Yohaannis Mishiraachcha 13

Yesuus Ixxi Losaa'nneka Lokko Aanshukkisa

1Yesuus ka uulliinsi Anni beyyo maroo amman afukkisa la'u ammanenne Shaashshiqqi Ugudiinsi gaassaa ixxeka ka uullanne yo'i iittoo keeno lasaanchi afeebe'em iittookko. 2Yesuusii ixxi losaanii hii'm hurbaata ittam hee'llo'o. Sheexaanchim Simi'oon beet Asqorotokkichchi Yihud Yesuusa higisaa uwwoo'isina ixxonne sawwite aagisukko. 3Yesuus ee ammanenne Waa'i luwwi hundam ixxi anganne uwwukkisa, Waa'i beyyiinsi waarukkisaa Waa'i beyyom maroo'isaa la'u bikkina 4hanenne edde'u eddechcha dissaa fooxam lamadonne xaaxaa hurbaata uraa ki'ukko. 5Ee lasage angaa'llaanchonne wo'o issaa ixxi losaa'nneka lokko aanshaa lade'u fooxinne shiinshukkuuyyi gokkisimma asheerukko. 6Pheexiroosa yakkam Simi'oonikam aansheena waarukkaare «Moollanna! At i lokko aanshiteenannihe?» yukko. 7Yesuus ixxena dabaraa «An issoommi luwwa at kaba laqqooyyo. Ihukkaarem lasonne laqqootto» yukko. 8Pheexiroosim Yesuusina «At i lokko hore'em aanshitooyyo!» yukko. Yesuus ixxena «An ki lokko aanshumbeelas iinaa kiinaa mateeyyoom bee'e» yukko. 9Pheexiroosa yakkam Simi'oonim dabaraa «Moollanna! Eehaara'i iikka xale'i lokki ihoo'n angaa horooree eddaa aanshe» yukko. 10Yesuus dabaraa «Orachcho aanshaqqukkaannik lokkiinsi bagaan ixxek orachchi muccur ihu bikkina od aanshaqqimmi hasisooyyo. Ki'nnuwwiinsi matiinsi bagaan ki'nnuwwi hundim mucculluwwa» yukko. 11Yesuus ixxo higisaa uwwookkok ayyetda'e ihukkisa la'am hee'u bikkina «Matiinsi bagaan ki'nnuwwi hundim mucculluwwa» yukko.

12 # Luq 22:27 Yesuus ixxuwwika lokko aanshaa eddechcha edde'aa ixxi beyyonne daba'llaa afuuraa ixxuwwina «An kaba ki'nnuwwina issummi luwwa laqqakka'atennihe? 13An losisaanchoo Moollannaa ihummi bikkina ki'nnuwwi eese ‹Losisaanchoo Moollannaa› yitakkamok hanqame. 14Eehannata'i an losisaanchoo Moollannaa ihaa hee'ummuuyyi ki'nnuwwika lokko aanshummisam ki'nnuwwina'i ki'nnuwwim lokko aanshaqqamimmi hasisookko. 15An ki'nnuwwina issaa moo'isummisam ki'nnuwwim ee an issummisam issehe. 16#Mat 10:24; Luq 6:40; Yoh 15:20 Hanqinam an ki'nnuwwina kuroommo; awwaadaanchi ixxi moollanniinsi lophphooyyo. Asse'amaanchim ixxo asse'ukkaanniinsi lophphooyyo. 17Ki'nnuwwi eekka laqqakka'a issitakkolas maassaammuwwa. 18#Maz 41:9 An doo'llummi keeno la'oommi bikkina an wocoommok ki'nnuwwi hundi bikkinayyo. Keesammi Kitaabanne ‹Iinninne maqire hurbaata daayyamaa itukkok eesenne ki'ukko› yamamukkok wo'mmoo'isinatte. 19Oo woshshi ihoo'n gaassaa an ki'nnuwwina kuroommuullak woshshoom ihoo ammane ‹An anette› ihummisa amma'nnitakkamisinatte. 20#Mat 10:40; Mar 9:37; Luq 9:48; 10:16 Hanqinam an ki'nnuwwina kuroommo; an asse'ummoka ayyem aa'ookkok eesem aa'ookko. Eese aa'ookkok odim eese asse'ukkokam aa'ookko» yukko.

