Maarqoos Mishiraachcha 1

Xammaqaanchi Yohaannis Alallaatukkisa

(Mat 3:1-12; Luq 3:1-18; Yoh 1:19-28)

14 Kuk Waa'i Beet Yesuus Kiristoos mishiraachchi asheera.

2-3 # Isa 40:3 Hiraagaanchi Issaayyaas

«Oono'o, kiina googo gudisoo i asse'amaancho

an gaassaa asse'oommo.

Oohim ‹Moollannina googo gudissehe;

googguwwam shiraashillehe› yukkuuyyi

udma'anne laaroo sagara» yaa kitaabukkisannette.

4Ee bikkina Xammaqaanchi Yohaannis udma'anne «Baaxiil haafamoo'isina baaxiilo biiraa yitakka'a xammaqammehe» yaa alallaatukkuuyyi waarukko. 5Ee bikkina Yihuxxi uullikii Yerusaalee'm beero'ikii dut manni ixxi beyyo maraa baaxiilo biiraa yukkuuyyi Yoordaanoos daajjenne Yohaannis anganne xammaqamukko.

6 # 2Adl 1:8 Yohaannis edde'am hee'u eddechchi gaameela'i oddiinsi baxamaakkoohan hee'ukko. Ixxi lamadom omachchiinsi baxamu saqqinne lade'am hee'ukko. Itam hee'u hurbaatim qawwaawwaa udma'i uulli maraboo hee'ukko. 7Ixxi alallaatim «An ixxeka caamma'i fatiram heeshaa tireena laboombee'ek iinniinsi hore'em lophphookkok i lasonne waaroolla. 8An ki'nnuwwa wo'inne xammaqoommuulla; ihukkaarem ixxi Keesammi Ayyaaninne xammaqookko» yoohan hee'ukko.

Yesuus Xammaqamukkisaa Keenamukkisaa

(Mat 3:13-17; 4:1-11; Luq 3:21-22; 4:1-13)

9Ee ammane Galii'l uullanne yoo Naazireetiinsi Yesuus waarukkaare Yoordaanoos daajjenne Yohaannis ixxo xammaqukko. 10Yesuusim wo'i woriinsi firukkisam iiman fooqaa Keesammi Ayyaan handarekkichchi kobi'llanne ihaa ixxi hanenne afuurukkuuyyi Yoohannis moo'ukko. 11#Qoc 22:2; Maz 2:7; Isa 42:1; Mat 3:17; 12:18; Mar 9:7; Luq 3:22 Ee ammanem «An iittoommi i Beet atette; anim keesenne liiramoommo» yoo sagar iimaniinsi waarukko.

12Ee ammanem Keesammi Ayyaan Yesuusa udma'i uulli kolli awwonsukko. 13Ee udma'annem Sheexaanchi ixxo sor ballina keenukko. Ixxennem bii'l moochchi hee'ukko; Waa'i asse'amaanim ixxena awwaaddo'o.

Galiilanne Yesuus Losisimma Asheerukkisa

(Mat 4:12-17; Luq 4:14-15)

14Yohaannis karamaa lasage Yesuus Waa'ika mishiraachchi sagara alallaatukkuuyyi Galiila waarukko. 15#Mat 3:2 Ixxim «Amman afaakko; Waa'i adillanim waaraakko; baaxiilo biiraa yi'llehe; mishiraachchi sagarannem amma'nnehe!» yam hee'ukko.

Qurxumme'e Qaashaano Yesuus Weeshukkisa

(Mat 4:18-22; Luq 5:1-11)

16Yesuus Galii'l Dambalaq gadaninne higukkuuyyi Simi'oonii ixxi abbaayyi Indiraasii qurxumme'e qaashsham hee'llo'i bikkina dambalaqanne shikka ubbussu'uuyyi moo'ukko. 17Ixxuwwinam «Eese awwonnehe! Manna qaashaan ikkakkamisa issoommo» yukko. 18Ixxuwwim ee ammanem shikka utta'a ixxo awwonto'o.

19Ixxim ee beyyiinsi hofqaxam maraa Zabdiwoos ooso Yaaqoobaa Yohaannisaa moo'ukko. Ixxuwwim wongiranne afuutta'a shikka axissam hee'llo'o. 20Ee ammanem ixxuwwa weeshukko. Ixxuwwim ixxuwwika anna Zabdiwoosa ixxi baxaaninne maqirem wongiranne utta'a Yesuusa awwonto'o.

Habus Amadaakkoo Manchi Fayye'ukkisa

(Luq 4:31-37)

21Yesuusii ixxenne maqire hee'llo'i keenii Qifirinnaahooma matto'o. Yesuusim Usheexxaxxi Ayyaam aagukkisam Ayihuxxi manni wixxixxi mine aagaa losisimma asheerukko. 22#Mat 7:28 Ixxi losisam hee'ukkok seera losisaa'nnis ihoo'n gassaa'nnis ihu bikkina macceesso'i keen ee losanonne maalalto'o.

