Malikɔ 10
10
Yɛsu osoeyecha kombanga yee kuchia ibaa
(Mat 19:1-12; Luk 16:18)
1Yɛsu na kɔɔtɔka koa, na kwingea mɔ mɔsɛngɛ we Yulɛa, mbanga ikinɛ yee looche Yɔlɔlani. Aolea awɛ koa, kabee bando babua na kukumbakana a iboa lyabɛchaya awɛ. Na kobangoa kobaeyecha kabee bwabaeyechaya awɛ masu masɛ.
2Bafalisayɔ bamɔchi na komoolelea Yɛsu kwa mɔɛlɛkɛ. Na komobocha: Ee mwamoome! Salia yiito yaanga kuimenya mwamoome kulikita mokachi waakɛ? 3Na Yɛsu itɛ: «Meke salia yabasiela Musa?» 4Ne abɔ itɛ: «Musa waimenya mwamoome kukunya mokanda we kulikita mokachi wake, kusia na usumulikita.» 5Yɛsu na kobasaolea: «Nde metema yiinu kokoba ne yasukua Musa kobakunyea elya Salia. 6Alakini a kobangoa aketa Kakua biemo biisɛ, ‹Waketa mwamoome ne mwamokachi.›#10:6 Yɔɔla Kob 1:27. 7Kɔ bɔbɔ, mwamoome otasie isakɛ na inakɛ ne koongwa amɔɔsa ne mokachi waakɛ. 8Baa babee basutuuluka koongwa lɔkɔba lɔmɔɔsa. Alya baekee kabee babee alakini batae lɔkɔba lɔmɔɔsa.#10:8 Yɔɔla Kob 2:24. 9Ko boa, bia bisuumbanya Kakua, kɔɔbɛchaya naa ne mondo ɔmɔɔsa otabisamboe.»
10Aɔtɔka Yɛsu ne baeyechwa bakɛ ne kwingea mo ndabo, baeyechwa kaakɛ na komobocha kabee kombanga ya lea ikomo. 11Awɛ na kobasaolea itɛ: «Kende mwamoome usulikita mokachi waakɛ ne kotomba ukinɛ, ochebe itɛ osoketa masɛnga. 12Ne mwamokachi na awɛ, kende uswiyocha mwibaa lyaakɛ kusia na ɔsɔsɔngwa ne mwamoome ukinɛ ochebe itɛ osoketa bwambya.»
Yɛsu ɔsɔtɛchɛa techea baana bakɛɛkɛ kaowe
(Mat 19:3-15; Luk 18:15-17)
13Lusu lɔmɔchi, bamɔ bando na komobesea Yɛsu baana itɛ obakɔbɔchɛ. Alakini baeyechwa kaakɛ na kobangoa kobakandokea. 14Amɔa Yɛsu bɔbɔ, na koemoka byabua. Awɛ na kosaolea baeyechwa bakɛ: «Mɔlɛkɛɛ baana bakɛɛkɛ babake koe mee! Mobakandeaya, kɔmɔa bando bwe abɔ ne bɛɛnɛ be boombe bwa Kakua. 15Kiinɛkinɛ, natomosaolea itɛ kende mondo ndakaɔsɔnɛ kuimenya makomo me boombe bwa Kakua bwe mwaana muchiinini, ndakaingea monda mwabɔ kiinɛkinɛ.» 16Kusia na otoenda baa baana mo mabɔkɔ maakɛ, na koba tɛchɛa kaowe.
Ngonji ɔsɔɛngɛa Yɛsu maani
(Mat 19:16-30; Luk 18:18-30)
17Abɛchaya Yɛsu osoola, mondo ɔmɔchi na koolea alya mo mbeo, na kɔkɔma malu makɔngɔ kombaa kwakɛ na komobocha: «Mweyechi mwaachi, nakete eke kokokonja mwɛchɔ we meombo?» 18Yɛsu na komosaolea: «Ko eke kutumbitana awɛ mwaachi? Kuusi oe mwaachi, kotosea Kakua mwɛɛnɛ! 19Mbaya otocheba bɔtɔɔcha Salia: ‹Nduchiaya, ndoketaya masɛnga, ndwibaya, ndakɔɔchɛa mondo manu, ndakoongaya bando, nyemyaya isao na inao.›#10:19 Yɔɔla Kot 20:12-16; Koe 5:16-20.» 20Olya mondo na komosaolea itɛ: «Mweyechi kobangoa ngee ketekoa chia salia chisɛ natuchiketa.»
