MOTHI 26

Jisu yok Kilang Set-Set Alam

(Mrk. 14:1-2; Luk. 22:1-2; Jhn. 11:45-53)

1Konam Jisu lamehel ahuwit kipu tango, anang adun hel yok pulo, 2“Nali than un, ni-ni aphel ke Kijoktang-kamai doye, aro Arleng Aso yok kros along kitar ayok champiye.” 3Lapara ke bangthe hel aro kithe kiding abang hel Kaiphas bor-bangthepo ahem chingrumo, 4aro inansi Jisu yok kinep aro kamari ye yok chipangchimo. 5Manta anali pulo, “Kamai adak ke ili tiki nangne, piyok pu tene arleng hel adak ahul wange.”

Jisu yok Kanempru Jangthu Kihel

(Mrk. 14:3-9; Jhn. 12:1-8)

6Konam Jisu Bethani rongso long Simon po arje ibeng kiso ahem kido amun ihut arloso pe, 7ador-ong kanempru jangthu kiplengsop isi tema ensi, Jisu adungyok wangsi, anang kicho along iningsi kido amun, anang aphu long dungo. 8Konam adun hel labang theksi aneng kango aro anali pulo, “Piyokte labangpo panghon do? 9Labang kanempru jangthupo jor tene ador ako-ong hlonge, aro kangwe abangyok pi uno hoi.” 10Manta Jisu atot hlongsi anali yok pulo, “Piyokte nali arlosope yok aduk pido? Anang akime asalsi ne aphan tikilo. 11Piyok pu tene kicho kangwe abangke nalipen arnita doye, manta nali arniten nepen ke dode ye. 12Nebang athak kanempru jangthu kidungke anang neyok kipep aphan honjok ngo. 13Khanangsi ne nali thando, pirthepe ajaldung daklong labang kime-alamthe pahare, la-amun anang katikipo anangyok neng chipurki ye.”

Judas po Jisu yok Hutur Arideng Kichampi

(Mrk. 14:10-11; Luk. 22:3-6)

14La-amun bang kere-hini adun asitem, Judas Iskariyot amen ihutpo bor-bangthe hel adung yok damsi pulo, 15“Ne nali rideng anangyok champidet tene, neyok pot kipiyok aneng man?” Anali thom-kep rupa tanga atheng anangyok pilo. 16Aro la-amun para, anang Jisu yok hutur arideng kichampi yok asek lango.

Jisu Adunhel Pen Kijoktang Kamai Kicho

(Mrk. 14:12-21; Luk. 22:7-13)

17Kicheng arni Onga Ahim kicho ayok, adun hel Jisu adung wangsi pulo, “Daklong te nang kar-ih ateng Kijoktang-kamai chojun aphan nang honjok pinang?” 18Anang pulo, “Rongpe yok damsi ihutpoyok than, ‘Paklangpo pudo, ne porpo adung hetno; ne adun helpen ne nanghem longsi Kijoktang-kamai mainot bo.” 19Lasi adun hel Jisu kithan ateng si tikilo, aro anali Kijoktang-kamai cho-jun honjok damo. 20Anithu apor Jisu bang kere-hini adun hel pen kicho yok iningo; 21aro anali chojongne kido apor, anang pulo, “Khanang ne nali thando, nalidak para ihut hutur arideng nechampi ye.” 22Aro anali aneng doho daksi, abangten ta anangyok arjulo, “Hemphu, labang ke “Ne lo ma?” 23Jisu pulo, “Ne pen inghosi kicho-asenge along ari jokplupme, anangsi nechampi ye. 24Arleng Aso alam lo-kangthir long kiwi ateng choknge, manta jai arleng pensi Arleng Aso yok champiman, anang kaphere meme do! Labang arleng kiplangple detsi, anang phan akime kido. 25Anang yok kichampiye Judas po pulo, “Hemphu, labang ke nelo ma?” Jisu anangyok pulo, “Nang khanangsi pulo.”