23Habus amadaakkoo mat manchi ee ammane ee wixxixxi minenne hee'ukko. 24Ixxim «Naazireexxi Yesuusa! Niina kiinninne mah hee'aate? Neese bi'isseenattennihe? At ayyetda'e ikkittisa an la'oommo; at Waa'i keesamma» yaa laarukko. 25Yesuusim habusina «Sa'itaa ka manchiinsi fire!» yaa ijaajukko. 26Habusim mancho fitifitaa'aa lasage laaraa firukko.

27Ee beyyonne hee'llo'i manni hundim maalalta'a «Kuka'i aganna; kuk haareechchi losishshayyonnihe? Malaayyinne habusa ijaajoolla; ixxuwwim ixxena ijaajantamuulla» yita'a ixxuwwina'i ixxuwwim wocco'o. 28Ee ammanem Yesuusik sad Galii'l kululleetanne yoo uulli hundannem macceesamukko.

Yesuus Lobakat Jabbaano Fayyiisukkisa

(Mat 8:14-17; Luq 4:38-41)

29Ayihuxxi manni wixxixxi miniinsi firukkisam Yaaqoobinnee Yohaannisinnee maqirem Simi'oonii Indiraasii hee'llam mine aaggo'o. 30Eekke'em Simi'oonik ballo xissita'a iinse'lla'a hee'llo'o. Ixxuwwim is bikkina Yesuusina kutto'o. 31Ee bikkina iinse'llo'i beyyo maraa is anga amadaa ki'isukko; xissim ise fatakukko. Ki'lla'atim ixxuwwina koyyinano issito'o.

32Eelliinchi aagukkisam hiimonne Yesuus beyyo jabbaanoo habus amadaakkoo keenoo eebakko'o. 33Ee beero'i manni hundim u'llummanne wixxaa hee'ukko. 34Ixxim annanni annanni xissinne jabbu dut manna fayyiisukko; dut habusam fissukko. Ixxi ayyetda'e ihukkisa habus la'aa hee'u bikkina ixxi bikkina woccambee'isa Yesuus hoorukko.

Yesuus Galiilanne Mishiraachchi Sagara Losisukkisa

(Luq 4:42-44)

35Uulli soodeena ihaakkoohaannonne Yesuus ki'aa Waa'a uunxeena manni bee'i beyyo marukko. 36Simi'oonii ixxenne hee'llo'i keenii ixxo hasimma asheetto'o. 37Ixxuwwim ixxo siiddo'i ammanenne «Manni hundim keese hasoolla» yito'o. 38Yesuusim ixxuwwina «Massehe; ka kululleetanne yoo gattuwwa mallona. Eehe'enne alallaatoommo; an waarummokim eehanninatte» yukko.

39 # Mat 4:23; 9:35 Ee bikkina Ayihuxxi manni wixxixxi minneewwanne Waa'i sagara alallaatukkuuyyii habusa fissukkuuyyii Galii'l uulli hundannem do'am hee'ukko.

Oddomachchonne Baddisoo Jabbi Yoo Manchi Muccurukkisa

(Mat 8:1-4; Luq 5:12-17)

40Oddomachchonne baddisoo jabbi#1:40 Qes 13 moo'nnoommi ammane ka kitaab xiqqi sorenne yoo jabbi shishir ihoo'n oddomachchonne firoo baddisoo jabbo. firaakkoo mat manchi ee ammane Yesuus beyyo waaraa ixxi illagenne guruphphaa «At iittittaare eese fayyiisseena xantootto» yaa uunxukko. 41Yesuusim qishixxaa ixxi anga biddiqaa'aa ee mancho nakkaa «Iittoommo; muccure» yukko. 42Ixxim ee ammanchom oddomachchonne yoo baddisoo jabbiinsi fayye'aa muccurukko.

43 # Qes 14:1 Ee lasage Yesuus ixxena 44«Macceese; at kaka ayyenam kuttoobee'isa. Ihukkaarem mattaa ki orachcho qeessichchina moo'ise. Odim at muccuttittisa hundim la'ona Muse'e ijaaju kitimam kitime» yaa qoxxisaa ijaajaa geegeesukko.

45Ihukkaarem manchoom maraa ee woshsha beyyi hundam afisukko. Ee bikkina Yesuus hinki beero'om la'amaakkoo'isinne aageena xanukkoyyo. Ihona bagaan beero'iinsi tochchonne manni bee'i daphphit beyyuwwanne hee'am hee'ukko. Ihukkaarem manni beyyi hundiinsim ixxi beyyo waaram hee'ukko.

Currently Selected:

Maarqoos Mishiraachcha 1: KeesKita

Highlight

Copy