinne maqire Yerusaaleema waatto'oo dut meentim hee'llo'o.

Yesuus Waammamukkisa

(Mat 27:57-61; Luq 23:50-56; Yoh 19:38-42)

42-43Uulli hiimeena ihaakkoohaannonne Armaate'i beero'i Yooseef waarukko. Ixxim Ayihuxxi daannuwwiinsi mat hee'ukko. Mannim ixxo lonsoohane. Ixxim Waa'ik adillan waaroo'isa egeraakkoohan hee'ukko. Oo ayyaamim Usheexxaxxi Ayyaamina gudakkaman hee'u bikkina Yesuusika leesha Philaaxoos uwwoo'isina uunxeena iggimminne Philaaxoos beyyo marukko.

44Ihukkaarem «Hinkid kaqaxannem lehukko?» yaa Philaaxoos maalalaa xibbi halaqichcho weeshaa «Yesuus lehaatennihe?» yaa xa'mmukko. 45Yesuus lehukkisa xibbi halaqichchiinsi macceesaa lasage Yesuusika leesha Yooseef massoo'isa issukko. 46Yooseefim talbiinsi baxamaakkoo danaam keefa'n eddechcha bito aa'aa Yesuusika leesha masqaliinsi dilliisaa keefanaa kina feere'akka'a axisakko'oo waammanne waammukko. Geejji kinam onkoroollisaa ee waammanne ifiisukko. 47Ee ammane Magda'l Maaraamee Yoosa'i ama Maaraamee Yesuus hannonne waammamuda'e moo'llam hee'llo'o.

Currently Selected:

Maarqoos Mishiraachcha 15: KeesKita

Highlight

Copy