Yohaannis Mishiraachcha 14

Anni Waa'i Beyyo Massoo Goog Yesuusatte

1Odim Yesuus «Ki'nnuwwik wodan baa'oone. Waa'anne amma'nnehe; odim eesennem amma'nnehe. 2Iyyanni minenne lobakat beyyi yookko. An maraa ki'nnuwwina beyyo gudisoommo. Iyyanni minenne lobakat beyyi bee'an yakkota'n an ki'nnuwwina ‹Beyyo gudiseena maroommo› yam hee'ummonnihe? 3An maraa ki'nnuwwina beyyo gudisaa lasage daba'llaa waaraa iinninne maqire hee'llakkamisina ki'nnuwwam i beyyo massoommo. 4An maroommi beyyo massoo googom laqqakkamo» yukko.

5Toomaasim Yesuusina «Moollanna! At mattoo beyyi handa'e ihukkisa lanqoombee'i bikkina googo hinkid lanqeena xannoommo?» yukko. 6Yesuusim Toomaasina «An googo, hanqaa heechchaa. I kollinnette ihubeelas ayyim Iyyanni beyyo waareena xanooyyo. 7Eese laqqakko'oota'n Iyyannam laqqakkam hee'llakko'o. Kabadiinsi ki'issakka'a ixxo laqqakkamo. Ixxom moo'llakko'ookko» yukko.

8Filiphphoosim Yesuusina «Moollanna! Niina Waa'a moo'ise. Ixxo moo'issittaa'lleensi niina ihookko» yukko. 9Yesuusim Filiphphoosina dabaraa «An lobakat ammaniinsi ki'isaa ki'nnuwwinne hee'ummuuyyi eese laqqooyyonnihe? Eese moo'ukkok Waa'am moo'aakko. At eese hinkid ‹Waa'a moo'ise› yitoolla? 10Filiphphoosa, an Waa'inne yoommisa Waa'im iinninne yoo'isa amma'nnitooyyonnihe? Iinninne yoo Waa'i ixxeka baxo baxoolla bagaan an wocoommi luwwi i gagiinseyyo. 11An Waa'inne yoommisa Waa'im iinninne yoo'isa kuroommoka amma'nnehe. Eebeelas an baxoommi bax bikkina amma'nnehe. 12Hanqinam an ki'nnuwwina kuroommo; eesenne amma'nnookkok an baxoommi baxo baxookko. An Waa'i beyyo maroommi bikkina an baxoommi baxiinsim lophphoo baxo baxookko. 13Ayyi luchchom i summinne xa'mmitakkolas Waa'i i kollinne lomba siixxoo'isina an issoommo. 14Ayyi luchchom i summinne xa'mmitakkolas an issoommo» yukko.

Keesammi Ayyaana Asse'oo'isa Yesuus Kurukkisa

15Odim Yesuus «Eese iittitakkolas i ijaajo egettakkamo. 16An Waa'a uunxoommaare ki'nnuwwinne maqire doolli hundinam hee'oo'isina mulli Qoxxisaancho Waa'i asse'ookko. 17Oohim ka uulli manni moo'oobee'anee la'oobee'anee ihu bikkina aa'eena xanoobee'i hanqo'i Keesammi Ayyaana. Ihukkaarem oo Keesammi Ayyaan ki'nnuwwi woronne hee'oo bikkina laqqakkamo.

18An ki'nnuwwi beyyo daba'llaa waaroommo bagaan adaraa'llisa ki'nnuwwa uraa uroommoyyo. 19Hofqax ammaniinsi lasage ka uulli manni eese moo'ooyyo. Ihukkaarem ki'nnuwwi eese moo'llakkamo. Mashka'oomim an hee'oommane; ki'nnuwwim hee'llakkamo. 20An Iyyanninne yoommisa ki'nnuwwim iinninne yoontakke'isa anim ki'nnuwwinne yoommisa ee ammane laqqakkamo. 21Eese iittookkok i ijaajo aa'aa egeroohane. Eese iittookkoka Iyyannim iittookko. Anim ixxo iittaa i gaga ixxena la'isoommo» yukko.

22Yihud Yesuusina «Moollanna! At ki gaga ka uulli manninatte ihoo'n niina hinkid issitaate la'issoottok?» yukko. Ku Yihud Asqorotokkichchi Yihudatteyyo. 23Yesuus ixxena dabaraa «Ayyi manchim eese iittulas an yummi luwwa egerookko. Iyyannim ixxo iittookko. Iyyannii anii ixxi beyyom waallaa ixxenne maqire hee'nnoommo. 24Eese iittoobee'ek an yummi luwwam egerooyyo. An wocoommi woshshi eese asse'u Iyyanni woshsha bagaan iihaneyyo.

25An ka woshsha ki'nnuwwinne maqire hee'ummuuyyim kaba kuraammo. 26Ihukkaarem Iyyanni i summinne asse'oo Qoxxisaanchi Keesammi Ayyaan ki'nnuwwina luwwi hundam losisookko. An ki'nnuwwina kuroommi luwwi hundam tiissiisookko. 27An ki'nnuwwina xumma uwwoommo. Oo uwwoommi xummim i xumma. An uwwoommi xummi ka uulli manni uwwoo xummi'nnoo'aneyyo. Ki'nnuwwik wodan baa'aa baddoone. 28An ‹Uraa maraa daba'llaa ki'nnuwwi beyyo waaroommo› yummoka macceessakko'ookko. Eese iittitakkota'n an Waa'i beyyo maroommi bikkina liirantakkam hee'llakko'o. Mashka'oomim Waa'i iinniinsi lobane. 29Ku woshshi ihoo ammane amma'nnitakkamisina an gaassaatim ki'nnuwwina kuraammo. 30Ka uullik gassaanchi waaroolli ihu bikkina ka lasage an ki'nnuwwinne lobakata atooraroommoyyo. Ihukkaarem eese kaa'oo malaayyi ixxena bee'e. 31An Waa'a iittoommisa ka uulli manni la'oo'isina Waa'i eese ‹Isse› yaa ijaajukkisa issoommo» yaa «Ki'llehe; ka beyyiinsi mallona» yukko.

Currently Selected:

Yohaannis Mishiraachcha 14: KeesKita

Highlight

Copy