Genesis 12

Abrammi di ǂgaihes

1Ob ge ǃKhūba Abramma ge mîba: “Sa ǃhūb, sa ǀaokhoen tsî sa îb di omarisa ǁnāxū, îts tita nî ǁgau tsi ǃhūb ǁga ǃgû.#ǃNǃkh. 7:2-3; Heb. 11:8 2Tita ge satsa ǂgui suriga nî mā tsîn ge ǁîna kai ǁaese nî ī. Tita ge satsa nî ǀkhae tsîs ge sa ǀonsa khoen ǃnâ nî ǃgôaǃgôasa, tsîts ge khoena ǀkhaeb ase nî ība.

3 # Gal. 3:8 “Tita ge ǁnān satsa ra ǀkhaena ǀkhae,

tsî ǁnā-i satsa ra ǀâxare-e nî ǀâxare.

Tsî sats ǃnâ-u ta ge hoaraga ǃhaodi ǃhūbaib dide nî ǀkhae.”

4Hûdisikoroǀa kurixab a hîab ge Abramma Haransa xu ǃKhūb xab ge mîmāhe khami, Loti ǀkha ge doe. 5Abrammi ge ǁîb taras, Sarais, ǃgâsab ôab, Loti tsî hoaraga ǃkhūsib tsî ǃgān hîan ge Harans ǃnâ hōn ǀkha Kanaanǃhūb ǁga ge doetsoatsoa.

Tsî Kanaanǃhūb ǃnân ge sī, 6ob ge Abramma hoaraga ǃhūba ge ǃgûǃnâǃganu, Mores di aikehais, Sexems di ǃanu ǃkhais tawab ge sīs kōse. ǁNā ǁaeb ǃnân ge Kanaanǁîna noxopa ǁnā ǃhūb ǃnâ ge ǁan hâ i. 7Ob ge ǃKhūba Abramma ǂhai tsî ge mîba: “Nēb ge ǁnā ǃhūb sa suriba ta nî māba.” Tsîb ge Abramma ǁnāpa ǃKhūb hîa ge ǁîba ǂhaiba altar-e ge ǂnubiba. #ǃNǃkh. 7:5; Gal. 3:16 8ǁNāpa xub ge ǃnâuxa ǀkharib, Betels aiǂoasǀkhāb dib ǁga ǃkharu tsî Betelsa huriǂoasǀkhāb ai tsîs Aisa aiǂoasǀkhāb ai hâse sī ge ǁan. ǁNāpas tsînab ge altar-e ǂnubi tsî ǃKhūba gere ǀgoreǀî. 9Tsîb ge ǃaruǀî Kanaanni di ǃkhawagasǀkhāb ǁga ge doe.

Abrammi Egipteb ǃnâ

10ǁNāpab ge Kanaanni ǃnâ ǃâtsūǀkhāba hâ, ob ge Abramma kaise i ge ǁkhō, o ǃaruǀî Egipteb di ǃkhawagasǀkhāb ǁga, ǁnāpa sī nî ǁaero-e hâse ge doe. 11Egipteb ǃnâb nî ǂgâs aiǃâb ge Abramma ǁîb taras, Saraisa ge mîba: “Tita ge mâtikōses sasa a îsa tarekhoe ǃkhaisa a ǂan. 12Tsîn ge Egipteǁîna sasan ga mûo, sas ti tara ti mî tsî tita ǃgam tsî sasa nî ûi kai. 13Os ge ǁîna sam khoeǃgâgu ti nî mîba, în sas ǃaroma ǃgâise ûi-ū tsî tā ǃgam te.” #Gen. 20:2; 26:7 14Tsî Egipteb di ǃhūǀgorasa ǃgâu tsîb ra Abramma Egipteb ǃnâ ǂgâ hîan ge Egipteǁîna ǁîs a kaise îsa tarekhoe ǃkhaisa ge mû. 15Faraob di ǂamkhoegu ge ǁîsa mû tsî mâtikōses ǁîsa îsa ǃkhaisa gaoba sī ge mîba; tsî gu ge ǁîsa Faraob di gao-ommi ǃoa ge sī-ū, Faraob di taradi ǀgui kais nîse. 16Tsîb ge Abramma Sarais ǃaroma Faraob xa ǃgâise ûi-ūhe tsî ǀuiǀnūǀgoan, goman, dâukin, ǃgān tsî ǃnain tsîna ge māhe.

17Xaweb ge ǃKhūba Faraob tsî ǁîb di omarisa ǀgaisa tsûtsû-ain ǀkha Abrammi di taras, Sarais ǃaroma ge ǁkhara. 18Ob ge Faraoba Abramma ǂgai kai tsî ge dî: “Tare-ets kha go dī-ū te? Tare-i ǃaromats ge sa taras a ǃkhaisa mîba te tama hâ i? 19Tare-i ǃaromats ge khoeǃgâguro ti mî tsî ta ge tita ǁîsa tarase ūbasen? Nē hâ sa taras xuige ū ǁîsa, î ro ti aisa xu bē!” 20Tsîb ge Faraoba ǁîb khoega ge mîmā, tsî gu ge Abramma taras tsî ūb hâ xūn hoan ǀkha ge sî-oa.

Currently Selected:

Genesis 12: KKG20

Highlight

Copy