Maatiwoos Mishiraachcha 5

Duunanne Yesuus Losisukkisa

(Mat 5—7)

1Yesuusim lobakat minaadaba moo'u ammanenne duunanne firaa afuurukko. Ixxi losaanim ixxi kollonne hincito'o. 2Ixxuwwinam kanniinsi woroon yoo losano losisimma asheerukko.

Hanqo'i Maasso Siiddam Kee'n Bikkina

(Luq 6:20-23)

3Yesuus «Hanqo'i wodaninne ixxuwwi gaga heeshaa'llam keen

Waa'ik adillan ixxuwwan ihu bikkina maassaammuwwa.

4 # Isa 61:2 Kichche'llam keen

Waa'i ixxuwwina qoxximma uwwoo bikkina maassaammuwwa.

5 # Maz 37:11 Maashaalluwwi keen

uulla lago aa'llam bikkina maassaammuwwa.

6 # Isa 55:1 Muccurooma mixxam keenii

xeebe'llam keenii godditam bikkina maassaammuwwa.

7Mannina haafitam keen

Waa'im ixxuwwina haafoo bikkina maassaammuwwa.

8 # Maz 24:3 Wodano muccur keen

Waa'a moo'llam bikkina maassaammuwwa.

9Manna iittansitam keen

Waa'i ooso yamantam bikkina maassaammuwwa.

10 # 1Phex 3:14 Muccuroo'm bikkina hawwo aa'llam keen

Waa'ik adillan ixxuwwan ihu bikkina maassaammuwwa.

11 # 1Phex 4:14 I mashka'inne manni ki'nnuwwa game'lloohaare, hawwisoohaaree qophphanonnem jora wocukkuuyyi ki'nnuwwika summa bi'isoohaaree maassaammuwwa. 12#2Aga 36:16; Ass 7:52 Waa'i adillanonne siixxitakkam irifo'i lobakat ihu bikkina liirammehe; lobakat liiranchinnem heellammehe. Mashka'oomim ki'nnuwwiinsi gaassakka'a hiraagaanom hawwisakko'ookko» yukko.

Sooqixxekii Caakki Kobi'llii

(Mar 9:50; Luq 14:34-35)

13 # Mar 9:50; Luq 14:34 Odim Yesuus «Manni hundinam ki'nnuwwi sooqixxisa. Ihukkaarem sooqixxek xee'n bi'uta'n hinkid issakka'a xee'oo'isa issakkamo? Biiranne fissakka'a uunjakkamaare manni hancaacamookko bagaan mahinam awwaadooyyo. 14#Yoh 8:12; 9:5 Ki'nnuwwim uullina caakkuwwa. Duu'n hanenne yoo beero'i maaxameena xanooyyo. 15#Mar 4:21; Luq 8:16; 11:33 Caakka caakkisaa sanfi woronne dissookkok ayyim bee'e. Ihukkaarem minenne yoo manni hundinam caakkisoo'isina qoffit beyyonne dissakkamo. 16#1Phex 2:12 Ee'isam manni ki'nnuwwika er baxo moo'aa iimanenne yoo ki'nnuwwina Anna galaxxoo'isina ki'nnuwwik caakki manni illagenne caakkona» yukko.

See'l Bikkina Yesuus Losisukkisa

17Odim Yesuus «Seeraa hiraagaa'n losishshaa gindeena waarummoka labissakkotte; an guulleena waarummo bagaan gindeena waarummoyyo. 18#Luq 16:17 Hanqinam an ki'nnuwwina kuroommo; iimanii uullii higeebe'i afeebe'e Seer hundim wo'mmookko bagaan Seeriinsi winxo'im te'im tako'im bi'ooyyo. 19Ee bikkina ka ijaacceka hundiinsi hoffe'ookkoka matichchom gindookkokii mulli keeninam losisookkokii Waa'i adillanonne hoffan ihookko. Ihukkaarem ijaajo hundam wonshookkokii mulli keeninam losisookkokii Waa'i adillanonne loban ihookko. 20Ki'nnuwwik er bax Seera losisaa'nnaanniinsii Farisaawe'uwwaanniinsii lophphubeelas Waa'i adillano hore'em aaggakkamoyyo» yukko.

Quuqimmi Bikkina

21 # Doy 20:13; Se'l 5:17 Odim Yesuus «Gaassi doollenne hee'u mannina ‹Shititte, shookkok ayyim oogatamookko› yukkisa macceessakko'ookko. 22Ihukkaarem an ki'nnuwwina kuroommo; ixxi abbaayyonne kora'am#5:22 Mat mat tiraxxi kitaabbuwwi «Kora'am» yoo sagara edukkoyyo. quuqoohaannonne ayyennem oogatamookko. Ixxi abbaayyo game'llookkok ayyim lommanni dummichchanne oogatamookko. Odim ixxi abbaayyo ‹Ka awwaad bee'i gawwa!› yaa game'llookkok ayyim gaanna'm giirinne oogatamookko. 23Ee bikkina at Waa'ina kitima hincaa'lloo ammane kiyyabbaayyo hawwodditti luwwi yoo'isa tiittilas 24Waa'ina kitim issitaa uwwiteena eebbittoka ee beyyonnem uttaa gaassitaa ee kiyyabbaayyinne iittame. Ee lasage waattaa Waa'ina kitima hincaa'e. 25Keese kasasu ki masokkichchinne maqire oogaxxi mine mattittuuyyi googonne hee'llittuuyyim ixxenne iittame. Ee'isamdu issitbeelas ki masokkichchi keese daannuwwina higisaa uwwookko; daannuwwim fooliisina higisaa uwwoohaare karaxxi minenne aaggootto. 26Hanqinam an kiina kuroommo; guzumo'ika lasaanchi saantiba guullitaa miqqeebe'e ee karaxxi miniinsi fittooyyo» yukko.