Hemphu Abhok Kicho

(Mrk. 14:22-26; Luk. 22:14-23; 1 Ko. 11:23-26)

26Anali chojongne kido apor, Jisu him ensi, Arnam yok bor-eh hangsi, ingbengsi, adun hel yok pisi pulo, “Enot, chonot; labang ke nebangpo.” 27Aro anang lang-hanpo ensi Arnam yok kardom pisi, analiyok pisi pulo, “Bangpo, nali ahuwit ta junot; 28piyok pu tene bangpo lo, ne angtonpo awi, pap hel kiron aphan ako-ong arleng aphan lisi wando. 29Ne nali thando, ne Apa alongri long nali pen akimine junje lengke, ne rihanthu athe alang jun phakphe lo.” 30Konam anali pingkit alun kilun, anali Olip anglong kartulpe yok olesi damo.

Pitor po Hoi Kichocheye Alam Jisu Kithandak

(Mrk. 14:27-31; Luk. 22:31-34; Jhn. 13:36-38)

31Laparake Jisu analiyok pulo, “Labang anuwe nali netikang detne, labang ke wisi do, “Ne khokhre poyok aduk piye, aro bherabik ajhak kat sal le. 32Manta ne kibur phak aphel, naliyok ango ne Galili yok dame.” 33Pitor po anangyok pudakngo, ahuwit nang anat aduk hlong yongta, ne ke nangyok jatsi tikangke.” 34Jisu anangyok pulo, “Khanangsi ne nangyok thando, labang anuwepe, wopo kiku ango, neyok barthom nang hoi choche ye.” 35Pitor po anangyok pulo, “Ne nangpen thidun hlong yongta, ne nangyok chobelbe ye.” Aro adun hel ahuwit ta laben thotsi pulo.

Jisu Getsemani Barik long Kapingkit

(Mrk. 14:32-42; Luk. 22:39-46)

36Laparake Jisu Getsemani barik yok adun hel pen damo aro anang anali yok pulo, “Holek iningot, ne halong damsi pingkit bang.” 37Aro anang pen Pitor po aro Jebedi po aso bang hiniyok chipono, aro anang aneng doho lo aro angthin ihik-bihik dolo. 38Laparake anang anali yok pulo, “Ne thin doho ongdo, holek done neyok inghong ngot.” 39Aro ango dam chotsi anang lungle athak parhubaksi pingkitno, “Nang ne Apa, un tene, labang langhan ne para terek pon. La manta, nengthin badike kalek manta nangthin ateng pachok nang.” 40La-amun anang dunhel adung wangsi anali amek jangklipsi thekngo aro anang Pitor po yok pulo, “Nali ghonta isita ne-inghong un-eh yongo ma? 41Honjat yok ponpe yok, la-aphan pingkit chinghongne do; ajiu long ke ar-ih do, manta a-ok long un-eh.” 42Phongni Jisu dam phakngo aro pingkitno, “Nang ne Apa, ne labang junje lengke terek un-eh tene, nangthin atengne pachok nang.” 43Aro anang wang phaksi analiyok amek kijangklip wang thek phakngo. 44Lasi analiyok tikang phaksi anang phong-thom ayok damo aro labenthot alamsi pingkitno. 45Lapara ke anang adun hel adung wangsi analiyok pulo, “Minon hokta nali mek jangklipsi aro sangdo lang ma? Langot, aporpo adung hetno, aro Arleng Aso yok papihel arideng champi tango. 46Thurnot, ili dam minang. Langot, neyok kichampi arlengpo wang hleng choro.”

Jisu yok Kinep

(Mrk. 14:43-52; Luk. 22:47-53; Jhn. 18:1-11)

47Anang lam kangje jong amunsi bangkere hini asitem ihut, Judas po wango aro bangthe helpen kithe kiding abang anangpen rat ako-ong nokjirpen kalbong-kalthe pa-en repsi duno. 48Minon ke kichampi arlengpo analiyok atewa isi pisi pulo, “Ihut yok ne munge bangposi arlengpo; anang yok nepmot.” 49Aro Judas po Jisu adung damo aro pulo, “Hemphu, kardomo” pusi anang mungo. 50Jisu anangyok pulo, “O khoi, nang holek pot aphan te wangdo.” Laparake anali adung wang chotno aro Jisu yok ari ot thipsi nepmo. 51Aro langot, Jisu pen kido arleng hel para ihut anang nokjir olesi bangthepo aturu yok ano isi chor weno. 52La-amun Jisu anangyok pulo, “Nang nokjir anang ahomlong thal phakngot. Piyok pu tene inghosi nokjir en-ne, anangke nokjir pensi ore. 53Ne Apa yok ne chi-ojor tene aro hajar kere hini yok ong chot sonturi atharlon wang tol pen un-eh ye pusi nali chirondo ma?. 54Ladi tene labidi tiki pu tene lo-kangthir long alampo pot badi chok plenge?” 55La-apor Jisu rat ayok pulo, “Nali kanghu yok akhep kido badi nokjir pen kalbong-kalthe pensi nekinep yok olesi wangdo ma? Arni-arni ne Arnam ahem long kangning amun paklango manta nali nenepne yongo. 56Manta turkihel lo-kangthir long kiwi alamthe kichokpen yoksi ladi chiplango.” Laparake adun hel anangyok tikang detsi kat det no.