Higisaa Uwwoohaanni Bikkina Yesuus Gaassaa Wocukkisa

(Mat 26:20-25; Mar 14:17-21; Luq 22:21-23)

21Yesuus eekka wocaa lasage ixxi wodanonne lobakata kichche'aa ixxuwwina «Hanqinam an ki'nnuwwina kuroommo; ki'nnuwwiinsi mat eese higisaa uwwookko» yaa caakkisaa kurukko. 22Ixxi losaanim ixxuwwik mal bi'aa «Wocookkok ayyenatte» yimminne mat matika ille moo'aqqanto'o. 23Ixxi losaaniinsi Yesuus iittam hee'ukkok Yesuus gadanonne hee'ukko. 24Pheexiroosa yakkam Simi'oon ixxo qaqqisaa «Wocookkok ayyi bikkinda'e ihukkisa xa'mme» yukko. 25Ee bikkina oo Yesuus gadanonne afuuraa hee'ukkok «Moollanna! Ixxi ayyette?» yaa xa'mmukko. 26Yesuusim dabaraa «An qorosho'o iiqaa cefo'onne qasaa uwwoommi mancho» yaa qorosho'o iiqaa cefo'onne qasaa Asqorotokkichchi Simi'oon beet Yihudina uwwukko. 27Yihud ee qorosho'o aa'aa duuqukkisam Sheexaanchi ixxonne aagukko. Ee lasage Yesuus ixxena «Issitoo luwwa qaqqissaa isse» yukko. 28Eekka Yihudina mahina wocuda'e hurbaata itteena afuutta'a hee'llo'i keeniinsi matim la'ukkoyyo. 29Ihukkaarem mat mat keen diinaxxi karaxiita Yihud amadam hee'u bikkina ugudina mat luwwa maraa bito aa'oo'isina te'im buxina mat luwwa uwwoo'isina wocukkoka labissa'a hee'llo'o. 30Yihudim Yesuus iiqaa uwwu qorosho'o aa'aa lasage ee ammanem firukko. Oo ammanim hiim hee'ukko.

Haareechchi Ijaacci Bikkina

31Yihud firaa lasage Yesuus ixxuwwina «Manchi Beet kaba lomba siixxaakko; ixxi mashka'innem Waa'i lophphaakko. 32Waa'im Manchi Beet kollinne lomba siixxulas Manchi Beetom matemaaggem lonsookko. 33#Yoh 7:34 I ooso, an hofqax ammanina ki'nnuwwinne maqire hee'oommo. Eesem hassakkamo. Ihukkaarem an Ayihuxxi mannina ‹An maroommi beyyo ki'nnuwwi mattakkeena xantakkamoyyo› yummisam kaba ki'nnuwwina yoommo. 34#Yoh 15:12 An ki'nnuwwina haareechchi ijaajo uwwoommo. An ki'nnuwwa iittummisam ki'nnuwwina'i ki'nnuwwim iittammehe. 35Ki'nnuwwina'i ki'nnuwwi iittantakkolas i losaan ikkakko'isa manni hundim eehanninne la'ookko» yukko.

Pheexiroos Lagoo'isa Yesuus Gaassaatim Wocukkisa

(Mat 26:31-35; Mar 14:27-31; Luq 22:31-34)

36Pheexiroosa yakkam Simi'oon Yesuusina «Moollanna! Hanno matteenatte?» yaa xa'mmukko. Yesuus dabaraa «An maroommi beyyo kaba at awwonteena xantooyyo. Ihukkaarem lasonne awwontootto» yukko. 37Pheexiroosim dabaraa «Kaba an keese awwoneena xanoombee'ek mahinatte? An i foorem ki bikkina higisaa uwwoommo» yukko. 38Yesuusim ixxena dabaraa «Ki foore i bikkina higissaa uwwitoohonnihe? Hanqinam an kiina kuroommo; sas kore eese lageebe'e antabaa'i muunooyyo» yukko.

Currently Selected:

Yohaannis Mishiraachcha 13: KeesKita

Highlight

Copy