Luqaas Mishiraachcha 24

Lehiinsi Yesuus Ki'ukkisa

(Mat 28:1-10; Mar 16:1-8; Yoh 20:1-10)

1Ihukkaarem saantiinsi luxxi ballanne soodaraar daram oo meenti gudisso'i shitto'o amadda'a Yesuusa waammakko'i beyyo matto'o. 2Ixxuwwim waammanne ifiisakko'i kin onkoroollaakkoo moo'llo'o. 3Ihukkaarem waammakko'i ba'l woro aagga'a moo'llo'i ammanenne Moollanni Yesuusika leesha siiddo'oyyo. 4Ee woshshanne ixxuwwina mal bi'aakkoohaannonne belecce'oo qadaalli eddechcha edde'llo'oo lam manchi waatta'a dangonnem illagenne uullito'o. 5Oo meenti baddita'a uullanne qubbita'a hee'llo'isam oo lamem manchim «Foorinne yookkoka lehu kee'n lambe'enne mahina hassakkamuulla? Ixxi ki'aakko, ka beyyonne bee'e. 6-7#Mat 16:21; 17:22-23; 20:18-19; Mar 8:31; 9:31; 10:33-34; Luq 9:22; 18:31-33 ‹Manchi Beet baaxiilaa'n anganne higaa uwwamaa saqalamimmi hasisookko. Saxxi ballannem lehiinsi ki'ookko› yaa Galiilanne hee'ukkuuyyi kuru woshsha sawwi'llehe» yito'o.

8Meentim ixxi wocu woshsha sawwito'o. 9Ixxuwwim waammi beyyiinsi daba'llita'a ee woshshi hundam tomminaa mat losaaninaa gatto'i keen hundinaa kutto'o. 10Ee woshsha asse'amaanina kuramu keen Magda'l Maaraamette, Yoona'atte, Yaaqoob ama Maaraamettee ixxuwwinne maqire hee'llo'i meentoo. 11Ihukkaarem ixxuwwina woshshoom haqaawwo labaa moo'amu bikkina ee meentika woshsha amma'nnito'oyyo. 12Ihukkaarem Pheexiroos ee beyyiinsi ki'aa waammi beyyo geerukkuuyyi marukko. Eehe'em afaa heeshaa moo'u ammanenne talbiinsi baxamu keefa'n eddechchi xale'e moo'ukko. Ixxim ee ihu woshshanne maalalukkuuyyi mine marukko.

Lam Ixxi Losaanina Yesuus Moo'amukkisa

(Mar 16:12-13)

13Ee ayyaamom Yesuus losaaniinsi lam losaan Yerusaaleemiinsi tommoo mat kiilomeetiraa massoo Eema'oosa yakkam gatte mattam hee'llo'o#24:13 Giriik kitaab «Lohayyi istaadiyooma» yookko. Oohim geerakkam beyyo yimma.. 14Ixxuwwina'i ixxuwwim ee ihaa hee'u luwwi hundi bikkinam woccam hee'llo'o. 15Ixxuwwim mat ikka'a lobakata sawwita'a atoorattonam Yesuus hincaa ixxuwwinne marukko. 16Ihukkaarem ixxotte ihukkisa qoossitambee'isa ixxuwwik illi amadamaa hee'ukko. 17Yesuusim ixxuwwina dabaraa «Ku ki'nnuwwina'i ki'nnuwwim atoorattakku'uuyyi mattakkam luwwi maruwwa?» yukko. Ixxuwwim kichche'lla'a cawwita'a uullito'o.

18Ee lasage ixxuwwiinsi mat Qalayoophpha yakkamok dabaraa «Ka saanti woronne ihu luwwa laqqibee'ek Yerusaaleemina koyyiinchi xale'i atettennihe?» yukko. 19Ixxim ixxuwwina dabaraa «Maruwwa?» yukkaare ixxuwwim dabatta'a «Hiraagaanchi Naazireexxi Yesuus bikkinatte. Ixxi manni hundi illagennee Waa'i illagennee baxinnee wocimminnee malaayyaam hee'ukko. 20Ee ixxo qeessa awwonsaanii ni gassaanii leh oogato'ina higissa'a uwwita'a saqalto'o. 21Ihukkaarem neese ‹Isra'eela wolabbanonne fissookko› yinaa neeyyato issinaa hee'nnummo. Odim eehannonnem exxaa oo luwwi hundim ihukkaanniinsi kaballi saxxi balla. 22Niinninne maqire yo'i meentiinsi mat mat keen neese maalalsiisso'o. Oo meentim daram ki'lla'a waammi beyyo matta'a 23ixxeka leesha siiddo'oyyo. Ixxuwwim ‹ «Ixxi lehiinsi ki'aakko» yitam asse'amaano kaaltanne moo'nnaammo› yitu'uuyyi waatto'o. 24Niinninne maqire hee'llo'i keeniinsi mat mat keen waammi beyyo matta'a meenti yukkisam ihaakkoo moo'llo'o. Ihukkaarem ixxooma moo'llo'oyyo» yito'o.