21Yɛsu na kɔmɔlɔla ne miisɔ me lokwa, na komosaolea: «Okee mokoena keemo kɛmɔɔsa bokata! Yaaka kwaolekye biemo byao biisɛ, ne tombaambaa totaole abɔ baa abanyea bakɛna. Ndwasoketa bobo otabɛ uswilɔngɛa bɔɔngya kwiyoo. Kusia ne ngyee!»
22Alakini olya mondo aungwa awɛ elya myanda na kofeka lukiyɛ kɔmɔa wabɛchaya ne byɛndɔ byabua.
23Yɛsu na kɔlɔla baeyechwa bakɛ bamokombeaya, na kobasaolea: «Kiinɛ kiinɛ, bie ne kokoba ko ngonji kwingea mo boombe bwa Kakua!»
24Aungwa baeyechwa bɔbɔ na kokanakana byabua. Alakini Yɛsu na kobasaolea kabee: «Baana banɛ kwingea mo boombe bwa Kakua koe ne kokoba! 25Biitowaena kɔɔsɔnɛka ko Ngamia koolana mo saka yee motoboo, kotasi Ngonji kwingea mo boombe bwa Kakua.»
26Baeyechwa ba Yɛsu aungwa abɔ kabee bɔbɔ, na koseboa kokanakana byabua, ne kobangoa kobochana: «Chɔ naani wakaɔsɔnɛ kooloka?» 27Yɛsu kɔbalɔla na kobasaolea: «Ko bando bibyɔ bitɔɔsɔnɛka, alakini kwa Kakua biisi bɔbɔ. Kɔmɔa kwakɛ biisɛ byaanga kɔɔsɔnɛka!»
28Kɔ bɔbɔ Pɛtɛlɔ na komosaolea: «Mwaame, lɔla! Bae twausia kɔlɛkɛa biisɛ ko kokoyea.»
29Yɛsu na kobasaolea: «Kiinɛkinɛ kende mondo ususia ibota lyaakɛ ɔbɛɛ babotwa naakɛ, ɔbɛɛ metamba yaakɛ, ɔbɛɛ inakɛ, ɔbɛɛ isakɛ, ɔbɛɛ baana bakɛ, ɔbɛɛ masio makɛ kombanga yaanɛ ne kombanga yee Ilɔngɔ Lyaachi, 30olya, kende okee moono mɔsɛngɛ otakonje kɛɛchwa kekataala ngongobwa lokama. Otakonje: mabota, ne babotwa naakɛ, ne metamba, ne bainakɛ, ne baana, ne masio. Alakini naanga ne bɔbɔ, otakonje manɛnɛ. Ne mo masu me kombaa wakakonja mwɛchɔ we meombo. 31Bando babua bae be kombaa leno, bakaongwa be kɔmɔngɔ. Ne bae be kɔmɔngɔ leno bakabɛchaya be kombaa.»
Yɛsu ɔsɔɔcha lwasato kombanga yee kokwa ne kuubuka kwakɛ
(Mat 20:17-19; Luk 18:31-34)
32Abɛchaya Yɛsu ne baeyechwa bakɛ mo njea mo kokobea ko Yɛlusalɛma, Yɛsu wabɛchaya kombaa kwabɔ. Baa baeyechwa babɛchaya mu kwikakanya, ne bakinɛ bando babɛchaya nabɔ babɛɛ ne bɔɔba. Yɛsu na koenda kabee Ndomwa cha Yɛsu na koenda kabee Ndomwa chaakɛ ikumi ne babee, na kobangoa kobasaolea makomo matamoolelee. 33Na kobasaolea: «Mɔlɔlɛ ndeebae baba totae kokobea ko kalya ke Yɛlusalɛma! Ne mo kaa kalya ne motalambolwe mee Mwaana we Mondo mo mabɔkɔ me bakoo be Mapatili, ne baeyechi be Salia. Batabɛmbɛ makomo maanɛ itɛ banjie. Kusia batanamboe mɔ mabɔkɔ me bataasi kotena Kakua. 34Baa batangyɛtɛ ne kunduela sɔki, batangomoe fimbɔ, kusia ne banjie. Alakini lusu lwa sato ndaubuke.»