Jisu Bor-Bangthe Amel Ango Karjap

(Mrk. 14:53-65; Luk. 22:66-71; Jhn. 18:12-14,19-24)

57La-aphel Jisu yok kinep pon abang, kanong-paklang helpen kithe kiding hel bor-bangthe ka-oneyok ahem inan kachingrum yok pono. 58Manta Pitor po bor-bangthepo ahem sotal hlenghle lengke, chipaholo chipaholosi, anang phel-phel duno, aro anang sonturihel pen ining si ki-oryok lang duno. 59Bangthehel aro ason amel abang Jisu yok akhep kido anat anali kamaripen yok asisik ahakhi pawan japmo, 60manta ako-ong arleng asisik hakhi wanjap mo, yongta anali paklang un-eh yongo. Aphel ke bang-hini angoyok wango, 61aro pulo, “Labang arlengpo kipu, “Ne Arnam ahempo pangho det une, aro ni-thom arni ne kem une.” 62Bor-bangthepo arjapsi Jisu yok pulo, “Lamehel arleng hel asisik hakhi nang pijap do, te nang ke ithe ta thanthelo ma?” 63Manta Jisu dositsi dolo. Laparake bor-bangthe po anangyok pu phak ngo, “Kihreng Arnam amen pen ne nang arju do, nangsi Arnam Aso, Khristo tene hali thanot.” 64Jisu anangyok pulo,“Nang bithangsi pulo. Manta ne nang thando, minon parake Arleng Aso yok ancho-ari aga apharan pen ininge aro inghun athak ethakpe para kiwang theknge.” 65La-amun bor-bangthepo anang pe ingsek chersi pulo, “Anang Arnam yok patharak do! Piyok ili minon hakhi kanange do? Nali minonsi anang Arnam ayok kapatharak arju hlongo. 66Nang bisarpo pot pachipdo? Anali pulo, “Anang kithi pen nange adodo.” 67Laparake anang amahang long anali ingthi ingthokngo aro angkhan ke anangyok ardep mo, 68aro pulo, “Ei nang Khristo, haliyok turkine thannot! Inghote nangthengo.”

Pitor po Hoi Kichoche Alam

(Mrk. 14:66-72; Luk. 22:54-62; Jhn. 18:15-18,25-27)

69Labang apor Pitor po mokol aga sotal along iningsi kido. Ihut turupe anang dungyok wangsi pulo, “Nang ta Galili arleng Jisu pen kido.” 70Manta Pitor po ahuwit ango chobelsi, pulo, “Nang pot pudo, ne abhu hlonghle yong.” 71La-aphel anang hem honthukam yok damo apot, prek ihutpe anangyok thekngo, aro anang lalong karjap helyok pulo, “Labang arlengpo Najaret Jisu pen kido.” 72Anang chobel phaksi hopot cholo, “Ne labang arleng poyok chinine si.” 73Bekso aphel konam arjapsi kido abang wango aro Pitor poyok pulo, “Khanangsi nangta anali sitem ihutpo, piyok pu tene nang kachobel alam asi nang chinido.” 74Lalong anang hao pisi aro hopot chosi pulo, “Ne bang arlengpo yok chinine pen. Aro lajongsi wopo kulo.” 75La-amun si “wopo kiku angosi, nang neyok barthom chobele,” pusi Jisu kithan, alam Pitor po aneng chipurkilo: Aro anang mokol yok damsi, aneng aduk-ongsi suru ghuk-ghuk ngo.

Currently Selected:

MOTHI 26: AMRI-BSI

Highlight

Copy