25Ee lasage Yesuusim ixxuwwina dabaraa «Hiraagaan kuru woshshi hundam qaqqisonne amma'nnitakkambee'i hinkido'i qawwuwwa, 26Kiristoos ka hawwi hundam aa'aa ixxi lombanne aagimmi hasisooyyonnihe?» yukko. 27Ee lasage Muse'aanniinsii hiraagaa'n kitaabbuwwiinsii asheeraa keesammi kitaabbuwwanne hundannem ixxi bikkina kuramu luwwi hundam tiraa kurukko.

28Ixxuwwim mattam hee'llo'i gatte affeena hincito'oohaannonne Yesuus qee'llo maroohaannisa ihukko. 29Ihukkaarem ixxuwwi «Kaba eelliinchi aageena ihaa uulli hiimu bikkina niinninne maqire gare» yita'a lobakata uunxito'o. Ee bikkina ixxuwwinne maqirem gareena aagukko. 30Ixxim ixxuwwinne maqire hurbaata iteena afuuraa qorosho'o ki'isaa Waa'a galaxxaa iiqaa ixxuwwina uwwukko. 31Ee lasage ixxuwwik illi fooqukkaare ixxotte ihukkisa qoossita'a laqqo'o. Ihukkaarem Yesuus ixxuwwi illiinsi willukko. 32Ixxuwwina'i ixxuwwim «Ixxi niina googonne wocukkuuyyii Keesammi Kitaabiinsi tiraa kurukkuuyyii ni wodan lobakata liiramam hee'ukkoyyonnihe?» yaqqanto'o. 33Ixxuwwi ee ammanchom ki'lla'a Yerusaaleema daba'llita'a matto'o. Tommii mat losaanii ee losaaninne maqire yo'i keenii mat ikka'a wixxita'a 34«Hanqinam Moollanni ki'aakko. Simi'ooninam moo'amaakko» yitonam affo'o. 35Ee lasage oo lamem mannim googonne ihu luwwaa qorosho'o iiqaa uwwukkuuyyi ixxuwwina la'amukkisaa kutto'o.

Ixxi Losaanina Yesuus Moo'amukkisa

(Mat 28:16-20; Mar 16:14-18; Yoh 20:19-23; Ass 1:6-8)

36Ixxuwwim eekka wocconam Yesuus ixxi gagim ixxuwwi lambe'enne uullaa «Xummi ki'nnuwwina ihona» yukko. 37Ixxuwwim wiidda moo'llo'oka labissa'a muggita'a jallito'o. 38Ihukkaarem Yesuus ixxuwwina «Ki'nnuwwi badditakkamokii ki'nnuwwi wodanonne malantakkamokii mahinatte? 39An anette ihummisa i angaa i lokkoo moo'llehe. Eesenne moo'llakkam maarii miqii wiiddanne bee'an ihu bikkina eese amaddakka'a moo'llehe» yukko. 40Yesuusim eehid yaa lasage ixxeka angaa lokkoo ixxuwwina moo'isukko#24:40 Mat mat kitaabbuwwanne xiqqi sor bee'e. . 41Ixxuwwim liiranchiinsii maalallatiinsii ki'ukkok amma'nnitoo'n hee'llonam «Ka beyyonne ki'nnuwwina ittakkam luwwi yoohonnihe?» yaa xa'mmukko. 42Ixxuwwim saramaakkoo qurxumme'ika hoffokam uwwito'o#24:42 Mat mat kitaabbuwwanne qurxumme'ikaa maraphphi damaa'mmekaa uwwito'o yamamaakko.. 43Ixxim eekka aa'aa ixxuwwi illagennem itukko.

44Ee lasage ixxim ixxuwwina «An ki'nnuwwinne maqire hee'ummuuyyi ‹Muse'i Seeranne, hiraagaa'nnaannonnee Mazmuu'l Kitaabbuwwannee i bikkina kitaabamu woshshi hundim wo'mmimmi hasisookko› yaa kurummi woshshi kane» yukko. 45Ee lasage odim Keesammi Kitaaba qoossitamisina ixxuwwika wodano fooqaa'ukko. 46Ixxim ixxuwwina «Kiristoos hawwo aa'oo'isinaa saxxi ballannem lehiinsi ki'oo'isinaa kitaabamaakko. 47Ee'isam ‹Ixxi summinnem baaxiilo biiraa yimmikii baaxiilo Waa'i haafoo'isii Yerusaaleemiinsi ki'isaa minaadab hundinam kuramookko› yamamaakko. 48Ka woshshinam ki'nnuwwi naqaashshuwwa. 49#Ass 1:4 Oono'o! Iyyanni ‹Asse'oommo› yukkoka an ki'nnuwwina asse'oommo. Ihukkaarem malaayyi iimaniinsi ki'nnuwwanne dilleebe'e ka beero'onne afuullehe» yukko.

Iimane Yesuus Marukkisa

(Mat 16:19-20; Ass 1:9-11)

50 # Ass 1:9-11 Ee lasage ixxi losaano Biitaan afeebe'e massaa ixxi anga iim ki'isaa maasse'ukko. 51Maasse'ukkuuyyim ixxuwwiinsi annanni ihaa iimane marukko. 52Ixxuwwim ixxena otossita'a lobakat liiranchinne Yerusaaleema daba'llito'o. 53Daba'llita'ahim hundi ammanem Waa'a galaxxitu'uuyyi Keesammi Miniinsi annanni ikkam hee'llo'oyyo.

Currently Selected:

Luqaas Mishiraachcha 24: KeesKita

Highlight

Copy