Yakɔbɔ na Yɔana batɔɛngɛa bokoo
(Mat 20:20-28)
35Kɔmɔngɔ kwe bɔbɔ, baana ba Sɛbɛlayɔ be babaome, Yakɔbɔ na Yɔana komoolelea Yɛsu ne komosaolea: «Toe ne ikomo lɛmɔsa lɛtɔkɔɛngɛa bae toketea.» 36Yɛsu na kobabocha: «Motokonda nabaketee eke?» 37Ne abɔ itɛ: «Bitokonda bae toketea na bibi, atabɛ awɛ mo boombe bwao imenya toongwe nao amɔɔsa, ɔmɔ saa ndome ukinɛ saa ngachi.» 38Yɛsu ne awɛ itɛ: «Yee bitɔɛngɛa banu, mutubicheba! motaɔsɔnɛ kɔsɔa kebacha kye manɛnɛ kɛtasɔɛ mee? Ne keeko ketainwe mee mbuu#10:38 Mutindo we kwina mbuu: Asɔɔcha Yɛsu kwina mbuu bitosaola manɛnɛ maakɛ ne kokwa kwakɛ. mo manɛnɛ baanu mɔtaɔsɔnɛ kwinwa?» 39Na abɔ itɛ: «Inde totaɔsɔnɛ.» Kɔ bɔbɔ Yɛsu na kobasaolea: «Bie bɔbɔ, kebacha kye manɛnɛ kɛtasɔɛ mee na baanu motakɛsɔɛ. Ne atainwe mee mbuu mo manɛnɛ, na baanu motainiwe amo. 40Alakini kobeka bando ko saa ndome ɔbɛɛ ko saa ngachi yaanɛ bitɔndɔla. Mama maboa, Kakua awɛ mwɛɛnɛ ne wausia komasangyea bando basɔbɔa awɛ kaɛ.»
41Aungwa Ndomwa baa bakinɛ ikumi, na koemoka Yakɔbɔ na Yɔana. 42Kɔ bɔbɔ Yɛsu na kobaitana basɛ ne kobasaolea: «Mbaya motocheba itɛ bando bataasi batotena Kakua, binombe byabɔ byaanga kobanyaa nɛ bɔkɛtɛ, nabɔ batobamɔnya manɛnɛ mo konyaa kwabɔ. 43Alakini baanu, mao makomo maongwaya mo koketeka mwingya mwiinu. Kɔmɔa olya otoenga bokoo asambea banu, biengye oongwe ngambi wiinu. 44Ne otoenga koongwa we kombaa asambea baanu, biengye ɔbɛɛ mocha we bando basɛ. 45Kɔmɔa mee Mwaana we Mondo na mee sabaaka itɛ bando baongwe mo kongambea. Alakini nabaaka ne itɛ naongwe mo kokambeana ne koocha mwɛchɔ waanɛ kɔmɔa bando babua baoloke.»
Yɛsu osoolola Balatimayɔ
(Mat 20:29-34; Luk 18:35-43)
46Kusia, Yɛsu ne baeyechwa bakɛ na koolea mo kalya ke Yɛlikɔ. Babɛchaya basoola monda, bando babua na kobayea. Mɔsɛɛsɛ mwe njea mwachikanaya mbufu ɛmɔ wabɛcha ne meemo yee kɔɛngeaya bando tombaambaa. Ona mbufu waitanewaya Balatimayɔ, mwaana wa Timayɔ we mwamoome. 47Aungwa awɛ itɛ Yɛsu we mosomba we Nasalɛti ne oe mokoeta, na kobagoa kokandoka ne chuuki lya yanaka mɔ kɔɔcha: «Ee! Yɛsu Mwaana wa Lauli, ngwea lokwa!» 48Bando babua na kobangoa komokandokea itɛ onyamee. Alakini awɛ na koseboa kokandoka ne chuuki lyanaka itɛ: «Ee! Yɛsu Mwaana wa Lauli, ngwea lokwa!»
49Yɛsu na koemaa na kɔɔcha: «Mumwitane.» Abɔ na kumwitana ne komosaolea: «Kemya motema, taoka! Usukuitana.»
50Elya mbufu akaɛ alya na kokosoa ikɔti lyaakɛ mɔsɛɛsɛ na kotaoka lobeo ne koya kwabɛchaya Yɛsu.
51Yɛsu na komobocha: «Otokonda nakoketee eke?» Ne awɛ itɛ: «Mweyechi, natokonda kɔmɔa kabee.»
52Kɔ bɔbɔ Yɛsu na komosaolea: «Yaaka, iekekeo lyao lesokoolola.» Akaɛ alya na kɔmɔa kabee. Ne kobangoa komoyea Yɛsu.
Currently Selected:
Malikɔ 10: ZMB
Highlight
Share
Copy
Want to have your highlights saved across all your devices? Sign up or sign in
©2022 Seed Company in coordination with Forum Communautaire des Traducteurs de la Bible et Alphabétisation