Saa'immi Bikkina

27 # Doy 20:14; Se'l 5:18 Odim Yesuus « ‹Saa'llitte› yamamukkisa macceessakko'ookko. 28Ihukkaarem an ki'nnuwwina kuroommo; mat meentichcho moo'aa mixookkok hundim ee ammane ixxi wodanonne isenne saa'aakko. 29#Mat 18:9; Mar 9:47 Ee bikkina kiikki makki illi baaxiilina mashka'i ihulas fissitaa uunje. Mashka'oomim ki orachchi hundim xoo'oobee'i giiranne darabamoohaanniinsi ki orachchika matooma hooggittaare e'llookko. 30#Mat 18:8; Mar 9:43 Kiikki makki angi baaxiilina mashka'i ihulas muttaa uunje. Mashka'oomim ki orachchi hundim xoo'oobee'i giiranne aagoohaanniinsi ki orachchika matooma hooggita'n kiina e'llookko» yukko.

Meento Hollimmi Bikkisa

(Mat 19:9; Mar 10:11-12; Luq 16:18)

31 # Se'l 24:1 Odim Yesuus « ‹Ixxi meentichcho hollookkok ayyim furma uwwona› yamamaakko. 32#Mat 19:9; Mar 10:11 Ihukkaarem an ki'nnuwwina kuroommo; saa'immi mashka'innette ihoo'n ixxi mi'n ama hollookkok ayyim ise saa'aanchotte issookko. Hollanto'i meentichcho eebookkokim saa'aancho» yukko.

Hide'immi Bikkisa

33 # Qes 19:12; Xiq 30:2; Se'l 23:21 Odim Yesuus «Gaassi doollenne hee'u mannina ‹ «Waa'ina uwwoommo» yitaa hide'llitti sagara wonshe bagaan woccitti sagara gindititte› yamamukkisa macceessakko'ookko. 34#Yaq 5:12; Isa 66:1; Mat 23:22 Ihukkaarem an ki'nnuwwina kuroommo; hore'em hide'llakkotte. Iimanennem hide'llakkotte; mashka'oomim iiman Waa'ina adilla'n barcuma. 35#Isa 66:1; Maz 48:2 Uullannem ihukkaare hide'llakkotte; mashka'oomim Waa'ik lokki hancaacoohane. Yerusaaleemannem ihukkaare hide'llakkotte; mashka'oomim Yerusaaleem lob adi'l beero'o. 36Ki gagannem hide'llitte; mashka'oomim ki horoo'l saraaxxeka matom qadaallisseena te'im heemachchisseena xantooyyo. 37Ee bikkina hanqi ihulas ‹hanqa› yi'llehe. Qophphan ihulas ‹qophphano› yi'llehe. Eehanniinsi lophphookkok joriinsette» yukko.

Baado Miqisimmi Hasisoobee'an Ihukkisa

(Luq 6:29-30)

38 # Doy 21:24; Qes 24:20; Se'l 19:19 Odim Yesuus «Illi bikkina ille; inqi bikkinam inqe» yamamukkisa macceessakko'ookko. 39Ihukkaarem an ki'nnuwwina kuroommo; ki'nnuwwina jora issoo manchina jora issitakkotte. Ihukkaarem makki kolli xabano aphphisoohaannina odim qeddi kolli xabanom uwwe. 40Mat manchi ki shamiisa masseena hasaa kasasulas ki kootam eddaa uwwe. 41Mat manchi « ‹Iinninne maqire hofqax googo mallona›#5:41 Giriik kitaab «Mat maayila» yookko. Oohim mat kiilomeetiraa kolloo yimma. yaa ijaajuta'n ixxi yukkaanniinsi lam suume eddaa mare. 42Mat manchi kiinniinsi mat luwwa uunxulas uwwe. Liqaayyo aa'eena hasoohaanninam hoottitte» yukko.

Maso'o Iittimmi Bikkina

(Luq 6:27-36)

43Odim Yesuus « ‹Ki beshichcho iitte; ki masokkichchom sabe› yamamukkisa macceessakko'ookko. 44Ihukkaarem an ki'nnuwwina kuroommo; ki'nnuwwi maso'o iittehe. Ki'nnuwwa hawwisoo keeninam Waa'a uunxehe. 45Ee'isa issitakko'aare iimanenne yoo ki'nnuwwi Annina oos ikkakko'isa moo'issakkamo. Mashka'oomim ixxi jora issoo keeninaa eroka issoo keeninaa ixxeka eelliincho fissookko. Ee'isam xummaaninaa baaxiilaaninaa xeena ga'nnisookko. 46Ki'nnuwwa iittoo keeno iittitakko'aare Waa'iinsi maha siiddakkamo? Ee'isa'i qaraxaanim issitamuullayyonnihe? 47Ki'nnuwwika abbaayyuwwi xale'e xummaatissakko'aare mulli keeniinsi mahinne e'llitakkamo? Ee'isa'i Waa'a laqqambee'i minaadabim issitamuullayyonnihe? 48#Qes 19:2 Ee bikkina iimanenne yoo ki'nnuwwik anni muccur ihukkisam ki'nnuwwim mucculluwwi ikkehe» yukko.

Currently Selected:

Maatiwoos Mishiraachcha 5: KeesKita

Highlight

Copy